Romans 9

1Yụ ra' jéyac ọij rụijsis p̂eyacdye', jam ọij väñädye' jéyac ra' yụ, ĉaĉaij na Cristoty yụ, chime'dye ĉojtyi'ĉan yụ, mọ' bächäbun yụ Jen'si' Ạ'edye' mu', mu'ĉan chịj yụ jam väñädye' ọij p̂eyacdye' yụ. 2Anic där táracsi chätidye' yụ mu'in Israeltyi' vóshi' in, anic fer dyijtucsi yụ, ĉaĉaij na jam méqui' anicyi in. 3Anic yoqui yụ faraj vu' ca' yụ́che' tŝọi' mọ' va'tacdyedyes mu'in, mọ' so'macsis ra' Jen', chime'dye vu' ca' pạrejtac Cristoya' yụ mu'indyes in. 4Mu'in Israeltyi' vóshi' in, mu'in ạvatucsi mu' Jen', judyeya' jị'caveyacsi mạijquedye'tumsi' ferdye' mu'. Chime'dye mu' dai' qui' yụ'tyeyacsi p̂eyacdye' mu', judyeya' yụ'tacdye' mu' chime' so'macsi, judyeya' so'macsi mọ' rụijsis tima'cacdye' aca'ĉandyesi' mu', judyeya' jéyacsi chime' jun' chuc ra' so'mac in, me' me' yụ'tyeyacsi tsan' mu'in Israeltyi' vóshi' in. 5Mu'in nash vóshi' jiquej mu'in tashchety tsim'tactyi' Jen'tyi' jiquej mu'. Mu'inĉan na'i mu' Cristo, ĉaĉaij na mu' Israeltyi' vóshi' chime' mu', mu' nash anictyity Jen' mu' ayo'bu'yity räjdyes, mijam ra' jụ'ñisĉan mạyedye' mọtsi' tima'cacdye' mu'. ¡Paj me'! 6Me' tsan' mu'in Israeltyi' vóshi' in jam anicyi in, jam qui nam' fibidyes shupqui' mọ' Jen'si' p̂eyacdye' mu', mọ' yụ'tyeyeyacsis jiquej. Jesha', mu'in Israeltyi' vóshi' in jam mu'in räj tsim'tac Jen'ya' in. 7Me' tsan' Abrahamtyi' vóshi' in, jam qui nam' räj anictyity vóshi' mu', mọ'dye mu' p̂eye' Jen', jajiti jiquej mu' Abraham: “Yụ nash yụ'te uts Isaac, mu'ĉandye ra' shupqui mítyi' vóshi' in, mu'in ra' anictyity vóshi' mi”, jajiti.120 8Ọij sánacdye' ji'chäquiyisin' jam ca ra' räj Abrahamtyi' vóshi' in anictyity Jen'tyi' ạva' mu' shupqui in. Mu'in na jị'cätseptety in Jen'si' p̂eyacdye' mu', mọ' jayu'tyiyitis mu' Abraham jiquej, mu'in mọmo' anictyity Abrahamtyi' vóshi' shupqui in. 9P̂eyacdye' jayu'tyiyitis mu' Abraham jiquej, yi': “Ayij ra' tupudye', cuvij ra' ca'ñibun yụ ĉọ́shadyeye, aty ra' mu'ya' ạvam' Saraty”, yi jajitacdyi.121 10Isaac ca tịj ạva' na'ity mọ', mu' nash vóshi'vun jiquej tsun. Mu' qui vämi Rebecache', epoj ạva'yi' mọ'. 11- 12- 13Jambi' na'i in, jambi'dyem' yiris jedye' jäm'taqui in, jambi'dyem' ac̣hi' bä'yi in, mijambi' rụij bä'yi chime' in, Jen' jä'mij tashche' jéyacsebi tse' mu'in: “Mu' ra' tashchety ạva' mi, mu' ra' úñi jäquitydyes”, jajiti'.122 Chime'dye yocsi' sánacdye' yi': “Jacob nash mạ'jete yụ, mu' na Esaú jam mạ'jete yụ”, yi mu' Jen'. Ọij ji'chäquiyisin' jun' chuc mu' Jen' ĉụi'si'ya' dyijyedye' mu' tashche' tsim'tacsi muntyi' in, jam dyijtucsi jun' chuc bä'yi in, mu' ĉụi' mọmo' tsim'tacsi. 14¿Tupuj buty yéja' tsun: “Jam nash rụijsis dyijyedye' Jen'si' mu'?” Jam jun' tupuj yéja'. 15Yi Jen' jajiti Moisés: “Jụ'ñity ĉụi' ram' tsim'tacsi yụ, mu'in ñịbe' ĉọcsity yụ, judyeya' ñịbe'jeyacsi yụ.” 16Mọ'dyes ọij ji'chäquiyisin' mu' Jen' ĉụi'si'ya' dyijyedyem' mu' tsim'tacsi muntyi' in, tyi chuc tsim'tacsi, mu'in mọmo' ñịbe' ĉọcsi. Me' tsan' fer mu' mạ'je' muntyi', me' tsan' jam, jam mọ' jedye' yi', ĉụi'si'ya' dyijyedye' Jen'si' mu' ñịbe' ĉọcsi. 17Mọ'dye p̂eye' sánacdye' mu', Jen' jajiti mu' Egiptoĉantyi' ayo': “Yụ yụ'tyeye jiquej paj qui ayo'bu'yi mi paj qui míya' jị'caveyacsi ferdye' yụ muntyisya' vej mu'in, jun' chuc ra' so'meye va'tacdye', mọ'ya' qui ra' räj úchety muntyi' in chäyin yụ in tyi chuc yụ”, jajiti Jen'. 18Mọ'dyes ọij ji'chäquiyisin', tyi chuc tsim'tacsi mu' Jen' ĉụi'si'ya' dyijyedye' mu', mu'dye mọmo' ñịbe' ĉọcsi, me'dye mu' chime' tyi chuc tsim'tacsi ĉụi'si'ya' dyijyedye' mu', chimu'dye me'jeyacsi ji'yäjcacsebi ĉojtyi' mu'in. 19Pạrej mu'ya' cäj p̂eyaqui in yi in: “Jen'dye me' ji'yäjquibusin' ĉojtyi' tsun, jätäjjisin'dyem' ra' tsun me' juchayeja' jụijya' tsun, ĉaĉaij na muntyi' tsun jam jun' tupuj ñutsjeĉun'bija dyijyedye' Jen'si' mu'”, pạrej cäj yi in. 20Jam ra' me' yéja', ĉaĉaij na muntyi' tsun jam tupuj ji'pen'tiĉa' Jen'ya'. Jeñej yiris puñuj jäm'tacdye' muntyis in, mọ' jam jun' ji'pen'ti' jụ'ñis chuc jajäm'tisya', mijam tupuj yi' mọ': “¿Jun' dash jo'mei' jäm'tim?” 21Jesha', mu' jäm'tyety puñuj tupuj mu'dye pirij jedye' chuc jäm'tye' mu'. Mu'dye pirij tupuj jäm'tye' yiris puñuj yụ'tacdyes jäm'si' jedye', judyeya' yocsi' jam jäm'sidyes jedye'. 22Me'dye mu' chime' Jen', me' tsan' mu' mạ'je' ferdye'ya' mu' jị'caveyacsi fạ́codye' mu' mu'in aty va'tacdyety in, dyichjetacsi qui nam' jam jätäjjeyacsi va'tacdyety ra' in. 23Chime'dye mu' Jen' yu'sin' tsun paj qui so'mac ñịbe'jitidyes tsun, mọ'dyes mu' mạ'je' paj qui me' jị'caveyacsi räj in mọ' därsi' jäm'yedye' mu'. Me' mu' därsi' mạ'jitidyes mu' ji'caviyisin' tsun, mu' aty tạ'caty tsim'sin' jiquej tsun tashche'dye paj qui mu'ya' tsun Jen'yadyety tsun. 24Me'dyes mu' Jen' fayisin' paj qui me' yụ'tac tsun, jam mu'ĉantyi' mọmo' fayacsi judíoĉantyi', chime'dye mu'ĉantyi' jam judíoĉantyi' chime' fayacsi mu' Jen'. 25Me' cạ̈tsi' Oseaĉansi' sánacdye', yi' mọ', Jen' ra' fayacsi mu'in jam judío in, yi mu': “Mu'in yoctyi'dye muntyi' in jam yụ́tyi' in, yụ ra' jéyacsi: Mi'in nash aty ĉụi'tyi' muntyi' yụ. Mu'in jam mạ'jeyacdyety yụ́ya' in, yụ ra' jéyacsi: Mi'in nash mạ'jeyacdyety yụ, yi mu' Jen'. 26Yóĉandyem' jéyacsi jiquej u yụ: Jam nash yụ́tyi' muntyi' mi'in, chimu'ĉandye ra' yi in: Mu'in nash aty Jen'tyi' ạva' in, mu' tsạ'tyi' Jen'.” 27Mu' Isaías p̂eyacsi mu'in Israeltyi' vóshi' in, yi' sánacdye'che' mu': “Me' tsan' dai' in Israeltyi' vóshi' in jeñejti jáman in, dam' qui na ra' mọmo' c̣hoñi in, 28ĉaĉaij na Jen' ra' räj jị'cätse' p̂eyacdye' mu', cavintum ra' va'tacdye' so'macsi räj bu'yity jacchety muntyi' in”, yi' sánacdye'. 29Mu'dye Isaías yi tashche' jiquej: “Arajdye tas ijasin' in, mu' muju'chaty Ayo' jam dam' ji'shucsin' jụijya' tsun jiquej, a vuty itŝija' q̂uin' u, yojdyem' Sodomaĉantyi' muntyi' u in judyeya' Gomorraĉantyi' in, a vuty me' shupqueja' u tsun”, yi' sánacdye'. 30Me' ọij cại' p̂eyacdye', mu'in jam judío in, me' tsan' jam dyijyi in jun' chuc ra' rụij yụ'tac Jen'ya' in, mu'indye q̂uin' aty rụij yụ'tac in, ĉaĉaij na mu'in anicjete Jen' in. 31Mu'in na Israeltyi' vóshi' in tsim'tactyi' tsan' Jen'ya' in, mọm' cäc̣hä'chui' in mọ' yụ'tacdye', jeñej aty ra' mọ' tupuj rụij yụ'tacsi' ĉúti u in, mọ'dyes jam rụij yụ'tac Jen'ya' in. 32¿Jun' buty me'? Ĉaĉaij na mu'in judío in jam mạ'je' dyijtute Jen' in paj qui mu' rụij yụ'tacsi anicyedye'ya' mu'in, jeñej aty ra' tsan' tupuj c̣hoñi ĉụi'si'ya' rụijquedye' ĉúti u in. Anic cäj cại' dyijyedye' in, mọ'dyes qui mu' Cristo jeñej bu'yi ta'chitidyety mij, me' bu'yi shupqui mu'indyety judíodyety in, ĉaĉaij na mu' va'quecte Cristo in. 33Mu'dye Cristo p̂eijte mu' Jen' sánacdye'chem': Jesha', mu'ĉan Siónĉan yụ yụ'tyeyeyacsi yirity mij ta'chitidyety muntyidyety in,123 paj qui mu'che' tach tŝọij in, me' bu'yi' ra' shupqui' mu'indyes in, ĉaĉaij na mu'in in jam méqui' anicjete in. Jụ'ñity chuc anicjetety in, mu'in ra' jam jun' fibidyes shupqui in.

will be added

X\