1 SAN PEDRO 1

1Yu̶, Pedro cawãmecu̶cu̶ Jesucristo cũ̶ caquetibu̶ju̶rotijoricu̶ apóstol yu̶ ãniña mu̶jããrẽ cawoajou̶. Ati carta mena mu̶jãã yu̶ woajoya mu̶jãã ya yepapu̶ mai caãnimirĩcãrã caábataricarãrẽ. Ato cãnacã yepaa macããnarẽ mu̶jãã yu̶ woajoya: Ponto, Galacia, Capadocia, Asia, ape yepa Bitinia yepa macããna cũ̶ãrẽ yu̶ woajoya. 2Mu̶jãã, marĩ Pacu̶ Dios caãnijũ̶goripau̶pu̶ina cũ̶ cabesejũ̶goricarã caãna, cũ̶ caátigajũ̶goyetiricarorea bairo cũ̶ caátiparã majũrẽ mu̶jãã woajou̶ yu̶ átiya. Tunu bairoa cũ̶ Yeri Espíritu Santo jũ̶gori cañurã caroarã cũ̶rẽ catũ̶gou̶sari majã mu̶jãã ãnio joroque ásupi. Tunu bairoa Jesucristo yucu̶pãĩpu̶ cũ̶ cariarique jũ̶gori ñe cawapa cũ̶goena, caroarã mu̶jãã ãnio joroque ásupi. Yu̶ yarã, bairi ñiña: Nocãrõ pairo caroare cũ̶ joáto mu̶jããrẽ. Yerijõrõ ãnajẽ cu̶taje ũnie cũ̶ãrẽ mu̶jãã cũ̶ jonemoáto marĩ Pacu̶ Dios. 3Marĩ Pacu̶ Dios nocãrõ cañuu̶, marĩ Quetiupau̶ Jesucristo pacu̶re cũ̶ marĩ basapeoto: “Nocãrõ marĩrẽ caĩñamai ãnirĩ cũ̶ macũ̶ Jesucristo cariacoatacu̶re tunu cũ̶ cacatioricarorea bairo marĩ cũ̶ãrẽ cayasirácoabujiorãrẽ marĩ netõõwĩ. Yeri cañurĩjẽ catiriquere marĩ jowĩ,” marĩ ĩ tũ̶goñamasĩ cotecõãña. 4Tirũ̶mu̶pu̶a cũ̶ caĩjũ̶goyetirique, caroaro cũ̶ caátipeere cacũ̶goparã majũ mu̶jãã ãniña. U̶mu̶recóo cũ̶ tu̶pu̶ caãniparã majũ mu̶jãã ãnio joroque átigu̶mi. Topu̶ caroaro mu̶jãã cũ̶ caátipee pu̶ame nicõãña. Jĩcã wãmeacã ũno yasietimajũcõãgaro. 5Marĩ Pacu̶ Dios mena mu̶jãã catũ̶goñatutuaro jũ̶gori nocãrõ catutuau̶, carotimasĩ ãnirĩ, cũ̶ã, mu̶jãã ĩñaricanu̶gõgu̶mi, nipetiro mu̶jãã cũ̶ canetõõbojapeere mu̶jãã caẽmu̶etamasĩparore bairo ĩ. Bairi ati u̶mu̶recóo catu̶sari rũ̶mu̶ caãno tiere mu̶jãã masĩõgu̶mi caroaro mu̶jãã cũ̶ caátipeere. Bairi ati u̶mu̶recóo capetiro bero cũ̶ mena caãniparã majũ mu̶jãã ãniña. 6Bairo marĩ Pacu̶ marĩ cũ̶ caátipeere tũ̶goñarĩ u̶seanirĩqũẽ mena mu̶jãã ãniña ti rũ̶mu̶ caetaparo jũ̶goye ati yepapu̶re. Bairãpu̶a yoari yu̶tea mea ati yepapu̶ mu̶jãã caãno capee wãmeerĩ majũ popiye mu̶jãã baiãnigarã. Bairopu̶a, popiye mu̶jãã cabairo ñuña ati yepapu̶re. 7Dios mena mu̶jãã catũ̶goñatutuarije oro ũnierẽ bairo ãno baiya. Peero bu̶tioro caũ̶rõ mena orore joeripu̶ caroa majũ orore jenucũñama camasã cawapacu̶tie majũrẽ. Torea bairo mu̶jãã cũ̶ã popiye roro tãmu̶omirãcũ̶ã, Dios mena mu̶jãã catũ̶goñatutuacõãninucũrĩjẽ roque oro netõjãñurõ wapacu̶tiya. Bairi Jesucristo nemo cũ̶ catunuatí rũ̶mu̶ caãno, cũ̶ mena mu̶jãã catũ̶goñatutuacõãninucũrĩjẽ jũ̶gori mu̶jãã ĩñajesogu̶mi Dios. “Ñujãñuña. Caroaro mu̶jãã ápu̶,” mu̶jãã ĩgu̶mi. Bairo ĩ yua, caãnimajũrãrẽ bairo caãna mu̶jãã ãnio joroque mu̶jãã átigu̶mi. 8Apeyera, mu̶jãã roque Jesucristore caĩñaetana nimirãcũ̶ã, cũ̶rẽ mairĩ cũ̶ yaye quetire cariape mu̶jãã tũ̶gou̶saya. Cũ̶ mena mu̶jãã tũ̶goñatutuaya. Bairo cũ̶rẽ caĩñaetana nimirãcũ̶ã, ãmerẽ cũ̶rẽ tũ̶gou̶sari yua, nocãrõ netõrõ majũ u̶seanirĩqũẽ mena mu̶jãã ãniña. Tie cũ̶ mena mu̶jãã cau̶seanirĩjẽ pu̶ame dope bairo ĩ quetibu̶ju̶ masĩã maniña marĩ cabu̶su̶ri risero mena. 9Tocãrõ netõrõ mu̶jãã u̶seaniña cayasicoabujioricarãrẽ mu̶jãã yerire cũ̶ canetõõrõ jũ̶gori yua. Bairi Dios mena mu̶jãã catũ̶goñatutuarije jũ̶gori mena jeto cũ̶ tu̶re mu̶jãã etamasĩgarã. 10Merẽ tirũ̶mu̶pu̶a masĩrĩ majã profeta majãrẽ na quetibu̶ju̶yayupi Dios, cañuu̶ ãnirĩ caroa wãme camasã cũ̶ yarã caãniparãrẽ cũ̶ caátipeere. Mu̶jãã cũ̶ãrẽ tiere jou̶ átiyami yua ãmerẽ. Bairo Dios na cũ̶ caĩquetibu̶ju̶miatacũ̶ãrẽ, tirũ̶mu̶pu̶re profeta majã caroaro masĩpeyoesupa mai. Torena, tiere buemasĩnemoñupã Dios marĩ cũ̶ canetõõpeere. 11Tunu apeyera Espíritu Santo cũ̶ camasĩõrĩjẽ jũ̶gori caroaro masĩñupã profeta majã Jesucristo ati yepa roro popiye cũ̶ cabaipeere. Tunu bairoa cũ̶ cariaro bero nocãrõ caroaro camasã na caãnipee cũ̶ãrẽ na masĩõñupĩ Espíritu Santo. Tie cũ̶ camasĩõrĩjẽrẽ tũ̶gori yua, profeta majã pu̶ame tũ̶goñacõã maniásupa. Bairi atore bairo ãmeo ĩñupã: “¿Ñamu̶ ũcũ̶ cũ̶ ãnicu̶ti camasãrẽ canetõõpau̶? ¿Dope bairo átiri na cũ̶ netõũ̶áti camasãrẽ?” Tunu bairi, “¿Di yu̶tea caãno marĩ qũĩ quetibu̶ju̶yati Espíritu Santo?” ãmeo ĩ jẽniñanucũñañupã profeta majã ãnana pu̶ame, masĩnemogarã. 12Baipu̶a Dios pu̶ame, “Marĩ yaye rotie jeto mee niña atie Espíritu Santo cũ̶ camasĩõrĩjẽ. Ape yu̶tea macããna cũ̶ãrẽ cũ̶ caquetibu̶ju̶rije niña,” na ĩ tũ̶goñamasĩõ joroque ĩ ásupi. Bairi ãmerẽ mu̶jãã cũ̶ã tiere mu̶jãã masĩña Dios cũ̶ canetõõrĩqũẽ quetire. Tie caroa queti pu̶ame Espíritu Santo, u̶mu̶recóopu̶ caatácu̶, cũ̶ camasĩõrĩjẽ jũ̶gori caquetibu̶ju̶ri majã mu̶jããrẽ na caĩquetibu̶ju̶riquea niña. ¡Tie queti nocãrõ caroa majũ caãno jũ̶gori, u̶mu̶recóo macããna, ángelea majã majũ cũ̶ã tiere masĩnemogamajũcõãnucũñama! 13Bairi yu̶ yarã, caroaro tũ̶goñamasĩcoteãña. Caroa wãme Jesucristo cũ̶ caborore bairo jeto átiãna. Dios nocãrõ cañuu̶ ãnirĩ Jesucristo nemo cũ̶ cabuiaetari rũ̶mu̶ caãno caroare marĩ cũ̶ cajopee jetore tũ̶goñanemocõã ninucũña. 14Tunu bairoa Dios pũnaarẽ bairo caãna ãnirĩ caroaro cũ̶ tũ̶gopeoya. Tirũ̶mu̶pu̶ marĩ Pacu̶ Diore masĩẽna roro mu̶jãã rupau̶ caborore bairo jeto mu̶jãã caátatore bairo átiãmerĩcõãña. 15Dios mu̶jããrẽ cabesericu̶ pu̶ame caroú̶ cañuu̶ ñe ũnie caru̶saecu̶ niñami. Bairi mu̶jãã cũ̶ã cũ̶ pũnaa caãna ãnirĩ cũ̶rẽ bairo ñe ũnie cawapa mána majũ caroarã ãnajẽcu̶sa. 16Yu̶ yarã, Dios ya tutipu̶ cũ̶ãrẽ atore bairo ĩña: “Mu̶jãã cũ̶ã caroarã ãña. Yu̶, caroú̶ cañuu̶ yu̶ caãnimajũcõãrõrẽã bairo mu̶jãã cũ̶ã carorijere ápericõãña,” ĩ quetibu̶ju̶ya. 17Apeyera tunu Dios caĩñabesemasĩ, camasã roro na caátaje wãme cãrõ ni jĩcãũ̶ ũcũ̶rẽ ĩñaricaworicaro mano caĩñau̶ majũrẽ, “Dios jãã Pacu̶ majũ mu̶ ãniña,” mu̶jãã caĩata, caroaro cariape cũ̶ mu̶jãã ĩroagarã. Cũ̶rẽ qũĩroacõã ninucũña tocãnacã rũ̶mu̶a ati yepapu̶ mu̶jãã caãni rũ̶mu̶ cãrõ. 18Mu̶jãã roquere Dios merẽ mu̶jãã netõmajũcõãñupĩ. Mu̶jãã ñicũ̶jãã ãnana dope bairo canetõmasĩã manierẽ mu̶jãã na caátiroticũrĩqũẽrẽ catũ̶gou̶samirĩcãrãrẽ mu̶jãã netõõmajũcõãñupĩ. Merẽ mu̶jãã masĩña mu̶jãã carorije wapare Dios cũ̶ cawapatibojariquere. Apeye ũnie capetirije oro, apeye plata ũnie meei mu̶jãã canetõpee wapa ãñupã. 19Marĩ Quetiupau̶ Jesucristo yucu̶pãĩpu̶ cũ̶ rií caãnimajũrĩjẽrẽ cũ̶ carerique jũ̶gori roque mu̶jãã netõñupã. Jesucristo cũ̶ majũ rupau̶ina, cordero waibu̶cu̶ cañuu̶ ñe ũnie camácũ̶rẽ joemu̶gõjoricarore bairo tuayupi. Cũ̶ jũ̶gori mu̶jãã netõñupã. 20Mai, Jesucristo pu̶ame ati yepa camanopu̶a, “Camasãrẽ canetõõpau̶ nigu̶mi yu̶ macũ̶,” Dios cũ̶ caĩjũ̶goyeticũrĩcũ̶ ãñupĩ. Bairi ati yu̶tea catu̶sari yu̶tea caãno etari mu̶jãã cũ̶ãrẽ mu̶jãã netõõñupĩ Jesús, cũ̶ yarã mu̶jãã caãniparore bairo yua. 21Jesucristo jũ̶gori cariape cũ̶ mu̶jãã tũ̶gou̶saya Diore. Jesucristo cariacoatacu̶ cũ̶ caãnimiatacũ̶ãrẽ Dios pu̶ame tunu cũ̶ catiori, cariape nu̶gõãpu̶ cũ̶ ruirotiri carotimasĩ majũ cũ̶ cũñupĩ. Bairi mu̶jãã roque Dios mena mu̶jãã tũ̶goñatutuaya. Cũ̶, cũ̶ caátipee jetore cariape mu̶jãã tũ̶gou̶saya ãmerẽ. 22Bairi ãmerẽ yu̶ yarã, cariape macããjẽ quetire catũ̶gou̶sarã ãnirĩ mu̶jãã yeripu̶ ñe ũnie carorije camána majũ mu̶jãã ãniña. Bairi yua, nu̶cũ̶bu̶gorique mena nemojãñurõ mu̶jãã ãmeo maigarã marĩ yarãrẽ. Tocãnacãũ̶pu̶rea caroa yericu̶taje mu̶jãã catũ̶goñawẽpũ̶rĩjẽ nipetirije mena mu̶jãã ãmeo maigarã. 23Ãmerẽ caroa wãmerẽ catũ̶goñarĩ majã mu̶jãã ãniña. Dios mu̶jããrẽ cawãma wãme yericu̶tajere mu̶jãã joyupi. Cawãma buiarãrẽ bairo caãna mu̶jãã ãniña. Ati u̶mu̶recóo macããna camasã cayasiparã na cabuiari wãmerẽ bairo mee mu̶jãã ãniña. Dios yaye quetibu̶ju̶rique capetietie tocãnacã rũ̶mu̶a caãnipeere bairo caãna roque mu̶jãã ãniña. 24Torea bairo ĩña Dios ya tutipu̶ cũ̶ã: “Nipetiro camasã taare bairo niñama. Na camasã cu̶tiãnie, tie taa oóre bairo niña. Bu̶tioro caasiro taa jĩniyasicoaya. Torea bairo camasã cũ̶ã yasicoayama. Caoó cũ̶ã owaa yaparo, caasiro ñacoaya. Tore bairo niñama camasã. 25Tore bairo camasã na cabaimiatacũ̶ãrẽ, Dios yaye bu̶su̶rique roque tocãnacã rũ̶mu̶a nicõã ninucũgaro,” ĩ quetibu̶ju̶ya Dios ya tutipu̶. Atie yu̶ caquetibu̶ju̶rije niña caroa queti camasã na carorije wapare Dios cũ̶ canetõõrĩqũẽ queti. Tiere merẽ mu̶jããrẽ yu̶ quetibu̶ju̶wu̶.

will be added

X\