1 SAN PEDRO 4

1Bairi mu̶jãã cũ̶ã Jesucristo cũ̶ majũ rupau̶ mena popiye cũ̶ catãmu̶orĩqũẽrẽ tũ̶goñarĩ popiye mu̶jãã cabaipeere mu̶jãã ẽñotaetigarã. “Popiye marĩ cabairo ñugaro,” mu̶jãã ĩ tũ̶goñagarã. Ni ũcũ̶ caroare átimicũ̶ã roro popiye cũ̶ catãmu̶oata, roro átajere canetõnu̶cãrĩcũ̶ ãnirĩ carorijere cajãnarĩcũ̶rẽ bairo tuacõãñami. 2Bairo caãcũ̶ ãnirĩ yua, ati yepapu̶ cũ̶ caãni rũ̶mu̶rẽ Dios cũ̶ caborore bairo jeto átiãnimasĩñami. Ati yepa macããna na rupau̶ caborore bairo jeto na caátiãnorẽ bairo átiãmerĩñami yua cũ̶ ũcũ̶. 3Nocãrõ yoaro jĩcã yu̶tea cãrõ Diore camasĩẽna na caátiãnorẽ bairo mu̶jãã cũ̶ã roro mu̶jãã átiãmu̶. Carorije macããjẽ mu̶jãã rupau̶ cabori wãme ũnie jetore mu̶jãã átiãninucũwũ̶. Bose rũ̶mu̶ caãno nu̶cũ̶bu̶goricaro mano roro majũ mu̶jãã awajañesẽãnucũwũ̶. Ti rũ̶mu̶ caãno cacũmuorĩjẽrẽ nocãrõ pairo etinetõrĩ roro mu̶jãã cũmunucũwũ̶. Tunu bairoa camasã na cawericarã ũna carorãrẽ na mu̶jãã ĩroanucũwũ̶. 4Ãme roquere tore bairo mu̶jãã átiãninemoẽtĩña. Roro netõrõ mu̶jãã caátiãnajẽrẽ mu̶jãã áperiya. Bairo roro caátiãnana nimirãcũ̶ã, ãmerẽ caroaro mu̶jãã caátiãnierẽ ĩñarĩ, mu̶jãã baparã caãnimirĩcãrã pu̶ame roro mu̶jããrẽ ĩ bu̶su̶nucũñama. Pu̶gani cãrõ tũ̶goñanemonucũñama, carorã caãnimirĩcãrã cañurãrẽ bairo mu̶jãã cayeri wasoarijere ĩñarĩ yua. 5Na, cañuena roquere marĩ Pacu̶ Dios caĩñabesegajũ̶goricu̶ majũ na ĩñabesegu̶mi. Cacatirã, cariaricarã nipetirore na ĩñabesegu̶mi na yaye wapare ti rũ̶mu̶ caetaro yua. 6Torecu̶na, marĩ ñicũ̶jãã cariaricarã ãnana cũ̶ãrẽ merẽ caroa queti Dios cũ̶ canetõõrĩqũẽrẽ na quetibu̶ju̶yupi Jesús, na cũ̶ã Espíritu Santo Dios Yeri mena na ãmarõ, na yerire na yasieticõãto ĩ. Bairãpu̶a, na cũ̶ã nigarãma camasã nipetirore cũ̶ caĩñabeseri rũ̶mu̶ caãno cũ̶ãrẽ. Na cũ̶ã jĩcãrõ tũ̶nia ĩñabese ecogarãma, camasã marĩrẽ bairo caãnana ãnirĩ. 7Apeyera mu̶jãã ñiña: Merẽ ati u̶mu̶recóo capetipa rũ̶mu̶ cõñarõ baiya. Torena, masacatirique mena caroaro ãnajẽcu̶sa. Nu̶cũ̶bu̶gorique mena tocãnacãnia Diore cũ̶ jẽnicoteãninucũña ti rũ̶mu̶ caetaparo jũ̶goye. 8Tunu bairoa tocãnacãũ̶pu̶rea mu̶jãã caãmeomaiãnie to ãmarõ. Bairo caroaro mu̶jãã caãmeomaiãnimasĩata, aperã yaye wapare na mu̶jãã masiriyobojamasĩbujiorã. Cañurĩjẽ macããjẽ pu̶amerẽ tũ̶goñarĩ carorijere mu̶jãã átijãnacõãgarã yua. 9Tunu bairoa tocãnacãũ̶pu̶rea caroaro mena na bocáya caetari majãrẽ. Na qũẽnoña mu̶jãã ya wiiripu̶ nu̶cũ̶bu̶gorique mena. Yasioroacapu̶ roro na ĩ bu̶su̶paieticõãña caetari majãrẽ. 10Nipetirije caroa wãme cañurĩjẽ Dios cũ̶ cajoriquere caroaro cacũ̶gomasĩrã ãnirĩ na ju̶átinemoña aperãrẽ. Marĩ Pacu̶ Dios tocãnacãũ̶pu̶rea cũ̶ cajogaro cãrõ caroa wãme marĩ caátiãnimasĩpeere marĩ joyupi. Ti wãme Dios cũ̶ cajorica wãme jĩcãrõ tũ̶nia aperãrẽ na ju̶átinemoña. Mu̶jãã caãmeoju̶átijĩãtiro cãrõ ãmeo ju̶átinemoña. 11Bairi ni jĩcãũ̶ ũcũ̶ mu̶jãã mena macããcũ̶ Dios yayere quetibu̶ju̶ri majõcu̶ cũ̶ caãmata, caroaro cariape cũ̶ quetibu̶ju̶áto Dios yaye quetire. Apei, ãmeo ju̶átinemomasĩrĩqũẽrẽ marĩ Pacu̶ Dios cũ̶ cajoricu̶ cũ̶ caãmata, cũ̶ cũ̶ã Dios cũ̶ catutuarije cũ̶ cajorije mena caroaro cũ̶ ju̶átinemoáto. Tore bairo jeto na átiãmarõ nipetiro, Dios caroa wãme cũ̶ cajoricarã cãrõ. Tore bairo na átiãmarõ nipetiro camasã Jesucristo jũ̶gori Diore na cabasapeoparore bairo. Cũ̶ jĩcãũ̶rẽã basapeorique to ãmarõ. Cũ̶ carotimasĩrĩjẽ to petieticõãto. Ãnicõã ninucũgaro. Bairoa to baiáto. 12Yu̶ bairãrẽ bairo caãna, yu̶ camairã, tũ̶goña acu̶eticõãña roro popiye mu̶jãã cabaipeere. Aperã Diore camasĩẽna roro majũ mu̶jããrẽ na caáto ĩñarã, “¡Agotã! ¿Nopẽĩrã tocãrõ roro popiye marĩ baio joroque marĩ na átiyati?” ĩ tũ̶goña yapapuaeticõãña. Tie popiye bairiquere mu̶jãã camasĩẽtĩẽ ũnie majũrẽ bairo ĩñaeticõãña. 13Bairo pu̶ame baiya: Jesucristo popiye cũ̶ catãmu̶orĩcãrõrẽã bairo mu̶jãã cũ̶ã cũ̶ yarã ãnirĩ roro popiye mu̶jãã baigarã. Cũ̶, cũ̶ cabairicarore bairo cabairã ãnirĩ tũ̶goña u̶seaniña. Tore bairo mu̶jãã caãmata, netõjãñurõ pairo nigaro u̶seanirĩqũẽ tunu nemo cũ̶ catunuatí rũ̶mu̶ caãnorẽ. Cũ̶ mena u̶seanirĩ mu̶jãã ãnigarã yua ti rũ̶mu̶ caetaro. 14Bairi tunu Jesucristo yarã mu̶jãã caãno jũ̶gori roro popiye cabairã u̶seanirĩ ãña mu̶jãã, aperã roro na caĩeperi majã nimirãcũ̶ã. U̶seanirĩ ãña mu̶jãã roro na caĩeperã. Mu̶jãã roque Espíritu Santo, Dios nocãrõ catutuau̶ Yeri majũrẽ cacũ̶gorã mu̶jãã ãniña. Tocãnacãnia mu̶jãã mena ãnicõã ninucũñami Espíritu Santo Dios Yeri majũ. 15Apeyera tunu jĩcããrã Diore camasĩẽna camasãrẽ na pajĩãñama. Aperã yajanucũñama. Apeye cũ̶ãrẽ roro na caãmeoĩrõ na mena bu̶su̶nemonucũñama. Tore bairo na cabairoi, roro popiye na baio joroque na átiyama na quetiuparã. Narẽ bairo ápericõãña mu̶jãã roque. 16Narẽ bairo caáperã mu̶jãã mena macããna jĩcããrã na caãnimiatacũ̶ãrẽ, Jesucristo yarã na caãnie jũ̶gori roro popiye na cabaiata, tiere tũ̶goña boboeticõãña. Marĩ Pacu̶ Dios roquere cũ̶ basapeoya, cũ̶ yarãrẽ bairo cawãmecu̶na ãnirĩ. 17Merẽ ati rũ̶mu̶rĩrẽ etaro baiya marĩ cũ̶ yarãrẽ Dios cũ̶ caĩñabesejũ̶gopa rũ̶mu̶. Marĩ, cũ̶ ya poa macããna caĩñabesejũ̶gomajũcõãũ̶ ãnirĩ, ¿marĩ berore nocãrõ popiye na baio joroque na cũ̶ ácu̶ati cũ̶rẽ catũ̶gou̶saena roquere yua? Roro popiye na baio joroque na átigu̶mi Dios cũ̶ yaye quetire catũ̶gou̶saetana roquere. 18Cañuu̶ jĩcãũ̶ Diore catũ̶gou̶sau̶ ũcũ̶ cũ̶ caãmata, dope ĩẽcũ̶ majũ popiyepũ̶ĩna netõjĩãtimasĩñami Dios cũ̶ caĩñajoro. Bairi roro caána Diore cabaibotiorã roque dope átinetõjĩãtiecoenama. Netõõrõpu̶ yasimajũcõãgarãma. 19Bairi Dios cũ̶ caborore bairo, roro popiye cabairi majã nimirãcũ̶ã, caroa macããjẽrẽ áticõãña. Tiere jãnaeticõãña. Nipetiro ati u̶mu̶recóo macããjẽrẽ caátacu̶ mena jetoa tũ̶goñatutuacõãña. Cũ̶, jĩcãũ̶ã mu̶jãã netõõgu̶mi mu̶jãã yerire. Mu̶jããrẽ cũ̶ caĩjũ̶goyeticũrĩcãrõrẽã bairo átimajũcõãgu̶mi.

will be added

X\