1 CORINTIOS 13

1Yu̶ pu̶ame aperã camasã bu̶su̶riquere, o ángelea majã bu̶su̶rique cũ̶ãrẽ Dios yu̶ cũ̶ cajorije jũ̶gori cabu̶su̶masĩ majũ nimicũ̶ã, camasãrẽ camaiecũ̶ yu̶ caãmata, dope bairo caápei majũ yu̶ ãniña. Ãpõã tii ũnorẽ roro capaapatowãcõũ̶rẽ bairo caátiãcũ̶ yu̶ ãnibujiou̶. 2Tunu bairoa Dios yu̶ cũ̶ caquetibu̶ju̶rijere camasãrẽ caquetibu̶ju̶netõmasĩ yu̶ ãnibujiou̶. O tunu bairoa nipetiro Dios cũ̶ caátipee camasã na camasĩẽtĩẽ cũ̶ãrẽ camasĩpeyou̶ yu̶ ãnibujiou̶. O apeyera tunu tocãnacã wãme ñe ru̶saricaro mano caroaro camasĩpeti majũ yu̶ ãnibujiou̶. Bairo caãcũ̶ nimicũ̶ã, camasãrẽ camaiecũ̶ yu̶ caãmata, dope bairo caápei majũ yu̶ ãniña. Tunu bairoa nocãrõ netõõrõ tũ̶goñatutuariquere cacũ̶gou̶ ãnirĩ ũ̶tãũ̶ ũnorẽ aperopu̶ caárotimasĩ majũ nimicũ̶ã, peeto ũno camasãrẽ yu̶ camaieticõãta, cabu̶goro macããcũ̶rẽ bairo majũ yu̶ ãniña. 3Tunu bairoa nipetiro yu̶ cacũ̶gorijere cabopacarãrẽ na yu̶ batopeyocõãbujiou̶. Bairo na batomicũ̶ã, narẽ caĩñamaiecũ̶rẽ bairo yu̶ catũ̶goñaata, bairo áticũũ̶ yu̶ átibujiou̶. O aperãrẽ maietimicũ̶ã, narẽ yu̶ cariabojaata, wapa mano cabu̶goroa riau̶ yu̶ baibujiou̶. 4Mai, bairi ãmeo mairĩqũẽ pu̶ame atore bairo ãnajẽ cu̶taje niña: Roro aperã marĩ na caátimiatacũ̶ãrẽ, na caĩrĩjẽrẽ, o na caátiere marĩ nu̶cãcõãmasĩña. Tunu bairoa camasã mena caroaro átiãnajẽ niña. Tunu aperã na cacũ̶gorije cũ̶ãrẽ narẽ marĩ camaiata, marĩ ĩñau̶gomasĩẽtĩña. Tunu aperã netõjãñurõ, marĩ majũã tũ̶goñarĩ aperãrẽ baibotiori marĩ caãmata, camasãrẽ camaiena marĩ ãniña. 5Camasãrẽ caĩñamai pu̶ame camasãrẽ roro boborije ĩ bu̶su̶etinucũñami. Tunu bairoa jĩcãũ̶ã apeye ũnierẽ cabotũ̶goñau̶rẽ bairo baietinucũñami. Ãmeo mairĩqũẽ pu̶ame ãmeo asiarique mee niña. Tunu bairoa ãmeo mairĩqũẽ pu̶ame yoaro marĩrẽ roro caátacu̶ mena asiãnajẽ mee niña. 6Bairi aperã camasã carorije macããjẽrẽ na caáto ĩñarĩ u̶seani tũ̶goñaetinucũñama camasã caãmeomaimasĩrã pu̶ame. Caroaro cariape na caátiãnie pu̶amerẽ ĩñajesori tũ̶goña u̶seaninucũñama. 7Bairi ni jĩcãũ̶ ũcũ̶ camasãrẽ camaimasĩ cũ̶ caãmata, nipetiro popiye baimicũ̶ã, caroaro tũ̶goñanetõrĩ, caroaro maimasĩcõã ninucũñami. Tunu bairoa aperã roro na caátimiatacũ̶ãrẽ, narẽ ĩñamairĩ na cũ̶ã caroaro na caãnipeere masĩrĩ na mena cariape tũ̶goñatutuacõãñami. “Caberopu̶ caroaro átigarãma,” na ĩ tũ̶goñarĩ na maicõã ninucũñami. Bairo caroaro na caãnipeere bori, cũ̶ cũ̶ã caroaro jĩcãrõ tũ̶ni tie nipetiri wãme Dios cũ̶ cajorijere átiãninucũñami. 8Bairi ãmeo mairĩqũẽ di rũ̶mu̶ ũno capetietipee majũ niña. Jĩcã rũ̶mu̶ caãno camasã ape rũ̶mu̶ cabaipeere caquetibu̶ju̶mirĩcãrã quetibu̶ju̶ jãnacoagarãma. Tunu bairoa apeye bu̶su̶rique cũ̶ãrẽ bu̶su̶jãnacoagarãma. Dios yaye quetire camasã na cabuenucũrĩjẽ cũ̶ã cabero manigaro, merẽ jĩcãrõ tũ̶ni nipetiro marĩ camasĩpetiro jũ̶gori yua. 9Ãme ati yu̶teare Dios yaye macããjẽrẽ marĩ masĩpeyoetiya. Torena, cũ̶ yaye queti cũ̶ãrẽ jĩcãrõ tũ̶ni marĩ quetibu̶ju̶ peyomasĩẽtĩña. Marĩ camasĩpeyojĩãtipee marĩ ru̶samajũcõãña mai. 10Bairi ãme ati yu̶tea caãno peeto masĩrĩ marĩ caquetibu̶ju̶ãninucũmirĩjẽ peticoagaro, Jesucristo tunu etari nipetiro jĩcãrõ tũ̶ni caãnierẽ marĩ cũ̶ camasĩõrĩ rũ̶mu̶ caãno yua. 11Ĩcõñarĩ mu̶jãã yu̶ quetibu̶ju̶pa: Mai, yu̶ pu̶ame cawĩmau̶aca ãcũ̶pũ̶, cawĩmau̶ ya wãme bu̶su̶, tũ̶goña, o tũ̶goña besemasĩ yu̶ baiãninucũwũ̶. Bairo cabairicu̶ nimicũ̶ã, ãmerẽ cabu̶cu̶ niãcũ̶, nipetiro cawĩmau̶ yu̶ caãnajẽ cu̶tajere yu̶ cũpeyocõãwũ̶. 12Torea bairo ãmerẽ mai Dios yaye macããjẽ nipetirijere marĩ masĩpeyoetiya. Ẽñoorõ caroaro cabauetopu̶ ĩñarãrẽ bairo caroaro marĩ masĩpeyoetiya mai. Bairo ãmerẽ baimirãcũ̶ã, jĩcã rũ̶mu̶ caãno nipetiro, caãnorẽ bairo jĩcãrõ tũ̶ni cariape marĩ ĩñamasĩpeyocõãgarã. Mai, ati rũ̶mu̶ caãno nipetirore marĩ masĩpeyoetiya. Ape rũ̶mu̶ caãno roque Dios marĩ yerire jĩcãrõ tũ̶ni cũ̶ camasĩpeyororea bairo marĩ cũ̶ã tocãnacã wãme Dios yaye macããjẽrẽ marĩ masĩpeyocõãgarã jĩcãrõ tũ̶ni yua. 13Bairopu̶a, itia wãme niña tocãnacã rũ̶mu̶a caãnicõãninucũpee: Jesucristo mena tũ̶goñatutuarique, bairi Dios marĩ cũ̶ cajopeere marĩ cacoteãninucũrĩjẽ, bairi marĩ caãmeomairĩjẽ cũ̶ã yua. Bairo itia wãme caãnimajũrĩjẽ caãnimiatacũ̶ãrẽ, jĩcã wãmea niña netõjãñurõ caãnimajũrĩjẽ: ãmeo mairĩqũẽ jeto.

will be added

X\