Romans 4

1Chime' ra' dyijtubajsha mu' Abraham, vóshi'vun tsun jiquej. ¿Jun' buty rụij jayu'taque mu' Jen' jiquej? 2Jen' jam rụij jayu'ti mu' Abraham jiquej ĉụi'si'ya' jäm'yedye' mu', jun' chuc jäm' bä'yi mu' jiquej. Me' jụijya' mu', a vuty tupuj ĉụi'si'ya' jäm'yedye' va'bunyi u Jen'si'ya' vej mu'. Jam qui nam' jun' mu' me' va'bunnaqui Jen'si'ya' vej mu'. 3Mọ'dye p̂eye' mọ' sánacdye' yi': “Abraham anicjete Jen' me'dyes qui mu' Jen' rụij jayu'ti anicyedye'ya' mu'.”117 4Jesha', muntyi' tsun carijtaĉa' yocve jụijya', ya'itac tsun, mọ' jam ñịbe'yedye' shupqui'. 5Jen'tum jam me' mọ'. Tyi chuc anicjete mu' Jen', mu' rụij yụ'tac, ĉaĉaij na mu'dye rụij yụ'tacsity mu'in juchajtumtyi' in, me' tsan' itŝi' jäm'yedye' mu'in, anicyedye'ya' qui nam' mu' rụij yụ'tacsi ĉụi'si'ya' vej mu'. 6Me'dye mu' chime' Davidvun jiquej p̂eyacsebi ma'jodye' mu'in rụij yụ'tactyi' Jen'ya' in, me' tsan' itŝi' jäm'yedye' mu'in. 7Yi' sánacdye' Davidsi': Där ma'joij mu'in vayactactyi' juchaj in, Jen' aty jam dyijtucsebi a'c̣his dyijyedye' mu'in. 8Där ma'joij mu'in aty jam dyijtucsebity juchaj mu' Jen'. 9Ọij ma'jodye' ji'jäques mu' David ¿mu'indyes buty mọmo' sei'tactyi' a' in? Jam jun'. Mu'inmundyes chime' in mu'in jam sei'tactyi' a' in. A nash p̂eye' yụ ọij sánacdye' yi' jun' chuc mu' Jen' rụij jayu'ti mu' Abraham anicyedye'ya' mu'. 10¿Jun'dyeya' buty rụij jayu'taque? ¿Are' aty sei'tacya' a' mu', are' jambi'dyem' sei'tac? Tashche'dye rụij yụ'tac mu' jambi'dyem' sei'tac a' mu'. 11Jäqui've qui q̂uin'dyem' sei'tac a' mu', mọ' jeñej bu'yi' cachtacdye' shupqui' mu', mọ' jị'ĉocdyes aty rụij yụ'tac Jen'ya' anicyedye'ya' mu'. Mọ'dyes mu' Abraham jeñej bu'yi ạvatucsity jen' mu'in anicjetety Jen' in, mu'in rụij yụ'tactyi' Jen'ya' in, me' tsan' jam sei'tactyi' a' in, me' bu'yi mu' shupqui Abraham. 12Mu'dye jen' bu'yi chime' mu'in sei'tactyi' a' in, mu'in jam sei'tacdye'che' ĉútity in, mọ' mọmo' jịjcatyeptety in Abrahamsi' anicyedye' mu', jun' chuc mu' anicjete Jen' jambi'dyem' sei'tac a' mu' jiquej. 13Jen' jaso'miti p̂eyacdye' Abraham jiquej, jajiti: “Yụ ra' so'meye ọij jac mídyes, judyeya' vóshidyes ra' chime' mi”, jajiti Jen'. Jen' jam me' ñịbe'jajiti Abraham ĉaĉaij na chique' mọ' yụ'tacdye', me'dye anicyedye'ya' mu', mu' Jen' rụij jayu'ti judyeya' ñịbe'jajiti. 14Jesha', mu' Jen' ñịbe'jeyacsiya' mu'in mọmo' chique'tyi' yụ'tacdye' in, a vuty fibi' shupqui' p̂eyacdye' o Jen'si' mu', mọ' yi'si' jun' chuc mu' Jen' ñịbe'jeyacsi mu'in mọmo' anicjetety in, a vuty fibi' shupqui' o chime' anicyedye' mu'in. 15Yụ'tacdye' Jen'si' mu', mọ' ji'me'sin' tsan' tsun paj qui tsäqui'sisĉandyety tsun ĉaĉaij na mọ' jam tupuj chiqueja' tsun. Itŝi' yụ'tacdye' jụijya', a vuty jam juchatuja' yụ'tacdye' u. 16Mọ'dyes mu' Jen' dyijyi paj qui anicyedye'ya' mu' ra' ñịbe'jeyacsi Abrahamtyi' vóshi' mu', anicyedye'ya' ra' mu' jị'cätse' p̂eyacdye' mu' räjdyes mu'in in. Jam ra' mu'indyes mọmo' in chique'tyi' yụ'tacdye' ñịbe'jeyac in, Jen' ra' fibi'ya' ñịbe'jeyacsi räj mu'in anicjetety in, yódyem' mu' tashche' Abraham anicjete jiquej u. Me'dyes qui mu' Abraham jen' bu'yi shupqui tsun. 17Me' cạ̈tsi' mọ' sánacdye' yi': “Yụ ra' yụ'tyeye mi paj qui anic dai' shupqui in vóshi' mi, pai' bu'yi ra' in, mi ra' jen' bu'yi shupqui mu'indyes”,118 jajiti Jen' jiquej. Mu'dye Jen' anicjetety Abraham, mu' jị'cätse' ọij p̂eyacdye'. Mu' nash jị'tsa'acsebantyi' mu'in säñity in, judyeya' p̂eyacdye'ya' mu' tupuj jäm'tye' mọ' jambi' jäm'tacsi' jedye'. 18Mu' Jen' jajiti Abraham jiquej: “Me'tum ra' vóshi' mi”, yi' sánacdye'. Me' tsan' jiyi' carij mọ' jị'cätsac p̂eyacdye', Abraham qui nam' jam farajje' mọ' anicyedye' Jen'che', yejĉoij mọmo' bise' jun' qui' chuc cạ̈tsi' mọ'. Anicdye me', dayi vóshi' mu', yịjyi muntyi' in, pai' bu'yi bä'yi in. 19Aty isho'ĉan mu', araj yiri' cien yómodye' tyiti mu', aty itŝi' a'si' ferdye' mu' ĉúti, aty c̣hẹi'ya' säñi ĉúti. Chijo'mei'dye mọ' Sara mọ' särä' bu'yis, mọ'dyes anic carij ĉúti paj qui mu' ạva'yi. Me' tsan' me' jam qui nam' mọ' dyijtui' mu', yejĉoij mu' anicjepte p̂eyacdye' Jen'si' mu'. 20Mu' jam jun' farajjepte p̂eyacdye' Jen'si' mu', yejĉoij anicjepte, fer bu'yi qui ĉojtyi'ĉan, tima'quete Jen'. 21Mijam yocve dyijyi mu', chị́yete Jen' mu' nash ferdye'tumtyi' paj qui jị'cätse' p̂eyacdye' mu', mọ' jaso'mitis jiquej, mọ'dyes qui ferche' anicjete Jen'. 22Mọ'dyes qui mu' Jen' rụij jayu'ti anicyedye'ya' mu'. 23Ọij sánacdye' yi': “Jen' rụij jayu'ti anicyedye'ya' mu'.” Ọij sánacdye' jam Abraham mọmo' ji'jäcte, 24tsunmun chime' ji'jäcsin', ĉaĉaij na mu' rụij yu'sin' anicjejaya' mu' Jen', mu' vañinjebajtety mu' Jesús, Ayo' tsun. 25Jen' jutete paj qui mu' ijac tsunsidyes juchaj, judyeya' mu' vañinjebajte paj qui rụij yụ'tac tsun Jen'si'ya' vej mu'.

will be added

X\