2 SAN JUAN 1

1Yu̶, cabu̶cu̶ camasĩ majũ, mu̶jãã, Dios ya poa macããna cũ̶ cabesericarãrẽ mu̶jãã yu̶ woajoya ati carta mena. Bairi aperã Dios ya poa macããna caãniparã cũ̶ãrẽ yu̶ woajoya nipetiro, caãnorẽ bairo yu̶ camairã majũrẽ. Yu̶ jeto mee baipu̶a mu̶jããrẽ yu̶ maiña. Nipetiro aperã Dios yaye macããjẽ cariape quetire catũ̶gori majã cũ̶ã mu̶jããrẽ maiñama. 2Mu̶jããrẽ ñiñamaiña Jesucristo yeri pũnarẽ caãnorẽ bairo marĩ yeripu̶ jĩcãrõã marĩ cacũ̶goro jũ̶gori. Ti yeri pũna pu̶ame marĩ mena nicõã ninucũgaro tocãnacã rũ̶mu̶a. 3Dios, marĩ Pacu̶ majũ, bairi Jesucristo cũ̶ macũ̶ mena caroa macããjẽ, caroare cũ̶ jonemoáto mu̶jããrẽ. Bairi tunu cariape yerijõrõ ãmeo ĩñamairĩqũẽ cũ̶ãrẽ mu̶jãã cũ̶ jonemoáto. 4Apeyera bu̶tioro yu̶ u̶seaniña aperã jĩcããrã mu̶jãã mena macããna caroaro cariape marĩ Pacu̶ Dios cũ̶ caãnirotirore bairo na caátiãnierẽ ĩñarĩ. 5Bairi ãmerẽ, yu̶ yarã, yu̶ bairãrẽ bairo caãna, yu̶ camairã, marĩ nipetiro tocãnacãũ̶pu̶a marĩ caãmeomairõ yu̶ boya. Atie mu̶jããrẽ yu̶ caquetibu̶ju̶woatujorije ape wãme, cawãma wãme quetibu̶ju̶rique mee niña. Tirũ̶mu̶pu̶a caãnijũ̶goripau̶pu̶a marĩ camasĩjũ̶gorique niña. 6Ãmeo mairĩqũẽ pu̶ame atore bairo ãnajẽ cu̶taje niña: Dios marĩ caátiãnipeere cũ̶ caroticũrĩqũẽ caĩrõrẽ bairo marĩ caãno ñuña. Tie Dios cũ̶ caroticũrĩqũẽrẽ merẽ mu̶jãã tũ̶goyupa caãnijũ̶goripau̶pu̶a. Tie pu̶ame marĩ caãmeomaimasĩrĩjẽ mena marĩ caãnipeere átirotiyupa. 7Ati u̶mu̶recóopu̶re capããrã ãniñesẽãñama camasãrẽ caĩtoñesẽãrĩ majã. Na pu̶ame Jesucristo ati yepapu̶ marĩrẽ bairo ati rupau̶ cacũ̶gou̶ majũ cũ̶ caatájere camasãrẽ na quetibu̶ju̶etinucũñama. Bairi ni ũcũ̶ tore bairo caĩquetibu̶ju̶ecu̶ pu̶ame caĩtopai, Jesucristo wapacu̶ ũcũ̶ majũ niñami. 8Bairi tũ̶goña masĩña, caroaro mu̶jãã caátiãnie wapa caãnipee to yasieticõãto ĩrã. Tie mu̶jãã caátiãnie wapa nipetirore jĩcãrõ tũ̶ni Dios cũ̶ cajopeere mu̶jãã cacũ̶gopetiro roque ñuña. 9Bairi ni jĩcãũ̶ ũcũ̶, “Jesucristo cũ̶ caquetibu̶ju̶rique netõjãñurõ caãnimajũrĩjẽrẽ yu̶ masĩña,” caĩ pu̶ame Dios mena jĩcãrõrẽ bairo caãcũ̶ mee ñiñami. Apei, Jesucristo cũ̶ caquetibu̶ju̶riquere bairo cariapea caquetibu̶ju̶ pu̶ame roque Dios mena, bairi cũ̶ macũ̶ mena cũ̶ãrẽ tũ̶goñatutuari caroaro ãnicõã masĩñami. 10Bairi, “Jesucristo cũ̶ caquetibu̶ju̶rique netõjãñurõ caãnimajũrĩjẽrẽ yu̶ masĩña,” caĩbotiou̶ ũcũ̶ mu̶jããrẽ cũ̶ caĩñau̶ etaáta, caroaro mena cũ̶ bocá, cũ̶ jẽnirĩ, mu̶jãã ya wiipu̶ cũ̶ qũẽnoeticõãña. 11Cũ̶ ũcũ̶rẽ bocári, cajẽnii pu̶ame, cũ̶ mena macããcũ̶ rorije cũ̶ caátiere cũ̶rẽã bairo caátiãcũ̶ tuabujiou̶mi. 12Bairopu̶a, capee majũ nimiña mu̶jããrẽ yu̶ caquetibu̶ju̶garije. Cabaimiatacũ̶ãrẽ, ati carta mena mu̶jããrẽ yu̶ quetibu̶ju̶ woatujogaetiya. Bairi mu̶jããrẽ yu̶ majũpu̶a ĩñau̶ etari, mu̶jããrẽ yu̶ quetibu̶ju̶gaya Dios yaye quetire. Bairo yu̶ cabaiata, nipetiro caroaro ñe ũnie ru̶saeto u̶seanirõ marĩ ãnibujiorã. 13Ato macããna Dios ya poa macããna, mu̶jããrẽ bairo caãna mu̶jãã yarã, Dios cũ̶ cabesericarã mu̶jãã ñurotijoyama. Tocãrõã niña atie queti yu̶ cawoajorije.

will be added

X\