Romans 7

1Vojity, chị́yetiñe' adac mi'in yụ'tacdye', jun' chuc yirity muntyi' taca'dyem' tsạ' jụijya' mu', mọ' yụ'tacdye' yejĉoi' jabächäti. A qui nam' säñi jụijya' mu' muntyi' me'qui'dye jabächäti. 2Jesha', mọ' vämis p̂en jam jun' tupuj yacchute vämtyi' mọ', taca'dyem' tsạ' jụijya' mu'. A qui nam' säñiya' vämtyi' mọ', chat q̂uin'dyem' faraj bu'ban', shuban' vämtyisĉanvun yụ'tacdye' mọ'. 3Taca' na tsạ' vämtyi' jụijya' mọ', yoctyi'tum qui son' ĉọshi' jụijya' mọ', vo'voi' shupqui' mọ'. A qui nam' säñiya' vämtyi' mọ', shuban' yụ'tacdye'ĉan mọ', tupuj yoctyi'che' qui son' vämeban' mạ'je' jụijya', aty jam juchaj shupqui' mọ'. 4Me'dye mi'in chime' vojity, mi'in säñi Cristotum jiquej mi'in, aty säñity bu'yi mi'in, mọ'dyes qui aty shuban yụ'tacdye'ĉantyi' mi'in. ̣Q̂uin' chat aty Cristoty mi'in, mu' vañinjebajtety Jen' jiquej, paj qui jäm' bä'yi mi'in. Me' ra' Jen'dyes bä'ja' tsun. 5Jiquej tsun me'chuja'dyem' tashches dyijyedye' a'c̣his tsun, mọ' yụ'tacdye' ji'na'iyisin' a'c̣his dyijyedye' ĉojtyi'ĉan tsun, mọ' sän'dye' yu'tyiyisin'si'. 6̣Q̂uin' qui nam' aty shubajsha' yụ'tacdye'ĉan tsun ĉaĉaij na aty sänjaty shupqueja' tsun, paj qui mọ' yụ'tacdye' aty jam bächäbusin' tsun, aty jam mọ' cäc̣hä'chuja' mọ' urucyas sánacsi' yụ'tacdye'. ̣Q̂uin' chat aty faraj tsun, tupuj qui mụi'sis cäc̣hä'chuja', Jen'si' Ạ'edye' mu' cäc̣hä'chupja q̂uin'. 7¿Jätäjyeja' buty ra' tsun, ac̣hi'yis buty mọ' yụ'tacdye' Jen'si' mu'? Jam jun' me' mu', ĉaĉaij na mọ' yụ'tacdye' jorojĉanjibusin' juchaj tsun. Jam mọ'ya' jụijya' yụ'tacdye', a vuty jam jun' chị́ja' u jedye' chuc mọ' juchaj. Jesha', yiris yụ'tacdye' yi': “Jam ra' mạ'jeyacsebi mi'in yoctyis jedye' mu'in”, yi'.119 Jam me' yi' yụ'tacdye' jụijya', a vuty jam tupuj chịj u yụ me' juchaj shupqui' mạ'jeyacsebi jụijya' yụ yoctyis jedye' mu'in. 8Se've' qui yụ mọ' yụ'tacdye', mọ' qui ji'na'iyin yụ juchaj yụ ĉojtyi'ĉan yụ, mọ' yụ'tacdye' yi' paj qui dadam' mọjo'cha' mạ'jeyacsebi yụ yoctyis jedye' mu'in. Itŝi' jụijya' mọ' yụ'tacdye', a vuty jam ferdye'tum juchaj o. 9Me' jiquej yụ, jambi'dyem' se've' jiquej yụ mọ' yụ'tacdye', ĉụi' bä'yi yụ jun' chuc mạ'je' yụ, jeñej jam juchaij ĉúti yụ. Se've' qui yụ mọ' yụ'tacdye', mọ' jị'tsa'ibun yụ ĉojtyi'ĉansi' juchaj yụ, mọ' ji'dyijvin yụ a'c̣his ĉojtyi'ĉansi' dyijyedye' yụ, chịmo'dye sän'dye' yu'tyiyin yụ. 10Mọ' yụ'tacdye' mọ' yụ'tac jiquej paj qui mọ' tsạ'chusin' tsun, jam qui nam' me' shupqui' tsunche', me'dye sän'dye' mọmo' yu'tyiyisin'. 11Juchaj väñädye'ya' se' ja'yin yụ, judyeya' yụ'tacdye'ya' mọ' juchaj tupuj sän'dye' yu'tyiyin yụ, ĉaĉaij na me' yi' mọ' yụ'tacdye': “Tyi chuc juchaij jụijya' in mu'in ra' säñi in.” 12Mọ' ji'chäquiyisin' anic rụijsis mọ' yụ'tacdye', Jen'dye yụ'tye' räj mọ' yụ'tacdye', mu'si'dye mọ' mu', där jäm'si' mu'. 13Mọ' jäm'si' yụ'tacdye' mu', ¿mọ' buty sän'dye' yu'tyiyin yụ? Jam jun' me'. Juchaj sän'dye' yu'tyiyisin', mọ'ya' jäm'si'ya' yụ'tacdye', mọ'ya' sän'dye' yu'tyiyisin'. Me'dyes mọ' yụ'tac yụ'tacdye', mọ' qui ji'chäquiyisin' jedye' chuc mọ' juchaj, mọ'ya' yụ'tacdye'ya' tupuj chị́ja' tsun anic jiyi' där a'c̣his mọ' juchaj, mọ' räj jísin' jun' chuc cại'. 14Chị́ja' tsun mọ' yụ'tacdye' anic Jen'yas ayij, muntyi' qui nam' tsun, tsun úñity juchaty mọ', mọ' bächäsin' tsun. 15Yụ jam chịj jun' buty me' ac̣hi' bä'yi yụ, mạ'je' tsan' rụij bä'yi ĉúti yụ, jam qui nam' tupuj me' bä'yi yụ, ĉaĉaij na mọ' a'c̣his dyijyedye' mọm' jäme' yụ. 16Yụ jam dam' ma'jotaqui mọ' a'c̣his dyijyedye' cại'si' yụ, mọ' ma'jotye' yụ mọ' yụ'tacdye', mọ' chat rụijsis. 17Mọ' a'c̣his cại'si' yụ jam mọ' yụs dyijyedye' mọ', ĉojtyis juchaj yụ mọ' bächän yụ. 18Chịj yụ ĉụi'tyi'ĉan ĉojtyi' yụ, yódyem' räj jacchety muntyi' u in, itŝi' méquis jäm'si' dyijyedye' me'chui' yụ, mijam méqui' mọ'ya' me'chui' jäm'yedye' yụ. Yụ mạ'je' tsan' rụij bä'yi ĉúti, jam qui nam' tupuj me' bä'yi yụ. 19Anicdye me', me' tsan' yụ mạ'je' rụij bä'yi ĉúti, ac̣hi' qui nam' bä'yi yụ, mọ' jam dam' ma'jotye' yụ. 20Jesha', jäm'dyeya' ac̣hi' bä'yi yụ, jam qui nam' me' mạ'je' tsan' yụ, yejĉoij qui nam' me' taca' yụ. Mọ' jorojĉanyi' jam yụs mọ' dyijyedye', ĉojtyis juchaj yụ, mọ' bächän yụ. 21Me'dyes ọij shupqui', me' tsan' mạ'je' rụij bä'yi ĉúti yụ, jam qui nam' tupuj me' yụ, a'c̣his mọmo' jäm'taqui yụ. 22Ĉojtyi'ĉan yụ ma'jotyepte tsan' yụ Jen'si' yụ'tacdye' mu', 23mọ'ya' qui nam' a'ĉansi' ferdye' yụ, mọ' nash juchaj, mọ'tum fáquiti' jäm'si'tum dyijyedye' yụ. Mọ' a'ĉansi' ferdye' yụ carijtaqui' ĉojtyi'ĉan yụ, mọ' yi' paj qui mọ' juchaj yejĉoi' bächän yụ. 24- 25Me' shupqui yụ, me' tsan' dyijyedye'ĉan yụ mạ'je' tsan' paj qui Jen'si' yụ'tacdye' mu' bächän yụ, a'ĉansi' qui nam' ferdye' yụ, mọ' yi' paj qui mọ' juchaj yejĉoi' bächäbun a' yụ. ¡Där ñịbe' cạve' yụ! ¿Tyi buty tupuj ferdye' so'min yụ paj qui mọ' jam bächän yụ ọij sän'dyes a' yụ? Yoshoropaij jéte Jen' yụ, mu' aty ferdye' so'min yụ, Jesucristoya' mu' Ayo' tsun.

will be added

X\