1 TESALONICENSES 5

1Yu̶ yarã, marĩ Quetiupau̶ cũ̶ catunuatípee pu̶amerã, “Ti yu̶tea, o cũ̶ muipu̶ majũ atígu̶mi,” mu̶jãã yu̶ caĩwoatujopee mee niña. 2Merẽ caroaro majũ mu̶jãã masĩña: Marĩ Quetiupau̶ pu̶ame, “Ti rũ̶mu̶ etagu̶mi,” caĩmasĩã mani rũ̶mu̶ majũ tunu etagu̶mi. Jĩcãũ̶ yajari majõcu̶ ñami camasĩã mano cũ̶ cayajau̶ etarore bairo camasĩã mano etagu̶mi ati yepapu̶re. 3“Caroaro yerijõrõ merẽ marĩ ãnicõãña. Ñe ũnie maniña,” camasã na caĩãno, caãno tu̶saroa, na cayasipa rũ̶mu̶ na etagaro. Carõmio bairi rupau̶ caãcõ, pũnaa cu̶tigo, caãno tu̶saroa cõ cawisiojũ̶gorore bairo na etagaro. Cõ pu̶ame cõ capũnaa cu̶tipeere dope bairo rutimasĩẽtĩñamo. Torea bairo dope bairo rutimasĩẽtĩgarãma na cayasipee narẽ caetarijere. 4Yu̶ yarã, mu̶jãã pu̶ame canaitĩãrõpu̶ caãnarẽ bairo mu̶jãã baietiya. Bairi mu̶jããrẽ, marĩ Quetiupau̶ cũ̶ catunuetari rũ̶mu̶ pu̶ame yajari majõcu̶re eta acu̶oricarore bairo mu̶jãã camasĩẽto mu̶jãã eta acu̶oetigaro. 5Nipetiro mu̶jãã caroa macããjẽrẽ caána ãnirĩ cabusuro macããna u̶mu̶reco macããnarẽ bairo caãna mu̶jãã ãniña. Carorije macããjẽrẽ caátipairã, ñami canaitĩãrõ macããnarẽ bairo caãna mee marĩ ãniña. 6Bairi aperã na cabainucũrõrẽ bairo masacatiena cabaicoteetiparã marĩ ãniña. Cacãnirãrẽ bairo baiena, masacatiri caroaro caátiãnicoteparã marĩ ãniña marĩ Quetiupau̶re. 7Camasã cacãnirã ñamirẽ cãninucũñama. Aperã caeticũmupainucũrã cũ̶ã ñamirẽã eticũmunucũñama. 8Marĩ pu̶ame roque cabusuro, u̶mu̶reco macããnarẽ bairo caãna ãnirĩ tocãnacãnia caroa macããjẽ jetore caátiãnicotenucũparã marĩ ãniña ti rũ̶mu̶ caetaparo jũ̶goye. Dios mena marĩ catũ̶goñatutuarije, marĩ caãmeomaimasĩrĩjẽ jũ̶gori wãtĩrẽ marĩ ẽñotagarã. Soldau ãpõã jutiro mena cũ̶ rupau̶re jãñatori cũ̶ caãnorẽã bairo marĩ cũ̶ã Dios marĩ cũ̶ canetõõpeere caroaro marĩ átiãnicotegarã. 9Mai, marĩ, cũ̶rẽ catũ̶gou̶sarã pu̶ame, “Roro popiye cabaiparã nigarãma,” ĩrĩ cũ̶ cabesericarã mee marĩ ãniña. Marĩ Quetiupau̶ Jesucristo jũ̶gori cũ̶ canetõjĩãtiparã majũ roque marĩ ãnijũ̶goyupa. 10Bairi Jesucristo pu̶ame marĩ yaye wapa jũ̶gori yucu̶pãĩpu̶ riayupi. Cacatirã, o cariacoana nimirãcũ̶ã, cũ̶, Jesucristo cũ̶ cacatinemorĩcãrõrẽã bairo marĩ cũ̶ã cũ̶ jĩcãrõ marĩ cacatiãnipeere bou̶, marĩ riabojayupi. 11Bairi mu̶jãã cũ̶ã tocãnacãũ̶pu̶a ãmeo yeri ñuo joroque, yeri tutuarã ãmeo átinemoña. Ãmerẽ tore mu̶jãã caãmeo átiãninucũrõrẽã bairo ãmeo áticõã ninucũña. 12Yu̶ yarã, apeyera atore bairo mu̶jããrẽ jãã átirotiya: Mu̶jãã watoa capaãna, marĩ Quetiupau̶ cũ̶ caborore bairo mu̶jããrẽ caquetibu̶ju̶ jũ̶gonucũrãrẽ nu̶cũ̶bu̶gorique mena na ĩñaña. 13Bairo mu̶jããrẽ caroaro na caju̶átinemorõ jũ̶gori, na ĩroari bu̶tioro na maiña. Tocãnacãũ̶pu̶a ãmeo asiaricaro mano caroaro yeri ñurã ãnicõã ninucũña. 14Tunu bairoa, yu̶ yarã, atie cũ̶ãrẽ mu̶jããrẽ jãã átirotiya: Capaagaena, cateeyepairãrẽ tutuaro mena na quetibu̶ju̶ya. Aperã yapapuarãrẽ bairo caãna cũ̶ãrẽ yeri ñuo joroque na ása. Tunu bairoa cayeri tũ̶goñatutuawẽpũ̶ẽna ũna cũ̶ãrẽ caroaro na ju̶átinemoña. Nipetiro camasãrẽ paju̶tiricaro mano caroaro jĩcãrõ tũ̶ni na quetibu̶ju̶ya. 15Tunu apeyera tũ̶gomasĩña: Ni ũcũ̶ roro mu̶jããrẽ cũ̶ caápata, mu̶jãã pu̶ame cũ̶ã roro cũ̶ átiãmeticõãña. Atore bairo pu̶ame ása: Tocãnacãni jãñurĩpu̶a caroa macããjẽ pu̶amerẽ na átiãmeña. Mu̶jãã majũ cũ̶ã tore bairo átiri, nipetiro camasã cũ̶ãrẽ caroa wãme jetore na átiãninucũña. 16Tocãnacã rũ̶mu̶a u̶seanirõ caroaro áticõã ninucũña marĩ Quetiupau̶ cũ̶ caĩñajoro. 17Di rũ̶mu̶ ru̶saricaro mano tocãnacãnia Diore cũ̶ jẽnicõã ninucũña. 18“Dios, jãã mena mu̶ ñujãñuña,” qũĩ jẽninucũña, nipetiro mu̶jãã caátiãnierẽ ĩñarĩ yua. Jesucristore catũ̶gou̶sarã ãnirĩ tore bairo mu̶jãã caátiãnipeere boyami Dios. 19Mu̶jãã yeripu̶ Espíritu Santo jũ̶gori caroa wãme mu̶jãã caátinucũrĩjẽrẽ to yasio joroque ãmeo ápericõãña. 20Tunu bairoa Dios na cũ̶ camasĩõrõ jũ̶gori caquetibu̶ju̶nucũrã yaye quetire tũ̶goteeticõãña. 21Bairãpu̶a, tũ̶goñamasĩrĩ caroaro tũ̶goña beseya na caquetibu̶ju̶rijere. Caroa wãme na caquetibu̶ju̶rije pu̶amerẽ átiãña. 22Tocãnacã wãme carorije macããjẽrẽ jãnarĩ tunu átinemoeticõãña. 23Torecu̶, marĩ Pacu̶ Dios marĩ yeri ñuo joroque caácu̶ pu̶ame caroarã ñe ũnie wapa cũ̶goena mu̶jãã ãnio joroque cũ̶ áparo. Mu̶jãã rupau̶, mu̶jãã yeri, mu̶jãã camasacu̶tiãnie nipetirore caroarã u̶gueri mánarẽ bairo mu̶jãã cũ̶ áparo Dios, marĩ Quetiupau̶ Jesucristo cũ̶ tunuatíparo jũ̶goye. 24Mu̶jããrẽ cabesericu̶ cañuu̶ majũ niñami. Bairi nipetiro atiere cũ̶ caĩrĩcãrõrẽã bairo átimajũcõãgu̶mi. 25Yu̶ yarã, jãã cũ̶ãrẽ Diopu̶re jãã mu̶jãã jẽnibojanucũwã. 26Marĩ yarã nipetiro catũ̶gou̶sari majãrẽ caroaro nu̶cũ̶bu̶gorique mena na bocári tocãnacãũ̶pu̶a ãmeo jẽninucũña. 27Bairi marĩ Quetiupau̶ cũ̶ carotiro mena nipetiro marĩ yarã ñubueri majãrẽ mu̶jãã yu̶ jũ̶gobue rotijoya ati carta mena yu̶ caquetibu̶ju̶woatujorijere. 28Marĩ Quetiupau̶ Jesucristo caroare mu̶jãã cũ̶ jonemoáto mu̶jãã nipetirore. Tocãrõã niña atie queti yu̶ cawoaturije.

will be added

X\