1 TIMOTEO 6

1Apeyera tunu, noa ũna paacoteri majãrẽ bairo caãna na quetiuparãrẽ caroaro cariape nu̶cũ̶bu̶gorique mena na na ĩroáto. Bairo caroaro átiãnajẽrẽ na caátiãmata, ni jĩcãũ̶ ũcũ̶ marĩ Quetiupau̶ Dios ya wãmerẽ bu̶su̶paietigu̶mi. Tunu bairoa marĩ yaye, marĩ caquetibu̶ju̶rije cũ̶ãrẽ roro ĩ bu̶su̶paietigu̶mi. 2Bairi tunu noa ũna paabojari majã Jesucristore catũ̶gou̶sarã ũnarẽ caquetiuparã cũ̶gorã narẽ na baibotioeticõãto. Narẽã bairo na cũ̶ã Jesucristo yarã na caãno jũ̶gori roque netõjãñurõ nu̶cũ̶bu̶gorique mena na na capaabojapee niña. Timoteo, atie yu̶ caquetibu̶ju̶rije nipetirijere na bueri, na mu̶ quetibu̶ju̶wa: 3Ni jĩcãũ̶ ũcũ̶ ricaati quetibu̶ju̶riquere caquetibu̶ju̶nucũũ̶ cũ̶ caãmata, o caroa cañurĩjẽ marĩ Quetiupau̶ Jesucristo yaye quetire caboecu̶ cũ̶ caãmata, cañuecũ̶ niñami. Tunu bairoa Jesucristo yaye macããjẽ caroaro marĩ caátiãnipee quetibu̶ju̶rique macããjẽ cũ̶ãrẽ caboecu̶ cũ̶ caãmata, cañuecũ̶ niñami. 4Cũ̶ ũcũ̶ mu̶nana cabaibotiou̶re bairo caãcũ̶ ñe ũnierẽ camasĩẽcũ̶ majũ niñami. Cũ̶ ũcũ̶ pu̶ame Dios yaye quetire catũ̶gomawijiau̶ ãnirĩ cabu̶goro macããjẽ dope caátiãmanie bu̶su̶riquere quetibu̶ju̶gari ãmeo bu̶su̶rique netõganucũñami. Bairo na caĩrĩjẽ jũ̶gori camasã jĩcããrã yua ãmeo ĩñau̶gorique cu̶taje, ãmeo ĩñaterique cu̶taje, roro ãmeo tutirique cu̶taje, ãmeo yeri ñuetaje mena tuanucũñama ñubueri majã watoare. 5Catũ̶goñarĩqũẽ mána wãtĩ cũ̶ caroyeturicarã tu̶ri cũ̶ãrẽ torea bairo di rũ̶mu̶ ũno roro ãmeo qũẽrĩqũẽ petietinucũña. Caroa cariape macããjẽ quetire camasĩẽna tore bairo roro átiãninucũñama. Dios yaye macããjẽ queti mena wapatarique jetore camasĩrã tore bairo roro átiãninucũñama. 6Bairopu̶a, Dios yaye macããjẽ masĩrĩqũẽ cariapea u̶mu̶recóopu̶ marĩ cawapatapee majũ niña. Tore bairo nocãrõ pairo cũ̶gogu̶mi Dios cũ̶ cajorijere ni ũcũ̶ ãme ati yepapu̶ ãcũ̶ mai cũ̶ cacũ̶gorije ũnie mena cayeriñucõãninucũũ̶. 7Bairi merẽ marĩ masĩña: Ati yepapu̶ marĩ cabuiari rũ̶mu̶rẽ ñe ũnie marĩ jeetaepu̶. Bairi tunu ati yepapu̶re marĩ cariaweyori rũ̶mu̶ caãno cũ̶ãrẽ ñe ũnie marĩ jeápérigarã. 8Ati yepapu̶ ãna marĩ cau̶gapee, marĩ cajãñapee cũ̶ã ãnipeticõã cabaiata, ¿dopẽĩrã marĩ tũ̶goñarĩqũẽ paibujiocu̶ti? Tie marĩ cacũ̶gorije mena merẽ cau̶seanicõãniparã marĩ ãniña. 9Aperã pu̶ame narẽ caru̶sarijere cacũ̶gopetirã nimirãcũ̶ã, pairo cacũ̶gogari majã ãnirĩ petoaca na cacũ̶gorije mena tũ̶goña yapapuajãñunucũñama. Bairo tũ̶goñamacãrĩ yua, carorije átaje ati u̶mu̶recóo macããjẽrẽ tãmu̶onucũñama. Camasãrẽ cateerije, na yasio joroque caátie macããjẽrẽ átinucũñama yua. Tie ũnie cañuetie cabuipacorije niña. 10Bairi camasã bu̶tioro dinerore na cau̶garipearije jũ̶gori tocãnacã wãme carorije macããjẽ átiãnajẽrẽ tãmu̶onucũñama. Jĩcããrã Diore catũ̶gou̶sarã cũ̶ã dinerore u̶garipeamirã yua, Jesucristo mena tũ̶goñatutua jãnacõãñupã. Bairo jãnarĩ yua, na majũã roro popiye tãmu̶onucũñama. 11Mu̶ roque, Timoteo, Dios yau̶ ãnirĩ nipetiri wãme cadinero u̶garipeanucũrã na cabaiãnajẽ cu̶tiere bairo baieticõãña. Atore bairo pu̶ame ãnajẽcu̶sa: Cariape átiãnajẽ jetore átiãña. Tunu Dios cũ̶ caborore bairo mu̶ caátipee jetore átiãnajẽcu̶sa. Jesucristo mena tũ̶goñatutuacõãña. Caroaro camasãrẽ na maiña. Roro popiye tãmu̶omicũ̶ã, mu̶ paariquere jãnaeticõãña. Aperã camasã cũ̶ãrẽ di rũ̶mu̶ ũno na baibotioeticõãña. 12Tutuaro ãmeo qũẽĩrẽ bairo mu̶ cũ̶ã mu̶ catutuarije mena tocãnacã rũ̶mu̶a Jesucristo mena tũ̶goñatutuacõã ninucũña. Bairo cũ̶ mena mu̶ catũ̶goñatutuajãnaeticõãta, cũ̶ tu̶pu̶ mu̶ ãnicõã ninucũgu̶. Bairi merẽ mu̶rẽ Dios yau̶ mu̶ ãnio joroque ĩ, mu̶ beseyupi. Bairo mu̶ cũ̶ cabesero bero yua, mu̶ pu̶ame capããrã na caĩñajoropu̶, “Cariapea Jesucristo mena yu̶ tũ̶goñatutua ninucũgu̶,” mi quetibu̶ju̶wu̶. 13Marĩ Pacu̶ Dios nipetiro ati u̶mu̶recóo macããjẽ cacatiãnajẽ cu̶tiere to catiãnio joroque caácu̶ niñami. Bairi cũ̶ macũ̶ Jesucristo cũ̶ã Poncio Pilatore, Dios yaye macããjẽrẽ cariapea cũ̶ caquetibu̶ju̶ricu̶ niñami. Bairi cũ̶, Dios, Jesucristo mena cũ̶ caĩñajoropu̶ atiere mu̶ yu̶ átirotiya: 14Nipetirije Dios mu̶ cũ̶ caátirotiricarorea bairo wasoaricaro mano caroaro átiãnajẽcu̶sa. Bairo jĩcãrõ tũ̶ni mu̶ caápata, ñe ũnie jũ̶gori noa ũna mu̶rẽ bu̶su̶paietigarãma. Tore bairo caroaro jeto mu̶ áticõã ninucũgu̶ marĩ Quetiupau̶ Jesucristo nemo cũ̶ catunuetari rũ̶mu̶pu̶ yua. 15Dios pu̶ame cũ̶ cacõrĩcã yu̶tea caetaro, cũ̶ macũ̶ Jesucristore cũ̶ jogu̶mi tunu ati yepapu̶re. Cũ̶, jĩcãũ̶ã niñami Dios cañuu̶, tore bairo caátimasĩ majũ. Quetiuparã reyes caãna Quetiupau̶ Rey majũ niñami. Ati u̶mu̶recóo macããna quetiuparã netõrõ Quetiupau̶ cañuu̶ majũ ñiñami. 16Cũ̶ pu̶ame yeri capetietiere caãnijũ̶goropu̶a cacũ̶gojũ̶goricu̶ jĩcãũ̶ã caãcũ̶ niñami. Tunu bairoa nocãrõ majũ cũ̶ caasiyabatorije noa ũna camasã na caetaetie mena caãcũ̶ niñami. Ni jĩcãũ̶ ũcũ̶ camasocu̶ cũ̶rẽ qũĩñañaecũ̶mi. ¡Cũ̶rẽ nipetiro camasã cũ̶ na ĩroáto! ¡Cũ̶ catutuãnie cũ̶ã to petieticõãto! Bairoa to baiáto. 17Timoteo, ati u̶mu̶recóo macããjẽrẽ pairo cacũ̶gorãrẽ atore bairo na mi quetibu̶ju̶wã: “Aperã netõrõ caãnimajũrã jãã ãniña,” ĩ tũ̶goña botioeticõãña. Tunu bairoa ati u̶mu̶recóo macããjẽ mu̶jãã cacũ̶gorije jetore tũ̶goñarĩ tũ̶goña u̶seanieticõãña. Ati u̶mu̶recóo macããjẽ mu̶jãã cacũ̶gorije mena mu̶jãã netõmasĩẽtĩgarã. Ati u̶mu̶recóo macããjẽrẽ tũ̶goñarĩcãrõ ũnorẽã, Dios pu̶ame roquere cũ̶ tũ̶goñatutuaya mu̶jãã cũ̶ canetõparore bairo ĩrã yua. Cũ̶ roque nocãrõ pairo nipetiro marĩrẽ caru̶sarijere marĩ jomasĩñami. Bairo cũ̶ cajorije pu̶ame cabu̶goroa cũ̶ cajorije mee niña. Marĩ yaye caãnipee majũ nigaro. 18Nipetiro caroa macããjẽ cũ̶ãrẽ na mu̶ átirotiwa. Capee apeye ũnierẽ cacũ̶gori majã ãnirĩ capee wãme caroa macããjẽ átiãnajẽrẽ na átiãmarõ. Cotericaro mano na cacũ̶gorijere maiena, cabopacarãrẽ na batori na ju̶átinemoáto. 19Bairo na caápata, u̶mu̶recóopu̶ nemojãñurõ caroa macããjẽ majũrẽ cũ̶gogarãma. Tunu bairoa ati yepapu̶ ãna mai, caroaro cariape átiãnicõã ninucũgarãma. 20Timoteo, mu̶ roque caroaro tũ̶goñatutuarique mena cariape, Dios mu̶rẽ cũ̶ caátiroticũrĩcãrõrẽ bairo áticõã ninucũña. Aperã cabu̶goro macããjẽ dope caátiãmanie bu̶su̶riquere quetibu̶ju̶gari na caãmeo bu̶su̶rique netõnucũrĩjẽ ũnierẽ di rũ̶mu̶ ũno tũ̶gopeoeticõãña. Tie ũnie na cabu̶su̶rique netõrĩjẽ pu̶ame, “Cariape marĩ camasĩpee niña,” na caĩbotiomiatacũ̶ãrẽ, cabu̶goro macããjẽ quetibu̶ju̶rique niña. 21Jĩcããrã tie ũnie quetibu̶ju̶riquere caquetibu̶ju̶nucũrã pu̶ame tocãrõã tũ̶gomawijiari yua, Jesucristo mena cariape tũ̶goñatutua jãnacõãñama. Marĩ Quetiupau̶ caroa macããjẽrẽ mu̶jãã cũ̶ jonemoáto mu̶jãã nipetirore. Tocãrõã niña atie queti yu̶ cawoaturije.

will be added

X\