1 SAN PEDRO 3

1Mu̶jãã, carõmia camanapũ̶ãcu̶na cũ̶ã, mu̶jãã manapũ̶ã na carotirore bairo caroaro ása. Na ĩroaya mu̶jãã manapũ̶ãrẽ. Caroaro cariape ãnajẽcu̶sa, jĩcããrã Diore caĩroaena caroaro jĩcãrõ tũ̶ni mu̶jãã caátiere ĩñarĩ cũ̶ na catũ̶gou̶saparore bairo ĩrã. Noa ũna na caquetibu̶ju̶rije mee, caroaro mu̶jãã caátiãnierẽ ĩñacõrĩ roque na cũ̶ã tũ̶gou̶sajũ̶gogarãma Jesucristore. 3Mu̶jãã, carõmia jĩcããrã netõõ nu̶cãjãñurõpu̶ mu̶jãã wãmaganucũña mu̶jãã rupau̶ bui macããjẽrẽ. Caroaro netõjãñurõ mu̶jãã wu̶gapeoganucũña. Tunu bairoa oro ũnie cawapacu̶tie mena mu̶jãã wãmorĩrẽ mu̶jãã jããganucũña. Caroa cawapapacarije ũnie jutii cũ̶ãrẽ mu̶jãã jãñaganucũña. Tore bairo mu̶jãã caáto ũnorẽã, mu̶jãã pupea mu̶jãã yeripu̶re qũẽnoña. Maijũ̶goya mu̶jãã yeri mu̶jãã catũ̶goñarĩjẽ pu̶ame roquere. Dios yaye queti roque ati yepa macããjẽ cawapapaca netõjãñurõ caroa capetietie cawapacu̶tie majũ niña. Caroaro yerijõrõ patowãcãrĩcãrõ mano ãnimasĩrĩqũẽ niña. 5Torea bairo tirũ̶mu̶pu̶ macããna rõmirĩ ãnana cũ̶ã jutii caroa na caboro ũnorẽã, Dios cũ̶ caborore bairo jeto caroaro átiãniñañupã. Na yeripu̶ caroarã wãmagoricarãrẽ bairo ãniñañupã. Dios mena tũ̶goñatutuayayupa. Na manapũ̶ãrẽ na ĩroari caroaro na mena ãnimasĩñañupã. 6Tore bairo cabaiãnimasĩrĩcõ ãñupõ Sara cawãmecu̶co ãnacõ. Cõ manapu̶ Abraham ãnacũ̶rẽ caroaro qũĩroayayupo. Cũ̶ carotirore bairo caroaro u̶seanirĩqũẽ mena cũ̶ yu̶masĩñañupõ. Cõ quetiupau̶re bairo qũĩñañupõ Sara. Mu̶jãã, ãme caãna carõmia cõ ãnacõ pãrãmerãrẽ bairo caãna majũ mu̶jãã ãnigarã cõ ãnacõrẽ bairo mu̶jãã caápata. Bairo mu̶jãã caápata, mu̶jãã manapũ̶ãrẽ mu̶jãã tũ̶goña uwietigarã, na mena caroaro caãnimasĩrã ãnirĩ. 7Mu̶jãã, caũ̶mu̶a canu̶moacu̶na mu̶jããrẽ ñiña: Mu̶jãã nu̶moarẽ na maiña. Na mena jĩcã yericu̶narẽ bairo ãnimasĩña. Mu̶jãã nu̶moarẽ mu̶jãã caju̶átinemopeere na cabomasĩrõrẽã bairo caroaro na átiroaya. Carõmia ãnirĩ cayeritutuaena na caãno mee, jĩcã yericu̶na mu̶jãã caãnoi pu̶garãpu̶rea Dios cañuu̶ ãnirĩ cũ̶ canetõõrĩqũẽ jũ̶gori, tore bairo na ju̶ása mu̶jãã nu̶moarẽ. Tore bairo ãmeo átiãnimasĩña, ñe ũnie ru̶saeto jĩcã yericu̶narẽ bairo pu̶garãpu̶a Diore mu̶jãã cajẽnimasĩparore bairo ĩrã. 8Bairi nipetiro mu̶jãã tore bairo caroaro u̶seanirõ, jĩcã majãrẽ bairo yericu̶tiri átiãninucũña. Ãmeo mai ãninucũña jĩcãũ̶ pũnaarẽ bairo mu̶jãã majũ. Ãmeo ju̶átinemoña mu̶jãã majũ. Caãnimajũrãrẽ bairo baibotioeticõãña. 9Bairi tunu roro mu̶jããrẽ caánarẽ roroa mu̶jãã cũ̶ã na átiãmeeticõãña. Mu̶jããrẽ caawajatutirã ũna cũ̶ãrẽ na tuti ãmeeticõãña. Mu̶jããrẽ na caĩtutirorea bairo na ĩ tuti tunuo peoeticõãña. Bairo pu̶ame ĩña: “Caroare cũ̶ joáto mu̶jããrẽ Dios,” na ĩ jẽnibojaya mu̶jããrẽ cateeri majã cũ̶ãrẽ. Bairo mu̶jãã caápata, caroare na jonemogu̶mi Dios. 10Tirũ̶mu̶pu̶ cũ̶ãrẽ torea bairo ĩ quetibu̶ju̶yayupa profeta majã ãnana: “Ni jĩcãũ̶ ũcũ̶ camasocu̶ caroaro u̶seanirõ mena cũ̶ caãnigaata, carorije ũnierẽ cũ̶ bu̶su̶eticõãto. ‘Carori wãmerẽ yu̶ bu̶su̶etigu̶,’ ĩ tũ̶goñaposeromasĩrĩ cũ̶ ãmarõ. Tunu bairoa cũ̶ risero mena cũ̶ caĩtopairije ũnie cũ̶ãrẽ qũĩ bu̶su̶eticõãto. 11Cũ̶ ũcũ̶ carorije macããjẽrẽ cũcõãrĩna, caroa macããjẽ pu̶amerẽ átiãninucũñami. Caroaro átiãnijũ̶goyecu̶ti masĩñami, aperã cũ̶ã yeri jõrõ ãnajẽ cu̶tajere na caátibocámasĩparore bairo ĩ. 12Torecu̶na, marĩ Quetiupau̶ cañurã caroarã jetore na ĩñau̶sacotegu̶mi. Cũ̶rẽ cũ̶ na cajẽnirĩjẽ cũ̶ãrẽ caroaro na tũ̶gopeobojagu̶mi Dios. Aperã cañuena carorã roquere na asiajãñugu̶mi. Na pesure bairo caãcũ̶ tuagu̶mi yua,” ĩ quetibu̶ju̶yayupa profeta majã ãnana Dios ya tutipu̶. 13Caroa macããjẽ jetore tocãnacãnia mu̶jãã caátiãnimasĩata, ¿noa ũna mu̶jããrẽ roro na átibujiocu̶ti? Roro átimasĩẽnama. 14Bairãpu̶a, caroaro cariape mu̶jãã caátiãnimiatacũ̶ãrẽ, jĩcããrã popiye mu̶jãã baio joroque mu̶jãã na caápata, yapapuaeticõãña. U̶seanirĩ ãña. Noa ũnarẽ na tũ̶goña uwieticõãña. U̶seanirĩqũẽ mena ãnimasĩña. 15Atore bairo jeto ása: Nu̶cũ̶bu̶gorique mena marĩ Quetiupau̶re bairo caãcũ̶ Jesucristo mena tũ̶goña tutuaya mu̶jãã yeripu̶. Tunu apeyera caroaro tũ̶goña coteya. Mu̶jããrẽ aperã Diore catũ̶gou̶saena, “¿Ñe jũ̶gori Jesucristo mena mu̶jãã tũ̶goñatutuayati?” na caĩjẽniñarõ, caroaro mu̶jãã caquetibu̶ju̶masĩparore bairo ĩrã, caroaro tũ̶goñamasĩ coteya. 16“Caãnimajũrã Dios yarã jãã ãniña,” ĩẽna, nu̶cũ̶bu̶gorique mena na quetibu̶ju̶ya. Caroaro átiãña, mu̶jãã catũ̶goñamasacu̶ti ãnie yerijõrõ to ãnimasĩõ joroque ĩrã. Mu̶jãã, Jesucristore catũ̶gou̶sari majãrẽ, roro caĩbu̶su̶pairã pu̶ame na majũã na caĩrĩjẽrẽ na tũ̶goñaboboo joroque ĩrã, caroaro átiãña mu̶jãã majũ nipetiro camasã mena. 17Carorije mu̶jãã caátie jũ̶gori roro mu̶jãã catãmu̶oata, ñuña. Bairopu̶a, netõjãñurõ ñuña caroa macããjẽrẽ caána nimirãcũ̶ã, roro popiye mu̶jãã cabaiata. Popiye mu̶jãã baio joroque aperã cañuena mu̶jãã na caápata, ñujãñuña Dios pu̶ame bairo cũ̶ cabooata. 18Torecu̶na, Jesucristo cũ̶ majũã jĩcãnia roro popiye bairi riawĩ, marĩ carorije wapare netõõpeyo yaparoetagu̶. Cũ̶ pu̶ame roque cañuu̶ carorije caápei nimicũ̶ã, carorã yaye wapare netõõgu̶, roro popiye tãmu̶owĩ. Mu̶jãã cũ̶ã Dios yarã mu̶jãã caãniparore bairo ĩ, riawĩ. Marĩrẽ bairo caãcũ̶ ati rupau̶ cũ̶gori riawĩ Jesús ati yepapu̶re. Bairo riamicũ̶ã, Espíritu Santo Dios Yeri cacũ̶gou̶ ãnirĩ tunu catiwĩ. 19Bairo Jesús, cũ̶ yeri pũna jeto ãcũ̶, preso joricaropu̶ caãnarẽ bairo caãna cariaricarã yeri tu̶pu̶ ásúpi. Topu̶ etari na quetibu̶ju̶yupi Dios yaye quetire. 20Mai, na pu̶ame tirũ̶mu̶ macãã yu̶tea Noé cũ̶ caãni yu̶teapu̶ ãna, Diore cũ̶ tũ̶gopeoetiri cũ̶ baibotioyayuparã. Noé ãnacũ̶ pu̶ame Dios cũ̶ caátipeere na quetibu̶ju̶yamiñupũ̶. Na pu̶ame cũ̶ tũ̶goesuparã. Ti yu̶teapu̶re Dios pu̶ame paju̶tiricaro mano caroaro na cotemiñupũ̶, cũmua capairicare Noé cũ̶ caqũẽnotoye. Bairo caroaro na cotemicũ̶ã, jĩcã wãmo peti itia pẽnirõ cãnacãũ̶ ũnaacã na netõõñañupũ̶ Dios ati yepare cũ̶ caruri rũ̶mu̶ caãno. 21Mai, ti yu̶teapu̶ oco caãnajẽ na caruarique pu̶ame atore bairo marĩ masĩõñupã: “Oco mena marĩ cabautizarotiri rũ̶mu̶ caãno marĩ netõõwĩ Dios, cayasicoabujioatana marĩ caãnimiatacũ̶ãrẽ. Torea bairo ãñupã tie oco tirũ̶mu̶pu̶ Noé cũ̶ caãni yu̶teapu̶re,” marĩ ĩ masĩña. Marĩ cabautizarotirije pu̶ame marĩ rupau̶re u̶gueri coserique ũnie mee niña. Dios marĩ Pacu̶ majũrẽ yeri caroa marĩ catũ̶goñarĩjẽrẽ cũ̶ marĩ cajẽninemorĩjẽ ũnie niña. Bairi yua, marĩ netõõñupĩ Dios, Jesucristo cũ̶ macũ̶ cariacoatacu̶ cũ̶ caãnimiatacũ̶ãrẽ tunu cũ̶ cacatiorique jũ̶gori. 22Marĩrẽ canetõõrĩcũ̶ Jesucristo pu̶ame u̶mu̶recóo Dios tu̶pu̶ ámí. Cũ̶tu̶ cariape nu̶gõã, carotimasĩ cũ̶ caruiropu̶ niñami ãmerẽ. Bairi yua, nipetiro ángelea majã, aperã cacatirã seres majã cajũ̶goyepu̶re mai carotimasĩmirĩcãrã cũ̶ãrẽ carotimasĩ majũ tuayami. Cũ̶ jeto ãmerẽ na rotipeyomasĩñami. Na cũ̶ã nipetiro cũ̶ caĩrõrẽ bairo áticõãñama yua.

will be added

X\