1 TESALONICENSES 4

1Yu̶ yarã, apeyera marĩ Quetiupau̶ Jesucristo cũ̶ carotiro jũ̶gori atore bairo mu̶jããrẽ jãã átirotiya: Marĩ Pacu̶ Dios cũ̶ caĩñajesorije ũnierẽ mu̶jããrẽ jãã caquetibu̶ju̶ricarorea bairo jĩcãrõ tũ̶ni caroaro áticõã ninucũña. Merẽ torea bairo mu̶jãã átiãniña bairãpu̶a. 2Merẽ mu̶jãã masĩña marĩ Quetiupau̶ Jesucristo cũ̶ carotimasĩrĩjẽ jũ̶gori mu̶jããrẽ jãã caátiroticũrĩqũẽrẽ. 3Caroarã, cũ̶ cajericaworicarãrẽ bairo caãna, cũ̶ yarã ñe ũnie carorije áperã mu̶jãã caãno boyami Dios. Ati rupau̶ mena roro átieperique ũnierẽ áperã, caroaro mu̶jãã caãno boyami. 4Bairi canu̶mocu̶cu̶, cũ̶ nu̶mo majũ mena jeto nu̶cũ̶bu̶gorique mena, ñe ũnie wapacu̶tato mano, caroa wãme cũ̶ caátiãnimasĩrõ ñuña. 5Diore camasĩẽna na rupau̶ caborore bairo, roro átaje mena na caátinucũrõrẽ bairo ápericõãña. 6Tunu bairoa ni jĩcãũ̶ ũcũ̶ apei nu̶mo ũcõrẽ ĩtori, roro cũ̶ átiepeeticõãto. Tore bairo caátipairãrẽ tutuaro mena roro na baio joroque átiyami marĩ Quetiupau̶. Tie nipetirijere merẽ mu̶jããrẽ jãã quetibu̶ju̶ yaparowu̶. 7Mai, Dios pu̶ame, “Roro caátiãna majũ na ãmarõ,” ĩ mee, marĩ beseyupi. Cũ̶ yarã, cũ̶ caricaworicarã caroarã marĩ caãno pu̶amerẽ bou̶, marĩ beseyupi. 8Bairi ni ũcũ̶ atie jãã caátirotirijere cũ̶ caboeticõãta, camasocu̶ ũcũ̶rẽ cũ̶ baibotiou̶ mee baiyami. Dios, mu̶jããrẽ Espíritu Santore cajoricu̶ majũ pu̶ame roquere cũ̶ baibotiou̶ átiyami. 9Apeye, ñubueri majã mena ãmeo mairĩqũẽ macããjẽ pu̶amerã capee mu̶jãã yu̶ caquetibu̶ju̶woatujopee mee niña. Merẽ Dios pu̶ame tocãnacãũ̶pu̶a mu̶jãã ãmeo maimasĩõ joroque mu̶jãã ásupi. 10Merẽ torea bairo nipetiro marĩ yarã ñubueri majã Macedonia yepa macããnarẽ caroaro na mu̶jãã mai ãninucũña. Bairi jãã yarã, nemojãñurõ mu̶jãã caãmeomaimasĩrĩjẽ to ãninemonutuao joroque mu̶jãã caáto roque jãã bomajũcõãña. 11Caroaro yeri jõrõ jãñurĩpu̶a ãnicõã ninucũña. Aperã tu̶ripu̶ patowãcõ ñesẽãẽtĩcõãña. Mu̶jãã majũã mu̶jãã yaye paarique mu̶jãã cacũ̶gorijere caroaro jĩcãrõ tũ̶ni paacõã ninucũña mu̶jããrẽ jãã caquetibu̶ju̶ cũrĩcãrõrẽã bairo yua. 12Tore bairo mu̶jãã caátiãnimasĩata, aperã caroaro nu̶cũ̶bu̶gorique mena mu̶jãã ĩñagarãma. Tunu bairoa dise ũnierẽ cabopacaena majũ mu̶jãã tuagarã, caroaro jĩcãrõ tũ̶ni mu̶jãã capaa ãnimasĩata yua. 13Yu̶ yarã, tũ̶gopeoya: Cariacoatana Jesucristo yarã na cabairije macããjẽ cũ̶ãrẽ mu̶jãã camasĩrõ jãã boya. Tiere mu̶jãã camasĩẽpata, aperã Diore catũ̶gou̶saenarẽ bairo Jesucristo cũ̶ catunuatípee mena mu̶jãã tũ̶goñatutuacoteetibujiorã. Bairi tiere mu̶jãã camasĩrõ jãã boya. 14Merẽ cariape Jesús riacoamicũ̶ã, tunu cũ̶ cacatiriquere marĩ masĩña. Bairo cariape camasĩrã marĩ caãmata, “Jesure cũ̶ cacatioricarorea bairo, cũ̶rẽ tũ̶gou̶sari cariaricarã cũ̶ãrẽ na catiogu̶mi Dios,” marĩ ĩ masĩmajũcõãña. 15Bairi mu̶jããrẽ atore bairo jãã quetibu̶ju̶ya marĩ Quetiupau̶ cũ̶ caquetibu̶ju̶rotiro jũ̶gori: Marĩ Quetiupau̶ nemo cũ̶ catunuatí rũ̶mu̶rẽ mai marĩ, cacatiocõãna pu̶ame, cariaricarã jũ̶goye marĩ jeáecoetigarã. 16Mai, cajũ̶goye jĩcãũ̶ caroti ya riserore marĩ tũ̶gogarã. Jĩcãũ̶ arcángel cũ̶ cabu̶su̶rijere marĩ tũ̶gogarã. Tunu bairoa Dios yaro putiricaro trompeta cũ̶ãrẽ marĩ tũ̶gogarã. Bairi marĩ Quetiupau̶ cũ̶ã cũ̶ majũpu̶a u̶mu̶recóopu̶i ruiatígu̶mi. Bairo cũ̶ caruiató yua, Jesucristore tũ̶gou̶sari cariaricarã pu̶ame catitunujũ̶gogarãma. 17Bairo na cacatinemorõ beropu̶ marĩ ti yu̶teare cacatiãna pu̶ame na jĩcãrõ marĩ jeáecogarã oco poari watoapu̶ yua. Bairo oco poapu̶ áná, marĩ Quetiupau̶re jõbuipu̶ cũ̶ marĩ bocágarã. Bairo marĩ Quetiupau̶re cũ̶ bocáetari, cũ̶ mena tocãnacã rũ̶mu̶a marĩ ãnicõã ninucũgarã. 18Bairi mu̶jãã pu̶ame atie jãã caquetibu̶ju̶rijere tũ̶gori tocãnacãũ̶pu̶a ãmeo yeri ñuo joroque ãmeo átinemoña.

will be added

X\