2 CORINTIOS 4

1Dios pu̶ame jããrẽ caĩñamai ãnirĩ cũ̶ yaye caroa quetire jãã quetibu̶ju̶netõrotijowĩ camasãrẽ. Bairo cũ̶ caátirotiricarã ãnirĩ jãã pu̶ame tiere paaju̶tiricaro mano caroaro jãã quetibu̶ju̶nucũña. 2Bairi tunu cañuena yasioropu̶ rorije na caátie ũnie caboborijere jãã boetinucũña. Ĩtorique mena Dios yaye quetire jãã quetibu̶ju̶etinucũña. Diore caĩñapeoecorã ãnirĩ tie queti cũ̶ãrẽ wasoaricaro mano caroaro cariape jãã quetibu̶ju̶nucũña. Tore bairo cariape macããjẽrẽ jãã caquetibu̶ju̶rijere jããrẽ camasĩrã tiere caroaro masĩcõãñama. 3¿Bairi jãã caquetibu̶ju̶rijere noa na tũ̶gopuoetinucũñati? Cayasiparã jeto tiere tũ̶gopuoetinucũñama Jesucristo camasãrẽ cũ̶ canetõrĩjẽ quetire. 4Cariape na catũ̶gogaetie bui, ati yepa macããcũ̶ quetiupau̶ wãtĩ pu̶ame caroaro na catũ̶gomasĩbujiopeere catũ̶gomasĩẽnarẽ bairo na átiẽñotayami. Bairi caĩñapãmasĩẽna muipu̶ cũ̶ caasibatorijere na caĩñacãnamumasĩẽtĩnucũrõrẽã bairo na cũ̶ã Jesucristo yaye nocãrõ caroa quetire di rũ̶mu̶ ũno tũ̶gomasĩẽtĩnucũñama. Nocãrõ caroú̶, Dios catutuau̶ cũ̶ caãnajẽ cu̶tiere bairo caãnajẽcu̶cu̶ yaye quetire na tũ̶gomasĩẽtĩõ joroque átinucũñami wãtĩ. 5Jãã pu̶ame, jãã majũã jãã caátiere na ĩroáto ĩrã mee, mu̶jããrẽ jãã quetibu̶ju̶netõnucũña. Jesucristo marĩ Quetiupau̶ jĩcãũ̶ã cũ̶ caãnierẽ quetibu̶ju̶rã jãã átinucũña. Bairi jãã pu̶ame mu̶jããrẽ capaabojarã, caju̶áti majãrẽ bairo jãã ãninucũña, Jesucristore jãã caĩñamairĩjẽ jũ̶gori yua. 6Dios pu̶ame cawãmapau̶pu̶re ati yepa naitĩãrõ caãnimirĩcãrõrẽ to busuo joroque ásupi. Cũ̶ã niñami ãme cũ̶ãrẽ marĩ yeri canaitĩãrõpu̶ caãnierẽ bairo marĩ caãnajẽ cu̶tiere cabusuropu̶ to ãnio joroque caácu̶ majũ. Tore bairo átinucũñami Dios, cũ̶ macũ̶ Jesucristo nocãrõ cañuu̶ caroaro cũ̶ caátiere ĩñarĩ bero, Dios cũ̶ caãnajẽ cu̶tiere marĩ camasĩparore bairo ĩ Jesucristo jũ̶gori. 7Bairi atie Dios nocãrõ cũ̶ catutuarijere jãã camasĩnucũrĩjẽ pu̶ame, cawapacu̶tie netõjãñurõ jããrẽ cañurĩjẽ niña. Bairo tiere masĩrĩ aperã camasãrẽ na jãã quetibu̶ju̶netõnucũña. Bairo caquetibu̶ju̶rã nimirãcũ̶ã, ati rupau̶ pu̶amerã catutuaenarẽ bairo caãna jãã ãniña, ríiru̶ cawatiyasiparu̶re bairo yua. Bairo jãã cabaiãnierẽ ĩñarĩ nipetiro camasã, “Na catutuarije jũ̶gori mee, Dios cũ̶ catutuarije jũ̶gori roque tore bairo quetibu̶ju̶ masĩñama,” jãã ĩ masĩnucũñama. 8Ati yepapu̶re ãna, roro popiye jãã bainucũña. Bairo cabairã nimirãcũ̶ã, “¿dope bairo marĩ bairãti?” di rũ̶mu̶ ũno jãã ĩ tũ̶goñaetinucũña. Tunu bairoa roro popiye jãã cabairije mena tũ̶goña yapapuamirãcũ̶ã, di rũ̶mu̶ jãã quetibu̶ju̶ jãnaetinucũña. 9Roro popiye jãã tãmu̶o joroque jãã átiepenucũñama. Bairo roro na caána jãã caãnimiatacũ̶ãrẽ, Dios pu̶ame di rũ̶mu̶ ũno jãã aweyoetinucũñami. Jããrẽ capajĩãmasĩrã nimirãcũ̶ã, jãã yeri pu̶amerẽ dope átiyasiomasĩẽtĩñama. 10Bairi noo jãã caánucũrĩpau̶ cãrõ jãã cũ̶ã Jesucristo roro na cũ̶ caátiecogaricarorea bairo roro cayasicoaparãrẽ jãã ãnicotenucũña jãã wapana jũ̶gori. Bairo Jesucristo cũ̶ cabairiquere bairo jãã cũ̶ã roro popiye tãmu̶omirãcũ̶ã, caroaro cũ̶ caãnajẽ cu̶tie macããjẽ cũ̶ãrẽ jãã áti ĩñomasĩnucũña camasãrẽ. 11Tunu bairoa jãã nipetiro, tocãnacã rũ̶mu̶a capajĩãecoparãrẽ bairo jeto jãã ãninucũña, Jesucristo yarã ãnirĩ. Bairo cabairã nimirãcũ̶ã, caroaro Jesucristo cũ̶ catutuarijere camasãrẽ caáti ĩñoparã jãã ãniña ati rupau̶ cayasipa rupau̶ mena. 12Tore bairo jãã pu̶ame Jesucristo yaye quetire quetibu̶ju̶rã, roro jãã tãmu̶onucũña. Bairo jãã cabaimiatacũ̶ãrẽ, jãã caquetibu̶ju̶rije jũ̶gori mu̶jãã pu̶ame yeri capetietiere cacũ̶goparã majũ mu̶jãã ãniña. 13Bairo Dios jããrẽ cũ̶ cacotemasĩnucũrĩjẽrẽ tũ̶goñatutuari uwiricaro mano jãã quetibu̶ju̶nucũña cũ̶ yaye quetire. Torea bairo ĩ woatuyupa Dios ya tutipu̶ cũ̶ãrẽ: “Dios mena tũ̶goñatutuari cũ̶ yaye quetire uwiricaro mano camasãrẽ na yu̶ quetibu̶ju̶nucũña,” ĩ woatuyupi. 14Bairi cariape merẽ marĩ masĩña: Dios pu̶ame, Jesucristo cũ̶ cariacoamiatacũ̶ãrẽ cũ̶ catitunuo joroque cũ̶ caátatorea bairo jãã cũ̶ãrẽ jãã catiogu̶mi. Bairo jãã catiori bero mu̶jãã jĩcãrõã marĩ neágu̶mi cũ̶ caãno u̶mu̶recóopu̶ yua. 15Nipetiro popiye jãã catãmu̶orĩjẽ bainucũña, caroaro mu̶jãã canetõmasĩpeere ĩrõ. Bairo mu̶jãã mena macããna aperã nemojãñurõ Cristore catũ̶gou̶sarã na caãninemoata, nemojãñurõ Dios cũ̶ãrẽ cũ̶ na cabasapeopee cũ̶ã nigaro, nocãrõ marĩ mena cañuu̶ cũ̶ caãno jũ̶gori. 16Bairi popiye baimirãcũ̶ã, jãã pu̶ame cayeritutuaenarẽ bairo jãã tũ̶goña yapapuaetinucũña. Ati rupau̶ mena tocãnacã rũ̶mu̶a cabu̶cu̶a jũ̶goyecu̶na nimirãcũ̶ã, jãã yeri jãã catũ̶goñarĩjẽ pu̶ame nemojãñurõ jõpu̶ame cawãma yeri majũ cacũ̶gorã jãã ãnijũ̶goyecu̶tinucũña. 17Bairopu̶a atie, ati yepapu̶ ãna roro popiye jãã catãmu̶onucũrĩjẽ capetipee niña. Bairi ñe mee niña jããrẽ. Bairo popiye baimirãcũ̶ã, cabero netõjãñurõ caroa capetietipeere cacũ̶goparã majũ jãã ãniña. 18Bairo cabairo jũ̶gori bu̶tioro majũ ati yepa macããjẽ caãnierẽ jãã ĩroaetinucũña. Bairi ãme marĩ caĩñaetinucũrĩjẽ u̶mu̶recóo macããjẽ Dios marĩ cũ̶ cajopee pu̶amerẽ jãã ĩroanucũña. Ati yepa macããjẽ capetipee majũ niña. U̶mu̶recóopu̶ macããjẽ roque tocãnacã rũ̶mu̶a caãnicõãninucũpee majũ niña.

will be added

X\