1 CORINTIOS 16

1Apeyera, marĩ yarã, marĩrẽ bairo Jesucristo mena catũ̶goñatutuari majãrẽ mu̶jãã cadinero neñobojapeere mu̶jãã yu̶ quetibu̶ju̶pa: Bairi Galacia yepa macããna ñubueri majã poari dinero neñorã na caátipeere yu̶ caátiroticũrĩcãrõrẽ bairo mu̶jãã cũ̶ã mu̶jãã ápa. 2Yerijãrĩcã rũ̶mu̶ caãno mu̶jãã mena macããna jĩcãũ̶ jeto cũ̶ jericawoáto, cũ̶ cawapataátajere ĩñacõñarĩ yua. Bairo cũ̶ dinerore jericawori bero, cũ̶ qũẽnocũ yucoteáto. Bairo mu̶jãã caátimasĩata, yu̶ pu̶ame etari, dinerore mu̶jãã neñorotiricaro mano caroaro yu̶ jemasĩbujiou̶. 3Bairo yu̶ pu̶ame mu̶jãã tu̶pu̶ etau̶, Jerusalẽpu̶ tie mu̶jãã caneñoataje dinerore na yu̶ jeárotigu̶ mu̶jãã cabeseatana, mu̶jãã cajogarãrẽ yua. Na pu̶ame marĩ yarã catũ̶gou̶sari majãrẽ tie dinerore na jeábojagarãma. Bairi cartaari cũ̶ãrẽ na mena yu̶ woajogu̶ marĩ yarãrẽ. 4Yu̶ cũ̶ã Jerusalẽpu̶ yu̶ caápée cañuata, na mena jĩcãrõ jãã ágarã. 5Yu̶ caátí yu̶tea caãno Macedonia yepa macããnarẽ na ñiña netõájũ̶gogu̶. Bairo topu̶ etari bero netõácú̶pu̶ roque, mu̶jãã Corinto macããnarẽ ñiñau̶ etagu̶. 6Bairo mu̶jãã tu̶re etari yoaro jĩcã yu̶tea ũno yu̶ ãnibujiou̶. O ape watoa yu̶ cabaiata, mu̶jãã tu̶pu̶a puere yu̶ netõõbujiou̶. Bairo yu̶ cabaiata, mu̶jãã pu̶ame noo mu̶jãã caju̶átie mena yu̶re mu̶jãã ju̶átijogarã, cabero noo yu̶ caátópu̶ tunu yu̶ caátó yua. 7Baipu̶a, yoaro mee mu̶jããrẽ ĩñanetõrĩqũẽ jeto yu̶ átigaetiya. Yoaro jĩcã yu̶tea cãrõ mu̶jãã mena yu̶ tuagatũ̶goñaña, marĩ Quetiupau̶ cũ̶ cabooata. 8Mai, Efeso macãpu̶a yu̶ tuacõãgu̶ Pentecostés bose rũ̶mu̶ caetaparo jũ̶goye. 9Bairo ti rũ̶mu̶ caetaparo jũ̶goye marĩ Quetiupau̶ yaye quetire caroaro majũ camasãrẽ yu̶ caquetibu̶ju̶masĩpee nigaro ti yu̶teare. Yu̶ paarique yasietigaro. Capããrã niñama atopu̶re marĩ Quetiupau̶ yayere bu̶tioro catũ̶gou̶sagarã. Bairo na cabaimiatacũ̶ãrẽ, capããrã niñama aperã, yu̶ pesuare bairo caãna, yu̶ caquetibu̶ju̶rijere caboena cũ̶ã. 10Apeyera, mu̶jãã tu̶pu̶ Timoteo cũ̶ caetaata, caroaro mu̶jãã mena cũ̶ tũ̶goña u̶seanio joroque ĩrã, caroaro jãñurĩpu̶a cũ̶ mu̶jãã bocáwa. Cũ̶ cũ̶ã yu̶rea bairo marĩ Quetiupau̶ yaye macããjẽrẽ paanucũñami. 11Bairi ni jĩcãũ̶ ũcũ̶ mu̶jãã mena macããcũ̶ cũ̶ boeticõã cũ̶ baieticõãto. Atore bairo pu̶ame cũ̶ mu̶jãã ápa: Caroaro u̶seanirĩqũẽ mena yerijõrõã cũ̶ ju̶átinemo joya, noo cũ̶ caátópu̶ cũ̶ caátóre. Bairo mu̶jãã caáto, yu̶re ĩñau̶ atígu̶mi atopu̶re yua. Yu̶ pu̶ame cũ̶rẽ cũ̶ coteãcũ̶ yu̶ átiya aperã marĩ yarã catũ̶gou̶sari majã mena. 12Apei, marĩ yau̶ Apolos pu̶amerã bu̶tioro marĩ yarã mena mu̶jããrẽ cũ̶ ñiñañesẽã rotijomiwũ̶. Bairo yu̶ caárotimiatacũ̶ãrẽ, ãmeacã majũrã mu̶jãã tu̶re ágaetiyami. Baipu̶a, ape watoa cũ̶ caágari rũ̶mu̶ yoaro meea mu̶jãã tu̶pu̶ atígu̶mi. 13Bairi yu̶ yarã, caroaro tũ̶goña masacatiri ãña. Caroaro jĩcãrõ tũ̶ni tocãnacã rũ̶mu̶a Jesucristo mena tũ̶goñatutuacõã ninucũña. Yeri tutuarique mena tocãnacã rũ̶mu̶a caroa wãme jeto áticõã ninucũña. 14Bairo nipetirije mu̶jãã caátinucũrĩjẽrẽ mu̶jãã caápata, caroaro ãmeo mairĩqũẽ mena átiãninucũña. 15Yu̶ yarã, merẽ mu̶jãã masĩña Estéfanas ya poa, Acaya yepa macããna cajũ̶goye tũ̶gou̶sajũ̶gowã Jesucristo yaye quetire. Na pu̶ame ãmerẽ marĩrẽ bairo catũ̶gou̶sarã marĩ yarãrẽ na ju̶átinemo ãninucũñama. 16Bairi mu̶jãã cũ̶ã na ũna na carotirore bairo caroaro átiãña. O aperã to caãna, jãã capaarore bairo caána, caju̶átinucũrã na caĩrõrẽ bairo jĩcãrõ tũ̶ni mu̶jãã caáto yu̶ boya. 17Marĩ yarã Estéfanas, Fortunato, apei Acaico yu̶ tu̶pu̶ na caetaro ĩñarĩ na mena yu̶ u̶seaniña, mu̶jãã pu̶ame yu̶ mena mu̶jãã caãmerĩmiatacũ̶ãrẽ. 18Na pu̶ame mu̶jãã yu̶re yeri ñuo joroque mu̶jãã caátinucũrõrẽã bairo na cũ̶ã yu̶ tũ̶goña u̶seanio joroque yu̶ átiyama, yu̶ tu̶pu̶ etari yua. Na ũna camasã tore bairo caátinucũrãrẽ caroaro na caĩroanucũparã mu̶jãã ãniña. 19Ñubueri majã poari Asia yepa macããna mu̶jããrẽ ñurotijoyama. Aquila, cũ̶ nu̶mo Prisca bairi aperã cũ̶ ya wiipu̶ cañubueneñanucũrã cũ̶ã marĩ Quetiupau̶ mena bu̶tioro mu̶jãã ñurotijoyama. 20Ato macããna marĩ yarã ñubueri majã cũ̶ã nipetiro mu̶jãã ñurotijoyama. Bairi mu̶jãã cũ̶ã mu̶jãã mena macããnarẽ caroaro nu̶cũ̶bu̶gorique mena ãmeo bocári tocãnacãũ̶pu̶a ãmeo jẽninucũña. 21Yu̶, Pablo, yu̶ majũpu̶a atie catu̶sarijere mu̶jãã yu̶ ñuroti woatujoya. 22Bairi ni ũcũ̶ Jesucristore camaiecũ̶ cũ̶ caãmata, roro popiye Dios cũ̶ caátipau̶ cũ̶ tuacõãto. ¡Marĩ Quetiupau̶, tãmurĩ cũ̶ apáro! 23Marĩ Quetiupau̶ Jesucristo nipetiro mu̶jããrẽ caroare cũ̶ jonemoáto. 24Nipetiro mu̶jãã Jesucristo yarã mu̶jãã cũ̶ã mu̶jãã caãno jũ̶gori bu̶tioro mu̶jãã yu̶ maiña. Tocãrõã niña atie queti yu̶ cawoaturije.

will be added

X\