2 CORINTIOS 12

1Ñe ũnie majũ marĩ átimasĩẽtĩña, marĩ majũã marĩ caátiere marĩ caĩbu̶su̶ata. Bairo cabaimiatacũ̶ãrẽ, yu̶ pu̶ame marĩ Quetiupau̶ qũẽguericarore bairo yu̶ cũ̶ caĩñorĩqũẽ, cũ̶ yaye macããjẽrẽ yu̶ cũ̶ caátibuio ĩñorĩqũẽ macããjẽ cũ̶ãrẽ mu̶jãã yu̶ quetibu̶ju̶gaya. 2Jĩcãũ̶ caũ̶mu̶rẽ ñiñawũ̶ caroaro majũ Cristore jĩcãrõ tũ̶ni catũ̶gou̶sacõãninucũũ̶rẽ. Cũ̶ pu̶amerẽ itia u̶mu̶recóo tuti buipu̶ cũ̶ neámí Cristo. Merẽ pu̶ga wãmo peti ru̶pore baparicãnacã pẽnirõ cãnacã cũ̶ma majũ netõña cũ̶rẽ cũ̶ caneátato bero. Baipu̶a caroaro majũ yu̶ masĩẽtĩña: Ati rupau̶ menaa, o cũ̶ yeri jetore rita neácú̶ baibauwĩ. Dios roque cariape cũ̶ caátajere masĩñami. 3Baipu̶a caroaro majũ yu̶ masĩña: Cũ̶rẽ Dios nocãrõ caroaro caãno cũ̶ tu̶pu̶ cũ̶ neámí. (Ati rupau̶ menaa o cũ̶ yeri jetore rita neácú̶ baibauwĩ.) Topu̶ etaácu̶, cũ̶ pu̶ame bu̶su̶ri cayasiorije, ni ũcũ̶rẽ Dios cũ̶ bu̶su̶rotietie ũnie bu̶su̶rique majũrẽ tũ̶goroyawĩ. ((Mai, Pablo pu̶ame versículos 2-4 apei cũ̶ cabairiquere ĩ quetibu̶ju̶micũ̶ã, cabotiogaecu̶ ãnirĩ cũ̶ majũã cũ̶ cabairiquere quetibu̶ju̶gu̶ ĩcũ̶mi.)) 5Bairo yu̶ roque tore bairo camasĩ ãnirĩ caroaro netõrõ tie mena jũ̶gori yu̶ baibotio ĩñobujioya ni ũcũ̶ camasocu̶re. Bairo masĩmicũ̶ã, baipu̶a yu̶ majũã yu̶ camasĩrĩjẽ mena tore bairo yu̶ átibotiogaetiya. Tie ũnie meerẽ, yu̶ majũã yu̶ cayeri tũ̶goñatutuaetie roquere torea bairo mu̶jãã yu̶ caáti ĩñoata, ñucõãbujioro. 6Bairo netõjãñurõ yu̶ majũã yu̶ caátiere, o yu̶ caĩrĩjẽrẽ quetibu̶ju̶micũ̶ã, camecũ̶rẽ bairo quetibu̶ju̶ mee yu̶ baiya baipu̶a. Cariapea quetibu̶ju̶ roque tore bairo ñinucũmiña. Bairo caĩ nimicũ̶ã, baipu̶a buipearo ni jĩcãũ̶ ũcũ̶ tie yu̶ caáperie, o yu̶ caĩẽtĩẽ jũ̶gori yu̶ cũ̶ caĩroacotero yu̶ boetiya. Caroaro yu̶ caátiãninucũrĩjẽrẽ ĩñabeseri roque yu̶ cũ̶ caĩroaro ñuña. 7Bairo marĩ Quetiupau̶ yaye macããjẽ nocãrõ caroare yu̶ cũ̶ caátibuio ĩñorĩqũẽ mena jũ̶gori yu̶ cabaibotioetiparore bairo ĩ, wãtĩ roro yu̶ cũ̶ caátiere ẽñotaemi Dios. Tie jũ̶gori popiye pota marĩ rupau̶re caãnorẽ bairo wãtĩ roro yu̶re cũ̶ caátiere ẽñotaemi Dios. Tie jũ̶gori popiye pota marĩ rupau̶re caãnorẽ bairo wãtĩ roro yu̶re cũ̶ caátie ninucũña. 8Bairo roro popiye yu̶ cabaiãnierẽ yu̶ cũ̶ netõáto ĩ, itiani cãnacãni majũ Diore cũ̶ yu̶ jẽnimiwũ̶. 9Bairo itiani yu̶ cajẽnimiatacũ̶ãrẽ, itianipu̶a atore bairo ñi quetibu̶ju̶wĩ: “Mu̶ caĩrõrẽ bairo yu̶ áperigu̶. Yu̶ yarã popiye baimirãcũ̶ã, narẽ yu̶ mena na tũ̶goñatutuao joroque na yu̶ caátie jũ̶gori, nipetiro camasãrẽ yu̶ catutuarijere nemojãñurõ na ñiñomasĩña,” ñi quetibu̶ju̶wĩ. Bairi popiye yu̶ catãmu̶orĩjẽrẽ tũ̶goñarĩ, tie mena yu̶ tũ̶goña u̶seanicõãña. Tie jũ̶gori nipetiro camasãrẽ Cristo yu̶ cũ̶ catutuarije jorijere na yu̶ áti ĩñomasĩña. 10Tunu bairoa atiere tũ̶goñarĩ yu̶ u̶seaniña: Catutuaecu̶re bairo roro popiye yu̶ cabairije, roro yu̶re na caĩawajatutinucũrĩjẽ, yu̶re caru̶sarije cũ̶ãrẽ tũ̶goñarĩ yu̶ u̶seaniña. Apeyera Jesucristore yu̶ catũ̶gou̶sarije jũ̶gori yu̶re na capajĩãga ñesẽãnucũrĩjẽ, tunu Jesucristo jũ̶gori popiye capee wãme yu̶ cabainucũrĩjẽrẽ tũ̶goñarĩ yu̶ u̶seaniña. Bairo roro popiye catutuaecu̶re bairo majũ tãmu̶onucũũ̶ pu̶ame roque nemojãñurõ Cristo jũ̶gori catutuau̶re bairo majũ yu̶ tũ̶goñanucũña. 11Yu̶ majũã camecũ̶rẽ bairo ñiẽtĩña. Mu̶jãã roque camecũ̶rẽ bairo ñio joroque yu̶ mu̶jãã ápu̶. Mu̶jãã pu̶ame roque yu̶ caátiãnierẽ caroaro yu̶re cabu̶su̶parã mu̶jãã ãnimiña. Bairo yu̶re caroaro cabu̶su̶parã nimirãcũ̶ã, bairo mu̶jãã áperinucũña. Cabu̶goro macããcũ̶rẽ bairo caãcũ̶ nimicũ̶ã, baipu̶a na, mu̶jãã catũ̶gou̶sanucũrã, jãã apóstolea majã netõrõ caãnitũ̶goñarã roca macããcũ̶rẽ bairo yu̶ ãnitũ̶goñaẽtĩña. 12Bairo popiye tãmu̶omicũ̶ã, mu̶jãã tu̶pu̶ ãcũ̶, nipetiri wãme nocãrõ Dios cũ̶ catutuarije mena áti ĩñorĩqũẽrẽ mu̶jãã yu̶ áti ĩñoãninucũwũ̶. Tore bairo caroaro yu̶ caátimasĩrĩjẽ jũ̶gori cariapea Jesucristo yau̶ apóstol majũ yu̶ caãnierẽ mu̶jãã masĩõ joroque yu̶ áti ĩñomiwũ̶. 13Baipu̶a jĩcã wãme jeto aperã Jesucristore catũ̶gou̶sari majã poarire yu̶ caátinucũrõrẽ bairo mu̶jãã yu̶ ápewu̶. Yu̶re caru̶sarije caãnimiatacũ̶ãrẽ, di rũ̶mu̶ ũno patowãcõrõ mu̶jããrẽ yu̶ jẽnipatowãcõẽpũ̶. Tore bairo mu̶jããrẽ yu̶ cajẽnietĩẽ to cañueticõãta, ¡tiere yu̶ mu̶jãã masiriyobojawa! 14Mu̶jãã tu̶pu̶ águ̶, merẽ qũẽnojũ̶goyeti ãcũ̶ yu̶ átiya. Atie yu̶ caápée mena itiani majũ merẽ mu̶jãã tu̶pu̶re ñiñañesẽãgu̶. Bairo ati watoare ácu̶ cũ̶ã, mu̶jãã apeye ũnierẽ cajẽnipatowãcõũ̶rẽ bairo yu̶ baietigu̶. Capacu̶a pu̶ame na pũnaarẽ caru̶sarijere na jomasĩnucũñama. Na pũnaa pu̶ame mee na pacu̶are caru̶sarijere na jonucũñama. Bairi yu̶ pu̶ame mu̶jãã yu̶ pũnaarẽ bairo mu̶jãã caãnoi, dise ũnie mu̶jãã cacũ̶gorijere mu̶jãã yu̶ jẽnipatowãcõẽtĩgu̶. Yu̶re mu̶jãã caĩroapee pu̶ame jetore yu̶ boya. 15Baipu̶a, dise yu̶ cacũ̶gorije caetatuaro cãrõ mu̶jããrẽ yu̶ ju̶átinemogu̶. Yu̶ majũ rupau̶ mena cũ̶ãrẽ popiye yu̶ tãmu̶omasĩña, mu̶jãã pu̶ame caroaro mu̶jãã caãnimasĩpeere bori. Bairo mu̶jããrẽ netõjãñurõ yu̶ camaimiatacũ̶ãrẽ, mu̶jãã pu̶ame nemojãñurõ yu̶re camaiena majũ mu̶jãã tuanucũña. 16Bairo mu̶jããrẽ di rũ̶mu̶ ũno apeye ũnierẽ yu̶ cajẽnipato wãcõetimiatacũ̶ãrẽ, jĩcããrã atore bairo ĩnucũñama: “Pablo masĩrĩ, marĩrẽ ĩtou̶ átiyami. Di rũ̶mu̶ ũno caãno marĩ camasĩẽto yua, apeye ũnie marĩ cacũ̶gorijere jemasĩgu̶mi,” ĩnucũñama. 17Bairi, ¿mu̶jãã tu̶pu̶ yu̶ cajoricarã mu̶jããrẽ ĩtori apeye ũnie mu̶jãã cacũ̶gorijere mu̶jãã na ẽmarĩ? Ni jĩcãũ̶ ũcũ̶ mu̶jããrẽ ĩtori mu̶jãã yayere ẽmaesupi. 18Yu̶ pu̶ame Titore mu̶jãã tu̶pu̶ cũ̶ yu̶ jowu̶. Cũ̶ mena apei marĩ yau̶ Jesucristore catũ̶gou̶sau̶ cũ̶ãrẽ cũ̶ yu̶ jowu̶. Bairo mu̶jããtu̶ yu̶ cajoricu̶ Tito topu̶ ãcũ̶, ¿mu̶jããrẽ qũĩtori? Mu̶jããrẽ jĩcãni ũno ĩtoetacu̶mi. Jãã, cũ̶ mena pu̶garãpu̶a jĩcãrõ tũ̶ni jãã ãnajẽ cu̶tiya. Jãã, pu̶garãpu̶a jĩcã yerire bairo jãã yeri cu̶tinucũña. 19Ape watoara atore bairo pu̶ame mu̶jãã tũ̶goñabujiorã: “Caroaro jããrẽ na nu̶cũ̶bu̶goáto ĩrã, tore bairo ĩrãma,” jããrẽ mu̶jãã ĩ tũ̶goñarã. Bairo mee jãã baiya. Yu̶ yarã, yu̶ camairã, Dios cũ̶ã tore bairo bori, jãã caátigatũ̶goñarĩjẽrẽ masĩcõãñami. Dios mena nemojãñurõ mu̶jãã catũ̶goñatutuapee pu̶ame roquere bori, tore bairo mu̶jããrẽ jãã quetibu̶ju̶ ãninucũña. 20Mu̶jããrẽ yu̶ caĩñañesẽãũ̶átí rũ̶mu̶ caãno, caroaro yu̶ mu̶jãã caãniyuro yu̶ boya. “Ape watoara ricaati niyubujiorãma,” ĩ tũ̶goñarĩ, yu̶ tũ̶goña uwiya. Carorije macããjẽ mena mu̶jãã caãno mu̶jãã yu̶ eta tãmu̶ogaetiya. Atie ũnie carorije nibujioro mu̶jãã watoare bairopu̶a: Ãmeo tutirique, ãmeo ĩña u̶gorique, ãmeo asiarique, aperã netõrõ baitũ̶goñarĩqũẽ, roro ãmeo bu̶su̶pairique, cau̶saropu̶ bu̶su̶pairique, ãmeo botiorique, caroaro jĩcã yericu̶tiri ãnimasĩẽtãjẽ cũ̶ã nibujioro. Tiere tũ̶goñarĩ yu̶ pu̶ame yu̶ tũ̶goña yapapuajãñuña. Bairo mu̶jãã caãmata, mu̶jãã cũ̶ã bu̶tioro mu̶jãã yapapuabujiorã, mu̶jããrẽ yu̶ catutipeere tũ̶goñarĩ yua. 21Tunu bairoa ati watoa mu̶jããrẽ yu̶ caĩñañesẽãũ̶átí rũ̶mu̶ caãno, roro mu̶jãã caãnie jũ̶gori yu̶ Quetiupau̶ Dios pu̶ame mu̶jãã mena yu̶ tũ̶goñaboboo joroque yu̶ átibujiou̶mi. Nocãrõ yoaro carorije macããjẽrẽ mu̶jãã caátiãninucũrĩjẽrẽ tũ̶goñarĩ, bu̶tioro yapapuari yu̶ otio joroque yu̶ átibujiou̶mi. Capããrã mu̶jãã mena macããna tocãnacã wãme roro ati rupau̶ mena átieperique ũnierẽ áti jãnaetinucũñama. Tie nipetirijere tũ̶goñarĩ yu̶ majũpu̶a bu̶tioro yu̶ tũ̶goña yapapuajãñuña.

will be added

X\