1 SAN JUAN 4

1Yu̶ yarã, yu̶ bairãrẽ bairo caãna, yu̶ camairã, cariape tũ̶goeticõãña aperã, “Dios yarã jãã ãniña,” ĩmirãcũ̶ã ricaati na caquetibu̶ju̶ata. Espíritu Santo na yeripu̶ na cacũ̶goeticõãta, na tũ̶gou̶saeticõãña. “¿Cariape na quetibu̶ju̶yati?” ĩrã, na caĩrĩjẽrẽ caroaro tũ̶gobeseya. Ati u̶mu̶recóore capããrã niñama caĩtopairã. “Dios yaye quetire jãã cũ̶ã jãã quetibu̶ju̶ya,” ĩmirãcũ̶ã, wãtĩ yaye macããjẽ pu̶amerẽ quetibu̶ju̶rã átiyama. 2Bairo na caĩquetibu̶ju̶rijere caroaro mu̶jãã catũ̶gobesemasĩata, cariapea, “Ãnoa Dios yaye meerẽ quetibu̶ju̶yama,” mu̶jãã ĩ masĩgarã. Bairi jĩcãũ̶ ũcũ̶, “Cariapea Jesucristo marĩrẽã bairo ati rupau̶ cacũ̶gou̶ ati yepapu̶ etayupi,” caĩquetibu̶ju̶masĩ roque Espíritu Santo Dios Yeri majũrẽ cacũ̶gou̶ niñami. 3Tore bairo caĩquetibu̶ju̶masĩẽcũ̶ pu̶ame Espíritu Santo Dios Yeri majũrẽ cacũ̶goecu̶ niñami. Wãtĩ, Jesucristore cateeri majõcu̶ yeri majũrẽ cacũ̶gou̶ niñami. Merẽ tirũ̶mu̶pu̶ mu̶jãã tũ̶goyupa Jesucristore cateerã ricaati yeri catũ̶goñarã na caetapeere. Bairi merẽ etamajũcõãñama ati yepapu̶re wãtĩ yarã caĩtopairi majã. 4Yu̶ pũnaarẽ bairo caãna, mu̶jãã roque Dios yarã mu̶jãã ãniña. Caĩtopairã na caquetibu̶ju̶rijere mu̶jãã tũ̶gou̶saetiya. Na netõrõ cayeritutuarã mu̶jãã ãniña. Mu̶jãã roque, caĩtopairã ati u̶mu̶recóo macããna na yeripu̶ na cacũ̶gou̶ netõjãñurõ catutuau̶ Espíritu Santo majũrẽ cacũ̶gorã mu̶jãã ãniña. 5Na pu̶ame ati u̶mu̶recóo macããna niñama. Bairo caãna ãnirĩ ati u̶mu̶recóo macããjẽrẽ quetibu̶ju̶nucũñama. Na caĩrĩjẽrẽ caroaro tũ̶gou̶sanucũñama camasã aperã ati u̶mu̶recóo macããna ũna, Dios yarã caãmerã ãnirĩ. 6Marĩ roque Dios yarã, cũ̶tu̶ macããna marĩ ãniña. Bairi Diore camasĩ pu̶ame marĩ caquetibu̶ju̶rijere caroaro tũ̶gou̶sanucũñami. Apei Diore camasĩẽcũ̶ pu̶ame marĩ caquetibu̶ju̶rijere tũ̶gou̶sagaetiyami. Tore bairo na cabairijere ĩñarã, atore bairo marĩ ĩ masĩña: “Ãnoa caroa yeri cu̶taje Dios cũ̶ cajorije cariape macããjẽrẽ quetibu̶ju̶yama. Ãnoa aperã pu̶ame, caĩtopairã wãtĩ yeri pũna cacũ̶gorã niñama,” marĩ ĩ tũ̶goña besemasĩña. 7Yu̶ yarã, yu̶ bairãrẽ bairo caãna yu̶ camairã ãmeo mairĩqũẽ cañurĩjẽ Dios cũ̶ cajorije niña. Bairi tocãnacãũ̶pu̶a nipetiro caãmeomaiparã marĩ ãniña marĩ yarãrẽ. Nipetiro caãmeomaimasĩrĩ majã Diore camasĩrã cũ̶ pũnaarẽ bairo caãna niñama. 8Dios, maimasĩrĩqũẽrẽ cajomasĩ cũ̶ caãno jũ̶gori marĩ caãmeomaimasĩrĩjẽ baimasĩña. Bairi ni ũcũ̶ cũ̶ yau̶re camaimasĩẽcũ̶ pu̶ame Diore camasĩẽcũ̶ niñami. 9Merẽ marĩ masĩña Dios marĩrẽ cũ̶ camairĩjẽrẽ. Tiere marĩ masĩõ joroque ĩ, ati yepapu̶ cũ̶ joyupi, cũ̶ macũ̶ jĩcãũ̶ã caãcũ̶rẽ. Cũ̶ jũ̶gori marĩ nipetiro Dios yarã yeri capetietiere marĩ cacũ̶goparore bairo ĩ, ati yepapu̶ cũ̶ joyupi. 10Tũ̶goya mai. Cariape mairĩqũẽ caãnimajũrĩjẽ ati wãmerẽ bairo niña: Marĩ pu̶ame Diore cũ̶ marĩ camaijũ̶goro mee, cũ̶ pu̶ame jĩcã nu̶gõã marĩ mairĩ, cũ̶ macũ̶ jĩcãũ̶ã caãcũ̶rẽ cũ̶ joyupi ati yepapu̶. Bairo ati yepapu̶re etari bero yua, roro popiye tãmu̶orĩ yucu̶pãĩpu̶ cũ̶ cariarique jũ̶gori carorije wapa cacũ̶goenarẽ bairo marĩ tuao joroque marĩ ásupi. 11Yu̶ yarã, yu̶ bairãrẽ bairo caãna, yu̶ camairã, tore bairo marĩrẽ Dios cũ̶ camairĩqũẽ to caãmata, marĩ cũ̶ã marĩ yarãrẽ caãmeomaiparã marĩ ãniña. Marĩ yarãrẽ ãmeo ju̶átinemorotiya. 12Ni jĩcãũ̶ ũcũ̶ Diore ĩñañaecũ̶mi. Bairo marĩ camasã, Diore caĩñaena nimirãcũ̶ã, nipetiro marĩ yarãrẽ marĩ caãmeomaiata, Dios marĩ yeripu̶ nicõãñami. Bairo marĩ mena cũ̶ caãnoi, caroaro netõjãñurõ marĩ ãmeo maimasĩgarã. 13Dios, Espíritu Santo marĩ cũ̶ cajoricu̶ marĩ yeripu̶ cũ̶ caãno jũ̶gori, “Marĩ mena niñami Dios. Marĩã cũ̶ yarã marĩ ãniña,” marĩ ĩ tũ̶goñamasĩcõãña. 14Jãã majũpu̶a jãã ĩñawũ̶ Jesure ati yepapu̶ cũ̶ caãno. Bairo jãã pu̶ame cũ̶rẽ caĩñarĩcãrã ãnirĩ caãnorẽ bairo cariape majũ atore bairo jãã ĩ quetibu̶ju̶ masĩña: “Cũ̶ macũ̶ Jesure cũ̶ joyupi cũ̶ pacu̶ Dios, ati yepa macããna na carorije wapare na netõõgu̶,” jãã ĩ quetibu̶ju̶ masĩña. 15Bairi ni jĩcãũ̶ ũcũ̶ Jesús Dios macũ̶ cũ̶ caãnierẽ caãnorẽ bairo cariape cũ̶ catũ̶goñamasĩcõãta, Dios mena jĩcãrõrẽ bairo caãcũ̶ niñami. Dios pu̶ame cũ̶ã cũ̶ mena nicõãñami. 16Tore bairo cabaiãno jũ̶gori, merẽ yua, marĩ masĩña cariapea Dios marĩrẽ cũ̶ camaiãninucũrĩjẽrẽ. Dios pu̶ame ãmeo mairĩqũẽ macããcũ̶ niñami. Bairi ni ũcũ̶ cũ̶ yarãrẽ camaimasĩ, Dios yau̶ majũ niñami. Dios cũ̶ã cũ̶ mena nicõãñami. 17Tore bairo marĩ caãmeoáto jũ̶gori ãmeo mairĩqũẽrẽ nemojãñurõ marĩ masĩõgu̶mi Dios. Bairo marĩrẽ cũ̶ camasĩõrõ yua, marĩ pu̶ame tũ̶goña uwiricaro mano, tũ̶goñatutuarique mena camasãrẽ cũ̶ caĩñabeseri rũ̶mu̶rẽ marĩ cotegarã. Marĩ pu̶ame ati yepapu̶re ãna, Jesucristo marĩ Quetiupau̶ cũ̶ caãnatõrẽ bairo majũã marĩ ãniña marĩ cũ̶ã. 18Ni jĩcãũ̶ ũcũ̶ Jesucristo cũ̶ camairĩcãrõrẽ bairo caroaro cariape jĩcãrõ tũ̶ni cũ̶ yarãrẽ cũ̶ camaimasĩata, ñe ũnierẽ uwimasĩẽtĩñami. Bairi marĩ caãmeo maimasĩrĩjẽ Dios cũ̶ cajorije caãnoi, ñe ũnierẽ marĩ uwietiya, Dios cũ̶ caĩñabesepa rũ̶mu̶ caetaro cũ̶ãrẽ. Ni jĩcãũ̶ ũcũ̶ cũ̶ catũ̶goña uwiata, ãmeo maimasĩrĩqũẽ nipetirijere jĩcãrõ tũ̶ni cũ̶gopetietiyami mai. Bairi uwitũ̶goñau̶mi. 19Dios pu̶ame merẽ marĩrẽ cajũ̶goyepu̶a marĩ maijũ̶goyupi. Bairi marĩ cũ̶ã Diore cũ̶ marĩ maiña. 20Ni jĩcãũ̶ ũcũ̶, “Yu̶ roque Diore camai majũ yu̶ ãniña,” ĩmicũ̶ã, cũ̶ yau̶re cũ̶ caĩñatecõãmata, caĩtopai majũ niñami. Bairi marĩ yau̶ marĩ caĩñanucũũ̶rẽ marĩ camaieticõãta, nemojãñurõ marĩ maimasĩẽtĩbujiorã Dios marĩ caĩñaetinucũũ̶ roquere. 21Jesucristo atore bairo marĩ átiroticũwĩ: “Ni jĩcãũ̶ ũcũ̶ Diore camai, cũ̶ yau̶re bairo caãcũ̶ cũ̶ãrẽ cũ̶ cũ̶ maiáto,” ĩ cũwĩ.

will be added

X\