1 Mọ'dyes vojity, där ñịbe' ĉúsin' mu' Jen', mọ'dyes yụ ferche' jéyac paj qui ĉụi'si' a' mi'in so'metinte mu' Jen', mọ' jeñej bu'yi' ji'co'shayacdye' Jen'dyes. Me' Jen'dyes mọmo' bä'jam', mọ' ra' ma'jotyibunac mu' Jen', jemoñe' me' carijtaqui räjĉan Jen'dyes mi'in, mọ' jeñej bu'yi' rụijsis tima'cacdye' Jen'si' mu'. 2 Me'qui'dye ra' cäc̣hä'chutiñe' jacches dyijyedye' mi'in, mọ' qui ra' mụi'sis dyijyedye' Jen'si' mu' cäc̣hä'chubitinte, paj qui rụij bä'yi mi'in. Me' ra' chat tupuj chị́yebitinte Jen'si' dyijyedye' mu', mọ' jäm'sim', mọ' ma'jotyes Jen'. 3 Mu' nash ñịbe'jin yụ judyeya' yu'tyin yụ paj qui voro'tacsi yụ, mọ'dyes qui yụ jéyac mi'in, jam ra' va'bun-yedye'tum dyijtuti ĉụi' mi'in, rụij dyijtutiĉam' ĉụi' mi'in, jun' chuc mu' Jen' so'minac anicyedye' mi'in, me' ra' carijtaqui mu'dyes mi'in. 4 A' muntyis tsun dai' mọ'ya' me'chui' jedye'. Me' tsan' yoc yoc carijtaqui' a'si' jedye' tsun, yiris qui nam' shupqui' a' tsun. 5 Me'dye tsun chime' anicjejaty Cristo, me' tsan' dai' mu'ya' tsun, yirity qui nam' shupqueja' jeñej Cristos a' mu'. 6 Me' mu' Jen' ñịbe'jitidyesya' mu' so'misin' räj tsun. Jun' jun' chuc so'mac Jen'ya' tsun, me' me'dye ra' carijtaĉa' Jen'dyes tsun. Pạrej mu'ya' yụ'tactyi' Jen'ya' tsun paj qui jị'chiqueyacseja' tsun Jen'si' p̂eyacdye' mu' so'misin'si' tsun, me' jụijya' jemoñe' me' bu'ja'dye carijtaĉa', jun' qui' chuc anicyeja' tsun. 7 Pạrej mu'ya' yụ'tac Jen'ya' tsun paj qui nọ́tyetacseja' anicjetety Jen' in, me' jụijya' yụ'tac tsun, jemoñe' me' bu'ja'dye carijtaĉa' Jen'dyes. Pạrej mu'ya' so'mac tsun paj qui jị'chiyacseja' Jen'si' p̂eyacdye' mu', me' jụijya' so'mac tsun, jemoñe' me' bu'ja'dye carijtaĉa', jam ra' muyetyejcaja'. 8 Pạrej mu'ya' yụ'tac tsun paj qui ji'ma'yacseja' Jen'dyes, me' jụijya' yụ'tac tsun, jemoñe' me' bu'ja'dye carijtaĉa'. Pạrej mu'ya' yụ'tac tsun paj qui ñịbe'jeyacseja' yoctyi' in, me' jụijya' yụ'tac tsun, jemoñe' me' bu'ja'dye ñịbe'jeyacseja', jam ra' quijadye'tum so'macseja'. Pạrej mu'ya' tsun ayo'bu'ja' shupqueja' mu'indyes anicjetetydyes Jen' in, me' jụijya' yụ'tac tsun, jemoñe' rụij bu'ja' ayo'bu'ja'. Pạrej mu'ya' tsun ñịbe' ĉọcseja' mu'in ñịbe' cạvety in, me' jụijya' yụ'tac tsun, jemoñe' ma'jodye'tum nọ́tyetacseja' in, jemoñe' me' me' carijtaĉa' jun' jun' chuc so'misin' carijtacdye' mu' Jen'. 9 Mạ'jeyacsejam' anicsisya' mạ'jitidyes, jam ra' chụ' mọmo' yi' mi'in. Fạ́quetiñe' ra' räj a'c̣his jedye' in jam rụijsis, jịjcavac jäm'si' jedye'. 10 Vaj meij ra' mạ'jitidyeij mi'in ĉaĉaij na vaj vojity mi'in, räjĉan ra' jäm'jitidyeij bä'yi mi'in, muju'cha' ra' dyijtucsi vojity mi'in, uya'ya' ra' dyijtuti ĉụi' mi'in. 11 Fer ra' úñi Jen'dyes mi'in räj ĉojtyi'tum mi'in, jam ra' dofocjeyaqui úñedye' Jen'dyes mi'in. 12 Mi'in aty räj bistiñe' Jen'dyes, ma'jodye'tum bä'jam'. Tyum'chutidye'tum ji'cajñevac mọ' jedye' chuc ñịbedyes jị'ĉojtiñe'ya' mi'in, mijam ra' dam' farajjetiñe' cọdacdye' Jen'che' mi'in. 13 Nọ́tyetacsejam' mu'in vojity jayejjotaquity jedye' in, chime'dye ji'dyäcacsejam' aca'ĉan mi'in mu'in yocve jijtuijtyi' in. 14 Cọdyemac mu' Jen' mu'indyes in jị'ñibe'canactyi' in paj qui mu' chime' nọ́tacsi, mijam ra' jéyacsi: “Paj därsi' ñịbedyes jị'ĉojtiñe' mi'in”, jam ra' jéyacsi mi'in.124 15 - 16 Vaj meij ra' mạ'jitidyeij mi'in, vaj cäts ra' cạvacsi räj muntyi' mi'in. Ma'jodye'tum ra' pen'dyetucsi mi'in mu'in ma'joijtyi' in, mu'in na tárity in táredye'tum ra' pen'dyetucsi mi'in. Jam ra' va'bunyi mi'in, mijam ra' muju'cha' ĉụi' yu'ti mi'in, dam'dye jäm' uya'ya' yu'ti ĉụi' mi'in, jam ra' fibi'yi mi'in mijam ra' yi mi'in: “Tsun anic dyijyedye'tumtyi' muntyi'”, jam ra' me' dyijyi mi'in. 17 Mu'in jị'ñibe'canactyi' jụijya' in, jam ra' chime'je-yacsidye mi'in, jun'jinac chuc mu'in in. Anic ra' rụij bä'yi mi'in muntyisya' vej mu'in. 18 Ferdye' yụ'tacac paj qui jäm'jiti bä'yi mi'in yoctyi'tum muntyi' in, me' tsan' mu'in jam mạ'je' jäm'jinac in, mi'in qui na ram' jam jedye'jeyacsi. 19 Chätidye', jam ra' chime'je-yac-sidye mi'in mu'in jị'ñibe'canactyi' in, Jen'dye ra' me'jeyacsi jị'chiyacsi. Yi' sánacdye': “Yụ́dye ra' va'tacdye' so'macsi mu'in me'tyity in jị'ñibe'cacsity in, yụ́dye ra' me'jeyacsi jị'chiyacsi”, yi Ayo' tsun. 20 Mi'in ra' jam me'jeyacsi mu'in fáquinactyi' in, dáqui jụijya' in, ji'säcsacsejam', chime' jajri jụijya' in ji'tyecsejam'. Me' jụijya' mi'in anic ra' jị'tsicayacsi mi'in jun' chuc mu'in me'jinac jiquej in, me' yi' sánacdye'. 21 Jam ra' peñi mi'in a'c̣hisya' dyijyedye', dam'dye jäm' rụijsisyam' dyijyedye' ji'penac-sebijam' a'c̣his dyijyedye' mu'in.
