1 CORINTIOS 2

1Torecu̶ yu̶ yarã, Dios camasãrẽ cũ̶ camasĩõetaje ãme roquere cũ̶ camasĩõrĩjẽ queti cariape macããjẽrẽ mu̶jãã quetibu̶ju̶ etau̶, camasĩnetõũ̶rẽ bairo botioro mu̶jããrẽ yu̶ quetibu̶ju̶ ñesẽãẽpũ̶. 2Yu̶ roque mu̶jãã tu̶pu̶re ãcũ̶, Jesucristo yucu̶pãĩpu̶ cariaricu̶ yaye queti jetore mu̶jãã yu̶ quetibu̶ju̶wu̶. Ape wãme ricaati mu̶jããrẽ yu̶ quetibu̶ju̶epu̶, “Jesús yucu̶pãĩpu̶ na capapuaturicu̶re na masĩáto,” ĩ. 3Mu̶jãã tu̶pu̶re etau̶, caquetibu̶ju̶masĩẽcũ̶rẽ bairo yu̶ tũ̶goñawũ̶. Bairo catũ̶goñau̶ ãnirĩ tũ̶goña uwiri yu̶ nananucũwũ̶, mu̶jããrẽ quetibu̶ju̶gu̶ yua. 4Bairi topu̶re mu̶jããrẽ caroa quetire quetibu̶ju̶ ãcũ̶, caroaro masiriyoeto jeto mu̶jãã yu̶ quetibu̶ju̶wu̶. Nocãrõ ati yepa macããna na camasĩbotiorije ũnie mena masĩrĩ, mu̶jããrẽ yu̶ quetibu̶ju̶epu̶, “Camasĩ majũ niñami Pablo,” yu̶ mu̶jãã caĩetiparore bairo ĩ. Espíritu Santo cũ̶ camasĩõrĩjẽ jũ̶gori roque, “Pablo cariape quetibu̶ju̶yami,” mu̶jãã ĩ tũ̶goñao joroque yu̶ ápu̶. Tunu bairoa Dios cũ̶ catutuarijere áti ĩñorĩ, tore bairo mu̶jãã ĩõ joroque yu̶ ápu̶. 5Tore bairo yu̶ ápu̶, Dios cũ̶ caátimasĩrĩjẽ, cũ̶ catutuarijere ĩñarĩ bero, cũ̶ mena mu̶jãã catũ̶goñatutuaparore bairo ĩ. Camasã ati yepa macããna na camasĩrĩjẽ macããjẽrẽ tũ̶gori bero, Dios mena mu̶jãã catũ̶goñatutuaro roquere yu̶ boepu̶. 6Tore bairo quetibu̶ju̶mirãcũ̶ã, aperã merẽ Diore caroaro cariape catũ̶gou̶saricarã na caãmata, pairo Dios cũ̶ camasĩõrĩjẽ mena jãã quetibu̶ju̶nucũña. Bairãpu̶a, ati u̶mu̶recóo macããna camasĩrĩ majã, o quetiuparã camasĩrã cayasiparã na camasĩrĩ wãme ũnie mena mee jãã quetibu̶ju̶nucũña. 7Dios yaye queti, camasãrẽ cũ̶ camasĩõetaje masĩrĩqũẽrẽ mu̶jããrẽ jãã quetibu̶ju̶ya. Marĩ camasĩẽtãjẽ, ati yepa caãniparo jũ̶goyepu̶a marĩrẽ caroaro majũ cũ̶ canetõga jũ̶goyetirique macããjẽ queti roquere jãã quetibu̶ju̶nucũña. 8Atie wãme quetibu̶ju̶riquere ati u̶mu̶recóo macããna quetiuparã cariape tũ̶goboca masĩẽsupa. Tore bairo tiere cariape catũ̶gomasĩrã na caãmata, nocãrõ caroú̶ caãcũ̶ Jesucristore yucu̶pãĩpu̶ cũ̶ papuatuetibujioricarãma. 9Torea bairo ĩ quetibu̶ju̶ woatuyupa Dios ya tutipu̶ cũ̶ãrẽ: “Dios pu̶ame cũ̶rẽ camairãrẽ caroa majũrẽ na cũ̶goyuyami. Camasã na caĩñaetaje, na catũ̶goetaje, na catũ̶goñacoteetaje majũrẽ na qũẽnoyuyami,” ĩ quetibu̶ju̶ woatuyupa ti tutipu̶re. 10Tierea Dios ãmerẽ yua marĩ masĩõ joroque átiyami cũ̶ Yeri Espíritu Santo jũ̶gori. Espíritu Santo pu̶ame nipetiro wãme caĩñamasĩpeyou̶ majũ niñami. Nocãrõ Dios cũ̶ camasĩnetõnu̶cãcõãrĩjẽrẽ, camasã na camasĩẽtĩẽ cũ̶ãrẽ camasĩ majũ niñami Espíritu Santo pu̶ame. 11Ni jĩcãũ̶ ũcũ̶, jĩcãũ̶ camasocu̶ cũ̶ yeripu̶ cũ̶ catũ̶goñarĩjẽrẽ marĩ masĩẽtĩña. Cũ̶, caãcũ̶ jeto cũ̶ yeri cũ̶ catũ̶goñarĩjẽrẽ masĩ masĩñami. Torea bairo Dios yeri pũna Espíritu Santo jeto masĩñami cũ̶ yeripu̶ cũ̶ caátiãnimasĩnucũrĩjẽ pu̶amerẽ. 12Bairi marĩ pu̶ame roquere ati u̶mu̶recóo macããna yeri pũna ũnie meerẽ marĩ jowĩ Dios. Cũ̶ Yeri Espíritu Santo majũrẽ marĩ jowĩ. Cũ̶ pu̶ame nocãrõ cañuu̶ ãnirĩ tore bairo cũ̶ Yeri majũrẽ marĩ jowĩ, cũ̶ yaye macããjẽrẽ marĩ camasĩparore bairo ĩ. 13Bairi jãã pu̶ame Espíritu Santo Dios Yeri majũ cũ̶ camasĩõrĩjẽ jũ̶gori jãã quetibu̶ju̶nucũña. Jãã majũã jãã catũ̶goñarĩjẽ mena jãã camasĩjũ̶goatáje meerẽ jãã quetibu̶ju̶nucũña. Bairi Espíritu Santo yaye masĩrĩqũẽ macããjẽ mena camasã aperã Espíritu Santorea cayericu̶narẽ na jãã quetibu̶ju̶ netõnucũña. 14Ni jĩcãũ̶ ũcũ̶ ati yepa macããcũ̶ Espíritu Santo cacũ̶goecu̶ pu̶ame cũ̶ camasĩõgarijere boetinucũñami. Cabu̶goro macããjẽrẽ bairo tũ̶gocõãnucũñami Espíritu Santo cũ̶ caquetibu̶ju̶garijere. Tunu bairoa tie quetire tũ̶gomicũ̶ã, tiere tũ̶gomasĩ jĩãtietinucũñami. Espíritu Santo jũ̶gori Dios yaye macããjẽrẽ marĩ masĩña. Bairo Espíritu Santore cacũ̶goena pu̶ame roque cũ̶ yayere tũ̶gomasĩ jĩãtietinucũñama. 15Bairi apei camasocu̶, Espíritu Santo Dios Yeri majũrẽ cacũ̶gou̶ tocãnacã wãme ati u̶mu̶recóo macããjẽ caroa wãmerẽ besemasĩñami. Bairi tunu noa ũna camasã Dios Yeri cacũ̶goena pu̶ame qũĩñabese masĩẽnama cũ̶ caátiãnierẽ. 16Bairi torea bairo ĩ quetibu̶ju̶ya Dios ya tutipu̶ cũ̶ãrẽ: “Ni jĩcãũ̶ ũcũ̶ marĩ Quetiupau̶ cũ̶ yeripu̶ cũ̶ catũ̶goñarĩjẽrẽ masĩẽcũ̶mi. Tunu bairo ni ũcũ̶, Dios cũ̶ caátipeere cũ̶ quetibu̶ju̶pomasĩẽcũ̶mi,” ĩ quetibu̶ju̶ woatuyupa Dios ya tutipu̶. Tore bairo cabaimajũcõãmiatacũ̶ãrẽ, marĩ pu̶ame Espíritu Santo jũ̶gori Cristo cũ̶ catũ̶goñarõrẽã bairo catũ̶goñarã ãnirĩ Dios yaye macããjẽrẽ marĩ masĩcõãña.

will be added

X\