2 CORINTIOS 7

1Bairi yu̶ yarã, yu̶ camairã, atie mu̶jããrẽ yu̶ caquetibu̶ju̶rije pu̶ame tirũ̶mu̶pu̶a Dios caroaro marĩ cũ̶ caátiga jũ̶goyeticũrĩqũẽ majũ niña. Tore bairo cabairo jũ̶gori marĩ pu̶ame, roro marĩ baio joroque caátiere caátiecoeticõã ninucũparã marĩ ãniña. Marĩ yerire caroaro u̶gueri manorẽ bairo cacũ̶goparã marĩ ãniña. Marĩ rupau̶ cũ̶ãrẽ torea bairo cacũ̶goparã marĩ ãniña. Diore cũ̶ tũ̶gou̶sari, ñe ũnie wapa mána caroarã majũ cũ̶ caĩñajoro caãniparã marĩ ãniña. 2Jãã mena asiaeticõãña. ¡Mu̶jãã yeripu̶ jããrẽ bootũ̶goñaña! Jãã pu̶ame noa ũna mena roro na jãã ãmerĩnucũwũ̶. Tunu bairoa noa ũnarẽ roro jãã áperinucũwũ̶. Tunu bairoa ni jĩcãũ̶ ũcũ̶ mu̶jãã mena macããcũ̶rẽ jãã ĩtoñesẽãẽpũ̶. 3Atiere yu̶ caĩbu̶su̶ata, mu̶jããrẽ roro bu̶su̶paicotei mee ñiña. Merẽ bairina mu̶jããrẽ cajũ̶goyepu̶ ñi quetibu̶ju̶wu̶: Mu̶jãã, yu̶ mena jĩcã yericu̶narẽ bairo caãna mu̶jãã ãniña. Catiãna, jĩcã poa marĩ ãniña. Marĩ cariaro beropu̶ cũ̶ãrẽ, jĩcã poa marĩ ãnigarã. 4Bairi caroaro cariape mena mu̶jãã yu̶ quetibu̶ju̶ya, mu̶jããrẽ caroaro camasĩ ãnirĩ. Tunu bairoa caroaro mu̶jãã caátiãnierẽ masĩrĩ bu̶tioro majũ yu̶ tũ̶goña u̶seaniña mu̶jãã mena yua. Popiye yu̶ cabairije watoa to ãnimiatacũ̶ãrẽ, yu̶ yeri ñuña. Bairo caroaro yeri ñurĩ yua, mu̶jãã mena pairo yu̶ tũ̶goña u̶seaniña. 5Ato Macedonia yepapu̶ jãã caetaricaro beropu̶ina mai, di rũ̶mu̶ jãã yeri jãẽtĩmajũcõãña. Popiye jãã cabainucũrĩjẽ tocãnacãũ̶pu̶a nicõã cotenucũña jããrẽ. Tie jũ̶gori roro tãmu̶onucũrĩ yua, bu̶tioro jãã yeri uwitũ̶goñarĩqũẽ mena jãã ãninucũwũ̶. 6Tore bairo jãã cabaimiatacũ̶ãrẽ, aperã cayapapuarãrẽ na tũ̶goñatutuawẽpũ̶õ joroque caácu̶, Dios pu̶ame jãã tũ̶goñawẽpũ̶õ joroque jãã ámi marĩ yau̶ Tito cũ̶ caetarije jũ̶gori yua. 7Bairãpu̶a cũ̶ caetarije jũ̶gori jeto meerẽ ĩñarĩ, jãã yeri tũ̶goñawẽpũ̶wũ̶. Cũ̶ cũ̶ã caroaro mu̶jãã caátiãnierẽ ĩñarĩ, nocãrõ mu̶jãã mena cũ̶ catũ̶goñau̶seanirĩjẽrẽ ĩñarĩ, jãã cũ̶ã jãã yeri tũ̶goña u̶seaniwũ̶. Bairi cũ̶ pu̶ame jããrẽ bu̶tioro mu̶jãã caĩñagarije queti cũ̶ãrẽ jãã quetibu̶ju̶wĩ Tito. Tunu bairoa roro popiye mu̶jãã jũ̶gori yu̶ cabairijere tũ̶gori, bu̶tioro mu̶jãã catũ̶goña yapapuarije cũ̶ãrẽ jãã quetibu̶ju̶wĩ. Tie nipetirije quetire tũ̶gori roque yua, nemojãñurõ yu̶ tũ̶goña u̶seaninucũña. 8Cajũ̶goyepu̶ mu̶jãã yu̶ cawoajorica carta jũ̶gori mu̶jãã yapapuao joroque mu̶jãã yu̶ ápu̶ mai. Bairo mu̶jãã baio joroque átimicũ̶ã, yu̶ pu̶ame ãmerẽ yu̶ yapapuaetinucũña. Baipu̶a, cajũ̶goyepu̶ ti cartare yu̶ cawoaturi rũ̶mu̶rẽ bu̶tioro yu̶ tũ̶goña yapapuawu̶. Bairopu̶a, yoaroaca mee mu̶jãã yapapuao joroque ásupa yu̶ carta pu̶ame yua. 9Bairi ãmerẽ yu̶ tũ̶goña u̶seanijãñuña. Ti carta mu̶jããrẽ yapapuao joroque caátaje meerẽ yu̶ u̶seaniña baipu̶a. Yu̶ cawoajoriquere tũ̶gori yua, mu̶jãã carorijere yapapua tũ̶goñarĩ, Dios pu̶amerẽ cũ̶ mu̶jãã catũ̶gou̶sariquere masĩrĩ, bu̶tioro yu̶ u̶seaniña. Bairo cũ̶rẽ cũ̶ tũ̶gou̶sari yua, popiye bai yapapuamirãcũ̶ã, cũ̶ caborore bairo jeto mu̶jãã átiãninucũña. Bairo mu̶jãã caátiãnierẽ ĩñarĩ, “Narẽ roro marĩ ápeyupa,” jãã ĩ tũ̶goña u̶seaninucũña yua. 10Jĩcãũ̶ caũ̶mu̶rẽ roro popiye cũ̶ tãmu̶o joroque átimasĩñami Dios, roro cũ̶ caátinucũrĩjẽrẽ cũ̶ capitimasĩparore bairo ĩ. Bairo cũ̶ cayeri wasoata, qũĩña jesoyami Dios. Bairo roro cũ̶ caátiere cũ̶ capitiro ĩñarĩ yua, Dios cũ̶ netõgu̶mi roro cũ̶ cabaibujiopeere. Yasiricaropu̶ ápérigu̶mi. Bairi dope bairo pu̶ame ĩ yapapua masĩã mano yua. Cabaimiatacũ̶ãrẽ, ni ũcũ̶ roro popiye cũ̶ yaye wapa baiyapapuamicũ̶ã, Dios mena cũ̶ cabu̶su̶qũẽnoeticõãta, yasicoagu̶mi. 11Roro popiye mu̶jãã tãmu̶o joroque mu̶jãã cũ̶ caátinucũrĩjẽrẽ mu̶jãã canu̶cãnetõcõã nucũrĩjẽrẽ ĩñarĩ u̶seaninucũñami mu̶jãã mena Dios. ¡Popiye mu̶jãã catũ̶goñayapapuaro bero ape yeri mu̶jãã tũ̶goñao joroque caátajere tũ̶goñañijate! Bairi mu̶jãã yu̶ caquetibu̶ju̶woajoriquere bueri bero, tie caĩrõrẽ bairo nu̶cũ̶bu̶gorique mena mu̶jãã tũ̶goyupa. Tunu bairoa yu̶ cũ̶ãrẽ nu̶cũ̶bu̶gorique mena caroaro yu̶ mu̶jãã tũ̶goẽñotayupa aperã yu̶re roro na caĩbujiopeere yua. Bairi yua roro mu̶jãã caátinucũrĩjẽ mena tũ̶goña yapapuari yoaro mee tiere mu̶jãã cũñupã carorijere. Bairo roro mu̶jãã caátinucũrĩjẽ mena tũ̶goña uwiri, yu̶ pu̶ame mu̶jãã mena yu̶ caãno mu̶jãã bootũ̶goñañupã. Bairo tũ̶goña uwiri, roro caácu̶ mu̶jãã mena macããcũ̶ cũ̶ãrẽ mu̶jãã cabeyogaetimirĩcũ̶rẽ yua tutuaro mena cũ̶ mu̶jãã beyoyupa. Tore bairo mu̶jãã caátipetimasĩrĩjẽ jũ̶gori yua, “Carorijere caboena niñama,” mu̶jãã ĩ ĩñagarãma aperã camasã. 12Bairo mu̶jããrẽ woajou̶, roro caátacu̶re, bairi cũ̶ pacu̶ roro caátiecoricu̶ jeto meerẽ tũ̶goñarĩ yu̶ woajowu̶. Mu̶jãã cũ̶ãrẽ tũ̶goñarĩ tore bairo yu̶ quetibu̶ju̶ woajowu̶. Dios cũ̶ caĩñajoropu̶ jããrẽ caroaro mu̶jãã catũ̶gou̶sarijere mu̶jãã masĩõ joroque ĩ, ti cartare mu̶jãã yu̶ woajowu̶. 13Atie jããrẽ mu̶jãã camaitũ̶goñarĩjẽrẽ queti tũ̶gori bero, jãã yeri tũ̶goñatutuacõãña. Bairãpu̶a tie jũ̶gori jeto meerẽ tũ̶gori jãã yeri tũ̶goñatutuaya. Tito cũ̶ã, caroaro mena cũ̶ mu̶jãã cabocáriquere cũ̶ cau̶seanirĩjẽrẽ ĩñarĩ, jãã cũ̶ã bu̶tioro jãã yeri tũ̶goña u̶seaniña. Bairi mu̶jãã pu̶ame Titore cũ̶ yeri ñuo joroque cũ̶ mu̶jãã ásupa tunu. 14Merẽ Tito mu̶jãã tu̶pu̶ cũ̶ caápáro jũ̶goyepu̶a, “Caroaro mu̶ bocágarãma Corinto macããna,” cũ̶ ñi quetibu̶ju̶ jũ̶goyetiwu̶. Bairi cũ̶ yu̶ caĩrĩcãrõrẽã bairo caroaro mena cũ̶ mu̶jãã bocáyupa Titore. Yu̶ pu̶ame cariape jeto tocãnacãnia ñi bu̶su̶nucũña. Di rũ̶mu̶ ũno mu̶jããrẽ caĩtou̶re bairo ñietinucũña. Bairi mu̶jãã cabairijere Titore yu̶ caĩquetibu̶ju̶ricarea bairo cariape baiyupa. 15Tunu bairoa cũ̶ pu̶ame, cũ̶ mu̶jãã caátajere tũ̶goñarĩ, mu̶jããrẽ tũ̶goñamaijãñunucũñami, nocãrõ nu̶cũ̶bu̶gorique mena cũ̶ bocári, cũ̶ caĩrĩjẽrẽ mu̶jãã catũ̶gou̶sarique jũ̶gori. 16¡Bairi caroaro mu̶jãã caátijũ̶gocõãnipeere tũ̶goñarĩ, bu̶tioro majũ yu̶ u̶seaniña!

will be added

X\