2 CORINTIOS 9

1Marĩ yarã, marĩrẽ bairo Dios mena catũ̶goñatutuarãrẽ ju̶átaje macããjẽ pu̶amerã, capee mu̶jãã yu̶ caquetibu̶ju̶woatujopee mee niña bairopu̶a. 2Merẽ caroaro mu̶jãã, Acaya yepa macããna, mu̶jãã majũã aperãrẽ jĩcãrõ tũ̶ni mu̶jãã caju̶átimasĩrĩjẽrẽ yu̶ masĩjãñuña. Bairi torea bairo cariape caroaro mu̶jãã caju̶átiere na yu̶ quetibu̶ju̶nucũña ato Macedonia yepa macããna cũ̶ãrẽ. Ji cũ̶mapu̶a mu̶jãã pu̶ame cotericaro mano aperãrẽ mu̶jãã ju̶átigawu̶. Bairo mu̶jãã caátimasĩrĩjẽrẽ tũ̶gori, nipetiro jãñurĩpu̶a ato Macedonia yepa macããna cũ̶ã mu̶jãã caátorea bairo aperãrẽ ju̶átinemogayama. 3Tore bairo mu̶jããrẽ ĩ quetibu̶ju̶micũ̶ã, marĩ yarãrẽ mu̶jãã tu̶pu̶ yu̶ joya, mu̶jãã cabairijere cariape yu̶ caĩmiatacũ̶ãrẽ ricaati to cabaietiparore bairo ĩ yua. Yu̶ caĩrõrẽã bairo cariape aperãrẽ na mu̶jãã ju̶átiganucũña mu̶jãã caátimasĩrõ cãrõ. Tiere ato macããna na masĩáto ĩ, na yu̶ joya marĩ yarãrẽ. Bairo ĩgu̶ ñiña: Caroaro jicoquei mu̶jãã cajopeere mu̶jãã qũẽnoyuwa, ĩgu̶ ñiña. 4Ape watoara ato Macedonia yepa macããna mena ácú̶, mu̶jãã cajopeere qũẽnoyuena mu̶jãã cacotero mu̶jãã yu̶ eta tãmu̶ogaetiya. Tore bairo mu̶jãã cabaieticõãta, bobooro jãã pu̶ame jãã tãmu̶obujiorã, “Caroaro ju̶átimasĩñama Corinto macããna,” mu̶jãã mena jãã caĩtũ̶goñatutuamiatacũ̶ãrẽ, tore bairo jĩcãrõ tũ̶ni mu̶jãã caápericõãta yua. Tunu bairoa mu̶jãã cũ̶ã bobooro mu̶jãã netõbujiorã, tore jĩcãrõ tũ̶ni mu̶jãã cajopeere neñorĩ mu̶jãã cacoteeticõãta, ato Macedonia yepa macããna na caĩñarõ yua. 5Tore bairo cabaipeere tũ̶goñamasĩrĩ, “Marĩ yarã aperãrẽ na tu̶pu̶ cajopee ãno,” ĩrĩ caãnijũ̶goro mu̶jãã tu̶pu̶ caĩñañesẽãparãrẽ na yu̶ jojũ̶goyetiya. Tunu bairoa na pu̶ame topu̶ etarã, mu̶jãã caneñopee caru̶saata, mu̶jãã ju̶neñorotibojagarãma, mu̶jãã caátigajũ̶goricarorea bairo yua. Tore bairo mu̶jãã majũã mu̶jãã caneñomasĩrĩjẽ jũ̶gori yua, caroaro cabopacarãrẽ na mu̶jãã caju̶átimasĩrĩjẽrẽ mu̶jãã áti ĩñogarã. Tore bairo mu̶jãã majũã mu̶jãã cajogarijere mu̶jãã cajogaeticõãta, aperã bu̶tioro na caĩpajũ̶goro jũ̶goripu̶ cajori majãrẽ bairo mu̶jãã tuabujiorã. 6Cariape tũ̶goñañijate atie ĩrĩqũẽrẽ: “Petoaca otere caotei petoaca ríca jeyami; apei pairo otere caotei pairo ríca jeyami.” 7Bairi mu̶jãã yeripu̶ mu̶jãã cajopeere tũ̶goñapetiri bero, mu̶jãã cajomasĩrõ cãrõ jĩcãrõ tũ̶ni joya. Jogaetimirãcũ̶ã, mu̶jãã yeripu̶ roro tũ̶goñarĩ mu̶jãã cajoata, ñuẽtĩña. Dios pu̶ame caroaro yeri ñurĩqũẽ mena marĩ cajogarijere marĩ cajoro caroaro ĩñau̶seaninucũñami. 8Cũ̶ pu̶ame tocãnacã wãmepu̶a caroare pairo majũ mu̶jãã jomasĩñami. Bairo cũ̶ cajoata, mu̶jãã pu̶ame ñe ũnie ru̶saricaro mano caroaro mu̶jãã ãnimasĩgarã. Tunu bairoa tie mu̶jããrẽ cũ̶ cajorije caru̶sarije ũnie mena tocãnacã wãme caroaro átajere mu̶jãã átimasĩgarã camasã cabopacarã mena. 9Atore bairo Dios ya tutipu̶ cũ̶ãrẽ ĩ woatuyupa: “Ni ũcũ̶, cañuu̶ ãnirĩ cabopacarãrẽ caroaro mena na joyami narẽ caru̶sarijere. Bairo caroaro na cũ̶ caátiãnie di rũ̶mu̶ ũno petietigaro. Tocãnacã rũ̶mu̶a nicõã ninucũgaro,” ĩ quetibu̶ju̶ya Dios ya tutipu̶re. 10Dios pu̶ame, ote, marĩ caote u̶gapeere cũñupĩ. Tunu bairoa u̶garique cũ̶ãrẽ nipetirijere marĩ jonucũñami. Cũ̶ pu̶ame roque mu̶jãã jogu̶mi nipetirije mu̶jãã caotepeere. Tunu bairoa cũ̶ã, tie mu̶jãã caoterije to putio joroque átigu̶mi. Bairo Dios cũ̶ caáto yua, mu̶jãã pu̶ame pairo mu̶jãã cũ̶gogarã. Tie mena caroaro jĩcãrõ tũ̶ni cabopacarãrẽ na mu̶jãã ju̶átinemo masĩgarã. 11Bairo Dios mu̶jãã cũ̶ caáto jũ̶gori, tocãnacã wãme ñe ũnie ru̶saricaro mano mu̶jãã cũ̶gogarã Dios cũ̶ cajorijere. Tie mena aperã cabopacarãrẽ caroaro jĩcãrõ tũ̶ni na mu̶jãã ju̶átimasĩgarã yua. Tunu bairoa mu̶jãã majũ neñorĩ cabopacarãrẽ mu̶jãã cajorijere jãã cajeáto ĩñarã, na, marĩ yarã pu̶ame Diore bu̶tioro cũ̶ basapeogarãma. “Jãã mena mu̶ ñumajũcõãña,” qũĩgarãma Diore. 12Mai, tie marĩ yarãrẽ mu̶jãã caneñojorije jãã cajeátie pu̶ame, narẽ caru̶sarijere jãã cajeátie jeto mee niña. Caroaro na mu̶jãã caátie jũ̶gori Dios cũ̶ãrẽ, “Jãã mena mu̶ ñumajũcõãña,” na ĩbasapeo joroque ána mu̶jãã átiya. 13Bairo mu̶jãã caáto, na pu̶ame bu̶tioro cũ̶ basapeogarãma. Tore bairo na, cabopacarãrẽ na mu̶jãã caju̶átiere ĩñarĩ, masĩgarãma caria caroa queti Cristo yayere mu̶jãã catũ̶gou̶sarijere yua. Bairi na cũ̶ã Diore qũĩroagarãma, nocãrõ caroaro narẽ na mu̶jãã caju̶átie jũ̶gori. Tunu bairoa nipetiro aperã cabopacarã cũ̶ãrẽ na mu̶jãã caju̶átiere ĩñarĩ, bu̶tioro Diore qũĩroagarãma. 14Tunu apeyera na pu̶ame caroaro tũ̶goñamairĩqũẽ mena bu̶tioro Diopu̶re mu̶jãã jẽniboja nucũgarãma. Dios nocãrõ cañuu̶ ãnirĩ narẽ mu̶jãã jũ̶gori caroaro na cũ̶ caátiere ĩñarĩ, na pu̶ame bu̶tioro Diore cũ̶ basapeo nucũgarãma. 15Dios marĩ mena ñumajũcõãñami. Nocãrõ cañuu̶ ãnirĩ cũ̶ macũ̶rẽ marĩ joyupi. ¡Tiere tũ̶goñarĩ ati risero mena dope bairo pu̶ame pairo netõjãñurõ ĩ basapeo masĩã maa!

will be added

X\