1 SAN JUAN 3

1Nocãrõ majũ marĩ cũ̶ maiñati marĩ Pacu̶ Dios. Bairo marĩrẽ camai ãnirĩ, “Yu̶ pũnaa,” marĩ ĩnucũñami. Bairi cũ̶ pũnaa majũ marĩ ãniña. Aperã ati u̶mu̶recóo macããna camasã Dios pũnaa marĩ caãnierẽ masĩẽtĩñama, Dios, marĩ Pacu̶ cũ̶ãrẽ camasĩẽna ãnirĩ. 2Yu̶ yarã, yu̶ bairãrẽ bairo caãna yu̶ camairã merẽ Dios yarã cũ̶ pũnaa majũ marĩ ãniña yua. Bairo ãnimirãcũ̶ã, cabero marĩ cabaipee nipetirijere marĩ masĩpeyoetiya mai. Bairãpu̶a, atore bairo marĩ masĩña: Jesucristo ati yepapu̶ nemo cũ̶ cabauetaro caãno, cũ̶ yarã cũ̶rẽ bairo caãna majũ marĩ ãnigarã. Bairi Jesús ati yepapu̶ cũ̶ caetaro, cũ̶ marĩ ĩñamajũcõãgarã, caãnimajũũ̶rẽ bairo cũ̶ caãno yua. 3Nipetiro atie cabaipee mena catũ̶goñatutuacotei pu̶ame roque cũ̶ majũã cũ̶ carorije wapare coseire bairo átiyami. Jesucristo ñe ũnie camácũ̶ cañuu̶ cũ̶ caãnorẽã bairo, cũ̶ cũ̶ã ñe ũnie wapa mácũ̶ caroú̶ tuayami yua. 4Nipetiro carori wãmerẽ caána Dios cũ̶ carotirijere cabaibotiorã niñama. Bairi carori wãme jetore átiãninucũñama. 5Merẽ caroaro mu̶jãã masĩña atiere: Marĩ carorije wapare netõõũ̶ acú̶ asúpi Jesucristo ati yepapu̶re. Jesucristo pu̶ame ñe ũnie carorijere caápei majũ niñami. 6Bairi ni jĩcãũ̶ ũcũ̶ Jesucristo mena jĩcãrõrẽ bairo caãcũ̶ cũ̶ yaye quetire cariape catũ̶gocõãninucũũ̶ pu̶ame carorijere áperiyami. Aperã carorijere caáticõãninucũrã pu̶ame roque Jesucristore camasĩẽna majũ niñama. 7Yu̶ pũnaarẽ bairo caãna ni jĩcãũ̶ ũcũ̶ mu̶jããrẽ qũĩtoeticõãto. Ni jĩcãũ̶ ũcũ̶ caroaro cariape macããjẽ jetore caátiãnimasĩ cũ̶ caãmata, cañuu̶ caroú̶ niñami Dios cũ̶ caĩñajoro. Marĩ Quetiupau̶ Jesús cariape caácu̶ cañuu̶ cũ̶ caãnorẽã bairo cũ̶ cũ̶ã cariape caácu̶ cañuu̶ niñami. 8Carori wãme jetore bairoa caáticõãninucũũ̶ pu̶ame roque wãtĩ yau̶ cũ̶ carotirijere caácu̶ majũ niñami. Wãtĩ roque ati u̶mu̶recóo caãnijũ̶goripau̶pu̶ina carorijere caátijũ̶goricu̶ majũ niñami. Baipu̶a, merẽ asúpi Dios macũ̶ Jesucristo ati yepapu̶re, wãtĩ roro cũ̶ caátiere yasiorei acú̶. 9Jĩcãũ̶ Dios yaye quetire catũ̶gou̶sau̶, cũ̶ macũ̶rẽ bairo caãcũ̶ pu̶ame cawãma yeri pũna Dios cũ̶ cajoriquere cũ̶goyami. Bairo cacũ̶gou̶ ãnirĩ carori wãmerẽ átiãmerĩnucũñami. Bairo Dios macũ̶ ãnirĩ carorije macããjẽrẽ átigaetiyami. 10Bairi yua, atore bairo marĩ ĩ tũ̶goñamasĩña: “Nipetiro carorije macããjẽrẽ caáti majã wãtĩ cũ̶ carotirijere caána cũ̶ pũnaarẽ bairo caãna niñama. Aperã caroa macããjẽrẽ caána pu̶ame roque Dios yarã cũ̶ caĩñabesericarã, cũ̶ pũnaa majũ niñama,” marĩ ĩ tũ̶goñamasĩña. Bairi ni jĩcãũ̶ ũcũ̶ caroa macããjẽrẽ caápei cũ̶ yau̶re bairo caãcũ̶rẽ camaiecũ̶ Dios yau̶ mee niñami. 11Atore bairo Jesús yaye quetire mu̶jãã tũ̶gojũ̶goyupa caãni jũ̶goripau̶pu̶a: “Tocãnacãũ̶pu̶a ãmeo maiña. Ãmeo ju̶átinemoña Dios cũ̶ caborore bairo mu̶jãã majũ,” mu̶jããrẽ ĩ quetibu̶ju̶yupa. 12Apei Caín ãnacũ̶rẽ bairo marĩ baieticõãrõã marĩã. Cũ̶, Caín ãnacũ̶ pu̶ame cañuecũ̶ wãtĩ yau̶ majũ ãniñañupĩ. Cũ̶ bai Abel cawãmecu̶cu̶re cũ̶ pajĩãrocacõãñañupĩ. Bairi apei jĩcãũ̶ atore bairo ĩ jẽniñabujiou̶mi: “¿Dopẽĩ cũ̶ bai Abere cũ̶ pajĩãñuparĩ?” Atore bairo baiyupa: Caín cũ̶ caátaje carorije ãñupã. Cũ̶ bai cũ̶ caátaje pu̶ame caroa macããjẽ ãñupã. Bairi cũ̶ pajĩãrocacõãñañupĩ Caín Abere. 13Yu̶ yarã, yu̶ bairãrẽ bairo caãna, tũ̶goñamani ápéricõãña ati u̶mu̶recóo macããna Diore camasĩẽna mu̶jããrẽ na caĩñaterijere. 14Marĩ roque yasiricaropu̶ caãnibujioricarã nimirãcũ̶ã, tunu cacatirã majũ caãnarẽ bairo marĩ ãniña. Tore bairo marĩ masĩña tocãnacãũ̶pu̶rea marĩ yarãrẽ marĩ caãmeomairĩjẽ jũ̶gori. Cũ̶ yarãrẽ camaimasĩẽcũ̶ pu̶ame cayasiricu̶re bairo caãcũ̶ riaricaropu̶ caápáu̶re bairo niñami. 15Tocãnacãũ̶pu̶a na yarã camasãrẽ cateeri majã pu̶ame pajĩãrĩ majã wapanarẽ bairo caãna niñama. Na ũna pajĩãrĩ majã yeri capetietiere na majũã cũ̶gomasĩẽtĩñama. Merẽ tiere caroaro mu̶jãã masĩña. 16Jesucristo marĩrẽ camainetõũ̶ ãnirĩ yucu̶pãĩpu̶ riayupi. Tie jũ̶gori cariape merẽ marĩ masĩña ãmeo mairĩqũẽ majũ macããjẽrẽ. Bairi Jesucristo marĩrẽ cũ̶ caĩñamairĩcãrõrẽ bairo marĩ cũ̶ã marĩ yarã camasãrẽ ãmeo mairotiya. 17Capee cacũ̶gori majõcu̶, ñe ũnie caru̶saecu̶ pu̶ame cũ̶ yau̶ cabopacau̶re ĩñamicũ̶ã, cũ̶rẽ caju̶átinemoecũ̶, cũ̶ yau̶re camaiecũ̶ tuacõãñami. Dios cũ̶ cajorije ãmeo mairĩqũẽrẽ cũ̶goetiyami cũ̶ yeri cũ̶ catũ̶goñarĩjẽpu̶re. 18Yu̶ pũnaarẽ bairo caãna, marĩ caãmeomairĩjẽ marĩ risero marĩ caĩbu̶su̶rije jeto mee to ãmarõ. “Mu̶jããrẽ jãã ju̶átigarã,” marĩ caĩata, marĩ caĩbu̶su̶rorea bairo marĩ caátiyaparoro ñuña. Cariapea marĩ caĩbu̶su̶rorea bairo marĩ caátie to caãno ñuña. 19Tore bairo marĩ caátiãmata, “Dios yarã cariape macããjẽrẽ caána majũ marĩ ãnigarã,” marĩ ĩ masĩña. Bairi yua, pu̶gani cãrõ tũ̶goñarĩcãrõ mano Dios marĩrẽ cũ̶ canetõõpeere marĩ tũ̶goñaña, Dios cũ̶ caĩñajoro. 20Tunu apeyera marĩ yeri marĩ catũ̶goñarĩjẽpu̶, “Yu̶a, yu̶ caboro yu̶ baiya,” marĩ yeri caĩbu̶su̶jãrõ jũ̶gori capee wãme marĩ catũ̶goñaata, Dios tiere masĩ peyocõãñami. Dios pu̶ame nocãrõ camasĩ ãnirĩ netõjãñurõ masĩñami nipetiri wãme marĩ yeri catũ̶goñarĩjẽrẽ. 21Yu̶ yarã, yu̶ bairãrẽ bairo caãna yu̶ camairã carorije macããjẽrẽ caáperã marĩ caãno bero caãmata, “Cabui mána marĩ ãniña,” tũ̶goñatutuarique mena marĩ yeripu̶ marĩ ĩ masĩña Dios cũ̶ caĩñajoro. 22Marĩ pu̶ame cũ̶ caroticũrĩqũẽrẽ marĩ tũ̶gou̶saya. Tunu bairoa caroa macããjẽ Dios cũ̶ caĩñajesorije jetore marĩ átinucũña. Bairi Dios pu̶ame nipetiri wãme cũ̶rẽ marĩ cajẽnirĩ wãmerẽ marĩ jogu̶mi. 23Mai, Dios cũ̶ caroticũrĩqũẽ pu̶ame atore bairo ĩña: “Dios macũ̶ Jesucristore cũ̶ tũ̶gou̶saya. Tunu Jesucristo mu̶jããrẽ cũ̶ camairotiricarore bairo mu̶jãã cũ̶ã mu̶jãã majũ ãmeo maiña,” ĩ quetibu̶ju̶ya tie cũ̶ caroticũrĩqũẽ. 24Dios tore bairo cũ̶ caátiroticũrĩqũẽrẽ caána Dios yarã niñama. Dios cũ̶ã na mena nicõãñami na yeripu̶. Bairo cũ̶ caãnoi, “Dios marĩ yeripu̶ niñami,” marĩ ĩ masĩña, cũ̶ Yeri Espíritu Santo marĩ cũ̶ cajoricu̶ marĩ yeripu̶ cũ̶ caãno jũ̶gori.

will be added

X\