1 CORINTIOS 11

1Bairi, yu̶, Cristo cũ̶ caátiere ĩñacõrĩ caroaro yu̶ caátorea bairo mu̶jãã cũ̶ã caroaro yu̶ caátiere ĩñacõrĩ átiãnajẽrẽ átiãnimasĩña. 2Mu̶jãã pu̶ame yu̶re tũ̶goñarĩ, mu̶jãã yu̶ caquetibu̶ju̶ricarore bairo caroaro jĩcãrõ tũ̶ni caroa wãmerẽ mu̶jãã áticõã ninucũña. Tiere queti tũ̶gori mu̶jãã mena yu̶ u̶seaniña. 3Mai, atie cũ̶ãrẽ mu̶jãã camasĩrõ yu̶ boya: Cristo pu̶ame marĩ caũ̶mu̶arẽ caãnijũ̶gou̶, caru̶poare bairo caãcũ̶ niñami. Bairi tunu caũ̶mu̶ canu̶mocu̶cu̶ pu̶ame carõmio, cũ̶ nu̶morẽ caãnijũ̶gou̶, cõ ru̶poare bairo caãcũ̶ niñami. Dios, Cristore caãnijũ̶gou̶, cũ̶ ru̶poare bairo caãcũ̶ cũ̶ caãnorẽã bairo caũ̶mu̶ cũ̶ã cũ̶ nu̶morẽ caãnijũ̶gou̶ niñami. 4Bairi ni jĩcãũ̶ ũcũ̶ caũ̶mu̶ Diore cũ̶ jẽnigu̶, o Dios yaye macããjẽrẽ cũ̶ caquetibu̶ju̶paro jũ̶goye, jutii asero, o apeye ũnie mena cũ̶ ru̶poare peotori cũ̶ cajẽniata, Cristo cũ̶rẽ caãnijũ̶gou̶, cũ̶ ru̶poare bairo caãcũ̶rẽ cũ̶ nu̶cũ̶bu̶goecu̶ átiyami. 5Tunu bairo jĩcãõ ũcõ carõmio cũ̶ã Diore cũ̶ jẽnigo, o Dios yaye macããjẽrẽ cõ caquetibu̶ju̶paro jũ̶goye cõ ru̶poare jutii, o apeye ũnie mena cõ capeotoeticõãta, cõrẽ caãnijũ̶gou̶, cõ manapu̶re cũ̶ nu̶cũ̶bu̶goeco átiyamo. Cõ manapu̶re cabotio ãnirĩ cõ poare cajuapere reecõãrĩcõrẽã bairo baiyamo yua. 6Bairi jĩcãõ ũcõ carõmio cõ ru̶poare cõ capeotogaeticõãta, jicoquei cõ poare cõ cajuare peyocõãrotiro ñuña. Bairo átirotimiocũ̶ã, cõ capoa tarotiataje, o cõ capoa juarepeyorotiatajere cõ cabobotũ̶goñaata, toroque cõ ru̶poare cõ bu̶gatoáto apeye ũnie mena yua. 7Caũ̶mu̶ roque cũ̶ ru̶poare cũ̶ bu̶gatoeticõãto. Mai, caũ̶mu̶ pu̶ame, Dios bauriquere bairo cabauu̶, Dios cũ̶ caqũẽnojũ̶goricu̶ majũ niñami. Tunu bairoa Dios nocãrõ caroaro cũ̶ caãnajẽ cu̶tiere bairo cabauu̶ majũ niñami, caũ̶mu̶ pu̶ame. Carõmio pu̶ame roque caũ̶mu̶ cũ̶ caãnajẽ cu̶tiere bairo cabauo majũ niñamo. 8Bairi merẽ atore bairo marĩ masĩña: Mai, carõmio rupau̶ mena nerĩ cũ̶ qũẽnoesupi Dios caũ̶mu̶rẽ. Caãnijũ̶goricu̶ caũ̶mu̶ waru õwãrõ macããtõ mena nerĩ roque carõmiorẽ cõ qũẽñoñupĩ Dios carõmio caãnijũ̶goricore. 9Carõmio jũ̶gori mee caũ̶mu̶rẽ cũ̶ qũẽnoñupĩ Dios. Caũ̶mu̶ jũ̶gori roque carõmio caũ̶mu̶ mena caãnipaore cõ qũẽnoñupĩ Dios. 10Bairo caũ̶mu̶ roca cõ carotimasĩrĩjẽ jũ̶gori carõmio pu̶ame jutii asero ũno mena cõ ru̶poare bu̶gatori caquetibu̶ju̶pao niñamo. Tunu bairoa ángelea majã cõ ru̶poare bu̶gatori cõ caãno na caĩñajesoparore bairo ĩõ, tore bairo cõ caáto ñuña. 11Tore bairo caroca carotimasĩõ carõmio cõ caãnimiatacũ̶ãrẽ, ni jĩcãũ̶ ũcũ̶ Cristo yau̶ carõmio jũ̶gori mee caroaro caátiãnimasĩnucũũ̶ mácũ̶mi. Tunu bairo dico jĩcãũ̶ ũcõ Cristo yao caũ̶mu̶ jũ̶gori mee caroaro caátiãnimasĩnucũõ mácõmo. Na pu̶garãpu̶a yeri ñajããõ joroque na caãmeo átipeere bojũ̶goyupi Dios. 12Merẽ cariape marĩ masĩña: Carõmio caãnijũ̶goricore caũ̶mu̶ rupau̶ mena jũ̶gori cõ qũẽnoñupĩ Dios. Bairo cabaimiatacũ̶ãrẽ, cabero caũ̶mu̶ pu̶ame tunu carõmio mena jũ̶gori buiamasĩñami. Na pu̶garãpu̶a Dios cũ̶ caqũẽnorĩcãrã majũ niñama. 13Bairi mu̶jãã majũã tũ̶goña beseya mu̶jãã caátipee cañurĩjẽrẽ. Bairi, “Carõmio cõ ru̶poare apeye ũnie mena peotoeco Diore cõ cajẽnirõ ñurõ,” mu̶jãã caĩata, ñuẽtĩña. 14Merẽ, caũ̶mu̶a marĩ caãnajẽ cu̶tiere camasĩrã marĩ ãniña. Bairi caũ̶mu̶ cũ̶ poare juareecu̶, pairo bu̶tiori cũ̶ caãmata, boboojãñuña cũ̶rẽ, poa yowerije cũ̶ cacũ̶goro jũ̶gori yua. 15Bairo marĩ caũ̶mu̶a pu̶ame marĩ cabaimiatacũ̶ãrẽ, carõmio roque cõ poare bu̶tiori cõ caãno ñuña. Poa yowerije cũ̶gori cõ caãnie cõ jesoye majũ ãno baiya. Cõ poa cayowerije pu̶ame cõ ru̶poare catorije cõ jesoye majũ Dios cũ̶ cacũrĩqũẽ niña. 16Bairo yu̶ caĩquetibu̶ju̶rijere tũ̶gomicũ̶ã, ni jĩcãũ̶ ũcũ̶, “Bairo mee niña,” caĩbu̶su̶botiogau̶re atore bairo cũ̶ camasĩrõ yu̶ boya: Jãã, caquetibu̶ju̶ri majã, bairi aperã, Dios ya poa macããna ñubueri majã cũ̶ã ape wãme marĩ caátiãnijũ̶goatajere marĩ masĩẽtĩña. Tie yu̶ caquetibu̶ju̶rije jetore marĩ masĩña. 17Mai, ato jũ̶goye mu̶jããrẽ yu̶ cawoatujopeere tũ̶goñarĩ mu̶jãã mena yu̶ u̶seanimasĩẽtĩña. Mu̶jãã pu̶ame neñarĩ ñubuerã, Dios mena nemojãñurõ tũ̶goñatutuao joroque mu̶jãã caátiparo ũnorẽã, cũ̶ mena mu̶jãã caãnie to royetuao joroque roro mu̶jãã átinucũña. 18Caãnijũ̶goro atore bairo ñi quetibu̶ju̶nucũñama jĩcããrã mu̶jãã mena macããna: “Ñubuerã neñarã na majũ jĩcãrõ tũ̶ni tũ̶goñarĩ neñaetinucũñama. Na majũ ãmeo ricawatiri jĩcãrõ ñubuemasĩẽtĩnucũñama,” mu̶jãã ĩnucũñama. Bairo yu̶ na caĩquetibu̶ju̶nucũrĩjẽrẽ baipu̶a cariapea yu̶ tũ̶goya. 19Torea bairo mu̶jãã baicõã ninucũgarã. Tore bairo mu̶jãã cabairije cañuetie caãnimiatacũ̶ãrẽ, mu̶jãã catũ̶goñaricawatirije jũ̶gori yua, “¿Noa pu̶ame Jesucristore catũ̶gou̶sarã majũ na ãniñati?” marĩ ĩ masĩgarã. 20Bairo ricawatiri, caroaro caãmerã ãnirĩ Jesucristo riagu̶ jũ̶goye cũ̶ cau̶gatu̶sariquere tũ̶goñarĩ u̶garã, roro majũ átigarã, mu̶jãã neñanucũña. Marĩ Quetiupau̶ riagu̶ jũ̶goye cũ̶ cabuerã mena cũ̶ cau̶gatu̶saricarore bairo mee majũ mu̶jãã átinucũña. 21Mu̶jãã pu̶ame u̶garicapau̶ caetaro, tocãnacãũ̶pu̶a cajũ̶goyea u̶gariquere jeeri pairo mu̶jãã u̶gajũ̶goye cu̶tinucũña. Bairo cajũ̶goyea mu̶jãã cau̶gaweyoroi, aperã pu̶ame bocáqueya cotenucũñama. Tunu bairoa cũmurĩ tũ̶nipu̶ aperã mu̶jãã mena macããna cũ̶ã u̶se ocore etinucũñama. 22Bairi mu̶jããrẽ ñiña: ¿Dopẽĩrã mu̶jãã ya wiiripu̶a u̶gariquere u̶ga, o u̶se ocore eti, mu̶jãã áperiyati, tore bairo átigamirãcũ̶ã? Tunu bairoa, ¿dopẽĩrã Dios ya poa macããna ñubueri majãrẽ na mu̶jãã nu̶cũ̶bu̶goetinucũñati? Tunu bairoa aperã, apeye ũnie cacũ̶goena cũ̶ã roro bobooro na majũ na tũ̶goñao joroque mu̶jãã átiya. Bairi, ¿ne ũnie pu̶amerẽ mu̶jãã ñicu̶ti? “¡Ñujãñuña! Caroaro majũ mu̶jãã átiya,” ¿ñicu̶ti? Tore bairo roro mu̶jãã caátiere ĩñarĩ, ¿dopẽĩ, “Ñujãñuña,” ñibujiocu̶ti? ¡Tore bairo ñiecũ̶, tame! 23Mai, yu̶ pu̶ame marĩ Quetiupau̶ yu̶re cũ̶ caquetibu̶ju̶ricarorea bairo mu̶jããrẽ atore bairo yu̶ quetibu̶ju̶wu̶: Marĩ Quetiupau̶ Jesure cũ̶ cabu̶su̶jãbuitiri ñamia caãno, cũ̶ pu̶ame cũ̶ cabuerã mena neñarĩ cũ̶ wãmopu̶ pããrẽ neñupũ̶. 24Bairo ne yaparo Diore cũ̶ jẽnirĩ bero carecomacã pebatori cũ̶ cabuerãrẽ na nunirĩ, atore bairo na ĩñupũ̶: “Atie pan yu̶ rupau̶ niña. Mu̶jããrẽ yu̶ cariabojarije macããjẽ niña. Bairi mu̶jãã cũ̶ã cabero atore bairo yu̶ caátajere tũ̶goñarĩ pããrẽ mu̶jãã bato u̶ganucũgarã.” 25Tunu bairoa ásupu̶ Jesús: Pããrẽ u̶ga yaparori bero, cũ̶ wãmopu̶ copa etirica bapare nerĩ atore bairo na ĩñupũ̶ cũ̶ cabuerãrẽ, “Atiru̶ macããjẽ u̶se oco pu̶ame yu̶ rií niña. Camasãrẽ netõõgu̶ yu̶ riacoagu̶. Bairo yu̶ cariápee jũ̶gori cawãma wãme camasãrẽ Dios cũ̶ caátibojacũrĩjẽ niña. Bairi di rũ̶mu̶ ũno mu̶jãã caetiri rũ̶mu̶ cãrõ u̶se ocore etirã, yu̶ caátajere tũ̶goñarĩ mu̶jãã átinucũgarã,” ĩñupũ̶ Jesús. 26Bairi mu̶jãã pu̶ame Jesucristo cũ̶ caátajere tũ̶goñarĩ pããrẽ u̶ga, bairi u̶se oco cũ̶ãrẽ mu̶jãã caetinucũrõ cãnacãnia Jesucristo marĩ cũ̶ cariabojariquere masĩrĩ áti ĩñorã mu̶jãã átinucũña. Tore bairo áticõã ninucũña mai marĩ Quetiupau̶ ati yepapu̶ cũ̶ caatíparo jũ̶goye. 27Bairi caroaro ása. Ni jĩcãũ̶ ũcũ̶ marĩ Quetiupau̶ cũ̶ caátatore bairo pããrẽ u̶ga, o u̶se oco cũ̶ãrẽ eti, átimicũ̶ã, nu̶cũ̶bu̶gorique mano cũ̶ caápata, roro ácu̶ átiyami. Marĩ Quetiupau̶ cũ̶ rupau̶ mena roro popiye bairi yucu̶pãĩpu̶ cũ̶ cariariquere nu̶cũ̶bu̶goecu̶re bairo ácu̶ átiyami. Bairi tore bairo cũ̶ caápata, roro cũ̶ caátie wapa pairo nigaro. 28Bairo cabairo jũ̶gori tocãnacãũ̶pu̶a na yeripu̶ catũ̶goñabeseparã niñama, marĩ Quetiupau̶ yaye macããjẽ pan, bairi u̶se oco cũ̶ãrẽ na caetiparo jũ̶goye mai. 29Bairi mu̶jãã yeripu̶ caroaro tũ̶goñajũ̶goyetiena, Jesucristo yaye macããjẽrẽ u̶ga, o eti, mu̶jãã caápata, roro popiye mu̶jãã cabaipee wapare macããrã nu̶cũ̶bu̶goricaro mano eti, u̶ga mu̶jãã átinucũgarã. 30Tie jũ̶gori mu̶jãã mena macããna capããrã riaye painucũñama. Tunu aperã catutuaena cũ̶ã ninucũñama. Tunu bairo tie jũ̶gori aperã jĩcããrã mu̶jãã mena macããna baireyupa. ¿Tiere mu̶jãã masĩẽtĩñati? 31Bairi marĩ majũã marĩ yeripu̶ marĩ catũ̶goñarĩjẽ mena roro marĩ caátinucũrĩjẽrẽ caroaro marĩ rupau̶re marĩ catũ̶goñabesepeyocõãta roque, marĩ Quetiupau̶ pu̶ame marĩ yaye wapa, roro popiye marĩ baio joroque áperibujiou̶mi. 32Baipu̶a, marĩ Quetiupau̶ pu̶ame roro popiye marĩ tãmu̶o joroque cũ̶ caápata, caroaro marĩ caãnipeere marĩ beyou̶, tore bairo marĩ átinucũñami. Bairo marĩ cũ̶ caáto jũ̶gori marĩ pu̶ame ati u̶mu̶recóo macããna roro popiye cayasiparã mena roro marĩ catãmu̶oetiparore bairo ĩ, tore bairo marĩ átinucũñami. 33Bairo cabairoi, yu̶ yarã yu̶ camairã, di rũ̶mu̶ ũno neñapori Jesucristo riagu̶ jũ̶goye cũ̶ cau̶gariquere tũ̶goñarĩ mu̶jãã cau̶gari rũ̶mu̶ caãno tocãnacãũ̶pu̶rea ãmeo yuri, jĩcãrõ u̶ganucũña. 34Bairi ni jĩcãũ̶ ũcũ̶ mu̶jãã mena macããcũ̶ bu̶tioro majũ queyari mu̶jãã caĩrõrẽ bairo cũ̶ caboeticõãta, cũ̶ ya wiipu̶a cũ̶ u̶gacõãto u̶gariquere. Mai, Dios pu̶ame neñapori mu̶jãã cau̶ganucũrĩjẽrẽ cũ̶ canu̶cũ̶bu̶goetie jũ̶gori roro popiye cũ̶ baio joroque cũ̶ caáperiparore bairo ĩ, cũ̶ ya wiipu̶a cũ̶ u̶gacõãto. Baipu̶a, apeye yu̶ caĩquetibu̶ju̶garijere mu̶jããrẽ ĩñau̶ ácú̶pu̶, caroaro mu̶jãã yu̶ quetibu̶ju̶ qũẽnonemogu̶.

will be added

X\