Romans 5

1̣Q̂uin' aty rụij yu'sin' Jen' anicyedye'ya' tsun, mọ'dyes q̂uin' aty jäm'jibudyiĉa' Jen'ya' tsun, ĉaĉaij na mu' Jesucristo Ayo' tsun jäm' yu'busin'. 2Mu' c̣hẹi'ya'jisin' Jen'ya' anicyedye'ya' tsun, paj qui mu'si' ñịbe'jitidyes räjĉan tsunche' bu'yi'. ̣Q̂uin' aty ma'jodye'tum bisja' tsun jun' chuc ra' Jen'ya' tsun, där jäm'si' jedye' so'misin' ra' mu'. 3Me' tsan' ñịbedyes jị'ĉojtyeja' q̂uin' tsun, ma'joja' qui nam' bä'ja' tsun, ĉaĉaij na aty chị́ja' tsun mọ' ñịbedyes jị'ĉojtyeja'si' tsun, mọ' ñútyisin' paj qui tupuj dyichchutidye'tum bä'ja' tsun. 4Me' bä'ja' jụijya' tsun, mọ' ma'jotyibusin' mu' Jen', chị́ja' mu' Jen' me' ma'jotyisin' jụijya', mọ' yi' paj qui ma'jodye'tum bisaĉa' tsun. 5Mọ' bisacdye' tsun jam ra' fibi' mọ' shupqui', ĉaĉaij na mu' Jen' muju'cha' mạ'jisin' tsun, yoj jisin'dyem' Ạ'edye' jiquej um', mọ' ñịbe'jisin'si' mu' Jen'. 6Jesha' jiquej tsun jam jun' ĉụi' tupuj ji'c̣hontiĉa' tsun, mọ' qui ayij tupudye' Jen'si' mu', mu' Cristo mạ'jitidyesya' mu' ji'ijati ac̣hi'yitydyes muntyi' tsun. 7¿Tyi bu ra' tupuj yirity muntyi' ji'ijati yoctyidyes muntyi' in? Me' ra' tsan' rụijtyitydyes muntyi' jụijya', jam ra' jun' ji'ijati mu'dyes paj qui ñutsjetyete. Vatyquej mu'ya' jụijya' yirity muntyi' mạ'je' ji'ijati jäm'tyidyes. 8Jen' qui nam' ji'caviyisin' därsi' mạ'jitidyes mu', me' tsan' jam jäm'tyeja' tsun, juchajĉandyem' jiquej tsun, Cristo qui ji'ijati tsundyesi'. 9Jesucristosya' chäsh mu' Jen' rụij yu'sin', jam mọ' mọmo', chime' mu' ra' meijjityisin' va'tacdye' Jen'si' mu', paj qui jam tsunche' tŝọi' mọ'. 10Tsun jiquej fáquitiĉa'dyem' bä'ja' Jen'tum jiquej, me' tsan' me' mu' qui nam' jäm'jibusin' mu'tum Ạva'si'ya' sän'dye' mu'. ̣Q̂uin' qui nam' aty jäm'jibujsha' Jen'tum, jam mọ' mọmo', chime' Cristo ra' ji'c̣honsin' tsun ĉaĉaij na mu' aty vañinyeban sän'dye'ĉantyi'. 11Jam mọ' mọmo', chime'dye q̂uin' aty ma'joja' Jen'dyes, ĉaĉaij na mu' Jesucristo Ayo' tsun mu' yu'sin' tsun paj qui jäm'jibujsha' Jen'ya' tsun. 12Tashchety muntyi' jiquej Adán mu' ji'na'e'tyi' juchaj ọ́che' jacche', räj qui muntyi' tsun juchajtum shupqueja'. Mọ' qui ji'me'sin' yu'sin' räj sän'dye'ĉan muntyi' tsun, jam qui yirity va' tsun. Mọ'dyes qui muntyi' in räj juchajtum na'i in, räj ra' säñi in ĉaĉaij na räj juchajtum atsvun in. 13Itŝi'dyem' yụ'tacdye' jiquej, aty mọ' tạ'cas mọ'ya' juchaj, jambi' qui nam' juchatupte in Jen'si' yụ'tacdye' mu', ĉaĉaij na itŝi'dyem' yụ'tacdye' Jen'si' mu'. 14A na men, na'i qui Moisés jiquej, chat qui q̂uin'dyem' mọ'ya' yụ'tacdye' mu'. Me' tsan' itŝi'dyem' mọ' yụ'tacdye' jiquej, mọ' qui nam' sän'dye' aty tạ'cas mọ'ya', mọ'dyes qui muntyi' räj säñi in, yódyem' Adán jiquej u. Me' tsan' muntyi' in jam va'quecbite in Jen'si' p̂eyacdye' mu' jaso'mitis jiquej jam jeñej Adán jiquej, räj vatyquej säñi in. Mu' Adán jiquej jeñej bu'yi mu' atsijtyi' mu' bisva'tety jiquej in. 15Me' tsan' me' jam qui nam' mu' Adán cätste mu' Jesucristo, mu'si'dye juchaj mu' mijam cätsbite Jen'si' ñịbe'jitidyes mu'. Adán yirity ji'na'ety juchaj ọ́che' jacche', mọ'ya' qui dai' säñi muntyi' in, mọ' na Jen'si' ñịbe'jitidyes mu' mọjo'cha' mus shupqui', mu' yụ'te yirity muntyi', mu' Cristo, mu' chiquetety Jen' mọ'dyes qui mu' dai' ñịbe'jeyacsi muntyi' in. 16Anicdye me' Jen'si' ñịbe'jitidyes mu' dadam' mọ' mọjo'cha' shupqui' mu' nọ́tacdyes tsundyesi'. Adán yiri' qui' tsan' juchaij jiquej, räj vatyquej jäqui'vety ji'me'tacsi muntyi' in va'tacdyety shupqui in. Jen'si' na ñịbe'jitidyes jam me' mu', me' tsan' dai' qui' juchaij muntyi' in, Jen' qui na ñịbe'jitidyesya' mu' rụij yụ'tacsi. 17Yirityche' muntyi' na'i' mọ' juchaj, chat tiyacchuti' mọ' sän'dye' jiquej muntyis tsun, chiyirityya'dye muntyi' mu'si'ya' qui carijtacdye' mu', mọ' mọjo'cha' nọ́tacdye' shupqui' tsundyes. Tyi chuc jụjjepte in Jen'si' ñịbe'jitidyes mu', mu' ra' fibi'ya' rụij yụ'tac, Jesucristo ra' ji'c̣honacsi chat qui ra' mu'dye yụ'tacsi paj qui räjĉan tsạ' bu'yi Jen'ya' in, aty ra' jam me'tacsi' sän'dye'. 18Anicdye' me', mọ' yiris juchaj mu'si' tashchetysi' muntyi', mọ' ji'me'sin' paj qui räj muntyi' tsun va'tacdyety shupqueja' tsun. Me'dye mu' chime' Cristo yiris sän'dye' mu' räj ji'c̣honsin' paj qui jam va'tacdyedyety tsun. 19Anicdye me', mu' yirity muntyi' va'quecbite jiquej Jen'si' p̂eyacdye' mu', mọ' yi' paj qui dai' muntyi' juchajtum shupqui in, chiyiritydye mu' Cristo chiquepte Jen'si' p̂eyacdye' mu', mọ'dyes qui dai' muntyi' rụij yụ'tac shupqui in. 20Jen' jäqui've yụ'taqui yụ'tacdye' mu' paj qui dayi've chum muntyis juchaj mu'in. Aty dayi'ya' muntyis juchaj mu'in, mọ' qui Jen'si' ñịbe'jitidyes mu' mọjo'cha' bu'yi' muntyi'che' in. 21Me' tsan' mọ' juchaj ñịbe'sin' ji'me'sin' sän'dye'ya' tsun, mọ' qui nam' ñịbe'jitidyes Jen'si' mu' tsunche' bu'yi' mu', ĉaĉaij na mu' Jesucristo Ayo' tsun, mu' rụij yu'sin' paj qui Jen'yadyety tsun.

will be added

X\