Titus 1

1Yụ nash Pablo úñity Jen'tyi' mu' judyeya' jutactyi' Jesucristoty mu'. Mu' jutin yụ paj qui yụ voro'tacsi mu'in tsim'tactyi' Jen'tyi' mu' mu'si' p̂eyacdye' mu', paj qui anicjepte in. Chime'dye jutin yụ paj qui jị'chiyacsi yụ rụijsis p̂eyacdye' mu', mọ' cäc̣hä'chujas. 2Mọ' jísin' jun' chuc ra' tupuj Jen'ya' räjĉan bä'ja' tsun, mọ' q̂uin' bisva'quejas tsun. Ọij p̂eyacdye' yu'tyiyisin' mu' Jen' jiquej, jambi'dyem' jäm'tacya' ọij jac jiquej, tạ'caty mu' yi jiquej. Cạ̈tsi' ra' mọ' ĉaĉaij na mu' Jen' jam chịj väñäij. 3̣Q̂uin' aty ayij tupudye' Jen'si' mu', yụ'tye' p̂eyacdye' mu' judyeya' jutacsi mu'in voro'tacsity in paj qui muntyi' in chị́yepte in. Mu' Jen', Ji'c̣honsin'tyi' tsun, mu' yu'tyin yụ paj qui yụ voro'tacsi p̂eyacdye' mu'. 4Mọ'dyes qui yụ q̂uin' sáñe' ọij mídyes, Tito,197 mi jeñej bu'yi anictyity ạva' yụ ĉaĉaij na vaj me' anicyedye' Jen'che' tsun. Yụ cọdyete Jen' mu' Ạvatusin'tyi' tsun judyeya' mu' Cristo Jesús Ayo' tsun, mu' Ji'c̣honsin'tyi', paj qui mu' so'min ñịbe'jitidyes mu' judyeya' ma'jodye' ĉojtyi'ĉandyes mi. 5Yạjquiyeya' yụ jiquej Cretaĉan, yụ yạjquiye paj qui jäm' yụ'tye' mi jedye' chuc jayej jäm' yụ'tac mu'inĉan in. Chime'dye yụ baja' jéye jiquej paj qui yụ'tacsi mi mu'in ĉọjcacsity anicjetety Jen' in, junanaj chuc vajmu'yaijĉan in, mu'ĉaĉan ra' yụ'tacsi mi ĉọjcacsity in. 6Tyi chuc ra' me' yụ'tac jụijya' in jemoñe' rụij bä'yity in, mijam ra' jụ'ñity in, judyeya' yiritytyity p̂en in. Jemoñe' mu' ạva' mu' anicjetety Jen' in, judyeya' chicaquity jen' mu'in judyeya' tse' mu'in, mijam ra' ac̣hi' bä'yity ạva' mu' paj qui jam ñäñinac in. 7Mu' ĉọjcacsity anicjetety Jen' in, mu' nash yụ'tac paj qui carijtaqui Jen'dyes mu', mọ'dyes jemoñe' jam jụ'ñity mu', mijam me'me'yity, mijam fuchyedyeijtyi', mijam tyeijtyi', mijam chucsity, mijam fer dyijtutety querec̣ha chime'. 8Jemoñe' chịj ji'dyäcacsity aca'ĉan, judyeya' ma'jotyety rụijsis dyijyedye', judyeya' jäm' ĉujcatity ĉụi', judyeya' rụij bä'yity cäc̣hä'chutety Jen'. 9Chime'dye jemoñe' rụij cäc̣hä'chui'tyi' mọ' rụijsis p̂eyacdye' se'ves jiquej mu', me' ra' chat tupuj rụij jị'chiyacsi mu' rụijsis p̂eyacdye', mọ'ya' ra' ji'ma'yacsi judyeya' rụijjeyacsebi dyijyedye' mu'in fạ́quety Jen'si' p̂eyacdye' in, jemoñe' me' bä'yity in mu'in ra' yụ'tac in ĉọjcacsity in. 10Mu'ĉantyi' dai' in jam chiquety p̂eyacdye' in, dadam' mu'in judío in me' tsan' jụjjetety Jen' in, fibi' qui nam' p̂eyaqui in, se' ja'yacsi muntyi' in ĉụi'si'ya' dyijyedye' cäjsis mu'in, jéyacsi in jemoñe' sei'tac a' mu'in paj qui c̣hoñi in. 11Ji'dyäcacsebiva mọ' cäjsis p̂eyacdye' mu'in me'tyitysi' in ĉaĉaij na dai' se' ja'yacsi mu'in anicjetety Jen' in räjtumdye chätidye' mu'in, judyeya' anic ja'yacsi in väñädye'ya' mu'in, querec̣haveijdye mọmo' me' bu'yi jị'chiyacsi in, anic där tsị'ca' in. 12Jesha' yirity mu'ĉantyi'dye urucyaty Cretaĉantyi' jiquej, mu' dyijyedye'tumtyi' jiquej p̂eyacsi ĉụi'tyi' chätidye' mu', yi mu': “Uts Cretaĉantyi' muntyi' in yedyej ac̣hi'yacñity in, väväjñity in judyeya' to'omuntyi' in judyeya' säsäcsa' in”, yi mu'. 13Anicdye me' mu'in in Cretaĉantyi' in, anic rụijsis ọij p̂eyacdye' mu' jiquej. Mọ'dyes ferche' fạra'jeĉunacseva paj qui jam me' bä'yi in, paj qui rụij anicjete Jen' in. 14Chime'dye jéyacseva paj qui jam dyijtucsebi urucyas p̂eyacdye' judíos mu'in, mijam se'vacsebi p̂eyacdye' mu'in murujrutyeptety in mọ' rụijsis p̂eyacdye' Jen'si' mu'. 15Mu'in c̣hicon'tactyi' ĉojtyi' in tupuj jebei' in jụ'ñis ĉụi' mọmo' säcsedye', mọ' säcsedye' jam nash ac̣hi'tacsi', mu'in na a'c̣hity ĉojtyi' in, jam anicyity in, mu'indyes in räj jedye' chuc jäm'taqui in, räj mọ' a'c̣his shupqui' mu'indyes in, ĉaĉaij na yedyej a'c̣his dyijyedye' mu'in räjtumdye ĉojtyi' mu'in. 16Me' tsan' yi in “Tsun nash cäc̣hä'chutety Jen'”, mijam qui nam' anic cäc̣hä'chute in, jorojĉanyi' ĉaĉaij na ac̣hi' bä'yi in, anic ac̣hi'yity cạvacsi mu' Jen', mijam chime' chiquete in, mọ'dyes jam tupuj rụij bä'yi in mijam tupuj nọ́tyetacsi in.

will be added

X\