1 SAN JUAN 2

1Yu̶ yarã, yu̶ pũnaarẽ bairo caãna atie caroa quetire mu̶jãã yu̶ quetibu̶ju̶ woajoya, carorije áperã mu̶jãã caãniparore bairo ĩ. Bairo yu̶ caquetibu̶ju̶rijere tũ̶gomirãcũ̶ã, jĩcããrã roro na caápata, Dios macũ̶ Jesús cariape caácu̶ cañuu̶rẽ cũ̶ na jẽniáto. Jesús pu̶ame marĩ Quetiupau̶ Diopu̶re marĩrẽ caquetibu̶ju̶netõõbojau̶, caju̶ĩĩ majũ niñami. 2Cũ̶ pu̶ame riawĩ yucu̶pãĩpu̶, marĩ carorije wapare netõõbojagu̶. Marĩ yaye wapa jeto meerẽ netõõbojamasĩñami. Nipetiro ati yepa macããna cũ̶rẽ catũ̶gou̶sari majã cũ̶ãrẽ na netõõbojamasĩñami Jesús. 3Dios cũ̶ caátiroticũrĩqũẽrẽ tie caátirotirore bairo marĩ caápata, pu̶gani tũ̶goñanemorĩcãrõ mano merẽ marĩ masĩgarã cũ̶ yarã marĩ caãnierẽ. 4Aperã jĩcããrã, “Dios yarã majũ jãã ãniña,” ĩ bu̶su̶mirãcũ̶ã, Dios cũ̶ caátiroticũrĩqũẽrẽ jĩcãrõ tũ̶ni na caápericõãta, caĩtopairã majũ niñama. Na yeripu̶re caroa, cariape macããjẽ maniña. 5Apei, ni jĩcãũ̶ ũcũ̶ pu̶ame caroaro cariape Dios yaye bu̶su̶riquere cũ̶ catũ̶gou̶saata, ñe ũnie ru̶saricaro mano caroaro Diore camaimasĩ majũ tuayami. Bairo marĩ caápata, Dios mena jĩcã majãrẽ bairo marĩ ãnigarã. 6“Yu̶a, Dios yau̶ cũ̶ mena jĩcã majõcu̶re bairo caãcũ̶ yu̶ ãniña,” caĩ pu̶ame Dios cũ̶ caborore bairo, marĩ Quetiupau̶ Jesucristo cũ̶ caãnimasĩrĩcãrõrẽã bairo cũ̶ caãno ñuña. 7Yu̶ yarã, yu̶ bairãrẽ bairo caãna, atie roticũrĩqũẽ yu̶ cawoatujorije ape wãme cawãma wãme mee niña. Caãnijũ̶goripau̶pu̶a mu̶jãã catũ̶gojũ̶gorique Dios yaye queti niña. Atie roticũrĩqũẽ cabu̶cu̶ macããjẽ, merẽ mu̶jãã catũ̶gojũ̶gorique quetia niña. Apeye mee niña. 8Cabaimiatacũ̶ãrẽ tunu atie pu̶ame mu̶jããrẽ yu̶ cawoatujorije roticũrĩqũẽ, cawãma wãmerẽ bairo niña. Bairi tie roticũrĩqũẽ cariape macããjẽrẽ Jesucristorea bairo mu̶jãã cũ̶ã tiere mu̶jãã átimasĩña, ãmeo mairĩqũẽ macããjẽrẽ. Bairo marĩ caãmeomairõ, canaitĩãrõpu̶ caãnarẽ bairo marĩ caãnie manigaro. Dios yaye caroaro cabusumajũrĩjẽ caãno, cabusuropu̶ caãnarẽ bairo caãna majũ marĩ ãnigarã yua. 9Bairi ni jĩcãũ̶ ũcũ̶, “Yu̶a, Dios yau̶ cabusuropu̶ caãcũ̶ carorije caápei yu̶ ãniña,” caĩ nimicũ̶ã, cũ̶ yau̶re roro cũ̶ caasiaĩñateata, canaitĩãrõpu̶a mai caãcũ̶rẽ bairo tuacõãñami. 10Apei pu̶ame caroaro mairĩqũẽ mena cũ̶ yau̶re caĩñau̶ roque, cabusuropu̶ caãcũ̶ Dios cũ̶ caborore bairo caácu̶ niñami. Bairo caácu̶ ãnirĩ pu̶gani cãrõ tunu carorije macããjẽrẽ átinemogaetiyami. 11Apei, cũ̶ yau̶re caĩñateri majõcu̶ roque canaitĩãrõpu̶ caãna, carorijere caána na caátiere bairo carorijere caácu̶ ãnirĩ canaitĩãrõpu̶ caãniñesẽãũ̶rẽ bairo niñami. Bairo caãcũ̶ ãnirĩ cacaapee ĩñaecũ̶rẽ bairo cũ̶ caátóre masĩẽcũ̶ áñesẽãnucũñami rorije cũ̶ caátie jũ̶gori yua. 12Yu̶ pũnaarẽ bairo caãna, mu̶jããrẽ yu̶ woajoya atiere: Dios, cũ̶ macũ̶ Jesús yucu̶pãĩpu̶ cũ̶ cariarique jũ̶gori, mu̶jãã carorije wapare cũ̶ camasiriyobojaricarã mu̶jãã cũ̶ã mu̶jãã caãnoi, atiere mu̶jãã yu̶ woajoya. 13Mu̶jãã, cabu̶toa capacu̶a, mu̶jããrẽ yu̶ woajoya atie quetire, tirũ̶mu̶pu̶a ati yepa camanopu̶a merẽ caãnijũ̶goricu̶re mu̶jãã camasĩrĩqũẽ jũ̶gori. Mu̶jãã cawãmarã cũ̶ãrẽ mu̶jãã yu̶ woajoya, wãtĩ cañuecũ̶ majũrẽ cũ̶ mu̶jãã catũ̶gopeoeto jũ̶gori. 14Mu̶jãã, yu̶ pũnaarẽ bairo caãna cũ̶ãrẽ mu̶jãã yu̶ woajoya, Dios marĩ Pacu̶ yarã, cũ̶rẽ camasĩrã mu̶jãã caãnoi. Mu̶jãã, capacu̶a cabu̶toa cũ̶ãrẽ mu̶jãã yu̶ woajoya atie quetire, tirũ̶mu̶pu̶a ati yepa camanopu̶a merẽ caãnijũ̶goricu̶re mu̶jãã camasĩrĩqũẽ jũ̶gori. Mu̶jãã, cawãmarã cũ̶ãrẽ mu̶jãã yu̶ woajoya, yeri tutuarã caãna ãnirĩ Dios yaye quetire mu̶jãã yeripu̶ caroaro Dios mena mu̶jãã catũ̶goñatutuãnie jũ̶gori. Tunu bairoa wãtĩ cañuecũ̶ majũrẽ cũ̶ mu̶jãã catũ̶gopeoeto jũ̶gori mu̶jãã yu̶ woajoya. 15Ati u̶mu̶recóo macããjẽrẽ caĩñamainetõrãrẽ bairo baieticõãña. Ni jĩcãũ̶ ũcũ̶ mu̶jãã mena macããcũ̶ ati u̶mu̶recóo macããjẽrẽ cũ̶ caĩñamainetõata, Dios marĩ Pacu̶ majũrẽ camaiecũ̶ niñami. 16Nipetiri wãme ati u̶mu̶recóo macããjẽ camasã na caĩñaborije pu̶ame Dios cũ̶ cajorije mee niña. Ati u̶mu̶recóo macããjẽ majũ roque niña. Ati wãmerẽ ati u̶mu̶recóo macããna pu̶ame bonucũñama: Roro camasã na rupau̶ caborore bairo na caátigarijere átinucũñama. Aperã na cacũ̶gorijere bu̶tioro bori tiere ĩñau̶gonucũñama camasã. Aperã cũ̶ã ati u̶mu̶recóo macããjẽ pairo cawapacu̶tiere bonetõnucũñama. 17Bairi ati u̶mu̶recóo macããna camasã ati u̶mu̶recóo macããjẽ capetirorea bairo cayasirãrẽ bairo tuayama, roro na caátigarije jũ̶gori. Dios cũ̶ caborore bairo jeto caroaro cariape caátiãcũ̶ pu̶ame roque tocãnacã rũ̶mu̶a caãnicõãninucũpau̶ majũ tuayami. 18Yu̶ pũnaarẽ bairo caãna, ati yu̶tea catu̶sari yu̶tea niña. Ati u̶mu̶recóo petigaro baiya. Bairo capetiparo jũ̶goye caãnoi, jĩcãũ̶ Jesucristore cateeri majõcu̶ cũ̶ caatíere mu̶jãã tũ̶goyupa. Bairo jĩcãũ̶ cũ̶ caatíere mu̶jãã catũ̶gomiatacũ̶ãrẽ, ãmerẽ capããrã majũ niñama Jesucristore cateerã. Bairo na cabairoi, “Ati u̶mu̶recóo petigaro baiya,” marĩ ĩ masĩña ãmerẽ. 19Jesucristore cateeri majã pu̶ame marĩ mena macããna jĩcããrã nimiñupã. Bairo baimirãcũ̶ã, cariape majũrã marĩ yarã mee ãñupã. Marĩ yarã marĩrẽ bairo Dios mena macããna na caãmata, marĩ mena ãnibujiorãma. Bairo na cabairo ĩñarĩ, atore bairo na marĩ ĩ masĩña: “Marĩ mena caãnana nimirãcũ̶ã, marĩ mena macããna jĩcãũ̶ pũnaarẽ bairo caãna mee ãñupã,” marĩ ĩ masĩña yua. 20Marĩ Quetiupau̶ Jesucristo, cũ̶ yeri, Espíritu Santo majũrẽ mu̶jãã joyupi. Bairi nipetiro mu̶jãã Espíritu Santo cũ̶ camasĩõrĩjẽrẽ cacũ̶gorã jeto mu̶jãã ãniña. 21Dios yaye cariape macããjẽrẽ mu̶jãã camasĩẽto jũ̶gori mee mu̶jããrẽ yu̶ woajoya. Tiere mu̶jãã camasĩrõ jũ̶gori roque mu̶jãã yu̶ quetibu̶ju̶ woajoya. Merẽ atore bairo mu̶jãã ĩ masĩña: “Caĩtopairã na caĩrĩjẽ mee niña atie queti. Dios cariape caãcũ̶ yaye queti roque niña,” mu̶jãã ĩ masĩña. 22Caĩtopai pu̶ame atore bairo niñami: Jesucristo, Dios macũ̶, Dios cũ̶ cajoricu̶re, “Jesús, Mesías mee niñami,” ĩ bu̶su̶nucũñami. Bairo caĩbu̶su̶nucũũ̶ pu̶ame Jesucristore cateeire bairo caãcũ̶ niñami. Bairo cũ̶rẽ cateei ãnirĩ, Dios, Jesús pacu̶ cũ̶ãrẽ caboecu̶re bairo tuayami. 23Ni jĩcãũ̶ ũcũ̶ Jesure caĩñatei cũ̶ caãmata, Jesús pacu̶ Dios cũ̶ãrẽ caĩñatei, cũ̶ mena macããcũ̶ mee niñami. Apei, “Cũ̶ã niñami Jesús marĩrẽ canetõõrĩcũ̶,” cariape Jesure caĩbu̶su̶nucũũ̶ pu̶ame roque, cũ̶ pacu̶ Dios yau̶, jĩcãrõrẽ bairo caãcũ̶ niñami. 24Torena, mu̶jãã pu̶ame tirũ̶mu̶pu̶ caroa queti Dios yaye mu̶jãã catũ̶gojũ̶goriquere jãnaeticõãña. Mu̶jãã yeripu̶ tiere tũ̶goñacõã ninucũña. Bairo Dios yaye queti mu̶jãã catũ̶gojũ̶gorique mu̶jãã yeripu̶ caãnicõãninucũata, Dios, bairi cũ̶ macũ̶ Jesucristo mena jĩcãrõrẽ bairo caãna mu̶jãã ãnigarã. 25Bairi, “Jesucristo, cũ̶ caĩcũrĩcãrõrẽã bairo cariape marĩ jogu̶mi yeri capetietie majũrẽ,” marĩ ĩ masĩña yua. 26Aperã roro mu̶jããrẽ caĩtogari majã na caatíparo jũ̶goye mu̶jãã quetibu̶ju̶ woajou̶ yu̶ átiya, narẽ mu̶jãã caĩtoecoetiparore bairo ĩ. 27Bairãpu̶a, mu̶jãã Jesucristo cũ̶ cajoricu̶ Espíritu Santo Dios Yeri majũrẽ mu̶jãã cũ̶goya mu̶jãã yeripu̶. Espíritu Santo pu̶ame mu̶jãã cũ̶ camasĩõrõ jũ̶gori nipetiro caroa wãme macããjẽ jetore mu̶jãã átiãnimasĩnucũña. Espíritu Santo cũ̶ cabuerije cariape macããjẽ niña. Caĩtopairã na caquetibu̶ju̶nucũrĩjẽrẽ bairo mee niña. Bairi Espíritu Santo mu̶jããrẽ cũ̶ camasĩõrõ jũ̶gori aperã mu̶jãã na cabuepeere mu̶jãã macãẽtĩña. Torena, mu̶jãã pu̶ame Jesucristo mena macããna ãnirĩ Espíritu Santo mu̶jãã cũ̶ caĩquetibu̶ju̶ricarore bairo jeto caroa macããjẽrẽ áticõã ninucũña. 28Tunu bairoa yu̶ pũnaarẽ bairo caãna, Jesucristo mena jĩcãũ̶ pũnaarẽ bairo ãnicõãña. Bairo marĩ caãmata, Jesucristo ati yepapu̶ nemo cũ̶ caetarore tũ̶goñatutuarique mena, tũ̶goñaboboricaro mano cũ̶ marĩ cotegarã. 29Merẽ atore bairo mu̶jãã masĩña: “Jesucristo caroaro cariape caácu̶ cañuu̶ majũ niñami. Tunu bairo nipetiro camasã caroa macããjẽ cañurĩjẽrẽ caána, Dios yarã cũ̶ pũnaarẽ bairo caãna niñama,” mu̶jãã ĩ masĩña.

will be added

X\