1 TIMOTEO 2

1Yu̶ yau̶, apeyera atore bairo mu̶ yu̶ átirotiya ñubueri majã mena: Mu̶jãã pu̶ame nipetiro ati u̶mu̶recóo macããna cabopacarãrẽ Diopu̶re na jẽnibojanucũña. Bu̶tioro Diore cũ̶ jẽniña, nipetiro ati u̶mu̶recóo macããnarẽ cũ̶ caĩñamainemoparore bairo ĩrã. Bairo cũ̶ mu̶jãã cajẽnirĩjẽrẽ caroaro mu̶jãã cũ̶ cayu̶bojarije jũ̶gori tocãnacã rũ̶mu̶a, “Jãã mena mu̶ ñumajũcõãña,” qũĩ basapeonucũña. 2Marĩ caãni yepa quetiuparã cũ̶ãrẽ Diopu̶re bu̶tioro na jẽnibojarotiya. Tunu bairoa caroaro marĩ caãnipeere carotimasĩrã cũ̶ãrẽ bu̶tioro Diopu̶re na jẽnibojaya. Bairo Diopu̶re marĩ cajẽnibojaata, ñe ũnie mano u̶seanirõ yerijõrõ marĩ ãnicõãgarã marĩ Quetiuparã mena yua. Bairo caroaro marĩ caãmata, Dios cũ̶ãrẽ cũ̶ nu̶cũ̶bu̶gori cũ̶ caborore bairo jeto tocãnacã wãmerẽ marĩ átiãnimasĩgarã. 3Tore bairo marĩ caátiãnie ñujãñuña. Bairo marĩ caátiãnierẽ Dios marĩrẽ canetõpau̶ cũ̶ã caroaro ĩñajeso jãñuñami. 4Dios pu̶ame nipetiro ati u̶mu̶recóo macããna na carorije wapare na canetõpetiro boyami. Bairo bori, nipetiro cariape macããjẽ cũ̶ yaye quetibu̶ju̶riquere marĩ camasĩrõ boyami. 5Merẽ marĩ masĩña: Jĩcãũ̶ã niñami Dios. Tunu bairoa caũ̶mu̶ jĩcãũ̶ã niñami nipetiro ati u̶mu̶recóo macããnarẽ Dios mena caroaro na ãnimasĩõ joroque caácu̶. Cũ̶ã, Jesucristo wãmecu̶tiyami. 6Mai, Jesucristo pu̶ame ẽñotaricaro mano cũ̶ majũã yucu̶pãĩpu̶ papuatuecori riayupi, marĩ carorije wapare nipetiro marĩ netõmasĩõ joroque ĩ. Bairi tie quetire ãmerẽ yua, cũ̶ caquetibu̶ju̶garica yu̶tea caetaro marĩ masĩõũ̶ átiyami. 7Cũ̶ pu̶ame yu̶re cũ̶ yaye quetire caquetibu̶ju̶bojau̶, cũ̶ yau̶ apóstol majũ yu̶ cũwĩ. Bairo yu̶ cũrĩ yua, cũ̶ yaye queti tũ̶goñatutuarique macããjẽ, cariape quetire yu̶ quetibu̶ju̶ rotijowĩ nipetiro judío majã caãmerãrẽ. Atie mu̶jãã yu̶ caĩrĩjẽ cariape niña. Dios cũ̶ majũpu̶a yu̶ quetibu̶ju̶ roticũwĩ. Mu̶jããrẽ ñitoetiya tie mena. 8Bairi yu̶ yau̶, nipetiro caũ̶mu̶a ñubueri majã Diopu̶re na jẽniáto noo na caãnipau̶pu̶ cãrõ. Caroarã na yeripu̶ ãnirĩ Dios cũ̶ caĩñajoro na wãmorĩ mena ñumu̶gõrĩ cũ̶ na basapeoáto. Tunu bairoa na majũ ãmeo asiari, roro ãmeo bu̶su̶rique netõpairique mano Diore na basapeoáto. 9Tunu apeyera carõmia cũ̶ã caroaro nu̶cũ̶bu̶gorique mena na jutii jãñaáto. Caroaro nu̶cũ̶bu̶goroa, baibotioricaro mano na ãnajẽ cu̶paro. Carõmia na rupau̶re wãmagarã, netõnu̶cãrõ majũ na wãmagaeticõãto. Na poa cũ̶ãrẽ netõnu̶cãrĩ wãme majũ na wu̶gapeoeticõãto. Oro, o perla wẽẽrĩ ũnie mena na bu̶sa epeeticõãto. Jutii cawapapaca ũnie cũ̶ãrẽ netõrõ na jãñagaeticõãto carõmia. 10Caroaro carõmia na cajãñarĩqũẽ cu̶tie jũ̶gori nipetiro camasã narẽ na camasĩparo ũnorẽã, caroaro na caátiãnie jũ̶gori pu̶ame roque, “Dios yarã rõmirĩ cañurã niñama,” camasã na na caĩ ĩñapee pu̶ame ñuña. 11Tunu bairoa carõmia bu̶su̶ricaro mano caroaro nu̶cũ̶bu̶gorique mena na tũ̶goáto ñubueri majã quetiuparã na caquetibu̶ju̶rijere. Na bu̶su̶rotieticõãña mu̶jãã caneñarõpu̶re carõmiarẽ. 12Carõmia pu̶ame nipetiro camasã na caneñarõpu̶ na cũ̶ã na caquetibu̶ju̶jũ̶goro yu̶ boetiya. Tunu bairoa caũ̶mu̶a netõrõ carõmia na cabairo yu̶ boetiya. Bu̶su̶ecoa, na caquetibu̶ju̶ro carõmio cõ catũ̶gocõãno yu̶ boya mu̶jãã caneñanucũrõpu̶re. 13Merẽ marĩ masĩña caãnijũ̶goropu̶ cabairiquere: Dios caãnijũ̶goro caũ̶mu̶rẽ cũ̶ qũẽnojũ̶goyupi Adán marĩ ñicũ̶ ãnacũ̶rẽ. Carõmio meerẽ qũẽnojũ̶goyupi. Adárẽ qũẽnorĩ beropu̶ roque, carõmio Evare cõ qũẽnoñupĩ Dios. 14Tunu bairoa Adán mee roro ĩtoecojũ̶goyupi wãtĩrẽ. Carõmio, Eva roque wãtĩrẽ roro ĩtoecori carorije macããjẽrẽ tãmu̶o jũ̶goyupo. 15Bairo cõ caĩtoecoro bero, roro popiye catãmu̶opao Dios cũ̶ cacũrĩcõ nimiocũ̶ã, nipetirije carõmio cõ caátipee Dios cũ̶ cacũrĩqũẽrẽ cõ caátipeyoata, roro cõ caátaje wapare netõmasĩgomo. Tunu bairoa caroaro nu̶cũ̶bu̶goro Dios mena tũ̶goñatutuari, caroaro ãmeo mairĩ camasãrẽ cõ caju̶átinemoata, cõ netõgu̶mi Dios. Caroarã, ñe ũnie na rupau̶pu̶ carorije wapa cũ̶goena na caãnimasĩata, na netõgu̶mi Dios carõmiarẽ.

will be added

X\