1 TIMOTEO 1

1Yu̶, Pablo, Jesucristo yau̶, apóstol majũ yu̶ ãniña. Dios marĩ carorije wapare canetõrĩcũ̶ pu̶ame marĩ Quetiupau̶ Jesucristo mena cũ̶ yaye quetire cũ̶ caquetibu̶ju̶rotijoricu̶ yu̶ ãniña. Bairi marĩ pu̶ame Jesucristo mena cariapea catũ̶goñatutuarã marĩ ãnicõã ninucũña cabero marĩ cũ̶ caátipee jũ̶gori. 2Timoteo, mu̶rẽ ati cartare mu̶ quetibu̶ju̶ woajou̶ yu̶ átiya. Mu̶ pu̶ame yu̶ macũ̶rẽ bairo caãcũ̶ mu̶ ãniña, yu̶ caquetibu̶ju̶riquere tũ̶gou̶sari bero yu̶rea bairo Jesucristo mena mu̶ catũ̶goñatutuarije jũ̶gori. Bairi marĩ Pacu̶ Dios, marĩ Quetiupau̶ Jesucristo mena caroare mu̶ cũ̶ jonemoáto. Caroaro ãmeo maimasĩrĩqũẽ cũ̶ãrẽ mu̶ cũ̶ jonemoáto. Tunu bairoa caroaro yerijõrõ ãnajẽ cu̶taje cũ̶ãrẽ cũ̶ jonemoáto mu̶rẽ. 3Mai, Macedonia yepapu̶ yu̶ caápáro jũ̶goye, Efeso macãpu̶ mu̶rẽ yu̶ tuarotiwu̶. Bairo mu̶rẽ topu̶ tuarotiri, atore bairo mu̶ ñiwũ̶: “Yu̶ yau̶, Timoteo, ato Efesopu̶a mu̶ tuawa mai. To Efeso macããna jĩcããrã ricaati caquetibu̶ju̶nucũrãrẽ caroaro na mu̶ beyowa,” mu̶ ñicũwũ̶. 4“Tunu bairoa apeye quetibu̶ju̶rique, na ñicũ̶jãã ãnana na caátiãnajẽ na cajãnagaetie cũ̶ãrẽ na quetibu̶ju̶nemoeticõãto tocãrõã,” ñiwũ̶. “Tiere na catũ̶gou̶saetiparore bairo ĩ, na mu̶ quetibu̶ju̶wa ricaati cabueri majãrẽ,” mu̶ ñiwũ̶. Tie quetibu̶ju̶rique pu̶ame ãmeo bu̶su̶rique netõrĩcãrõrẽ bairo jeto caátie ninucũña. Tie ũnie buerique cañuetie niña. Bairi tie pu̶ame tũ̶goñatutuarique mena nemojãñurõ Dios marĩ cũ̶ caátigajũ̶goriquere tũ̶gou̶sa masĩã manio joroque caátie niña. 5Mai, yu̶ pu̶ame atore bairo bori, tore bairo mu̶ yu̶ quetibu̶ju̶ roticũwũ̶ to Efeso macããnarẽ: “Ti macã macããna tocãnacãũ̶pu̶a caroaro yeri ñurĩqũẽ Dios cũ̶ cajorije mena na ãmeo maiáto. Caroa wãme na tũ̶goñarĩqũẽ cu̶paro. Tunu bairoa cariapea jĩcãrõ tũ̶ni ĩtoricaro mano Dios mena na tũ̶goñatutuáto,” ñi tũ̶goñajũ̶gowu̶. 6Bairo yu̶ caĩquetibu̶ju̶miatacũ̶ãrẽ, jĩcããrã to macããna tũ̶gomawijiacoayama. Bairo tũ̶gomawijiari yua, ñerẽ átiri mee tie jetore ãmeo bu̶su̶rique netõcõã ninucũñama. 7Tunu bairoa Dios camasãrẽ cũ̶ caátiroticũrĩqũẽrẽ cajũ̶gobueri majã majũ niganucũñama, na majũã na caátirotirijere catũ̶gojĩãtiena nimirãcũ̶ã yua. Tunu bairoa, “Jĩcãrõ tũ̶ni majũ buerã jãã átiya,” caĩrã nimirãcũ̶ã, na cabuerije cũ̶ãrẽ tũ̶gomasĩẽtĩnucũñama. 8Bairãpu̶a marĩ masĩña: Moisés ãnacũ̶ cũ̶ caátiroticũrĩqũẽ caroa cañurĩjẽ ãno baiya, tie carotigajũ̶goricarore bairo jĩcãrõ tũ̶ni marĩ caápata. 9Bairi tocãnacã wãme roticũrĩqũẽ caátiãnierẽ marĩ tũ̶goñanemoto. Caroaro camasã caátiãni majãrẽ popiye na tãmu̶o joroque na áperiya. Carorã roquere torea bairo átimasĩña. Ati wãme rorije caána roquere popiye na tãmu̶o joroque na átiya roticũrĩqũẽ: Roro caasiapairã, roro cabaibotiopairã, cañuena, carorije macããjẽrẽ caána, Diore boetiri Dios yaye bueriquere canu̶cũ̶bu̶goena, na pacu̶, na paco cũ̶ãrẽ capajĩãrepairã, aperã capajĩãrĩ majã ũnarẽ popiye na baio joroque caátie niña. 10Tunu bairoa roro na rupau̶ macããjẽ mena caũ̶mu̶a o carõmia cũ̶ã caátiepepairã, caũ̶mu̶a carõmio mena átato ũnorẽã, na majũã roro caána, carõmia cũ̶ã torea bairo na rupau̶ mena roro caátiepepairã, aperã camasãrẽ cajerutinucũrã, caĩtopairã, aperã, “Caãnorẽ bairo Dios mena jãã ĩña,” mu̶nana Dios cũ̶ caĩñajoro caĩrã, na, nipetirore popiye na baio joroque na átimasĩña Moisés ãnacũ̶ cũ̶ caroticũrĩqũẽ pu̶ame. Bairo pu̶ame roque ĩgu̶ ñiña: Nipetiro camasã cañurĩjẽ Dios yaye quetibu̶ju̶rique macããjẽ nipetirijere caboena popiye na baio joroque ĩ cũñupĩ Dios tie roticũrĩqũẽrẽ marĩ ñicũ̶jãã ãnana mena. Roro na caátiãnierẽ na masĩáto ĩ, tiere cũñupĩ Dios. 11Yu̶ yau̶, atie caroa cañurĩjẽ buerique pu̶ame Dios yaye macããjẽ queti camasãrẽ cũ̶ canetõrĩqũẽ queti majũ niña. Bairi Dios pu̶ame nocãrõ cañuu̶ majũ ãnirĩ tie cũ̶ yaye quetire yu̶ quetibu̶ju̶ rotijowĩ nipetiro camasãrẽ. 12Marĩ Quetiupau̶, Jesucristo pu̶ame nocãrõ tũ̶goñatutuariquere yu̶ jowĩ, cũ̶ carotirore bairo yu̶ átio joroque ĩ. Bairo yu̶ átiri, cũ̶ yaye quetire yu̶ quetibu̶ju̶ roticũwĩ. Bairo tiere tũ̶goñarĩ yu̶ pu̶ame bu̶tioro, “Yu̶ mena mu̶ ñumajũcõãña,” cũ̶ ñi basapeonucũña yua. 13Tũ̶goñijate mai, cajũ̶goyepu̶re Jesucristo yaye macããjẽrẽ roro ñi boyetiepenucũwũ̶. Bairo roro ĩ boyetieperi yua, cũ̶ yaye quetire catũ̶gou̶sarã cũ̶ãrẽ roro popiye na baio joroque na yu̶ átiepenucũwũ̶. Bairo caácu̶ yu̶ caãnimiatacũ̶ãrẽ, Dios pu̶ame bu̶tioro ñiñamaiñupĩ. Mai, yu̶ pu̶ame Jesucristore camasĩẽcũ̶ majũ yu̶ ãmu̶. Torecu̶, roro yu̶ caátaje cũ̶ãrẽ, “Carorije ãno,” ñi masĩẽpũ̶ mai. 14Bairo nocãrõ majũ yu̶re caĩñamai ãnirĩ, nocãrõ pairo cũ̶ yaye macããjẽ caroare yu̶ jowĩ. Bairo yu̶ jori, cũ̶ mena jĩcãrõ tũ̶ni tũ̶goñatutuamasĩrĩqũẽ cũ̶ãrẽ yu̶ jowĩ. Tunu bairoa Jesucristo jũ̶gori Diore nocãrõ marĩ camaimasĩnucũrĩjẽ cũ̶ãrẽ yu̶ jowĩ. 15Apeyera atie Jesucristo yaye queti yu̶ caquetibu̶ju̶pee caãnorẽ bairo cariape niña. Tiere nipetiro camasã ati u̶mu̶recóo macããna na camasĩpee niña: Jesucristo pu̶ame ati u̶mu̶recóopu̶re asúpi, nipetiro roro na caátie wapa cabuicu̶narẽ na netõũ̶ acú̶. Mai, yu̶ roque roro majũ, carorije yu̶ caátaje jũ̶gori cawapacu̶cu̶ majũ yu̶ ãnimiwũ̶ aperã netõjãñurõ. 16Tore bairo roro majũ carorije cawapacu̶cu̶ yu̶ caãno jũ̶gori, Dios pu̶ame bu̶tioro ñiñamaiñupĩ. Tore bairo ñiñamaiñupĩ Dios, cũ̶ macũ̶ Jesucristo pu̶ame nipetirije camasã mena cũ̶ caátigarijere yu̶ mena jũ̶gori cũ̶ caáti ĩñomasĩparore bairo ĩ. Torecu̶, yu̶ pu̶ame yua, aperã carorije caátipairã cũ̶ã yu̶ cabairijere masĩrĩ, Jesucristore tũ̶gou̶sari yeri capetietie na cacũ̶gojĩãtipeere ĩ, tore bairo yu̶ ámi Dios. 17Bairi yu̶ yau̶ Timoteo, qũĩroari cũ̶ marĩ basapeoto Diore: ¡Bairi marĩ Quetiupau̶ Rey majũrẽ cũ̶ catutuarije tocãnacã rũ̶mu̶a to ãnicõã ninucũáto! To petieticõãto marĩ Quetiupau̶ caãnicõãninucũũ̶ yaye. ¡Di rũ̶mu̶ ũno cariaecu̶, caĩñabócamácũ̶, jĩcãũ̶ã Dios caãcũ̶ tocãnacã rũ̶mu̶a cũ̶ ãnicõã ninucũáto! Bairoa to baiáto. 18Timoteo, yu̶ yau̶, yu̶ macũ̶rẽ bairo caãcũ̶, atiere mu̶ yu̶ átiroticũña. Tiere caroaro tũ̶gopeoya: Caroaro tũ̶goñatutuarique mena camasãrẽ na jũ̶goátiãña. Caroa macããjẽrẽ tũ̶goñarĩqũẽcu̶sa. Tirũ̶mu̶pu̶ macããna marĩ yarã Dios cũ̶ camasĩõrõ jũ̶gori, mu̶, caroaro mu̶ caátipeere na caĩjũ̶goyeticũrĩcãrõrẽ bairo caroaro jeto áticõãña. Jesucristo mena tocãnacã rũ̶mu̶a tũ̶goñatutuacõã ninucũña. Aperã jĩcããrã Jesucristo cũ̶ carotirore bairo jĩcãrõ tũ̶ni átimasĩẽtĩrĩ, cũ̶ mena na catũ̶goñatutuarijere jãnacõãñupã. 20Tore bairo tãmu̶oñupã Himeneo, apei Alejandro mena. Roro Diore na cabotiorije jũ̶gori tore bairo baiyupa. Bairi narẽ yu̶ pu̶ame na masacatiáto ĩ, “Mai, wãtĩ narẽ roro cũ̶ caátigaro cãrõ roro na cũ̶ áticõãmarõ,” ñi cũwũ̶. Tocãrõã yua, Diore roro qũĩ boyetiepeetigarãma.

will be added

X\