Titus 2

1Mi ra' jị'chiyacsi jụ'ñis chuc rụijsis ji'chäyitidye'. 2Jéyacseva mu'in isho' muntyi' in paj qui rụij bä'yi in, paj qui jäm' ĉujcati in, mijam tyédye'ĉan bä'yi in jemoñe' dyijyedye'tum bä'yi in. Jéyacseva chime' paj qui yejĉoij anicjete Jen' in, paj yejĉoij mạ'jeyacsi bä'yi in, paj tyum'chutidye'tum chime' bä'yi in. 3Jéyacseva chime' mọ'in isho'munsi' p̂en in, paj qui mọ'in chime' räjĉan irijyedye'tum bä'yi' in, paj jam ñinacsi' muntyi' in, mijam ra' tyei'si' chime' bä'yi in. Jemoñe' mọ'in qui jị'chiyacsi' in jun' chuc bä'yi' in mọ'in anicjetes Jen' in. 4Chime'dye mọ'in isho'munsi' p̂en in jemoñe' jị'chiyacsi' mọ'in nanamunsi' p̂en in paj qui mạ'jeyaqui' in ĉụi'tyi' vämtyi' mọ'in judyeya' ạva' mọ'in. 5Chime'dye mọ'in isho'munsi' p̂en in jemoñe' jị'chiyacsi' nanamunsi' p̂en in paj qui jam a'c̣his dyijyedye' cại' in, paj qui jäm' ĉujcati' in, judyeya' jäm'yedye'tum bä'yi' in, paj qui jäm' carijtaqui' aca'ĉan mọ'in, paj qui chicaqui' vämtyi' mọ'in. Me' bä'yi' jụijya' in mọ'in nanamunsi' p̂en in, mu'in jorojyaty muntyi' in jam ra' mọ'indyes äcäijjepte in Jen'si' p̂eyacdye' mu'. 6Chime'dye jéyacseva nanamuntyi' son' in paj qui jäm' ĉujcati ĉụi' in. 7Me' mi chime' rụij bä'va räjĉan, tupuj qui mu'in cäc̣hä'chutyin in. Rụij jị'chiyac-seva, jam ra' shejvin'dye'tum jị'chiyacsi mi. 8Rụijsis p̂eyacdye' so'macseva chat qui ra' jam tupuj ñäñibun in. Me' rụij jị'chiyacsi jụijyam, tsị́caij ra' mu'in in ñinaquity jiquej in, jam ra' jun' dacbusin' tsunsi' juchaj in. 9Jéyacseva mu'in úñity in paj chicaqui in ayos p̂eyacdye' mu'in, jemoñe' me' bä'yi in paj qui räjĉan ma'jotacsi ayo' mu'in. Paj jam ji'pen'ti mọmo' p̂eyacdye'ya' in, 10mijam ra' shi'atucsi in. Jemoñe' yedyej rụij bä'yity in, mijam ra' miquis shu'adye' me'chui' in, paj qui me' muntyi' yi in: “Där jäm'si' mọ' ji'chäyitidye' Jen'si' mu' cäc̣hä'chui'si' in”, paj qui me' p̂eijbite in Jen'si' p̂eyacdye' mu', mu' Ji'c̣honsin'tyi' tsun. 11̣Q̂uin' aty jemoñe' me' bä'ja' ĉaĉaij na mu' Jen' aty ji'caviyisin' ñịbe'jitidyes mu', mọ'ya' mu' mạ'je' paj qui räj ji'c̣honsin' úchety muntyi' tsun. 12Ọij ñịbe'jitidyesya' mu' jísin' paj qui farajjeyaĉa' a'c̣his dyijyedye' tsun, mọ' mạ'je'si' jacches jedye' tsun, paj qui rụij bä'ja' úche' jacche', paj qui ĉujcatiĉa' tsun paj qui yejĉoja' cäc̣hä'chuja Jen' úche' jacche', 13jun' qui' chuc atsijbanya' mu' Jesucristo Ji'c̣honsin'tyi' tsun, mu'dye Jen' mạyedye'chety. Mu' bisva'quejaty q̂uin' tsun ma'jodye'-tum ra' tiĉunja, mạijquedye'tum ra' atsijban. 14Mu' ĉụi' ji'ujati tsundyes jiquej, paj qui ji'c̣honsin' tsun räj a'c̣hisĉan jedye', judyeya' paj qui mu' c̣hicon'jibusin' a'c̣his jedye' ĉojtyi'ĉansi' tsun, judyeya' yu'sin' paj qui mu'dyety tsun, paj qui fer dyijtuja' tsun jun' chuc ra' jäm' bä'ja' mu'dyes. 15Ji'chäyitidye' so'macseva, chime' ji'ma'yacseva Jen'dyes, judyeya' fạra'jeyacseva tyi chuc jam mạ'je' chique'tyi' in, ĉaĉaij nash me' mu' Jen' yu'tyin mi. Me' ra' carijtaqui mi paj qui jam yirity muntyi' äcäijjin in.

will be added

X\