Romans 2

1Mọ'dyes mi'in, me' tsan' judío mi'in, me' tsan' jam, där tsäqui' shupqui mi'in dyijtucsebiya' mi'in yoctyis juchaj mu'in, yi jụijya' mi'in: “Tupuj va'tacdye' so'mac mu' juchajya' mu'.” Me' dyijyi mi'in ĉụi' ji'me'yiti juchajya' mi'in, me' bu'yi' shupqui' mọ' dyijtucdye' yoctyis juchaj mu', ĉaĉaij na mi'indye me' chime' juchaij. 2Chị́ja' tsun mu' Jen' jam ra' cäj so'macsi va'tacdye' mu'in me' bä'yity in, rụijsisya' ra' dyijyedye' mu' so'macsi va'tacdye'. 3Chime'dye mi, chätidye', me' tsan' dyijtucsebim yoctyis juchaj mu'in, chime'tyitydye qui nam' mi juchaj so'mete Jen' mi. Me' jụijya' mi jam ra' dyijyi mi c̣hoñi ra' ĉútim, mímun ra' chime' so'mac va'tacdye'. 4Jen' jam yiristum va'tacdye' so'min, mu' taca' dyichjibun juchaj mi ĉaĉaij na mu' där ñịbe' ĉun mi. Me' tsan' me' ñịbe' ĉun mi, mi qui nam' ĉụi' äcäijjepte Jen'si' mạ'jitidyes mu', mijam mạ'je' jụjjete mi. ¿Jam adac chịj mi mu' Jen' jambi' va'tacdye' so'min mi, ĉaĉaij na mu' taca' bisin paj qui mi caman' farajjeban' juchaj mi? 5Mi yäcäty ĉojtyi', mijam méqui' mạ'je' farajje' juchaj mi, yejĉoij mọmo' dụri'ñejijcai' juchaj mi. Därsi' ra' va'tacdye' tŝútyin mi aty ayijya' mọ' tupudye', Jen' so'macsiya' ra' därsi' tsäqui'sis muntyidyes in. Mu' ra' jam cäj so'macsi va'tacdye', 6jun' jun' chuc bä'yi jiquej in, me' me' ra' so'mac in, pạrej ra' bijodye' so'mac in, pạrej na ra' tsäqui'sisĉan jịjcaij in. 7Pạrej mu'ya' jẹjcai' rụij bä'yi in, fer dyijtui' jäm'si' jedye' in, mạ'je' so'mac bijodye' Jen'ya' in, judyeya' mu'si'che' mạijquedye' bä'yi in mạyedye'che'. Mu'in me' dyijyity in, Jen' ra' yụ'tacsi paj qui mu'ya' bä'yi in. 8Yoctyi' na jam me' in, mu'in ĉụi' mọmo' dyijtuti in, judyeya' va'queque' in räj rụijsis p̂eyacdye' in, a'c̣his qui cäc̣hä'chui' in. Jen' ra' fạ́codye'tum so'macsi tsäqui'sis mu'in me'tyity in. 9Jen' ra' räj ñịbe' jị'cavacsi mu'in me'tyity in, tashche' ra' mu'in judío in judyeya' jäqui've ra' mu'in jam judío in. 10Yocdye ra' mu'in rụij bä'yity in, Jen' ra' mu' tima'cacsi, mu' ra' so'macsi jäm'yedyedyes mu'in judyeya' ma'jodye' ĉojtyi'ĉandyes mu'in, räj ra' mọ' so'mac in, mu'in chum ra' judío in, judyeya' mu'in jam judío chime' in, 11ĉaĉaij na mu' Jen' vaj cäts cạvacsi úchety muntyi' in, mu' ra' vaj cäts jị'cäts yụ'tacsi. 12Mu'in jam judío in jam me'chupte in Jen'si' yụ'tacdye' mu', me' tsan' me' juchaij qui nam' jụijya' in, tsäqui'sisĉandyety ra' in. Me'dye chime' mu'in judío in, me'chuptety tsan' in Jen'si' yụ'tacdye' mu', juchaij jụijya' in, chime' ra' tsäqui'sisĉandyety in, mọ' yụ'tacdye' mọ' ra' mu'in ji'me'tacsi'. 13Mu'in se'veptety mọmo' in mọ' yụ'tacdye' mu', mọ' jam tupuj rụij yụ'tacsi' Jen'si'ya' vej mu', me'dye mu'in mọmo' chiqueptety in Jen'si' yụ'tacdye' mu', mu'in ra' rụij yụ'tac in. 14Mu'in jam judío in, me' tsan' jam me'chupte in Jen'si' yụ'tacdye' mu', mu'in qui nam' ĉụi'tyi'ĉan ĉojtyi' ĉụi' chiquebi' jụijya' in dyijyedye' yụ'tacdyes mọ', mọ'ya' chị́ja' mu'in ĉụi' chịj ĉojtyi'ĉan in jedye' buty jäm' judyeya' jedye' buty jam jäm'. 15Anicdye me', ĉaĉaij na rụij bä'yi jụijya' in, jam ji'yoquiti ĉojtyi'ĉan mu'in, ac̣hi' qui nam' bä'yi jụijya' in, ji'yoquiti ĉojtyi'ĉan mu'in. Mọ' anic jorojĉanyi' me' tsan' jam me'chupte in Jen'si' sánacdye' mu', mọ'ya' qui nam' mu'si' yụ'tacdye' ĉojtyi'ĉan mu'in. 16Me' ra' mọ' shupqui' aty ayijya' tupudye', mọ' p̂eyes Jen'si' p̂eyacdye' mu' voro'tacsis yụ, mọ' yi' jun' chuc mu' Jesucristo jị'cäts yụ'tacsi räj muntyi' in juchadye'ya' mu'in, ĉaĉaij na me'dye jayu'ti mu' Jen'. Me' tsan' caminsis dyijyedye' mu'in, mu' qui nam' räj chị́yacsebi, mọ' ra' chime' jị'cäts yụ'tacsebi. 17Mi'in va'bunyity mi'in, yi jítidyeij mi'in: “Tsun nash judío, tsun me'chupja Jen'si' yụ'tacdye' mu', anic Jen'tyi' tsun”, yi mi'in. 18Chime'dye yi mi'in: “Tsun judío anic jäm' chị́yepja Jen'si' dyijyedye' mu', tupuj tsun chị́yeja' jedye' chuc jäm'si' judyeya' jedye' chuc jam jäm'si', ĉaĉaij na Jen'si' yụ'tacdye' mu' mọ' ji'chäquiyisin' tsun”, yi mi'in. 19Chime'dye yi mi'in: “Tsun tupuj jị'chiyacseja' mu'in tofej bu'yity in, jam me'chuptety in Jen'si' p̂eyacdye' mu', tupuj chime' mạijchucsebija' ĉojtyi' mu'in, mu'in tojmadye'ĉan bä'yity in. 20Tsun jị'chiyacseja' chime' mu'in jam dyijyedye'tumtyi' in judyeya' mu'in jam jị'chiyactyi' in, ĉaĉaij na tsun räj mọ' me'chupja Jen'si' yụ'tacdye' mu', mọ' me'chui'si' rụijsis ji'chäyitidye'”, me' yi jítidyeij vaj meij mi'in. 21Mi'in me' yoctyi' jị'chiyacsi mi'in, ¿jun' dash jam ĉụi' ji'chäyiti mi'in? Mi'in jéyacsi voro'yedye'ya' mi'in, yi mi'in: “Jam ra' shu'aij mi'in.” ¿Jun' qui dash ĉaĉaij me' jäm'taqui mi'in shu'aij mi'in? 22Chime'dye jéyacsi muntyi' mi'in: “Jam ra' vo'voij mi'in.” ¿Jun' qui dash ĉaĉaij me' jäm'taqui vo'voij mi'in? Chime'dye äcäijjeyacsebi mi'in jäm'tacdye' mu'in. ¿Jun' qui dash ĉaĉaij me' shu'atucsi mi'in aca'ĉansi' jedye' jäm'tacdyes mu'in? 23Där va'bunyi mi'in, yi mi'in: “Tsun judío tsun nash me'chupjaty Jen'si' yụ'tacdye' mu'”, yi mi'in, ĉụi' mọmo' yi mi'in jam na chiquetiñe', me'dye ji'taretinte mọmo' Jen' muntyisya' vej mu'in, me' bu'yi' mọ' shupqui', anic moch va'quec-bitinte yụ'tacdye' mu'. 24Jesha' mi'in mọ' ji'jäcnac mọ' sánacdye' yi': “Mu'in jam judío in ñiñete Jen' in, mi'indyes ji'me'tacdye' mọ' shupqui'”, yi' sánacdye' Jen'si' mu'. 25Chiquepja Jen'si' yụ'tacdye' jụijya' tsun, chat q̂uin'dyem' ya'i' shupqui' mọ' ji'sei'tacdye' a'si' tsun. Jam na jụijya' me' chiquepja mọ' yụ'tacdye' mu', jam jedyedyes mọ' shupqui' ji'sei'tacdye' tsun. 26Jesha', mu' jam judío, me' tsan' jam sei'tactyi' a' jụijya' mu', chiquepte qui nam' Jen'si' yụ'tacdye' jụijya' mu', jeñej bu'yi sei'tactyi' a', me' bu'yi shupqui' Jen'si'ya' vej mu'. 27Mu'in na judío in, me' tsan' sei'tac a' mu'in judyeya' chime' me'chupte in mọ' yụ'tacdye' Jen'si' mu', jam qui nam' mọ' chique' in. Mọ'dyes mu'in jam judío in, me' tsan' jam sei'tactyi' a' mu'in, chique' qui nam' jụijya' in mọ' yụ'tacdye', mu'in me' jorojĉanjeyacsebi juchaj judíos mu'in. 28Cạveja, yirity muntyi' me' tsan' judío na'i jụijya', me' tsan' sei'tactyi' a' jụijya' chime', mọ' jam jun' tupuj paj qui me' anictyity Jen'tyi' ạva' shupqui. 29Mu' anictyity Jen'tyi' ạva' mu', mu' nash cäc̣hä'chutety Jen' ĉojtyi'ĉan mu'. Mu' anictyity ạva' mu' jam mọ' dyijtui' paj qui sei'tac a' mu' yojdyem' yi' Jen'si' yụ'tacdye' mu', mọ' Jen'si' Ạ'edye' mu', mọ' nash chiquepte ĉojtyi'ĉan mu'. Mu'in me'tyity in jam ma'jotac muntyisya' vej in, me'dye Jen' mọmo' ma'jotacsi.

will be added

X\