1 SAN JUAN 5

1Bairi nipetiro Jesucristo mena tũ̶goñatutuari, “Jesucristo Mesías Dios cũ̶ cajou̶ majũ niñami,” caĩrã Dios yarã cũ̶ pũnaarẽ bairo caãna majũ niñama. Bairi ni jĩcãũ̶ ũcũ̶ aperã pacu̶re cũ̶ camaiata, cũ̶ pũnaa cũ̶ãrẽ na maimasĩñami. Torea bairo marĩ Pacu̶ Diore marĩ camaiata, cũ̶ yarã cũ̶ pũnaarẽ bairo caãna cũ̶ãrẽ na marĩ maimasĩña. 2Diore camairã ãnirĩ marĩrẽ cũ̶ caátirotirore bairo jeto marĩ caápata, cũ̶ pũnaa cũ̶ãrẽ na marĩ camairĩjẽrẽ marĩ masĩcõãña. 3Caroaro Diore marĩ camairĩjẽ pu̶ame Dios marĩ cũ̶ caátiroticũrĩqũẽrẽ marĩ caátipeyomasĩrĩjẽ niña. Bairopu̶a Dios cũ̶ caátiroticũrĩqũẽ popiye netõrõ átaje mee niña. 4Bairi tocãnacãũ̶pu̶a Dios yarã, cũ̶ pũnaarẽ bairo caãna pu̶ame ati u̶mu̶recóo macããna roro na caátiãnierẽ ĩñajeetinetõ nu̶cãcõãñama. Bairi yua, Dios mena marĩ catũ̶goñatutuaro jũ̶gori ati u̶mu̶recóo macããna caĩtopairã, apeye ati u̶mu̶recóo macããjẽ carorije cũ̶ãrẽ, nipetirore marĩ tũ̶goetinetõnu̶cãcõãña. 5Bairi apei, “Jesús, Dios macũ̶ majũã niñami,” caãnorẽ bairo cariape caĩtũ̶gou̶sau̶ pu̶ame ati u̶mu̶recóo macããna roro na caátiãnierẽ ĩñajeetinetõ nu̶cãcõãñami. 6Atie jũ̶gori Jesucristo Dios macũ̶rẽ bairo ati yepapu̶ caatácu̶ cũ̶ caãnierẽ marĩ masĩña: Juan oco mena cũ̶rẽ cũ̶ cabautizaro cabairique, bairi yucu̶pãĩpu̶ riau̶ cũ̶ caĩrĩqũẽ mena jũ̶gori marĩ masĩña Dios macũ̶ cũ̶ caãnierẽ. Bairopu̶a, oco jeto mee niña. Oco, cũ̶ rií mena jũ̶gori marĩ masĩña. Espíritu Santo cũ̶ã torea bairo marĩ masĩõñami. Cũ̶ pu̶ame caĩtoecu̶ cariape majũ caquetibu̶ju̶masĩ niñami. 7Bairi tie itia wãme majũ marĩ masĩõña Jesucristo, Dios macũ̶ cũ̶ caãnierẽ: 8Espíritu Santo, bairi oco mena cũ̶ cabautizarique, bairi apeye yucu̶pãĩpu̶ cũ̶ cariarique mena cũ̶ãrẽ torea bairo marĩ masĩña Jesús Dios macũ̶ cũ̶ caãnierẽ. Tie itia wãmepu̶a cariape jĩcãrõ tũ̶ni jĩcãrõrẽã bairo marĩ quetibu̶ju̶ masĩõña Jesús, Dios macũ̶ cũ̶ caãnierẽ. 9Bairãpu̶a, camasã na caĩquetibu̶ju̶rijere marĩ catũ̶gou̶saro ñuña. Dios cũ̶ caquetibu̶ju̶rije pu̶ame cũ̶ macũ̶ Jesús yaye quetire quetibu̶ju̶rique niña. Cañurĩjẽ majũ niña. Bairi tie roquere netõjãñurõ tũ̶gou̶sarotiya marĩ Pacu̶ Dios cũ̶ caquetibu̶ju̶rije caãnimajũrĩjẽ caãnoi. 10Bairi ni jĩcãũ̶ ũcũ̶ Dios macũ̶ Jesucristore cariape catũ̶gou̶sau̶ cũ̶ yaye quetire cũ̶ majũã quetibu̶ju̶ masĩñami cũ̶ yeripu̶. Diore cariape catũ̶goecu̶ pu̶ame caĩtopairi majõcu̶re bairo tuayami, cũ̶ macũ̶ Jesús yaye quetibu̶ju̶rique quetire cariape cũ̶ catũ̶gogaeto jũ̶gori. 11Tunu bairoa, atore bairo marĩ camasĩrõrẽ boyami Dios: Yeri capetietie marĩ cacũ̶gopeere marĩ camasĩrõrẽ boyami. Cũ̶ macũ̶ jũ̶gori tie cũ̶ cajopeere marĩ camasĩrõ boyami. 12Bairi ni jĩcãũ̶ ũcũ̶ Jesucristo Dios macũ̶ yau̶ majũ cũ̶ caãmata, merẽ yeri capetietiere cacũ̶gou̶ tuayami. Apei, Dios macũ̶ Jesucristo yau̶ mee caãcũ̶ pu̶ame roque, yeri capetietiere cacũ̶goecu̶ majũ tuayami. 13Mu̶jãã, Dios macũ̶ Jesucristore catũ̶gou̶sari majãrẽ yu̶ quetibu̶ju̶ woatujoya, merẽ yeri capetietie mu̶jãã cacũ̶gorijere mu̶jãã camasĩparore bairo ĩ. 14Dios marĩrẽ cũ̶ caátipeere caroaro cariapea marĩ tũ̶goña tutuacõãniña. Cũ̶ jetore cariape cũ̶ marĩ tũ̶gomasĩña. Bairi, “Dios cañuu̶ ãnirĩ cũ̶ caborore bairo cũ̶rẽ marĩ cajẽniata, marĩ tũ̶gogu̶mi,” marĩ ĩ masĩña. 15Tore bairo Diore marĩ cajẽnirõ cũ̶ catũ̶gorijere camasĩrã ãnirĩ, “Merẽ marĩ cajẽnirĩjẽrẽ jogu̶mi Dios cũ̶ caborore bairo,” marĩ ĩ tũ̶goñamasĩcõãña. 16Mu̶jãã yau̶ ũcũ̶ jĩcãũ̶ carori wãme cayasiráná na caáti wãme ũnie meerẽ cũ̶ caápata, Diopu̶re cũ̶ jẽnibojaya. Bairo Diore mu̶jãã cajẽnibojaro, Dios pu̶ame mu̶jãã yau̶re cũ̶ yeri tũ̶goñawasoao joroque cũ̶ átigu̶mi, carori wãme cayasiráná na caáti wãme ũnie meerẽ cũ̶ caápata. Bairopu̶a, apeye carorije cayasirápárã majũ marĩ ãnio joroque caátie niña. Tie ũnierẽ caácu̶ cũ̶ caãmata roquere, “Diopu̶re cũ̶ jẽnibojaya,” mu̶jããrẽ ñi masĩẽtĩña. 17Bairopu̶a, nipetiro carori wãme marĩ caátie, cañuetie niña. Cabaimiatacũ̶ãrẽ, marĩ yasio joroque caátimajũcõãrĩjẽ jĩcã wãmea niña. 18Merẽ atore bairo marĩ masĩña: Dios yau̶ pu̶ame, Diore, cũ̶ pacu̶re bairo cacũ̶gou̶ ãnirĩ carorijere áperiyami. Cũ̶ macũ̶ Jesucristo pu̶ame cũ̶ ju̶átinemoñami. Bairi wãtĩ cũ̶ã jĩcãni ũno roro cũ̶ baio joroque cũ̶ áperiyami Dios yau̶re. 19Bairi tunu merẽ marĩ masĩña Dios yarã marĩ caãnierẽ. Tunu bairoa marĩ masĩña ati u̶mu̶recóo macããna nipetiro camasã wãtĩ cũ̶ camasĩrĩjẽ mena cũ̶ carotirã na caãnierẽ. 20Apeye cũ̶ãrẽ atore bairo marĩ masĩña: Ati yepapu̶re asúpi Jesús, Dios macũ̶ majũ. Cũ̶ pacu̶ Dios cariape caãcũ̶rẽ marĩ camasĩpee tũ̶goñarĩqũẽ cũ̶ãrẽ marĩ joyupi. Bairi Diore cariapea cũ̶ marĩ masĩña. Jesucristo cariape caácu̶ mena jĩcãrõrẽ bairo caãna marĩ ãniña. Cũ̶ã niñami Dios caãnimajũũ̶, marĩrẽ yeri capetietiere cajou̶ majũ. 21Bairi yu̶ yarã, yu̶ pũnaarẽ bairo caãna, tũ̶goña masĩña. Maijũ̶goya mu̶jãã yerire. Aperã camasã na caĩroarã na jũ̶gũẽã ũna yaye ricaati quetibu̶ju̶riquere mu̶jãã tũ̶gou̶sare. Tocãrõã niña atie queti yu̶ cawoajorije.

will be added

X\