Titus 3

1Jéyacseva quivij mu'in anicjetety Jen' in paj qui chicacsi mu'in jacchety ayo' in, räjtumdye bä'yedye'ĉantyi' fer bu'yity in, jemoñe' se'vacsebi yụ'tacdye' mu'in, paj qui rụij bä'yi in. 2Jéyacseva chime' paj qui jam yirity muntyi' ac̣hi' p̂iyiti in, paj qui jam chime' vaj meij doroi'jitidyeij in, jemoñe' jäm'yedye'tum bä'yi in räjtum muntyi' in. 3Anicdye me' bä'ja' jiquej tsun, a'c̣his bä'ja' jiquej, anic itŝi' jéja' dyijyedye' bä'ja' jiquej tsun, mijam dam' chiqueja Jen', anic därsi'tum mon'dye' bä'ja' jiquej. Chime'dye a'c̣his dyijyedye' ĉụi'si' cạja' tsun, mọ' bächäsin' jiquej tsun, mọ' mọmo' ma'jotyeja' jiquej. Anic ac̣hi' bä'ja' jiquej, ji'me'tyiyitiĉa' dyijyedye' jiquej, judyeya' fạ́cacseja' muntyi' in, mu'in qui chime' meij fáquisin' in, me' bä'ja' jiquej tsun. 4Chat qui ayij mọ' tupudye', mu' Jen' Ji'c̣honsin'tyi' tsun jutete mu' Jesucristo, mu'ya' qui ji'caviyisin' mạ'jitidyes mu' judyeya' jäm'yedye' mu'. 5Mu' qui ji'c̣honsin' tsun, jam qui nam' ĉụi'si'ya' jäm'yedye' tsun, jun' chuc rụij bä'ja'. Mu'dye mọmo' ñịbe' ĉúsin' ji'c̣honsin' tsun, ĉụi'si'ya' Ạ'edye' mu'. Mu' c̣hicon'jisin' tsun aty so'misin'ya' Ạ'edye' mu', mọ'ya' qui na'ebajsha' Jen'dyes tsun, yocsi' qui aty dyijyedye' me'chuja'. 6Mu' Jen' yi paj qui mu' Jesucristo mu' Ji'c̣honsin'tyi' tsun, paj qui mu' so'misin' Ạ'edye' mu' mijam dam' quijatutyisin' so'misin', 7judyeya' därsi'ya' ñịbe'jitidyes mu' rụij yu'sin' ĉụi'si'ya' vej mu', q̂uin' aty Jen'dyety tsun, Jen'ya' qui ra' bä'ja' tsun, mọ' bisva'quejas tsun, 8anic rụijsis ọij p̂eyacdye' jéyes q̂uin'. Yụ mạ'je' paj qui ferche' jị'chiyacsi mi mu'in anicjetety Jen' in paj qui cäc̣hä'chui' in ji'chäyitidye' q̂uin'. Jéyacseva paj qui nọ́tacsi bä'yi in, mọ' nash jäm' räjdyes muntyi' in. 9Jam qui na ram' dyijtui' mi urucyas p̂eyacdye' muntyis mu'in, mọ' itŝis dyijyedye'. Jam ra' dyijtui' chime' mi sánacdye' tịj jiquej mu'in, mijam ra' vaj meij jítidyeij mi mu'intum in va've jeptety yụ'tacdye' Jen'si' in. Jo'mes p̂eyacdye' muntyis in, anic fibis shupqui' mu'in. 10Mu'ya' yirity va've dyijyity jụijya', mu' yócocoj yụ'tacsity mu'in anicjetety Jen' jụijya' in, mu' me'tyity, jéme yiri' qui' judyeya' pärä' qui'. Jam mạ'je' chäquin jụijya' mu', va'quecme mu' paj jam pen'dyetucsi mu'. 11Jesha' mu'in me'tyity in anic ĉụi' ac̣hi'ti in, ĉụi'sidyes juchaj ji'me'ti in. 12Yụ ra' jutete míya' uts Artemas, jam jụijya' uts Tíquico, paj qui mu' ĉúquin. Ventyiquinya' mu' yụ'tyeva' ferdye' paj qui Nicópolisve jịjcaij mi, mu've ra' ĉucdyim, mu'ĉan ra' ji'jiye' yụ tupudye' tsịvu'vudye'. 13Chime'dye yụ'tyeva' ferdye' paj qui nọ́tyetacsi mu'in cạyacsity p̂eyacdye' in, mu' Apolos judyeya' mu' Zenas, mu' ñutsjetacsity ayo'ya' in. Cạveva' mi paj qui mu'in jam jayejjotaqui víte majmiya' in. 14Mu'in anicjetety Jen' in jemoñe' jäm' carijtaqui in paj qui tupuj nọ́tacsi yoctyi' in tyi chuc jayejjotaquity jedye' in, me' ra' jam fibi' bä'yi in mu'in anicjetety Jen' in. 15Räj úyaty in pen'dyetuntyi' yụ in, mu'in chime' vorjin in. Mi chime' vorjeyacseva mu'in anicjetety Jen' in mu'in mạ'jintyi' tsun in. Yụ cọdyete Jen' paj qui mu' so'minac ñịbe'jitidyes räjtumdye mi'in.

will be added

X\