2 CORINTIOS 1

1Yu̶, Pablo cawãmecu̶cu̶, Dios yu̶re cũ̶ caboro jũ̶gori Jesucristo yau̶ apóstol cũ̶ caquetibu̶ju̶rotijou̶ majũ yu̶ ãniña. Bairi marĩ yau̶, Timoteo mena mu̶jãã ñubueri majã Dios ya poa macããna Corinto macã macããnarẽ mu̶jãã woajou̶ yu̶ átiya. Tunu bairoa aperã Dios ya poa macããna Acaya yepa nipetiropu̶ macããna cũ̶ãrẽ woajou̶ yu̶ átiya. 2Bairi tunu marĩ Pacu̶ Dios, marĩ Quetiupau̶ Jesucristo mena caroare mu̶jãã na jonemoáto. Caroaro yerijõrõ ãnimasĩrĩqũẽ cũ̶ãrẽ mu̶jãã na jonemoáto. 3Diore cũ̶ marĩ basapeoto, marĩ Quetiupau̶ Jesucristo Pacu̶ majũrẽ. Cũ̶ã, marĩ Pacu̶ marĩrẽ caĩñamai majũ niñami. Cũ̶, Dios pu̶ame tocãnacãnia roro popiye marĩ catũ̶goñayapapuaro, marĩ yeri ñuo joroque caátinucũũ̶ niñami. 4Cũ̶ pu̶ame nipetiro roro popiye marĩ catãmu̶onucũrõ, marĩ ju̶átinemonucũñami. Bairo marĩ cũ̶ caátiere masĩrĩ, marĩ cũ̶ã roro popiye cabairãrẽ na marĩ ju̶átinemomasĩgarã. Marĩrẽ cũ̶ caju̶átinemomasĩrõ jĩcãrõ tũ̶nia marĩ cũ̶ã aperãrẽ na marĩ ju̶átinemogarã. 5Jesucristo yarã ãnirĩ popiye cũ̶ cabairicarorea bairo popiye marĩ bainucũña. Bairo nocãrõ popiye marĩ catãmu̶orõ cãrõã marĩ catũ̶goñatutuapee cũ̶ãrẽ marĩ jonucũñami. 6Bairi jãã cũ̶ã popiye jãã tãmu̶onucũña. Caroaro netõmasĩrĩ Jesucristo mena mu̶jãã catũ̶goñatutuapeere borã, jãã pu̶ame roro popiye jãã tãmu̶onucũña. Bairo popiye jãã cabaimiatacũ̶ãrẽ, jãã ju̶átinemonucũñami Dios, jãã cũ̶ã mu̶jããrẽ jãã caju̶átinemomasĩparore bairo ĩ. Bairo jããrẽ ĩñacõrĩ yua, mu̶jãã pu̶ame tũ̶goñaenarẽ bairo tutuaro mena mu̶jãã nu̶cãnetõmasĩcõãgarã popiye jããrẽã bairo mu̶jãã catãmu̶onucũrĩjẽrẽ yua. 7Bairi mu̶jãã mena caroaro cariape jãã tũ̶goñatutuacõãña. Cariape merẽ jãã tũ̶goñamasĩña: Mu̶jãã cũ̶ã jããrẽã bairo popiye peeto ũno cabairã ãnirĩ, jããrẽã bairo caroaro tũ̶goñatutuarique cũ̶ãrẽ cacũ̶goparã majũ mu̶jãã ãniña Dios cũ̶ cajorije majũrẽ yua. 8Yu̶ yarã, nocãrõ popiye Asia yepapu̶ ãna, jãã catãmu̶orĩqũẽrẽ mu̶jããrẽ jãã quetibu̶ju̶nemoña tunu. Nocãrõ popiye netõõrõ majũ catãmu̶orã ãnirĩ, merẽ jãã nu̶cãjĩãtieticoabujiowu̶. Cayasicoaparãrẽ bairo jãã tũ̶goñawũ̶, ti yepapu̶ ãna. 9Capajĩãecoyasirãrẽ bairo majũ jãã tũ̶goñawũ̶. Bairi, “Marĩ majũ rupau̶ mena marĩ catũ̶goñarõ jũ̶gori marĩ netõmasĩẽna,” ĩ tũ̶goñamasĩrĩ yua, Dios mena jeto jãã tũ̶goñatutuajũ̶gowu̶. Cũ̶ roque camasã cariacoana na caãnimiatacũ̶ãrẽ, tunu na catinemo joroque caácu̶ cũ̶ caãnoi, cũ̶ mena jeto cariape jãã tũ̶goñatutuajũ̶gowu̶. 10Dios pu̶ame roque roro jãã catãmu̶orĩjẽrẽ jãã netõõwĩ. Bairi cũ̶ pu̶ame nocãrõ roro jãã cayasibujiopeere jãã netõõgu̶mi. Caroaro cariape jãã tũ̶goñatutuacõãña jããrẽ Dios cũ̶ canetõõcõãnipeere. 11Tore bairo roro jãã catãmu̶orĩjẽrẽ jãã netõõcõã nigu̶mi, Diopu̶re jãã mu̶jãã cajẽnibojaata. Bairi marĩ nipetiropu̶a jĩcãrõ Diore cũ̶ marĩ basapeogarã, nocãrõ caroaro jãã cũ̶ caátibojarijere ĩñarĩ. Capããrã aperã cũ̶ã tore bairo cũ̶ basapeogarãma. 12Bairãpu̶a, jĩcã wãme jũ̶gori jãã u̶seaniña: Jãã catũ̶goñaata, caroaro jĩcãrõ tũ̶ni ati u̶mu̶recóopu̶re jãã átiãniña. Mu̶jãã watoapu̶re ãna, tore bairo majũ jãã átiãninucũwũ̶. Tiere tũ̶goñarĩ jãã u̶seaninucũña. Tore bairo jãã caátiãnie pu̶ame jãã majũ jãã camasĩrĩjẽ jũ̶gori mee, Dios cañuu̶ ãnirĩ tore bairo jãã átiãnimasĩõ joroque átiyami. 13Jãã cartaaripu̶re ricaati wãme bueri mu̶jãã tũ̶gomawijiao joroque jãã woajoetinucũña. Bairi cariape jĩcãrõ tũ̶ni mu̶jãã catũ̶gomasĩrõ yu̶ boya jãã caátiãninucũrĩjẽrẽ. 14Merẽ bairãpu̶a peeto mu̶jãã tũ̶gomasĩña jãã caátiãninucũrĩjẽrẽ. Nemojãñurõ mu̶jãã camasĩnemorõ boya. Bairi marĩ Quetiupau̶ Jesús ati yepapu̶ cũ̶ catunuatí rũ̶mu̶ caãno, caroaro jĩcãrõ tũ̶ni jããrẽ masĩpetiri bero jãã mena mu̶jãã u̶seanigarã. Jãã cũ̶ã mu̶jãã mena caroaro jĩcãrõ tũ̶ni jãã u̶seanigarã, mu̶jãã caátiãnajẽ cũ̶ãrẽ ĩñarĩ yua. 15Tore bairo mai tiere masĩtũ̶goñarĩ, caãnijũ̶goro mu̶jããrẽ ñiñau̶ ágatũ̶goñamiwũ̶. Tore bairo mu̶jããrẽ yu̶ caĩñau̶ápáta, pu̶gani cãrõ mu̶jããrẽ ñiñañesẽãnemobujiou̶. 16Mai, caãnijũ̶goro, Macedonia yepapu̶ ácú̶, mu̶jãã ñiñanetõájũ̶goga tũ̶goñamiwũ̶. Tore bero, topu̶ caatácu̶ tunuácú̶ mu̶jãã ñiñanetõ ánemogamiwũ̶ tunu. Bairo yu̶ cabaiata, mu̶jãã pu̶ame Judea yepapu̶ yu̶ caátó, yu̶ mu̶jãã ju̶átinemo jobujioricarã. Tore bairo yu̶ catũ̶goñamiatacũ̶ãrẽ, cariape yu̶ baimasĩẽpũ̶. 17Bairi mu̶jããrã, ¿yu̶ caátipeere caroaro cariape tũ̶goñaecũ̶ã, tore bairo ñiñuparĩ? ¿Mu̶jããrẽ ĩtou̶, “Yu̶ águ̶,” o “Yu̶ ápérigu̶,” pu̶gani cãrõ ñinemopeocu̶ti? Tore bairoa jĩcã riseroa ĩrãana, jãã ĩnemopeoetinucũña. 18Dios cũ̶ã caroaro cariape masĩñami tiere. “Mu̶jããrẽ jãã ĩñarágarã,” o “Jãã ápérigarã,” jĩcã riseroa ĩrãana, jãã ĩnemoetinucũña. Tiere Dios cũ̶ã masĩñami. 19Yu̶, Timoteo, bairi Silvano mena, Jesucristo Dios macũ̶ yaye quetire jãã quetibu̶ju̶nucũña. Cũ̶ yaye queti pu̶ame cariape niña. Jĩcã risero ĩmicũ̶ã, ricaati ĩrĩqũẽ mee niña. Torea bairo jãã cũ̶ã jĩcã riseroa jãã bu̶su̶nucũña. 20Jesucristo pu̶ame Dios cũ̶ caĩquetibu̶ju̶jũ̶goyeticũrĩqũẽ nipetirijere caátipeyou̶ majũ niñami. Bairo caãcũ̶ cũ̶ caãnoi, Diore cũ̶ marĩ cabasapeoripau̶ caãno, “Bairo to baiáto,” marĩ ĩnucũña. 21Cũ̶ã niñami Dios mu̶jããrẽ, bairi jãã cũ̶ãrẽ cabesericu̶, Jesucristo yarã marĩ caãnimasĩparore bairo ĩ. Tunu bairoa jããrẽ cũ̶ yaye quetire cajũ̶goquetibu̶ju̶parã majũ jãã cũwĩ. 22Bairi cũ̶ yarã cawãmecu̶na marĩ ãnio joroque marĩ ásupi. Espíritu Santore marĩ yeripu̶ cũ̶ joyupi Dios, “Nipetirije cũ̶ caĩjũ̶goyeticũrĩcãrõrẽã bairo átipeyocõãgu̶mi,” marĩ caĩmasĩparore bairo ĩ. 23Baipu̶a, yu̶ caágatũ̶goñarĩcãrõrẽ bairo Corinto macãpu̶ ápériri, jĩcã riseroa ĩmicũ̶ã, ricaati ĩ mee yu̶ baiya. Mu̶jãã, caroaro mu̶jãã caãnipeere bori mu̶jãã tu̶pu̶re yu̶ ápéwu̶. Tiere Dios cũ̶ã cariape masĩñami. 24Bairi tutuaro mena mu̶jãã caátipeere mu̶jãã átirotigarã mee, tore bairo jãã quetibu̶ju̶nucũña. Merẽ bairãpu̶a Dios mena caroaro catũ̶goñatutuarã mu̶jãã ãniña. Caroaro marĩ nipetiro u̶seanirĩqũẽ mena nemojãñurõ Diore marĩ camasĩparore bairo, mu̶jããrẽ ju̶átinemorã bairo jãã quetibu̶ju̶ya.

will be added

X\