1 CORINTIOS 8

1Ãmerẽ tunu ape wãme camasã na cawericarãrẽ ñubuepeogarã, u̶gariquere na cajoemu̶gõjorije macããjẽrẽ mu̶jãã yu̶ quetibu̶ju̶gu̶. Bairãpu̶a, nipetiro tie macããjẽrẽ peeto mu̶jãã masĩña. Tiere peeto masĩmirãcũ̶ã, netõjãñurõ camasĩbotiorãrẽ bairo mu̶jãã tũ̶goñanucũña. Marĩ caãmeomairĩjẽ roque marĩ yeripu̶ marĩ ãmeo mainemo joroque marĩ átiya, aperã marĩ yarãrẽ nemojãñurõ marĩ caju̶átimasĩparore bairo. 2Bairi ni jĩcãũ̶ ũcũ̶ jĩcã wãmerẽ masĩẽtĩmicũ̶ã, “Tiere camasĩ yu̶ ãniña,” cũ̶ caĩata, netõõrõ masĩẽcũ̶ majũrẽ bairo caãcũ̶ tuayami. 3Torea bairo ni jĩcãũ̶ ũcũ̶ Diore masĩrĩ cũ̶rẽ cũ̶ camaiata, Dios pu̶ame cũ̶ yau̶re bairo qũĩñanucũñami. 4Bairi merẽ marĩ masĩña: Camasã ĩroagarã, na cawericu̶ ũcũ̶ ati yepapu̶re ñe ũnie wapa maami. Jĩcãũ̶ã niñami Dios marĩ caĩroapau̶. Bairi, na cawericarãrẽ ĩroarã, waibu̶toa rii na cajoemu̶gõjorije ru̶sarijere marĩ cau̶garo dope bairo marĩ ápero. 5Bairãpu̶a, ati yepare, o u̶mu̶recóo cũ̶ãrẽ capããrã, jũ̶gũẽã na caĩrã ãnama. Na ũna jũ̶gũẽã, quetiuparã u̶mu̶recóo majãrẽ bairo caãna capããrã niñama. 6Bairo jũ̶gũẽã capããrã na caãnimiatacũ̶ãrẽ, marĩ pu̶amerẽ, jĩcãũ̶ã niñami Dios marĩ Pacu̶ majũ. Cũ̶, marĩ Pacu̶ Dios, nipetirije ati u̶mu̶recóo macããjẽrẽ qũẽnoñupĩ. Marĩ cũ̶ãrẽ, cũ̶ã, marĩ qũẽnoñupĩ, cũ̶ yarã marĩ caãniparore bairo ĩ. Tunu bairoa jĩcãũ̶ã niñami Jesucristo marĩ Quetiupau̶. Cũ̶ jũ̶gori nipetiro ati u̶mu̶recóo macããjẽ baiãnimasĩña. Cũ̶ jũ̶gori marĩ cũ̶ã marĩ masacu̶ti ãniña. 7Bairãpu̶a, nipetiro atiere masĩẽtĩñama. Jĩcããrã camasã, aperã na cawericarã ũnarẽ caĩroajeyanucũmirĩcãrã ãnirĩ, na jũ̶gũẽãrẽ ĩroarã na cajoemu̶gõjorije ũnie waibu̶toa riire u̶gari bero yua, “Roro majũ marĩ átiya,” ĩ tũ̶goñarĩqũẽ painucũñama cayeri tũ̶goñatutuawẽpũ̶ẽna pu̶ame. 8“Tie rii macããjẽrẽ u̶gari caroarã majũ marĩ ãnigarã, o tie rii macããjẽrẽ marĩ cau̶gaepata, netõõrõ carorã majũ marĩ ãnigarã,” ĩ tũ̶goña masĩã mano. Mai, Dios pu̶ame waibu̶toa riire aperã na jũ̶gũẽãrẽ ĩroarã na cajoemu̶gõjorije macããjẽrẽ marĩ cau̶garo, o marĩ cau̶gaeto jũ̶gori mee marĩ besenucũñami. 9Bairi mu̶jãã pu̶ame maijũ̶goya tore bairo mu̶jãã caátimasĩrĩjẽrẽ. Aperã Dios mena catũ̶goñatutuawẽpũ̶ẽnarẽ roro átajere na átio joroque ápericõãña. 10Mu̶jãã merẽ cayeritutuarã ãnirĩ mu̶jãã pu̶ame aperã na jũ̶gũẽãrẽ ĩroarã na cajoeru̶garije macããjẽrẽ na caroanurĩ wiipu̶ mu̶jãã cau̶garo, apei Diore caĩroau̶ cayeritutuaecu̶ cũ̶ã mu̶jããrẽ ĩñacõrĩ u̶gabujiou̶mi. Cũ̶ yeripu̶ra, “Tie ũnierẽ cau̶gaetipee niña,” ĩ tũ̶goñamicũ̶ã, u̶gabujiou̶mi. 11Bairo mu̶jãã pu̶ame caátimasĩrã, cayeritutuarã nimirãcũ̶ã, roro apei mu̶jãã yau̶ cayeritutuaecu̶ cũ̶ yasio joroque mu̶jãã átiya. Jesucristo cũ̶ã cũ̶rẽ netõõgu̶ cũ̶ riabojayupi. 12Mu̶jãã pu̶ame waibu̶toa riire cau̶gamasĩrã, roro aperã mu̶jãã yarã cayeritutuaena na tũ̶goña yapapuao joroque mu̶jãã átiya. Roro átajere Cristo cũ̶ caĩñajoro mu̶jãã átiãninucũña. 13Tore bairo na jũ̶gũẽã yaye macããjẽrẽ waibu̶toa riire yu̶ cau̶garije jũ̶gori roro yu̶ yau̶re cũ̶ baio joroque yu̶ caápata, cariapea tie waibu̶cu̶ riire jĩcãni cũ̶ã yu̶ cau̶gaĩñoeto, ñuña. Bairo yu̶ cau̶gaĩñoepata, roro cũ̶ baio joroque cũ̶ yu̶ áperibujiou̶ ĩ, tore bairo boya.

will be added

X\