1 TIMOTEO 3

1Timoteo, apeyera ni jĩcãũ̶ ũcũ̶ caũ̶mu̶, “Ñubueri majãrẽ cajũ̶gobuei majũ yu̶ ãnigaya,” cariape cũ̶ yeripu̶ cũ̶ caĩtũ̶goñaata, ñujãñuña. Tie tũ̶goñarĩqũẽ yu̶ caquetibu̶ju̶rorea bairo cariape niña. Caroa paarique niña. 2Bairãpu̶a, caroarã camasã cañurã jĩcãrõ tũ̶ni caána jetore, na ũna jũ̶gobueri majãrẽ na marĩ boya. Tocãnacãũ̶pu̶a jĩcãõ jeto canu̶mocu̶narẽ na marĩ boya. Tunu bairoa caroaro ãnajẽ cu̶tajere masĩrĩ majã, nu̶cũ̶bu̶goricarã ũnarẽ na marĩ boya. Apero macããna etari majã cũ̶ãrẽ cotericaro mano caroaro mena na bocári na ya wiipu̶ caqũẽnomasĩrã ũnarẽ na marĩ boya. Tunu bairoa ñubueri majã cũ̶ãrẽ caroaro uwiricaro mano caquetibu̶ju̶ ãmoqũẽ masĩrĩcãrãrẽ na marĩ boya. 3Caeticũmupairã, caãmeoqũẽpairã ũnarẽ na marĩ boetiya. Caroarã cañurã, canu̶cũ̶bu̶jarã, dinero cũ̶ãrẽ bu̶tioro majũ caĩroaena ũnarẽ na marĩ boya. 4Tunu bairoa na nu̶mo, na pũnaa jĩcã wii macããnarẽ caroaro cajũ̶goãni ĩñanu̶nu̶je masĩrãrẽ marĩ boya. Bairo cajũ̶goãnimasĩrã ãnirĩ na pũnaa cũ̶ãrẽ caroaro beyori carorije ĩẽna, nu̶cũ̶bu̶gori majã, masĩyu̶ju̶rã cajũ̶goãna ũnarẽ na marĩ boya. 5Na nu̶mo, na pũnaa jĩcã wii macããnarẽ caroaro na cajũ̶go ãnimasĩẽtĩcõãta, ¿dope bairo caroaro jĩcãrõ tũ̶ni Dios ya poa macããnarẽ na qũẽnomasĩbujiocu̶ti? Na ũna caroaro qũẽnomasĩẽnama. Bairi na ũnarẽ marĩ boetiya. 6Torecu̶ yu̶ yau̶, Timoteo, ñubueri majã quetiupau̶ caãnipau̶ ũcũ̶ pu̶ame Jesucristore cawãma tũ̶gou̶sajũ̶gou̶ ũcũ̶ mee cũ̶ ãmarõ. Yoaro merẽ Jesucristore camasĩnetõrĩcũ̶ ũcũ̶rẽ beserotiya. Jesucristore cawãma tũ̶gojũ̶gou̶ cũ̶ caãmata, ape watoara roro tũ̶goñarĩqũẽ wasoari, Diore cabaibotiou̶re bairo tuabujiou̶mi. Tore bairo roro tũ̶goñarĩqũẽ wasoari, wãtĩ cũ̶ã roro cawapa cũ̶gou̶re bairo tuajũ̶goyupi. 7Bairi ñubueri majãrẽ cajũ̶gobuenucũpau̶ pu̶ame ñubueri majã, bairi ñubueri majã mee cũ̶ã na canu̶cũ̶bu̶gou̶ ũcũ̶rẽ marĩ boya. Bairo ñubueri majã mee cũ̶ã na caĩroaena na caãmata, nipetiro camasã na bu̶su̶pai cotebujiorãma. Bairo na bu̶su̶pai coteri yua, wãtĩ cũ̶ carotiro jũ̶gori rori wãme na ĩtoepebujiorãma Dios yayere caboena pu̶ame. 8Torea bairo caroarãrẽ na marĩ boya ñubueri majãrẽ caju̶áti majã diáconoa cũ̶ãrẽ. Camasã cañurã, aperã camasã na canu̶cũ̶bu̶gorã, rorije caĩbu̶su̶ena ũnarẽ marĩ boya. Eticũmu pairique ũnierẽ caboena, roro camasãrẽ átiri cawapata painucũrã ũna cũ̶ãrẽ na marĩ boetiya. 9Cariape macããjẽ Dios ãmerẽ marĩ cũ̶ camasĩõrĩjẽrẽ caroaro catũ̶gou̶sarã, ricaati roro catũ̶goñarĩqũẽ cu̶perãrẽ na marĩ boya. Tie cariape macããjẽ quetirea marĩ cũ̶ã marĩ tũ̶gou̶sanucũña. 10Bairãpu̶a, ñubueri majãrẽ caju̶áti majãrẽ bairo na cajããparo jũ̶goye, jĩcã wãmerẽ na áticõñarotiya, na capaamasĩrĩjẽrẽ na ĩñagarã. Cabero yua, caroaro ñe ũnie ru̶saeto jĩcãrõ tũ̶ni na caátijĩãtimasĩata, tocãrõã ñubueri majãrẽ caju̶áti majã diáconorẽ bairo na jõña. 11Torea bairo na nu̶moa cũ̶ã caroaro na caãnajẽcu̶to ñuña. Camasã na canu̶cũ̶bu̶gorã carorije ocayojaye bu̶su̶pairique ũnie mána na ãmarõ na nu̶moa cũ̶ã. Tunu bairoa nu̶cũ̶bu̶gorã nipetiro na cabu̶su̶ri wãmerẽã bairo jĩcãrõ tũ̶ni caána ũna rõmirĩ na ãmarõ. 12Jĩcãũ̶ diácono caãnigau̶ pu̶ame jĩcãõã cũ̶ canu̶mocu̶to ñuña. Cũ̶ nu̶mo, cũ̶ pũnaa jĩcã wii macããna cũ̶ãrẽ caroaro cajũ̶goãni ĩñanu̶nu̶je masĩ ũcũ̶ ñuñami diácono cajããpau̶ pu̶ame. 13Bairi noa ũna ñubueri majãrẽ caju̶áti majã diáconoa caroaro camasã mena capaamasĩrã pu̶ame nipetiro camasãrẽ na ĩroaecomasĩñama. Bairo caroaro camasã na na caĩroaro jũ̶gori diáconoa cũ̶ã tũ̶goña uwiricaro mano nemojãñurõ Jesucristo yaye queti, cũ̶ mena tũ̶goñatutuariquere na quetibu̶ju̶ masĩgarãma. 14Yu̶ yau̶, Timoteo, baipu̶a tãmurĩã mu̶rẽ ñiñau̶ águ̶. Bairi atiere cajũ̶goye mu̶ yu̶ quetibu̶ju̶ woajoya. 15Ape watoara tãmurĩã mu̶ tu̶pu̶re yu̶ caetatimaepata, merẽ nipetiro Dios ya poa macããna caroaro na caátiãnimasĩpee ũnierẽ mu̶ camasĩparore bairo ĩ, mu̶ yu̶ quetibu̶ju̶ woajoya. Bairi mu̶ pu̶ame merẽ tiere camasĩ ãnirĩ ñubueri majã quetiuparã caãniparãrẽ mu̶ majũã na mu̶ besemasĩgu̶. Merẽ mu̶ masĩña: Dios caãnicõãninucũũ̶ ya poa macããna cũ̶ yaye cariape macããjẽ quetire ĩroari nemojãñurõ camasãrẽ caquetibu̶ju̶netõcõã ninucũrã majũ ñiñama. 16Cariape merẽ pu̶gani cãrõ tũ̶goñarĩcãrõ mano atore bairo marĩ masĩña. Camasã na camasĩẽtãjẽ Dios yaye buerique nocãrõ caãnimajũrĩjẽ niña: Jesucristo ati yepapu̶re etau̶, marĩrẽ bairo ati rupau̶ mena ñajãwasoari etayupi. Bairo ati rupau̶ nimicũ̶ã, Espíritu Santo mena cayericu̶cu̶ ãnirĩ ñe ũnie cawapa cũ̶goecu̶ majũ tuayupi Dios cũ̶ caĩñajoro. Bairo cũ̶ caãno tunu u̶mu̶recóo macããna Dios cũ̶ caqũẽnorĩcãrã ángelea majãrẽ caju̶átiecoricu̶ majũ ãñupĩ. Bairi tie quetire catũ̶gou̶saricarã tocãnacã camasã poari na quetibu̶ju̶yupa tie quetire. Tie quetire tũ̶gori nipetiropu̶ ati u̶mu̶recóo macããna jĩcããrã cariape tũ̶gou̶sayupa camasã. Tunu bairoa Jesucristore Dios pu̶ame cũ̶ neásúpi cũ̶ ya pau̶ nocãrõ caroaro caãnopu̶ tunu. Merẽ atiere cariape marĩ masĩña. Cabu̶goro macããjẽ quetibu̶ju̶rique mee niña.

will be added

X\