1 TIMOTEO 4

1Timoteo, apeyera atore bairo cariapea marĩ masĩõñami Espíritu Santo. Ati u̶mu̶recóo caãnitu̶sari yu̶tea caãno jĩcããrã camasã tocãrõã Jesucristore cũ̶ tũ̶gou̶sajãnarĩ cũ̶ mena tũ̶goñatutua jãnagarãma. Caĩtopairã, wãtĩ yeri pũna jũ̶gori ricaati na caquetibu̶ju̶rije mena caquetibu̶ju̶rã pu̶amerẽ na tũ̶gou̶sajũ̶gogarãma. 2Camasã pu̶ame na, catũ̶gomasĩẽna, caĩtopairãrẽ na tũ̶gou̶sagarãma. Na ũnarẽ na catũ̶goñarĩjẽpu̶ nicõãña roro na caátiãnigarije. Bairi di rũ̶mu̶ ũno carorijere ju̶tiricaro mano ĩtogarãma camasãrẽ caĩtopairi majã yua. 3Na, caĩtopairã pu̶ame wãmo jiyarotietinucũñama camasãrẽ. Tunu bairoa u̶garique cũ̶ãrẽ jĩcã wãmerĩ u̶garotietinucũñama. Dios yarã, cariape quetire camasĩrã nipetiri wãme u̶garique na cau̶gapee cũ̶ cacũrĩqũẽrẽ u̶garã, “Jãã mena mu̶ ñujãñuña,” ĩrĩ na cau̶gamasĩrĩjẽ caãnimiatacũ̶ãrẽ, tore bairo ĩ quetibu̶ju̶nucũñama caĩtopairã. 4Nipetiri wãme u̶garique Dios cũ̶ cacũrĩqũẽ caroa jeto niña. Bairi nipetirije u̶gariquere teena, “Dios, jãã mena mu̶ ñujãñuña,” ĩrĩ marĩ cau̶gaata, ñujãñuña. 5Dios cũ̶ caĩquetibu̶ju̶cũrĩcãrõrẽã bairo marĩ cau̶gapee u̶gariquere marĩ cajẽnipeorije jũ̶gori caroa cañurĩjẽ majũ tuacõãña. 6Atie nipetirije mu̶ yu̶ caquetibu̶ju̶rijere caroaro jĩcãrõ tũ̶ni to macããnarẽ na mu̶ caquetibu̶ju̶ata, caroaro cariape Jesucristo cũ̶ carotirore bairo caácu̶ majũ mu̶ tuagu̶. Tunu bairoa caroa macããjẽ quetire jãnaecũ̶ã, nemojãñurõ Dios mena tũ̶goñatutuanemorĩqũẽrẽ mu̶ caátiãnimasĩ jũ̶goata, caroaro cariape Jesucristo cũ̶ carotirore caácu̶ majũ mu̶ tuagu̶. 7Mu̶ roque Timoteo quetibu̶ju̶rique carorije catũ̶gomasĩã manie macããjẽrẽ tũ̶gopeoeticõãña. Tocãnacã rũ̶mu̶a Dios cũ̶ caborore bairo mu̶ caátiãnipee caãno cãrõrẽ átinemojũ̶goyecu̶ti ãnajẽ jetore átiãninucũña. 8Marĩ rupau̶re qũẽnorã, tocãnacã rũ̶mu̶a maijũ̶gorique mena marĩ caqũẽnoãninucũrĩjẽ ñujãñuña. Caroarã marĩ rupau̶ mena catiñurã nigarã, tocãnacã rũ̶mu̶a u̶sawãcãrĩqũẽ cañurĩjẽ niña bairopu̶a. Bairo tie cañurĩjẽ caãnimiatacũ̶ãrẽ, tie netõjãñurõ cañurĩjẽ niña tocãnacã rũ̶mu̶a Dios cũ̶ caborore bairo átiãnajẽ caãno cãrõ átinemo jũ̶goyecu̶ticõãnajẽ roque. Nipetiro marĩ rupau̶re ñujãñuña tore bairo átaje. Ati u̶mu̶recóore marĩ cacatiãno ũno marĩ ju̶átore bairo ñujãñuña tore bairo átaje. Tunu bairoa ati rupau̶re marĩ cariaro beropu̶ cũ̶ãrẽ caroaro Dios cũ̶ caborore bairo marĩ caátaje jũ̶gori cañurã ñe ũnie cawapa cũ̶goena marĩ tuao joroque átiya. 9Atie yu̶ caquetibu̶ju̶rije caãnorẽ bairo cariape Jesucristo yaye queti majũ niña. Tiere nipetiro camasã ati u̶mu̶recóo macããna caroaro cariape na catũ̶gou̶sapee niña. 10Tore bairo cariape nipetiro na catũ̶gou̶saparore bairo ĩrã, tutuaro paari popiye marĩ tãmu̶onucũña. Marĩ pu̶ame tocãnacã rũ̶mu̶a caãnicõã ninucũũ̶ Dios mena marĩ catũ̶goñatutuacõãnipeere marĩ cũ̶gojũ̶gowu̶. Cũ̶ pu̶ame nipetiro ati u̶mu̶recóo macããnarẽ canetõpau̶ majũ niñami. Tore bairo netõjãñurõ cũ̶ canetõmasĩpee niña marĩ cũ̶ mena catũ̶goñatutuanucũrã roquere. 11Atie nipetirijere na átirotiri, caroaro na mu̶ quetibu̶ju̶wa Timoteo to macããna camasãrẽ. 12Yu̶ yau̶, cawãmau̶ mu̶ ãniña mai. Bairo cawãmau̶ mu̶ caãnie jũ̶gori camasã mu̶rẽ na ĩñateetio joroque caroaro átiãnajẽ cu̶sa. Atore bairo pu̶ame caátiãnipau̶ mu̶ ãniña: Caroa wãme mu̶ caátiere na caĩñacõmasĩparore bairo caroa wãmea bu̶su̶riquecu̶sa. Caroaro nu̶cũ̶bu̶goroa átiãnajẽcu̶sa. Caroaro camasãrẽ na mairĩ, na ju̶átinemoña. Dios mena tũ̶goñatutuari ñe ũnie wapa cũ̶goecu̶ caroaro camasãrẽ mu̶ caquetibu̶ju̶rore bairo caroaro mu̶ yeri mena átiãnajẽcu̶sa. Bairo mu̶ caátiãmata, mu̶rẽ bu̶su̶pairicaro ũnorẽã, caroaro mu̶ caátiãnierẽ ĩñacõrĩ na cũ̶ã caroaro átiãnajẽ cu̶tigarãma mu̶ mena yua. 13Bairi yu̶ yau̶, Timoteo, to mu̶ caãnopu̶ yu̶ caetaparo jũ̶goye tocãnacã rũ̶mu̶a neñanucũrĩ Dios yaye woaturique macããjẽrẽ na quetibu̶ju̶cõã ninucũña ñubueri majãrẽ. Marĩ yarã to macããna catũ̶gou̶sari majã nemojãñurõ Dios yaye macããjẽrẽ na masĩnemo joroque tocãnacã rũ̶mu̶a cariape na quetibu̶ju̶cõã ninucũña. 14Caroa wãme mu̶ caátimasĩpee Dios mu̶ cũ̶ cajoriquere átiãni jãnaeticõãña camasã mena. Mai, ñubueri majã quetiuparã cabu̶toa camasĩrĩ majã pu̶ame Dios cũ̶ camasĩõrĩjẽ jũ̶gori di wãme caroaro camasã mena mu̶ caátiãnipeere mu̶ uparotirã, na wãmorĩ mena mu̶ ru̶poa buire ñigãpeowã. Tiere mu̶ pu̶ame masiriticũẽtĩcõãña. 15Bairi mu̶ pu̶ame atie nipetirije yu̶ caquetibu̶ju̶rijere caroaro nipetiro mu̶ catũ̶gojĩãtiro cãrõ tũ̶gopeoya. Tore bairo caroaro jĩcãrõ tũ̶ni mu̶ caátiãnimasĩata, “Timoteo roque caroaro jĩcãrõ tũ̶ni Dios yaye macããjẽrẽ nemojãñurõ átiãnijũ̶goyami,” ĩrĩ miñagarãma nipetiro camasã. 16Caroaro tũ̶goñamasĩña mu̶ caátiãnierẽ. Aperãrẽ mu̶ caquetibu̶ju̶rije cũ̶ãrẽ caroaro tũ̶goñamasĩrĩ na quetibu̶ju̶ya. Nipetiro tocãnacã wãme mu̶ caátiãnierẽ jĩcãrõ tũ̶ni áticõã ninucũña. Tore bairo caroaro mu̶ caátiãnimasĩata, mu̶ majũ cũ̶ã mu̶ carorije wapare mu̶ netõmasĩcõãgu̶. Mu̶ cabuerijere catũ̶gou̶sari majã cũ̶ã mu̶rẽã bairo netõmasĩjĩãtigarãma.

will be added

X\