1 SAN PEDRO 5

1Apeyera tunu yu̶ quetibu̶ju̶nemogaya mu̶jãã, ñubueri majã quetiuparã cabu̶toa camasĩrĩ majãrẽ. Yu̶ cũ̶ã mu̶jããrẽã bairo cabu̶cu̶ camasĩrĩ majõcu̶ ñubueri majã quetiupau̶ yu̶ ãniña. Yu̶a, Jesucristo popiye cũ̶ cabairiquere ñiñawũ̶. Torecu̶, cũ̶ yaye quetire yu̶ quetibu̶ju̶ masĩña. Yu̶ cũ̶ã mu̶jãã, camasĩrĩ majã cabu̶toarea bairo tunu Jesucristo ati yepapu̶ cũ̶ catutuarije mena cũ̶ caetaro ñiñagu̶. Jĩcãrõã nipetiro marĩ ĩñagarã ti rũ̶mu̶ caetarore. 2Dios yarã ñubueri majãrẽ caroaro na ĩñacoteya. Caroaro cariape na quetibu̶ju̶ya mu̶jãã, ñubueri majãrẽ. Mu̶jãã narẽ caroaro cariape na mu̶jãã quetibu̶ju̶ masĩña. Caroaro átato jesoro Dios cũ̶ caborore bairo cariape na quetibu̶ju̶ya. Rotimajũrĩcãrãrẽ bairo ápericõãña. Cabuerã mu̶jãã caãnoi, pairo mu̶jãã cawapatapee cũ̶ãrẽ tũ̶goñaeticõãña. Caroaro yerijõrõ átiãña mu̶jãã paarique ñubueriquere. 3Tutuaro mena na mu̶jãã quetibu̶ju̶epa camasãrẽ. “Jãã roque jãã rotimasĩña ñubueri majãrẽ,” mu̶jãã ĩ tũ̶goñaepa. “Narẽ mairĩ roque caroaro mena na marĩ quetibu̶ju̶garã. Caroaro mena na marĩ átirotigarã ñubueriquere,” mu̶jãã ĩ tũ̶goñagarã. Bairo ĩrĩ caroaro ãnajẽcu̶sa, bairo mu̶jãã caátiãnierẽ ñubueri majã cũ̶ã ĩñacõrĩ caroaro na caátiãniparore bairo ĩrã. 4Bairo narẽ caroaro mena mu̶jãã cajũ̶goãnimasĩata, marĩ Quetiupau̶ Jesucristo mu̶jãã mena u̶seanigu̶mi. Tunu ati yepapu̶ cũ̶ cabauetari rũ̶mu̶ caãno mu̶jãã jogu̶mi caroa yericu̶taje capetietie majũrẽ yua. Caroaro mu̶jãã caátiãnajẽ wapa di rũ̶mu̶ ũno cariaetie majũrẽ mu̶jãã jogu̶mi marĩ Quetiupau̶. 5Torea bairo átiãña mu̶jãã, cawãmarã cũ̶ã. Cabu̶toa camasĩrĩ majã na caátirotirore bairo caroaro átiãña. Nu̶cũ̶bu̶gorique mena na caquetibu̶ju̶rijere caroaro na tũ̶gou̶saya. Tocãnacãũ̶pu̶a mu̶jãã nipetiro ñubueri majã nu̶cũ̶bu̶gorique mena caroaro ása cabu̶toa na caquetibu̶ju̶rijere. “Jãã majũ cũ̶ã jãã rotimasĩña,” ĩ tũ̶goñaeticõãña. Torea bairo profeta majã cũ̶ã ĩ quetibu̶ju̶yupa: “Dios pu̶ame ni ũcũ̶ caĩtũ̶goñabotiori majõcu̶ cũ̶ caátigarijere ẽñotanucũñami. Apei caĩbotiogaecu̶, caroaro na caĩrõrẽ bairo caátiãnimasĩ roquere caroaro cũ̶ ju̶átimasĩñami Dios cañuu̶ ãnirĩ,” ĩ quetibu̶ju̶yupa profeta majã ãnana. 6Bairi Diore cabaibotiorãrẽ bairo baieticõãña. “Dios netõrõ jãã masĩña,” ĩ tũ̶goñaeticõãña. “Dios jeto jĩcãũ̶ã masĩñami,” ĩ tũ̶goñacõãña cariapea. Bairo ĩ tũ̶goñarĩ caroaro mu̶jãã caãmata, Dios pu̶ame cũ̶ caborica yu̶tea caetaro rotimasĩrĩqũẽ majũrẽ mu̶jãã jogu̶mi. 7Tunu bairoa Dios mu̶jããrẽ maimajũcõãñami. Caroaro mu̶jãã ĩñapeoyami. Bairi nipetirije dise ũnie mu̶jãã catũ̶goñamacããrĩjẽrẽ Diopu̶re cũ̶ quetibu̶ju̶netõõña. Cũ̶ mena tũ̶goñatutuaya. 8Caroaro tũ̶goñaqũẽnoña. Tũ̶goñamasĩña. Wãtĩ marĩ pesuu̶ merẽ yaijũãũ̶ waibu̶toare u̶gagu̶ cũ̶ cauwacoterore bairo marĩ yasio joroque átigu̶ cotei baiyami. Bairi masacatiri caroaro ãnajẽcu̶sa. Mu̶jãã yasioremi wãtĩ. 9Dios mena mu̶jãã catũ̶goñatutuãnierẽ jãnaeticõãña. Bairoa marĩ Quetiupau̶ Jesucristo mena tũ̶goñatutuacõãña. Wãtĩ cũ̶ cabu̶su̶jãrĩjẽrẽ jĩcã wãmeacã ũno tũ̶gou̶saeticõãña. Tore bairo jeto popiye baiyama nipetiro ati u̶mu̶recóopu̶re Diore catũ̶gou̶sari majã mu̶jããrẽ bairo cabairã, mu̶jãã yarã cũ̶ã. Merẽ tiere mu̶jãã masĩña. 10Bairãpu̶a, jĩcã yu̶tea cãrõã roro mu̶jãã tãmu̶ogarã. Cabero yua, Dios pu̶ame cañurã, cariape caãna majũ mu̶jãã átigu̶mi. Cariape catũ̶goñarã, catũ̶goñatutuarã majũ mu̶jãã átigu̶mi. Cũ̶ mena mu̶jãã catũ̶goñatutuaro jũ̶gori, tunu bairoa mu̶jããrẽ camaimajũũ̶ ãnirĩ cũ̶ caboricarorea bairo mu̶jãã jogu̶mi caroare. Jesucristo mena mu̶jãã caãnie jũ̶gori jĩcãrõ tũ̶nia tore bairo mu̶jãã átigu̶mi marĩ Pacu̶ Dios. 11Cũ̶ jetorea cũ̶ carotimasĩrĩjẽ to ãmarõ. Tocãnacã rũ̶mu̶a to ãnicõã ãmarõ. Bairoa to baiáto. 12Yu̶ yarã, tocãrõã mu̶jããrẽ ñi quetibu̶ju̶ woajoya. Atie petoaca ati carta mena mu̶jãã yu̶ caquetibu̶ju̶jorijere marĩ yau̶ Silvano yu̶ woatubojayami. Cũ̶ pu̶ame cañuu̶ Dios mena catũ̶goñatutuau̶ niñami. Torecu̶, yu̶ baire bairo caãcũ̶ cũ̶ ñiñanucũña Silvanorẽ. Bairi ati carta mena mu̶jãã, yeri tũ̶goñatutuarã, mu̶jãã ãnio joroque átigu̶, mu̶jãã yu̶ quetibu̶ju̶ woajoya. Apeye cũ̶ãrẽ cariapea caãnorẽ bairo Dios mu̶jããrẽ camai ãnirĩ caroa cũ̶ cajoãnierẽ mu̶jãã camasĩparore bairo ĩ, yu̶ quetibu̶ju̶ woajoya. ¡Mu̶jãã pu̶ame tie queti mena tũ̶goñatutuacõãña! 13Ati macã Babilonia cawãmecu̶ti macã macããna, mu̶jãã ñurotijoyama. Na cũ̶ã mu̶jããrẽã bairo Dios cũ̶ cabeserica poa macããna niñama. Apei Marcos cawãmecu̶cu̶ yu̶ macũ̶rẽ bairo caãcũ̶ cũ̶ã mu̶jãã ñurotijoyami. 14Tunu mu̶jããrẽ ñinemoña: Caroaro mena ãmeo mairĩ ãmeo bocáya jĩcã majãrẽ bairo. Nipetiro mu̶jãã Jesucristo yarãrẽ caroa yericu̶taje mu̶jãã cũ̶ jonemoáto marĩ Pacu̶ Dios. Bairoa to baiáto. Tocãrõã niña atie queti yu̶ cawoaturije.

will be added

X\