1 TIMOTEO 5

1Apeyera, Timoteo, cabu̶cu̶ camasĩrĩ majõcu̶ cũ̶ãrẽ tutuaro mena cũ̶ quetibu̶ju̶eticõãña. Caroaro nu̶cũ̶bu̶gorique mena pu̶ame roque, mu̶ pacu̶re bairo cũ̶ beyoya. Cawãmarã cũ̶ãrẽ mu̶ bairãrẽ bairo caroaro na ĩñaña. 2Cabu̶toa rõmirĩ cũ̶ãrẽ mu̶ pacore mu̶ canu̶cũ̶bu̶goparorea bairo nu̶cũ̶bu̶gorique mena na ĩñaña. Cawãmarã carõmia cũ̶ãrẽ roro tũ̶goñarĩqũẽ mano mu̶ bairãrẽ bairo caroaro nu̶cũ̶bu̶gorique mena na ĩñaña. 3Tunu apeyera cawapearã rõmirĩrẽ noa ũna narẽ caju̶ána na camanicõãta, mu̶ roque na ju̶átinemoña ñubueri majã mena. 4Apeo cawapeao capũnaacu̶co, o capãrãmerãcu̶co ninucũñamo. Cõ ũcõ pu̶amerẽ cõ pũnaa, o cõ pãrãmerã roque caãnijũ̶goro cõrẽ na caju̶átimasĩpee niña. Na, cawĩmarã na caãno, na pacu̶a narẽ caroaro na cabu̶tioriquere merẽ masĩñama. Torena, na cũ̶ã jĩcãũ̶ pũnaa na pacu̶a mena na caátipeere caátiparã ũna ãnirĩ caroaro na na ju̶átinemoáto na pacoa cawapearã rõmirĩrẽ. Tiere bairo na pacu̶a narẽ mairĩ, na na caju̶átatorea bairo na cũ̶ã na na caju̶áto ñujãñuña na pacoare. Tiere Dios cũ̶ã ĩñajesojãñuñami. 5Baiopu̶a jĩcãõ cariapea camanapu̶ mácõ cawapeao jĩcãõ majũã catuao pu̶ame Dios mena jeto tũ̶goñatutuariquere macãnucũñamo. Bairo Dios jetore tũ̶goñamacãrĩ yua, u̶mu̶reco, ñami bu̶tioro cũ̶ jẽni ãninucũñamo. 6Aperã cawapearã rõmirĩ pu̶ame caroaro átiãmerĩnucũñama. Na rupau̶ caborore bairo bu̶tioro carorije macããjẽrẽ u̶garipeapai nucũñama. Na ũna cayeri mánarẽ bairo Diore camasĩẽna niñama. Na ũna rõmirĩrẽ dopẽĩrã na ju̶átia mano. 7Atie yu̶ caátirotirije nipetirijere na quetibu̶ju̶ya to macããna mu̶ yarã ñubueri majãrẽ. Tore bairo caroaro na mu̶ quetibu̶ju̶wa to macããna ñubueri majã caãna na caátimasĩpeere na caátiãniparore bairo ĩ, tocãnacã rũ̶mu̶a yua. 8Noa ũna na yarãrẽ na caju̶átipeere caátigaena cañuena niñama. Bairo caãna ãnirĩ, netõjãñurõ na paco, o na ñicõ ũcõrẽ na caju̶átigaeticõãta roque, Dios mena tũ̶goñatutuariquere caboenarẽ bairo majũ tuacõãñama. Bairi Diore camasĩẽna netõjãñurõ cañuena majũ caãna niñama na ũna. 9Apeyera cawapearã rõmirĩ wãmerẽ mu̶ cawoaturi pũrõpu̶re cabu̶toa rõmirĩ majũ jetore na woatuya. Sesenta cũ̶marĩ bui jeto cacũ̶marĩ cũ̶gorãrẽ na woatuya. Tunu bairoa jĩcãũ̶ã camanapu̶ cu̶timirĩcãrãrẽ na woatuya ñubueri majãrẽ caju̶átinemoparã cawapearã rõmirĩrẽ. 10Ati wãme ũnie caroare cõ caátie jũ̶gori camasã na camasĩõ ũcõrẽ cõ woatuya: Caroaro cõ pũnaarẽ cabu̶tiomasĩrĩcõ, aperã etari majã cũ̶ãrẽ caroaro caĩroarico, o tũ̶gou̶sari majãrẽ nu̶cũ̶bu̶gori na ru̶porire cacoserico, cabopacarã cũ̶ãrẽ caroaro caju̶átinemorico ũcõrẽ cõ borotiya ñubueri majãrẽ caju̶átipaore. Tore bairo nipetiri wãme caroa macããjẽrẽ caátimasĩpetigaricarã ũnarẽ na mu̶ woatuwa ti pũrõpu̶re. 11Bairi aperã cawapearã rõmirĩ carocajãñurĩ cacũ̶ma cũ̶gorãrẽ na mu̶ woatuepa ti pũrõ cawapearã wãme catusari pũrõpu̶re. Na ũna pu̶ame na rupau̶ caborore bairo átigari, Cristore cũ̶ tũ̶gou̶sa jãnacõãnucũñama. Bairo Jesucristore tũ̶gou̶sajãnarĩ yua, manapu̶ bonemonucũñama tunu. 12Bairo na camanapu̶ borije jũ̶gori, “Jãã cũ̶ã, jãã caĩrõrẽ bairo jãã ju̶átigarã ñubueri majãrẽ,” na caĩcũrĩqũẽrẽ bairo na caáperie wapa pairo cawapa cũ̶gorã tuabujiorãma. 13Tunu bairoa aperã ya wiirire tocãnacã wiipu̶a jããrĩ, boyetiepe ñesẽãnucũñama. Bairo wiiri jetore caĩñañesẽãrã ãnirĩ yua, cateeyepairã capaagaena rõmirĩ tuanucũñama. Paaetaje jeto meerẽ bainucũñama. Ape wiipu̶ átí, roro bu̶su̶painucũñama. Bairo bu̶su̶pairi yua, roro tocãnacã wãme bu̶su̶riquere ricaati jeto quetibu̶ju̶nucũñama. Camasã marĩ cabu̶su̶etie cabu̶goro macããjẽ ũnierẽ bu̶tioro ocayoja ñesẽãnucũñama carõmia cawapearã cawãmarã rõmirĩ caãna. Na ũnarẽ boetirotiya ñubueri majãrẽ caju̶átiparãrẽ. 14Torena, cawãmarã rõmirĩ cawapearã caãna yoaro mee na manapu̶ cu̶paro. Bairo manapu̶ cu̶tiri yua, na pũnaa cu̶paro. Na pũnaa pacoa na ãmarõ. Aperã na pesua roro na caátiere ĩñarĩ, roro na na bu̶su̶paio joroque carorije macããjẽ jetore na átiãmerĩcõãto. 15¡Tame! Merẽ jĩcããrã cawapearã rõmirĩ Jesucristore cũ̶ aweyorãrẽ bairo cũ̶ yaye quetire tũ̶gou̶sagaetiyama. Wãtĩ cũ̶ caborore bairo jeto átiãninucũñama. Tiere tũ̶goñarĩ yu̶ yapapuajãñuña. 16Bairi apeyera jĩcã wii macããcõ, Diore catũ̶gou̶sao caãcõ cõ ya wiire cawapearã rõmirĩ na caãmata, narẽ cõ caju̶átinemopee majũ niña. Ñubueri majã pu̶ame popiye na na caju̶áperiparore bairo ĩõ, cõ majũã cõ ya wii caãna cawapearã rõmirĩrẽ cõ qũẽnoáto. Bairo cõ caátimasĩata yua, ñubueri majã pu̶ame cawapearã rõmirĩ cariapea noa ũna narẽ caju̶ána cacũ̶goena jetore na ju̶átimasĩgarãma. 17Timoteo, apeyera, to macããna ñubueri majã na quetiuparã cabu̶toa caroaro jĩcãrõ tũ̶ni cajũ̶goãnimasĩrãrẽ bu̶tioro na na ĩroáto. Tore bairo netõjãñurõ na ĩroáto Dios yaye macããjẽ jetore quetibu̶ju̶ri cabueãninucũrĩ majã roquere. Ñubueri majã caroaro jĩcãrõ tũ̶ni na na wapatiáto na quetiuparã quetibu̶ju̶ri majãrẽ na capaarije wapa. 18Torea bairo ĩ quetibu̶ju̶ya Dios ya tutipu̶ na cawoaturique cũ̶ã: “Wecu̶ trigore cawãĩãmejoreire cũ̶ risero jiyabiaeticõãña. Cũ̶ caátiwẽrĩjẽrẽ cũ̶ cũ̶ã cũ̶ u̶gaáto,” ĩ woatuyupa ti tutipu̶. Tunu bairoa aperopu̶ atore bairo ĩ woatuyupa: “Ni ũcũ̶ paari majõcu̶ caãcũ̶ cũ̶ capaarije wapa wapatamasĩñami,” ĩ quetibu̶ju̶ woatuyupa. Torena, tore bairo caroaro na wapatiáto na caquetibu̶ju̶rije wapa na quetiuparãrẽ ñubueri majã nipetiro. 19Timoteo, apeyera, cabu̶toa camasĩrĩ majãrẽ jĩcãũ̶ ũcũ̶ roro cũ̶ caĩbu̶su̶jãata, caãnorẽ bairo cũ̶ tũ̶goeticõãña. Pu̶garã, o itiarã ũna roro na caátajere caĩñarĩcãrã ãnirĩ caãnorẽ bairo jĩcãrõ tũ̶ni na caĩbu̶su̶jãata roque, cariape na tũ̶goya. 20Aperã ñubueri majã mena macããna jĩcããrã carorije macããjẽrẽ caátiãninucũpairã pu̶amerã tutuaro mena na mu̶ quetibu̶ju̶wa nipetiro ñubueri majã na catũ̶goropu̶. Bairo narẽ mu̶ caquetibu̶ju̶ ĩñorĩjẽrẽ tũ̶gori, na cũ̶ã narẽ ĩñacõrĩ roro na caáperiparore bairo ĩ, tore bairo na mu̶ quetibu̶ju̶wa. 21Yu̶ yau̶, Timoteo, atiere mu̶ yu̶ átirotiya, Dios, Jesucristo, bairi ángelea majã cañurã cũ̶ cabesericarã cũ̶ã na caĩñajoro: Atie yu̶ caátiroticũrĩjẽ nipetirijere na átiroticõã ninucũña, ni ũcũ̶rẽ ĩñabesericaro mano. Apei mu̶ bapa ũcũ̶ majũ caãcũ̶ cũ̶ãrẽ nipetiro jĩcãrõ tũ̶nia na átiroticõã ninucũña. 22Caroaro camasã na caátiãnierẽ mu̶ camasĩẽpata, ni jĩcãũ̶ ũcũ̶rẽ cũ̶ ru̶poa ñigãpeoeticõãña Dios cũ̶ caĩñojoro mu̶ wãmorĩ mena. Bairo mu̶ caápata, mu̶ cũ̶ã carorije macããjẽ na caátiãnierẽ bairo caácu̶ mu̶ tuabujiou̶. Bairi nipetiro carorije macããjẽ átiãnajẽrẽ di rũ̶mu̶ ápeia nicõãña. 23Apeyera, Timoteo, mu̶ pu̶ame paaro pũnirĩqũẽ mena mu̶ rianucũña. Torecu̶, baipu̶a oco jetore mu̶ etiepa. Ape watoara u̶se oco cũ̶ãrẽ peeto ũno, jĩcãnipu̶ jeto mu̶ etinucũwã, bu̶tioro mu̶rẽ capaaro pũnietiparore bairo ĩ. 24Apeyera tunu camasã jĩcããrã roro na caátiere nipetiro marĩ ĩñanucũña, marĩ Quetiupau̶ roro popiye na cũ̶ caátiparo jũ̶goyepu̶a mai. Aperã pu̶amerã yasioropu̶ roro na caátie jũ̶gori marĩ ĩñaetinucũña. Catu̶sari rũ̶mu̶pu̶ roquere nipetiro camasã roro na caátiãnajẽrẽ marĩ ĩñapeticõãgarã. 25Torea bairo camasã caroa macããjẽ na caátiãninucũrĩjẽ cũ̶ãrẽ nipetiro caroaro marĩ ĩñapeticõãnucũña. Bairopu̶a jĩcã wãme caroaro na caátaje marĩ caĩñaetaje caãmata, caberopu̶ marĩ ĩñapeyocõãgarã.

will be added

X\