2 CORINTIOS 10

1Yu̶, Pablo, Cristo caroaro mena cũ̶ cabeyorije, caroaro cũ̶ caĩñamairĩjẽ mena mu̶jããrẽ yu̶ quetibu̶ju̶ya. Bairãpu̶a, jĩcããrã yu̶re ĩnucũñama: “Ato marĩ watoapu̶ áñesẽãũ̶, marĩ uwire bairo tutuaro mena mee marĩ quetibu̶ju̶nucũñami. Bairo tutuaro mena mee quetibu̶ju̶micũ̶ã, yoaropu̶ ãcũ̶ pu̶ame, tutuaro netõrõ marĩ quetibu̶ju̶ woajonucũñami,” ñi bu̶su̶nucũñama. 2Bairi mu̶jããrẽ ñiña: To mu̶jãã tu̶pu̶ yu̶ caĩñau̶ etari rũ̶mu̶ caãno, yu̶re tore bairo roro caĩbu̶su̶jãrãrẽ tutuaro mena na yu̶ quetibu̶ju̶o joroque yu̶ na ápericõãto. ¡Yu̶ tutimasĩña, tame! Na pu̶ame jãã bu̶su̶pairã, “Na majũ na catũ̶goñarĩjẽ mena jũ̶gori na caátiãnierẽ quetibu̶ju̶nucũñama,” jãã ĩ bu̶su̶jãnucũñama. Jããrẽ na cabu̶su̶pai jãnaeticõãta, cotericaro mano tutuaro mena na yu̶ tutigu̶. 3Bairãpu̶a, camasã ati rupau̶ cacũ̶gorã marĩ caãnierẽ marĩ masĩña. Bairo marĩ cabaimiatacũ̶ãrẽ, jãã pu̶ame ati u̶mu̶recóo macããna camasãrẽ bairo jãã átiãnajẽ cu̶periya. 4Jãã catutuãnie ati u̶mu̶recóo macããjẽ ũnie mee niña. Dios cũ̶ catutuarije mena jũ̶gori roque carorije quetibu̶ju̶riquere quetibu̶ju̶netõnu̶cãõ joroque jãã átimasĩnucũña. Torea bairo roro na cabu̶su̶painucũrĩjẽ cũ̶ãrẽ jãã quetibu̶ju̶pomasĩña. 5Bairi jãã pu̶ame Dios cũ̶ catutuarije jũ̶gori tocãnacã wãme ricaati aperã na cabue ẽñotarije, Jesucristore na boetio joroque caátiere jãã, cariape jãã quetibu̶ju̶pomasĩña camasãrẽ. Bairo jãã caátimasĩrĩjẽ mena camasã na majũ na catũ̶goñarĩjẽrẽ caroa wãme pu̶ame tũ̶goñawasoari, Cristo cũ̶ caborore bairo na átiãnio joroque na jãã átimasĩña. Bairo jãã caátimasĩrõ yua, na pu̶ame cũ̶, Cristore cũ̶ tũ̶gou̶sagarãma. 6Bairi jãã pu̶ame cotericaro mano nipetiro Cristore cabaibotiorãrẽ popiye na baio joroque na jãã átimasĩgarã. Mu̶jãã pu̶ame Jesucristore caroaro mu̶jãã catũ̶gou̶sapetiro beropu̶, tore bairo na jãã popiye peyojãnagarã. 7Mu̶jãã pu̶ame yu̶ cabaurije bui macããjẽ jetore mu̶jãã ĩñapeonucũña. Yu̶ yeri yu̶ catũ̶goñatutuarije pu̶ame roquere mu̶jãã masĩẽtĩnucũña. Bairi ni jĩcãũ̶ ũcũ̶ cariapea, “Jesucristo yau̶ yu̶ ãniña,” caĩnucũũ̶ cũ̶ caãmata, jãã, Jesucristo yarã jãã caãnie cũ̶ãrẽ cũ̶ camasĩpee niña. 8Yu̶ pu̶ame jãã carotimasĩrĩjẽ buipeoropu̶ jããrẽ mu̶jãã caĩroapeere quetibu̶ju̶micũ̶ã, tie mena yu̶ tũ̶goñaboboetiya. Marĩ Quetiupau̶ pu̶ame roque tore bairo jãã carotimasĩpeere jãã jowĩ. Jesucristo mena mu̶jãã yeripu̶ nemojãñurõ cũ̶ mu̶jãã catũ̶goñatutua nutuaparore bairo ĩ, tore bairo jãã roticũwĩ. Mu̶jããrẽ jãã yapapuo reo joroque ĩ mee, tore jãã quetibu̶ju̶ roticũwĩ marĩ Quetiupau̶. 9Bairi yu̶ pu̶ame yu̶ cawoaquetibu̶ju̶jorije mena, “Corinto macã macããna na tũ̶goña uwiáto,” ĩ mee, tore bairo ñi quetibu̶ju̶ woajoya. 10Aperã jĩcããrã yu̶ cawoajorijere ĩñarĩ, bairo ĩnucũñama: “Tutuaro mena marĩrẽ quetibu̶ju̶ woatujomicũ̶ã, cũ̶ majũ etau̶ pu̶ame, tutuaro mena ni ũcũ̶rẽ quetibu̶ju̶ masĩẽtĩñami. Tunu bairoa caroaro cariape caquetibu̶ju̶ecu̶ niñami,” ñi bu̶su̶painucũñama. 11Tore bairo jããrẽ roro caĩbu̶su̶pairã atore bairo na camasĩrõ yu̶ boya: Yoaropu̶ ãnirĩ tutuaro yu̶ caĩquetibu̶ju̶rorea bairo mu̶jãã watoa ãcũ̶ cũ̶ã, yu̶ caátie mena tutuaro mu̶jãã yu̶ quetibu̶ju̶ masĩña. Tiere na camasĩrõ yu̶ boya. 12Bairi jãã pu̶ame jãã majũã jãã cabairijere ĩñacõñarĩ, o aperã na majũã na caãnierẽ caroaro na cabu̶su̶botiorije mena na caĩrõrẽ bairo caĩbu̶su̶etiparã jãã ãniña. Na, aperã pu̶ame catũ̶goñamasĩẽna niñama, tore bairo cabu̶su̶rã. Na pu̶ame na majũã na caátie mena bu̶su̶rã, o aperã na caátie mena ĩcõñarã, roro catũ̶goñamasĩẽna majũ ãna ĩñama. 13Bairi jãã pu̶ame roque tie ũnierẽ caáperiparã jãã ãniña. Tiere jãã átirotietiyami Dios. Cũ̶ pu̶ame jĩcãrõ tũ̶ni jãã caátimasĩpeere cõñarĩcãrõrẽ bairo jãã átibojacũnucũñami. Bairi Dios pu̶ame roque mu̶jãã Corinto macããna tu̶pu̶ jãã quetibu̶ju̶ñesẽãõ joroque jãã ámi. 14Bairi jãã pu̶ame mu̶jããrẽ Cristo yaye caroa quetire caquetibu̶ju̶jũ̶goricarã majũ jãã ãniña. Bairi mu̶jããrẽ quetibu̶ju̶ ãna, jããrẽ Dios cũ̶ caquetibu̶ju̶roticũrĩcãrõ netõjãñurõ ána mee jãã átiya. 15Bairi jãã pu̶ame aperã mu̶jãã watoapu̶ na caquetibu̶ju̶riquere ĩñarĩ, “Jãã roque tiere jãã quetibu̶ju̶wu̶,” jãã ĩẽtĩnucũña. Jesucristo mena nemojãñurõ mu̶jãã catũ̶goñatutuapeere borã, nemojãñurõ mu̶jããrẽ jãã quetibu̶ju̶gaya. Bairo bori, Dios jããrẽ cũ̶ caquetibu̶ju̶roticũrĩcãrõrẽ bairo jĩcãrõ tũ̶nia quetibu̶ju̶rã jãã átiya. 16Bairo mu̶jããrẽ quetibu̶ju̶yaparori bero, mu̶jãã jũ̶goye nocãrõ cayoaropu̶ macããna cũ̶ãrẽ caroa quetire quetibu̶ju̶ñesẽãgarã jãã átiya. Bairãpu̶a aperã caquetibu̶ju̶ri majã na caquetibu̶ju̶ñesẽãrĩcã macãrĩpu̶ jãã quetibu̶ju̶rápérigarã. “ ‘Aperã na capaariquere ẽmarã mu̶jãã átiya,’ jããrẽ ĩ bu̶su̶pairema,” ĩrã, to ũnopu̶ jãã ánucũgaya. 17Tore bairo Dios yaye cũ̶ã ĩ quetibu̶ju̶ya: “Ni jĩcãũ̶ ũcũ̶, ‘Caroaro majũ yu̶ paamasĩña,’ cũ̶ majũã cũ̶ caátimasĩrĩjẽ mena caĩnucũũ̶ cũ̶ caãmata, ‘Dios nocãrõ caroaro cũ̶ camasĩrĩjẽ jũ̶gori roque, caroaro yu̶ paamasĩña,’ cũ̶ caĩpee pu̶ame roque ñuña,” ĩ quetibu̶ju̶ya Dios yaye bu̶su̶rique. 18Bairi ni jĩcãũ̶ ũcũ̶ cũ̶ majũã cũ̶ paariquere cũ̶ caĩñajesoro netõjãñurõ wapacu̶tiya cũ̶ paariquere Dios cũ̶ caĩñajesorije pu̶ame roque.

will be added

X\