Romans 16

1Tiĉun'vac mọ' voji' tsun Febe, mọ' Cencreaĉan bä'yis, mọ' mọ'ĉan nọ́tyetacsis mu'in anicjetety Jen' in. 2Jäm' tiĉun'vac mi'in Ayo'si'che' tịj mu', yojdyem' tsun anicjejaty Jen' u vaj me' tiĉun'tiĉa' tsun. Nọ́tyevac chime' jedye' chuc mọ' jemoñe' jụijya', mọ' so'mevac mi'in, ĉaĉaij na mọ' dai' nọ́tyetacsis judyeya' yụ́mun chime' ñútyin. 3Yụ nash vorje' mọ' Prisca judyeya' mu' Aquila, mu'in úñity Jesucristodyes in yụ́tum in. 4Mu'in nash anic ñutsjityin yụ in, araj ijac in ñutsjitidye'ya' yụ́che' in. Mọ'dyes yụ fer yoshoropaij jéyacsi mu'in in, jam yụ mọmo' me' yoshoropaij jéyacsi, chime'dye mu'in räj jam judío in, mu'in ñuru'tyity Cristoya' in, mu'in yoshoropaij jéyacsi chime' in. 5Chime'dye yụ vorjeyacsi mu'in anicjetety Jen' in, vajmu'yaijtyi' in mu'insi'ĉan aca' in Priscasĉan mọ' judyeya' Aquilasĉan. Vorjete yụ chime' mu' Epeneto, mu' mạ'jeyacdyety yụ, mu'ĉan bä'yity mọ' jacsi' tịj mọ' Asia, mu' tashche' anicjete Cristo Asiaĉantyi'. 6Vorje' yụ mọ' María, mọ' fer úñis ñútyinacsi' mi'in. 7Yụ vorjeyacsi chime' mu'in chätidye' yụ judío in, mu' Andrónico judyeya' mu' Junias, mu'in pen'dyetuntyi' jiquej yụ in ĉär'taquisĉan jiquej. Mu'in chime' cạyacsity p̂eyacdye' Jen'si' in, anic jäm' chị́yactyi' in, mu'in tashche' anicjete Cristo jiquej in, jäqui've yụ. 8Vorjete yụ mu' chime' Ampliato, mu' mạ'jeyacdyety yụ Jen'ya'. 9Chime'dye vorjete yụ mu' Urbano, mu' nash úñi Cristodyes yụ́tum. Vorjete yụ chime' mu' Estaquis, mu' nash chime' mạ'jeyacdyety yụ. 10Vorjete yụ chime' mu' Apeles, mu' jorojĉan ji'cavitity mu' nash anictyity cäc̣hä'chutety Cristo. Chime'dye yụ vorjeyacsi mu'in chätidye' in mu' Aristóbuloty. 11Vorjete chime' yụ mu' Herodión, judío chime' chätidye' yụ. Yụ chime' räj vorjepte Narcisoty chätidye' mu' ọijche' voryedye'che', mu'in anicjetety Ayo' in. 12Chime'dye vorjeyacsi yụ mọ'in Trifena judyeya' mọ' Trifosa, mọ'in nash úñi' in Ayodyes. Vorje' yụ chime' mọ' Pérsida mạ'jeyacdyes yụ, mọ' nash fer úñi' Ayodyes. 13Chime'dye vorjete yụ mu' Rufo, mu' muju'cha' úñity Ayodyes, chime'dye tse' mu' vorjepte yụ, mọ' nash jeñej bu'yi' ĉụi'si' tse' yụ, me' mọ' ñútyin yụ jiquej. 14Mu'in chime' vorjeyacsi yụ Asíncrito, judyeya' mu' Flegonte, mu' Hermas, mu' Patrobas, mu' Hermes, judyeya' yoctyi' mu'ĉantyi' anicjetety Jen' in pen'dyetucsity in. 15Chime'dye mu'in vorjeyacsi yụ mu' Filólogo Juliatumdye, judyeya' mu' Nereo voji'tumdye mu', judyeya' Olimpas, judyeya' räj mu'in yoctyi' anicjetety Jen' in pen'dyetucsity mu'in in. 16Vorjitac vaj meij voryedye' pụ'sitidye' Jen'dyes. Mu'in ñuru'tyity Cristoya' in pai' bä'yity in vorjinac chime' in. 17Vojity, yụ jéyac pạrej mu'ya' mu'in queve' in paj qui vaj meij fáquitidyeij bä'yi mi'in anicjetintety Jen', mu'in mạ'je' ji'yacchuyinac in Jen'sidyes p̂eyacdye' mu'. Mu'in fáquibunactyi' ji'chäyitidye' in, mọ' se'vetiñes. Yụ ferche' jéyac doijrojam' bä'jam' paj qui jam se' ja'yinac in. Jemoñe' mi'in meijyi mu'inya' in, 18ĉaĉaij na mu'in jam Jesucristo Ayo' tsun cäc̣hä'chute in, ĉụi'sim' dyijyedye' a'c̣his cäc̣hä'chuqui in. Me' tsan' cäjsis ji'chäyitidye' mu'in, anic jäm' bu'yi' dạque' in mọ' p̂eyacdye' mu'in, paj qui mọ'ya' väñätucsi in mu'in jam chịjtyi' muntyi' in. 19Yụ anic ma'jotyebiyac mọ' dyijyedye' mi'in, ĉaĉaij na pai' bä'yity in aty chäyinac in jun' chuc mi'in cäc̣hä'chubitinte mọ' jäm'si' p̂eyacdye' Jen'si' mu'. Yụ qui nam' mạ'je' paj qui dyijyedye'tum cäc̣hä'chutiñe' jäm'si' jedye', jam mạ'je' yụ paj qui a'c̣his cäc̣hä'chutiñe' mi'in. 20Mu' Jen' so'misin'tyi' ma'jodye' ĉojtyi'ĉandyes tsun, mu' ra' cavintum cachjete mu' Sọyo' Satanás, me'qui'dye ra' fer bu'yi mi'inche'. Yụ cọdyete Jen' paj qui mu' Jesucristo Ayo' tsun ñịbe'jitidyes so'minac mi'in. 21Uts Timoteo, úñi Jen'dyes yụ́tum, mu' vorjinac mi'in. Chime'dye mu'in vorjinac in mu' Lucio judyeya' mu' Jasón judyeya' mu' Sosípater, mu'in nash chätidye' yụ judío in, mu'in vorjinac chime' in. 22Yụ nash Tercio sáñe'tyi' yụ ọij q̂uin' p̂eyacdye', Pablo ji'sañiyin yụ, yụ nash vorjeyac Ayo'si'che' tịj mu'. 23- 24Chime'dye uts Gayo vorjinac mi'in, yóĉandyem' dyäquiĉan q̂uin' uij. Mu'si'ĉan aca' vajmu'yaij in mu'in anicjetety Jen' in. Mu' Erasto chime' vorjinac mi'in, mu' ĉọjcacsebity querec̣ha bä'yedye'ĉantyity mu'in. Mu' vojity tsun Cuarto mu' vorjinac chime' mi'in. 25¡Tima'queja mu' Jen'! Mu' ferdye'tumtyi', mu' tupuj fer bu'yi yu'tyinac paj qui rụij cäc̣hä'-chubitinte jäm'si' p̂eyacdye' mu', mọ' voro'tacsis yụ, mọ' p̂eijtes Jesucristo. Ọij p̂eyacdye' jam mụi'sis, tạ'cas jambi' qui nam' chị́yac. 26̣Q̂uin' qui nam' mu' Jen' aty ji'chäquiyisin' muntyi' tsun ọij p̂eyacdye' mu', mu'in sáñepte in mu'in jaso'mitity p̂eyacdye' Jen' in. Mu' räjĉan bu'yity Jen', mu' jutacsi paj qui voro'tacsi in paj qui pai' úche' jacche' bä'yity in se'vaqui in paj qui mu'in chime' anicyi in judyeya' chiquete Jen' in. 27¡Tima'queja mu' Jen', itŝij yoctyi' mu'ya' me'tyity, mum' yirity dyijyedye'tumtyi', mu' räj chị́dye'tumtyi'! Mu' jutiyisin'tyi' Jesucristo, mu'ya' qui tupuj tima'queja tsun. ¡Paj jam mọtsi' tima'cacdye' mu'!

will be added

X\