2 CORINTIOS 13

1Atie mu̶jãã yu̶ caĩñañesẽãũ̶ápee mena merẽ itiani majũ mu̶jãã tu̶pu̶re ñiña ñesẽãágú̶. Dios ya tutipu̶ bairo ĩ quetibu̶ju̶ woatuyupa: “Pu̶garã, o itiarã ũna, apei roro caátacu̶re na cabu̶su̶jãrõ ñuña. Bairo na, itiarã ũnapu̶a jĩcãrõrẽ bairo na cabu̶su̶jãata, nipetiro catũ̶gorã cũ̶ã na caĩrõrẽ bairo átimasĩñama,” ĩ quetibu̶ju̶ya Dios ya tutipu̶. 2Bairi mu̶jãã tu̶pu̶ caãna carorijere caátanarẽ, o nipetiro to caãna cũ̶ãrẽ ãme ato mai cayoaropu̶a ãcũ̶, jĩcãni bero tunu mu̶jããrẽ ĩñau̶ etanemou̶ yu̶ caquetibu̶ju̶ricarorea bairo ñinemoña tunu: Ati watoa mu̶jããrẽ tunu yu̶ caĩña ñesẽãnemou̶ ápáta, roro caátipairãrẽ yu̶ bopaca ĩñaecũ̶ yua. Roro popiye na baio joroque na yu̶ átigu̶. 3Mu̶jãã pu̶ame mai yu̶re caria Jesucristo yu̶ cũ̶ caju̶átiere masĩgarã, jĩcã wãme áticõña macããrã mu̶jãã átiya. Jau̶, toroque mu̶jããtu̶ ãcũ̶, mu̶jããrẽ yu̶ áti ĩñogu̶ cũ̶ catutuarijere. Cristo pu̶ame catutuaecu̶re bairo mu̶jãã watoare ãcũ̶rẽ bairo bainucũñami. Bairo cabai nimicũ̶ã, nocãrõ cũ̶ catutuarijere mu̶jãã áti ĩñomajũcõãnucũñami yu̶ jũ̶gori mu̶jãã tu̶ripu̶re. 4Bairãpu̶a, cariapea marĩ masĩña catutuaecu̶rea bairo yucu̶pãĩpu̶ papuatuecori riariquere. Bairo papuatuecori cariaricu̶ nimicũ̶ã, Dios cũ̶ camasĩrĩjẽ jũ̶gori cacatiricu̶ majũ niñami. Jãã cũ̶ã bairãpu̶a Jesucristorea bairo roro popiye jãã tãmu̶onucũña. Bairo popiye baimirãcũ̶ã, Jesucristore capitiena ãnirĩ jãã cũ̶ã cũ̶rẽã bairo jãã ãnigarã Dios cũ̶ catutuarije jũ̶gori, mu̶jããrẽ ju̶átinemogarã yua. 5Bairi mu̶jãã majũã caroaro mu̶jãã caátiãnierẽ tũ̶goña besemasĩña. ¿Cariapea Jesucristo mena marĩ tũ̶goñatutuamiñatĩ? mu̶jãã caĩtũ̶goñamasĩparore bairo ĩrã, caroaro tũ̶goña beseya mu̶jãã caátiere. ¿Mu̶jãã yeripu̶ Jesucristo cũ̶ caãnierẽ mu̶jãã tũ̶goñamasĩẽtĩñati? Caĩtopairãrẽ bairo cabu̶goroa, “Jesucristo yarã jãã ãniña,” mu̶jãã caĩata roque, Jesucristo mu̶jãã yeripu̶ mácũ̶mi. 6Bairo ĩmicũ̶ã, baipu̶a yu̶ pu̶ame mu̶jãã mena yu̶ tũ̶goñatutuacõãña. Bairi jããrẽ bairãpu̶a cariapea Cristo yarã jãã caãnierẽ mu̶jãã masĩcõãrã. 7Bairi jãã pu̶ame mu̶jããrẽ Diopu̶re jãã jẽnibojanucũña, dise ũnie carorije macããjẽrẽ mu̶jãã caáperiparore bairo ĩrã. “Na netõrõ caroarã majũ jãã ãniña,” ĩgarã mee, mu̶jããrẽ tore bairo jãã átibojagarã. Caroa macããjẽ pu̶ame roque mu̶jãã caátiãniparore bairo ĩrã, tore bairo jãã átigarã. “Cabu̶goroa quetibu̶ju̶rã átiyama,” camasã jãã na caĩmiatacũ̶ãrẽ, bairãpu̶a tore bairo jãã átigarã. 8Jãã pu̶ame dopẽĩrã cariape macããjẽrẽ ricaati pu̶ame jãã baibotiomasĩẽtĩña. Cariape macããjẽ quetibu̶ju̶rique caĩrõrẽ bairo pu̶ame jeto roque jãã caátimasĩnucũpee niña. 9Bairi jãã pu̶ame jããrẽ caĩñaterã cayeritutuaenarẽ bairo jãã na caĩmiatacũ̶ãrẽ, tũ̶goña u̶seanirĩqũẽ mena jãã ãnicõãnucũña. Mu̶jããrẽ ju̶átigarã, tie mena jãã pu̶ame popiye jãã catãmu̶onucũrĩjẽ jũ̶gori nemojãñurõ Dios mena mu̶jãã catũ̶goñatutuapeere tũ̶goñarĩ jãã u̶seaninucũña. Bairi tocãñacã rũ̶mu̶a mu̶jããrẽ Diopu̶re jãã jẽnibojanucũgarã, caroaro mu̶jãã caátiãnie ñe ũnie to caru̶saetiparore bairo ĩrã. 10Bairi ati carta mena mu̶jãã yu̶ quetibu̶ju̶ woajoya, mu̶jãã tu̶pu̶ yu̶ caĩñañesẽãũ̶ ápáro jũ̶goye. Topu̶ yu̶ caetaparo jũ̶goye roro mu̶jãã caátiãnierẽ mu̶jãã majũã qũẽnocõãña. Bairo mu̶jãã caápata, yu̶ pu̶ame topu̶ etau̶, tutuaro mena mu̶jãã yu̶ quetibu̶ju̶etigu̶. Marĩ Quetiupau̶ pu̶ame roque tore bairo yu̶ carotimasĩpeere yu̶ jowĩ. Jesucristo mena mu̶jãã yeripu̶ nemojãñurõ cũ̶ mu̶jãã catũ̶goñatutuanutuaparore bairo ĩ, tore bairo yu̶ roticũwĩ. Mu̶jããrẽ yu̶ yapapuo reo joroque ĩ mee, tore yu̶ quetibu̶ju̶ roticũwĩ marĩ Quetiupau̶. 11Yu̶ yarã, mu̶jããrẽ yu̶ cawoajo yaparoparo jũ̶goye atore bairo mu̶jãã ñiña: Caroaro u̶seanirĩqũẽ mena ãnajẽcu̶sa. Caroaro átiãnajẽ pu̶amerẽ átiãnimasĩña. Tocãnacãũ̶pu̶a caroaro yeri ñurõ ãmeo átiãnajẽcu̶sa. Tunu bairoa jĩcã yericu̶narẽ bairo ãnajẽcu̶sa. Marĩ Pacu̶ Dios ãmeo mairĩqũẽrẽ, bairi jĩcã yericu̶taje cũ̶ãrẽ cajou̶ mu̶jãã mena cũ̶ ãmarõ. 12Tunu bairoa caroaro nu̶cũ̶bu̶gorique mena ãmeo bocári ãmeo jẽniña. 13Marĩ yarã ato macããna Jesucristore catũ̶gou̶sarã nipetiro mu̶jããrẽ ñuroti joyama. 14Jesucristo marĩ Quetiupau̶ caroare cũ̶ jonemoáto mu̶jãã nipetirore. Tunu bairo marĩ Pacu̶ Dios nocãrõ marĩrẽ camai, bairi cũ̶ Yeri Espíritu Santo cũ̶ã mu̶jãã mena cũ̶ ãnicõã ninucũáto. Tocãrõã niña atie queti yu̶ cawoaturije.

will be added

X\