1 SAN PEDRO 2

1Bairi yu̶ yarã, nipetirije carori wãme mu̶jãã caátiãnierẽ tocãrõã jãnacõãña. Cañuenarẽ bairo mu̶jãã caãnie, apeye mu̶jãã caĩtopairije cũ̶ãrẽ jãnacõãña. Tunu bairoa mu̶jãã roro mu̶jãã caĩbu̶su̶paicoterije cũ̶ãrẽ jãnacõãña. Tunu bairoa roro ãmeo ĩñau̶garipea pairique cũ̶ãrẽ jãnacõãña. Roro mu̶jãã caãmeobu̶su̶pairije ũnie cũ̶ãrẽ tocãrõã jãnacõãña yua. Tie ũnierẽ ĩnemoeticõãña. 2Cawĩmarã buiari bero na paco ũpẽcõãrẽ ũpũrĩ tutuarã na caátórea bairo mu̶jãã cũ̶ã Dios yaye quetire tũ̶gou̶saya mu̶jãã yeripu̶. Tie Dios yaye quetire mu̶jãã catũ̶gou̶saata, nemojãñurõ yeri tutuarã mu̶jãã ãnigarã. Tore bairo cũ̶ mena mu̶jãã catũ̶goñatutuaroi mu̶jãã netõõgu̶mi yua marĩ Pacu̶ Dios. 3Bairoa mu̶jãã átibojagu̶mi marĩ Pacu̶ Dios, Jesús mena caãna ãnirĩ cariapea, “Marĩ Quetiupau̶ nocãrõ cañuu̶ majũ cũ̶ ãniñati,” mu̶jãã caĩtũ̶goñamasĩata. 4Bairi marĩ Quetiupau̶ Jesucristore nemojãñurõ cũ̶ tũ̶gou̶sacõã ninucũña. Cũ̶ã, Cristo niñami catiriquere cajou̶ majũ, camasã wii qũẽnorã ũ̶tãã na cacũjũ̶gorica caãnimajũrĩcãrẽ bairo caãcũ̶. Cũ̶rẽ camasã bu̶tioro cũ̶ teewã. Bairo cũ̶ na cateemiatacũ̶ãrẽ, Dios pu̶ame cũ̶ beseyupi. Dios cũ̶ macũ̶rẽ mairĩ caãnimajũũ̶rẽ bairo caãcũ̶ cũ̶ cũñupĩ. 5Mu̶jãã cũ̶ã cacatirã nimirãcũ̶ã, ũ̶tã rupaare bairo mu̶jãã ãniña ãmerẽ. Jesucristore catũ̶gou̶sarã menarẽ caãninemonucũrã ãnirĩ Dios ya wiire ũ̶tã rupaare na capeowãmu̶átiere bairo mu̶jãã ãniña. Tunu bairoa ti wii macããna sacerdotea majã cañurãrẽ bairo caãna mu̶jãã ãniña. Bairo caãna ãnirĩ, Espíritu Santo jũ̶gori caroa macããjẽ átaje Dios cũ̶ caĩñajesorijere átiãña. 6Bairi Dios ya tuti cũ̶ã atore bairo ĩña: “Tũ̶goya mai: Sión cawãmecu̶ti buropu̶ ũ̶tãã caãnimajũrĩcã cawapacu̶tia yu̶ cabeserica majũrẽ cũũ̶ yu̶ átiya. Topu̶ wii qũẽnogu̶ yu̶ átiya tia ũ̶tãã mena yua. Tia ũ̶tãã ñumajũcõãña. Apeye ũ̶tã rupaa netõrõ caroa cawapacu̶tia majũ niña. Cũ̶ã niñami Cristo yu̶ cajopau̶. Bairi ni ũcũ̶ camasocu̶ cũ̶rẽ catũ̶gou̶sau̶ yua, di rũ̶mu̶ ũno, ‘Cabu̶goro majũ Cristore cũ̶ yu̶ boyupa,’ ĩ tũ̶goña yapapuaetigu̶mi,” ĩ quetibu̶ju̶ya ti tutipu̶. 7Mu̶jãã roque tia ũ̶tããrẽ bairo caãcũ̶ Jesucristore cũ̶ mu̶jãã maimajũcõãña. Aperã roque Dios mena catũ̶goñatutuaena ãnirĩ Jesucristore cũ̶ boetinucũñama. Jesucristore na caboetimiatacũ̶ãrẽ, Jesús caãnimajũũ̶ cũ̶ caãnipeere atore bairo ĩ quetibu̶ju̶yayupa Dios ya tutipu̶: “Wii qũẽnorĩ majã jĩcã ũ̶tãã na caboetimirĩcã ãmerẽ yua, ti wii macããcã caãnimajũrĩcãrẽ bairo tuaya.” 8Aperopu̶ ĩñupã apeye cũ̶ãrẽ tunu: “Jĩcã ũ̶tãã caãnimajũrĩcã mena rocawa yasigarãma camasã,” ĩ quetibu̶ju̶yupa Dios ya tutipu̶ camasã cañuena na cabaipeere. Bairi camasã cũ̶ yaye quetire catũ̶gou̶saena yasicoagarãma. Dios na ũna cañuenarẽ cũ̶ caĩjũ̶goyeticũrĩcãrõrẽã bairo yasicoagarãma. 9Mu̶jãã roque Dios ya poa macããna, cũ̶ cabesericarã jĩcã poa macããna mu̶jãã ãniña. Marĩ Quetiupau̶ reyre bairo caãcũ̶ yarã paabojari majã sacerdotea majũ mu̶jãã ãniña. Cũ̶ ya yepa macããna cañurã, cũ̶ mena caãniparã majũ mu̶jãã ãniña. Tore bairo mu̶jããrẽ ásupi Dios, nocãrõ caroaro yu̶ caátiere na quetibu̶ju̶netõáto camasãrẽ ĩ. Bairo mu̶jããrẽ beseyupi. Canaitĩãrõpu̶ caãna mu̶jãã caãnimiatacũ̶ãrẽ, cũ̶ yaye quetire mu̶jãã catũ̶gou̶sarije jũ̶gori ãmerẽ yua, nocãrõ caroaro cabusuropu̶ caãnarẽ bairo mu̶jãã ãnio joroque ásupi Dios. 10Tunu bairoa tirũ̶mu̶pu̶re jĩcã poa macããna mu̶jãã ãmewũ̶. Diore cũ̶ mu̶jãã masĩẽpũ̶. Cũ̶ yarã mee mu̶jãã ãmu̶. Ãme roquere yua, cũ̶ yaye quetire tũ̶gori cũ̶ mena mu̶jãã tũ̶goñatutuaya. Cũ̶ ya poa macããna majũ mu̶jãã ãniña. Cajũ̶goyepu̶re Dios bopacooro camasãrẽ cũ̶ caĩñamairĩjẽrẽ mu̶jãã masĩẽsupa. Ãmerẽ yua, cũ̶ mena mu̶jãã caãnie jũ̶gori tiere mu̶jãã masĩcõãña. Bairi Dios cũ̶ caĩñamairã majũ mu̶jãã ãniña. 11Yu̶ bairãrẽ bairo caãna, yu̶ camairã mu̶jããrẽ ñiña: Ape u̶mu̶recóopu̶ caãniparã nimirãcũ̶ã, mai ati yepapu̶ ãna, roro mu̶jãã rupau̶ carotirore bairo átiãmerĩcõãña. Tie cañuetie pu̶ame Dios mena marĩ caãnie to yasio joroque caátie niña. Torena tiere jãnacõãña. 12Tunu apeyera Diore camasĩẽna watoa ãna, caroaro átiãña, “Jããrẽ bu̶su̶jãrẽma,” ĩrã. Bairo caána mu̶jãã caãnoi, na pu̶ame cabero mu̶jããrẽ roro bu̶su̶jãẽtĩgarãma, caroaro mu̶jãã caátiere masĩrĩ yua. Bairo tiere masĩrã, “Nocãrõ catutuau̶ cañuu̶ niñami Dios,” ĩgarãma, Cristo ati yepapu̶ tunuetari, nipetiro camasãrẽ na cũ̶ caĩñabeseri rũ̶mu̶ caãno. 13Marĩ Quetiupau̶ Jesucristo mena caãna ãnirĩ, ati yepa macããna quetiuparã na carotirore bairo átiãña. Na botioeticõãña. Emperador quetiupau̶ ũcũ̶, bairi cũ̶ carotirã cũ̶ roca carotirã ũna cũ̶ãrẽ na carotirore bairo ása. Cũ̶, quetiupau̶ emperador pu̶ame aperã camasã cañuenarẽ cũ̶ ũ̶mu̶a cũ̶ roca macããnarẽ roro na átirotijonucũñami. Aperã caroaro átiãnajẽrẽ caátiãnimasĩrã pu̶amerẽ nu̶cũ̶bu̶gorique mena na ĩñarotinucũñami. Quetiupau̶ caroti ãnirĩ tore bairo átinucũñami, ati yepapu̶ ãcũ̶. 15Caroa macããjẽ roquere mu̶jãã caáto boyami marĩ Pacu̶ Dios. Bairo caroa macããjẽrẽ mu̶jãã caátiãnorẽ ĩñarã yua, Diore camasĩẽna, aperã catũ̶gomasĩẽna ũna cũ̶ã mu̶jããrẽ roro ĩ bu̶su̶paietigarãma. 16Dios, mu̶jãã Quetiupau̶, jĩcãũ̶ã niñami. Apei maniñami. Bairo apei cũ̶ camanimiatacũ̶ãrẽ, mu̶jãã pu̶ame, “Jããrẽ caroti maniñami. Bairi jãã caboro jãã átimasĩña cañuetie cũ̶ãrẽ,” ĩ tũ̶goña mawijiaeticõãña. Dios yarã paacoteri majãrẽ bairo caãna ãnirĩ caroaro átiãnimasĩña mu̶jãã cũ̶ã cũ̶ carotirore bairo. 17Bairi nipetiro camasãrẽ marĩ canu̶cũ̶bu̶gopee caãnorẽ bairo na nu̶cũ̶bu̶goya. Marĩ yarã Diore caĩroari majã mena ãmeo maiña. Marĩ Pacu̶ Dios cũ̶ãrẽ nu̶cũ̶bu̶gori qũĩroaya. Ati yepa macããcũ̶ quetiupau̶ emperador cũ̶ãrẽ cũ̶ nu̶cũ̶bu̶goya. 18Yu̶ yarã, mu̶jãã paacoteri majã cũ̶ã, mu̶jãã quetiuparã na carotirore bairo nu̶cũ̶bu̶gorique mena ása. Caroaro na átibojaya paarique mu̶jãã na carotirijere. Mu̶jãã quetiuparã tutuaro mena carotirã cañuena, aperã cañurã mu̶jããrẽ caĩroarã na caãmatacũ̶ãrẽ, caroaro nu̶cũ̶bu̶gorique mena na paabojaya. Na nu̶cũ̶bu̶goya. 19Mu̶jãã, roro mu̶jãã caáperimiatacũ̶ãrẽ, roro mu̶jãã na caápata, ñujãñuña bairopu̶a. Dios cũ̶ carotirore bairo caáticõãna mu̶jãã ãniña bairãpu̶a. Cũ̶ roque caroaro mu̶jãã caátiere ĩñajesoyami. 20Mu̶jããrẽ, mu̶jãã quetiuparã, rorije mu̶jãã caátie wapa na catutiata roque, dope bairo mu̶jãã ĩ masĩẽtĩbujiorã. Yerijõrõ mu̶jãã quetiuparã mena mu̶jãã ãnimasĩẽtĩbujiorã. Caroa wãmerẽ mu̶jãã caátiatato bero caãnimiatacũ̶ãrẽ, roro popiye mu̶jãã baio joroque mu̶jãã na caápata roque, popiye mu̶jãã cabairijere mu̶jãã nu̶cãnetõõcõãgarã. Tũ̶goñaenarẽ bairo tiere tũ̶goñanetõõcõãña. Tie ñujãñuña marĩ Pacu̶ Dios cũ̶ caĩñajoro. 21Bairo mu̶jãã caátiãno boyami Dios. Mu̶jãã yaye wapa jũ̶gorina Jesucristo cañuu̶ nimicũ̶ã, popiye tãmu̶owĩ. Bairo popiye tãmu̶omicũ̶ã, cũ̶rẽ roro caánarẽ na tuti ãmeemi. Cũ̶rẽ ĩñacõrĩ mu̶jãã cũ̶ã cũ̶ cabairicarore bairo átiãnimasĩña. 22Jesucristo pu̶ame jĩcã wãme ũno rorije caápei, ñe ũnie wapa cacũ̶goecu̶ majũ ãmi. Ni jĩcãũ̶ ũcũ̶rẽ qũĩtoñaemi. Cariape quetibu̶ju̶wĩ. 23Tunu roro awajari cũ̶ na catutiro cũ̶ãrẽ jĩcãni ũno roro na ĩ tuti cãnamuemi. Roro popiye cũ̶ baio joroque na caáto cũ̶ãrẽ, roro na átiãmeemi. Atore bairo jeto ĩ tũ̶goñawĩ: “Dios jeto roro caánarẽ cariape na ĩñabesemasĩñami na yaye wapa,” ĩ tũ̶goñawĩ Dios na cũ̶ caátipee jetore. 24Jesucristo cũ̶ majũ rupau̶ina yucu̶pãĩpu̶ cũ̶ cariarique jũ̶gori marĩ carorije wapare netõõwĩ. Carorije marĩ caátiãnierẽ marĩ cajãnaparore bairo ĩ, riacoámí Jesucristo yucu̶pãĩpu̶. Caroaro cariape caána marĩ ãnio joroque marĩ ámi Jesús. Mu̶jãã pu̶ame yeri catirã mu̶jãã caãnipee jũ̶gori Jesucristo pu̶ame cãmicu̶tiri riawĩ. 25Yu̶ yarã, nurĩcãrã oveja waibu̶toa na caboropu̶ áñesẽãrĩ na camawijiayasirore bairo mu̶jãã cũ̶ã mu̶jãã caboro átiri, caũ̶petietopu̶ cayasiráná mu̶jãã ãnimiñupã. Bairo caãnana nimirãcũ̶ã, ãmerẽ yua, carorije mu̶jãã caátajere jãnarĩ Jesucristo yaye queti pu̶amerẽ mu̶jãã boya. Cũ̶, Jesucristo roque oveja coteri majõcu̶re bairo caãcũ̶ ãnirĩ caroaro majũ mu̶jãã ĩñacotemasĩñami.

will be added

X\