Romans 13

1Jemoñe' räj mi'in chicacsi mu'in jacchety ayo' in, ĉaĉaij na mu'dye Jen' me' yụ'tacsi jacchety ayo' in, mu' nash so'macsi yụ'tacdyedyes mu'in. 2Mọ'dyes tyi chuc va'queĉunacsecbi ayos ferdye' mu'in, chime'jeptedye ra' Jen'si' yụ'tacdye' in, me' jụijya' in, va'tacdye' ra' so'mac in. 3Tyi chuc rụij bä'yity in jam mu'in jun' quijnacsi ayo' in, mu'in na ac̣hi' bä'yity in, mu'in chat tupuj quijnacsi ayo' in. Jemoñe' rụij bä'yi mi'in, paj qui jam quijnacsi ayo' mi'in, me' jụijya' mi'in, ayo' ra' tima'quinac in. 4Jen'dye yụ'tacsi mu'in ayo' jacchety in paj qui mu'in ñutsjityinac in. Ac̣hi' na bä'yi jụijya' mi'in, me' chat tupuj quijnacsi mi'in, ĉaĉaij na mu'in jam fibidyes so'mac ferdye' in paj qui va'tacdye' so'macsi mu'in me'tyity in. Mu'in ayo' in yụ'tactyi' Jen'tyi' mu' paj qui mu'in so'macsi va'tacdye' in mu'in ac̣hi' bä'yity in. 5Mọ'dyes jemoñe' chicac in, jam mom' quijñebitinte Jen'si' va'tacdye' mu', jemoñe' me' se'vacsi mi'in, paj jam ji'yoquiti ĉojtyi'ĉan mi'in. 6Chime'dye jemoñe' so'macsi mi'in ayo' in mu' querec̣ha cudyityinactyi' in, jun' chuc yi' muntyis yụ'tacdye' mu', mọ'dye ra' cäc̣hä'chutiñe' mi'in, ĉaĉaij na mu'dye Jen' me' yụ'tacsi ayo' in paj qui me' so'mac in, mu'ya' tupuj nọ́tacsi muntyi' in. 7Mọ'dyes mi'in jemoñe' so'macsi ayo' in räj jun' chuc yi' muntyis yụ'tacdye' mu'in. Irijyejam' ayo'che', ñutsjetacsejam' räj mu'in chime' in. 8Jam ra' tạ'betacsi jedye' mi'in paj qui jam dévetucsi mi'in, mom' déveyejam' mi'in mọ' mạ'jitidyes, jemoñe' mạ'jeyacsi bä'yi mi'in. Tyi chuc mạ'jeyacsity bä'yi jụijya', mu' tas chiquepte yụ'tacdye' Jen'si' mu'. 9Yụ'tacdye' yi': Jam ra' vo'voij mi'in, jam ra' ijatinte muntyi' mi'in, jam ra' shu'aij mi'in, jam ra' yoctyis mạ'jeyacsebi jedye' mu'in, me' nash yi' Jen'si' yụ'tacdye' mu'.125 Mọ'ya' chime' yocsi' yụ'tacdye', anic mọ' mọjo'chas, yi': “Mạ'jeyacsejam' fer chätidye' mi'in, yojdyem' ĉụi' mạ'jiti u mi'in”, yi'. Räj yocsi' yụ'tacdye' in siti' in ọijĉan yirissisĉan yụ'tacdye' Jen'si' mu'. 10Mạ'jeja jụijya' yirity muntyi', mijam ra' jun' jedye'jeja tsun. Ọij jorojĉanyi' mạ'jeyacsejaty jụijya' tsun räj chiqueja' mọ' yụ'tacdye' in. 11Jemoñe' me' bä'yi mi'in ĉaĉaij na chịj mi'in aty ayij mọ' tupudye', tupuj tsạ'i ĉojtyi'ĉan mi'in, aty c̣hẹi'ya' tyiti' atsvun mọ' c̣hon'dyedyes tsun, jam jeñej jiquej, yoqui'dyem' anicjejaya' Jen' jiquej u, q̂uin' mọjo'cha' c̣hẹi'ya' bu'yi' mọ'. 12Mọ' tsedyedye' aty c̣hẹi'yai' nạijjoi', mọ'dyes jam ra' tojmadye' cäc̣hä'chuja' tsun, dam'dye jäm', jäm' yu'tiĉa' mạij bu'yisya', jeñej yirity väc̣hä'tyity jämi'ti räj ji'pen'tidyestum mu', me' bu'ja'dye ra' tsun chime', paj qui chutiĉa' Sọyostum dyijyedye'. 13Mọ'dyes rụij bä'jam', yojdyem' mu'in u in mạijĉantyi' in, paj me' bu'ja'. Aty ra' jam a'c̣hisĉan bä'ja' tsun, mijam ra' shu'quedye'ĉan, mijam ra' vo'voyedye'ĉan bä'ja'. Chime' jam ra' fáquitiĉa' yoctyi'tum in, mijam ra' chutiĉa' p̂eyacdye'ya'. 14Jịjcamac Jesucristo Ayo' tsun, me'chuvac ñutsjitidyes so'minacsi' mu'. Aty jam ra' a'c̣his a'si' quivij dyijtubajtiñe' mi'in, aty jam ra' mọ' me'chubajtiñe' mi'in quivij.

will be added

X\