2 CORINTIOS 6

1Bairi yua, jãã pu̶ame Dios yaye paariquere caju̶átinemorãrẽ bairo caãna ãnirĩ mu̶jããrẽ jãã ĩña: Dios nocãrõ cañuu̶ ãnirĩ mu̶jãã cũ̶ caju̶átiãnierẽ ĩñateeticõãña. 2Torea bairo ĩcũñupĩ Dios cũ̶ ya tutipu̶ cũ̶ãrẽ: “Yoaro mee yu̶re mu̶ cajẽnirĩjẽrẽ mu̶ yu̶ tũ̶gobojagu̶. Bairo mu̶ tũ̶gobojari yua, camasãrẽ yu̶ canetõrĩ rũ̶mu̶rẽ mu̶ yu̶ ju̶átinemogu̶,” ĩ quetibu̶ju̶yupi cũ̶ ya tutipu̶re. Bairi ãmea ãno baiya Diore marĩ catũ̶gou̶samasĩpa rũ̶mu̶ majũ. ¡Ãmea Dios marĩ carorije wapare cũ̶ canetõrĩ rũ̶mu̶ majũ ãno baiya! 3Bairi jãã pu̶ame noa ũnarẽ jĩcãni ũno roro jãã áti ĩñoetinucũña. Jãã paarique cawapa manie, cabu̶goro macããjẽrẽ bairo to tuaeticõãto ĩrã, roro aperãrẽ jãã áti ĩñoetinucũña. 4Bairo pu̶ame roque jãã átinucũña: Nipetiro dise ũnie jãã caáti wãme cãrõ Dios paabojari majã jãã caãnierẽ jãã áti ĩñoãninucũña. Popiye tãmu̶omirãcũ̶ã, tũ̶goñaenarẽ bairo tiere caroaro mena jãã nu̶cãcõãnucũña. Tunu bairoa jããrẽ caru̶sarijere, jããrẽ roro na caátigarije cũ̶ãrẽ caroaro mena jãã tũ̶goñanetõcõãnucũña. 5Tunu apeyera roro jãã na cabape eperije, roro preso jorica wiiripu̶ jãã na cacũeperije cũ̶ãrẽ jãã nu̶cãnetõcõãnucũña. Jããrẽ roro átigarã, aperã neñarĩ na caawajatuti epenucũrĩjẽ, apeye tutuaro jãã capaanucũrĩjẽ, popiye ñamii cũ̶ãrẽ jãã cawu̶goa tãmu̶onucũrĩjẽ, jãã caau̶atãmu̶onucũrĩjẽ, tie nipetirijere jãã nu̶cãnetõcõãnucũña. Tore bairo caroaro jãã canu̶cãmasĩrĩjẽ jũ̶gori Diore paabojari majã jãã caãnierẽ jãã ĩñonucũña. 6Torea bairo caroarã jãã yeri jãã caãnajẽ cu̶tie, cariape macããjẽ queti caroaro jãã catũ̶gomasĩrĩjẽ cũ̶ãrẽ camasãrẽ jãã áti ĩñoãninucũña. Tunu bairoa patowãcãrĩcãrõ mano caroaro yeri jõrõ caãna ãnirĩ camasãrẽ caroaro na jãã ju̶átinemonucũña. Tunu bairo Espíritu Santo jãã mena cũ̶ caãno jũ̶gori caroaro cariape ĩtoricaro mano camasãrẽ jãã camairĩjẽ jũ̶gori nipetiro camasã masĩñama Dios yarã paabojari majã jãã caãnierẽ. 7Tunu bairoa jãã caquetibu̶ju̶rije cariape macããjẽ quetire, Dios cũ̶ catutuarije jãã mena caãno jũ̶gori nipetiro camasã masĩñama Dios yarã paabojari majã jãã caãnierẽ. Bairi jãã pu̶ame cariape ãnimasĩrĩ yua, wãtĩrẽ jãã canetõnu̶cãpeere, o jãã camasatoye cu̶tipee cũ̶ãrẽ jãã cũ̶gonucũña. Tie, cariape ãnimasĩrĩqũẽ pu̶ame jãã besure bairo caãnie majũ niña. Tie jũ̶gori di rũ̶mu̶ ũno jãã wapana roro jããrẽ na caátigaro jãã ẽñotamasĩnucũña. 8Bairi camasã pu̶ame ape rũ̶mu̶rẽ jãã ĩroanucũñama. Ape rũ̶mu̶ caãnorẽ bu̶tioro jãã ĩñatenucũñama. Ape rũ̶mu̶ caãno caroaro bu̶su̶nucũñama jãã caátiãnierẽ. Ape watoare roro bu̶su̶painucũñama jãã caátiãnierẽ. Ape rũ̶mu̶rẽ caĩtopairãrẽ bairo jãã ĩñanucũñama, caroaro cariape jãã caquetibu̶ju̶miatacũ̶ãrẽ. 9Tunu bairoa caroaro jããrẽ camasĩrã nimirãcũ̶ã, ape majã na camasĩẽna ũnarẽ bairo jãã ĩñanucũñama. Cariacoanarẽ bairo tũ̶goñamirãcũ̶ã, jãã masacu̶ti ãnijũ̶gonucũña. Apeyera popiye jãã baio joroque átimirãcũ̶ã, jãã pajĩãreetinucũñama bairãpu̶a. 10Tunu bairoa yapapuarãrẽ bairo baumirãcũ̶ã, tocãnacã rũ̶mu̶a jãã u̶seanicõã ninucũña. Tunu apeyera cabopacarãrẽ bairo nimirãcũ̶ã, jãã caquetibu̶ju̶rije jũ̶gori capããrã camasãrẽ cabopacaenarẽ bairo na ãnio joroque na jãã átinucũña. Tunu ñe ũnie cacũ̶goenarẽ bairo baumirãcũ̶ã, nipetiro jãã cũ̶gocõãña jããrẽ caru̶sarijere. 11Yu̶ yarã Corinto macããna, cariape ĩtoricaro mano jĩcãrõ tũ̶ni jãã cabairijere mu̶jããrẽ jãã quetibu̶ju̶ya. Jãã camasã cu̶tiãnie nipetirijere mu̶jãã masĩõ joroque jãã quetibu̶ju̶ya. 12Jãã pu̶ame mu̶jãã mena ricaati wãme jãã tũ̶goñarĩqũẽ cu̶perinucũña. Mu̶jãã pu̶ame roque jããrẽ roro ricaati tũ̶goñarĩqũẽ ũnie mena jãã mu̶jãã ĩña ãninucũña mu̶jãã yeripu̶ mena. 13Bairi mu̶jããrẽ atore bairo yu̶ átirotiya, jĩcãũ̶ capacu̶ cũ̶ pũnaarẽ beyou̶, cũ̶ caátirotirore bairo yua: Yu̶ mena caroaro tũ̶goñarĩqũẽcu̶sa. Ricaati wãme yu̶re tũ̶goña macãẽtĩcõãña. Yu̶, mu̶jãã mena caroaro yu̶ catũ̶goñau̶seanirõrẽ bairo mu̶jãã cũ̶ã caroaro tũ̶goñarĩqũẽcu̶sa yu̶ menarẽ. 14Jesucristo yaye quetire catũ̶gou̶saena mena ãnijesoeticõãña. Dope bairo caroa, carorije mena jĩcãrõ ãnimasĩẽtĩña. Tunu bairo cabusurije cũ̶ã busumirõcũ̶ã, canaitĩãrĩjẽ mena jĩcãrõ ãmerĩnucũña. 15Torea bairo Jesucristo wãtĩ mena jĩcãrõ tũ̶nia na caãmeo u̶seanipee maniña. Bairi apei Jesucristore catũ̶gou̶sau̶ cũ̶ã apei catũ̶gou̶saecu̶ mena caroaro jĩcãrõ ãnimasĩẽtĩñama. 16Tunu bairoa apeyera ñe ũnie jũ̶gori Dios ya wii ñubuerica wii pu̶ame aperã na jũ̶gũẽãrẽ na cañubuerije macããjẽ mena jĩcãrõ ãnijesomasĩẽtĩña. Marĩã, Dios, cacati majũ ya wiire bairo caãna majũ marĩ ãniña. Cũ̶ majũ cũ̶ã atore bairo ĩñupĩ marĩ mena cũ̶ caãnipeere: “ ‘Na mena ãcũ̶, na watoapu̶ yu̶ ãniñesẽãgu̶ ti yepapu̶re. Yu̶a, na pacu̶ Dios majũ yu̶ ãnigu̶. Bairi na pu̶ame yu̶ ya poa macããna majũ nigarãma jĩcã macãrẽ bairo yua,’ ĩñupĩ Dios. 17Tunu apeyera bairi atore bairo ĩnemoñami marĩ Quetiupau̶: ‘Carorã watoare ãmerĩcõãña. Na watoare tocãrõã witiweyocõãña. Tunu bairoa carorije ũnie cañuetie cũ̶ãrẽ peeto ũno ápericõãña. Bairo mu̶jãã caáto roque yua, yu̶ yarã majũ mu̶jãã yu̶ átigu̶. 18Bairo mu̶jãã átiri, yu̶ pu̶ame mu̶jãã pacu̶ majũ yu̶ ãnigu̶. Mu̶jãã pu̶ame yu̶ pũnaa caũ̶mu̶a, carõmia cũ̶ã, yu̶ pũnaa majũ mu̶jãã ãnigarã yua,’ ĩ quetibu̶ju̶yami marĩ Quetiupau̶ nocãrõ catutuau̶ majũ yua,” ĩ woatuyupa Dios cũ̶ caĩrĩqũẽrẽ cũ̶ ya tutipu̶.

will be added

X\