Romans 10

1Vojity, ĉojtyi'ĉan nash yụ anic fer dyijtucsi yụ mu'in chätidye' yụ Israeltyi' vóshi' in, yụ fer cọdyete Jen' mu'indyes in paj qui c̣hoñi in. 2Yụ nash chị́yacsi, mu'in fer dyijtute tsan' Jen' in ĉojtyi'ĉan mu'in, cäj qui nam' dyijtute in jam rụij. 3Mu'in jam chịj in jun' chuc mu' Jen' rụij yụ'tacsi muntyi' in, ĉụi'sim' dyijyedye' cại' in, jeñej aty ra' tsan' rụij yu'ti Jen'ya' ĉúti u in ĉụi'si'ya' dyijyedye' in, jam qui nam' méqui' mọ' chiquepte in Jen'si' dyijyedye' mu'. 4Cristo aty jị'motse' mọ' yụ'tacdye', mọ' jam rụij yụ'tacsis Jen'ya', mu' qui Jen' rụij yụ'tacsi tyi chuc anicjete in. 5Chime'dye mu' Moisés p̂eyacsi mu'in yity dyijyity in jeñej aty ra' tsan' rụij yụ'tac u in mọ'ya' yụ'tacdye'ya' ĉútity in. Yi mu': “Tyi chuc chique'tyi' räj yụ'tacdye' in, mọ' ra' tsạ'chucsi'”, yi. 6Yocvedye shupqui' anicyedye'. Yi' yocsi' sánacdye', p̂eye' jun' chuc ra' mu' Jen' rụij yụ'tacsi mu'in anicjetety in, yi': “Jam ra' yi mi: ¿Tyi buty ra' mạyedye'che' jịjcaij?” (Yi' mọ', jam jemonac mu'che' jäĉajte in mu' Cristo.) 7“Chime'dye jam ra' yi mi: ¿Tyi buty ra' chạij säñitysi'ĉan ĉär'tacdye'?” (Yi' mọ', jam jemonac mu'ĉan quevjajte in mu' Cristo, aty itŝij mu'ĉan.) 8Me'dye yi' mọmo' sánacdye': “P̂eyacdye' Jen'si' mu' anic vejya' míya', mọ' p̂eyeptes mi, judyeya' me'chupte ĉojtyi'ĉan mi”, yi' sánacdye'. Mọ' p̂eyacdye' voro'tacsejas tsun yi' jun' chuc jemoñe' anicjeja Jen'. 9Tyi chuc p̂eijte mu' Jesús yi: “Mu' Jesús anictyity Ayo' tsun”, judyeya' chime' anicyi ĉojtyi'ĉan mu', jun' chuc mu' Jen' vañinjebajte jiquej, mu' nash ra' c̣hoñi. 10Jemoñe' ĉojtyi'ĉan anicjeja Jen' paj qui mu' rụij yu'sin' judyeya' p̂eyacdye'ya' mu' ji'jäcja Jesucristo, chat qui ra' mu' Jen' ji'c̣honsin' tsun. 11Yi' sánacdye': “Tyi chuc anicjete in mu'in ra' jam jun' fibidyes shupqui in.” 12Ọij p̂eyacdye' räjdyes muntyi' in, Jen' räj vaj cäts cạvacsi muntyi' in, paj tsan' judío in judyeya' paj tsan' jam judío in. Mu' nash ayo'bu'yi räjdyes muntyi' in, judyeya' ñịbe'jeyacsi jụ'ñity chuc cudyitity mu'che' in, därsi' ñịbe'yedyes mu' so'macsi. 13Mọ'dye p̂eye' sánacdye' yi': “Räj mu'in cudyitity Ayo'che' tsun paj qui mu' ji'c̣honacsi, mu'in ra' c̣hoñi in.” 14Yụ ra' jéyac, ¿jun' bu ra' tupuj cudyiti mu'che' in, jambi' anicjeteya' Jen' in? ¿Jun' bu ra' tupuj anicjete in, jambi' se'vaquiya' p̂eijteya' in? ¿Jun' bu ra' tupuj se'vaqui in, jam tyi voro'tacsiya'? 15¿Jun' bu ra' tupuj voro'tacsi in, jam tyi jutacsi jụijya' mu'in voro'tacsity in? Mu'indye p̂eyacsi' mọ' sánacdye' yi': “Där ma'jodye'tum tiĉunac in mu'in tui'tyi' in jäm'si' p̂eyacdye' Jen'si' mu'”, yi'. 16Mu'in qui nam' jam räj chique' mu'in in mọ' jäm'si' p̂eyacdye' Jen'si' mu'. Mọ'dye p̂eye' mu' Isaías yi mu' jiquej: “Tsuntyi' Ayo', ¿tyídyem' ra' anicje' in ọij p̂eyacdye' mi, mọ' voro'tacsis tsun?” yi' sánacdye'. 17Mọ'dyes jemoñe' tashche' chum ra' se'veja' mọ' p̂eyacdye' p̂eijtes mu' Cristo, chat q̂uin'dyem' ra' tupuj anicjeja'. 18Yụ ra' jéyac: ¿Judío in are' jambi' se've' in mọ' Jen'si' p̂eyacdye' mu'? Aty tsan' se've' in. Cạ̈tsi' mọ' sánacdye' yi': “Pai' voro'tacsi in, yóqui'vedyem' ọij jac o, me'qui' bu'yi se'vacsebi p̂eyacdye' in”, yi' sánacdye'. 19Quivij yụ ra' jéyac: Mu'in Israeltyi' vóshi' in ¿jam buty chique' jiquej in jun' chuc mọ' Jen'si' p̂eyacdye' mu', jedye' buty cại' mọ' p̂eyacdye' se'ves in? Chịj tsan' in. Mọ'dye p̂eye' Moiséssi' sánacdye' mu', yi mu' Jen': “Yụ ra' tsim'tacsi yoctyi'dye muntyi' in jam yụty tsim'tactyi' jiquej in, me' tsan' jam dyijtuctyi' yụty in, mu'in ra' ñịbe'jeyacsi yụ, paj qui mu'in tsim'tactyi' yụ in, paj qui mu'in ji'yoquiti ĉojtyi'ĉan mu'in, paj qui dyijtubudyiĉa' yụ mi'in”, yi mu' Jen'. 20Isaías jiquej jam dam' quijnacdye'tum p̂eyepte jiquej ọij Jen'si' p̂eyacdye' mu', p̂eyacsiya' mu'in jam judío in, yi mu': “Me' tsan' jam quivin yụ in mu'in jam judío in, daquin qui nam' yụ in, me' tsan' jam cudyiti yụ́che' in, yụ qui nam' ji'naijti mu'inya' in”, yi mu' Jen'. 21Isaías chime'dye p̂eyacsi mu'in judío in, yi: “Dyutsetsen' mạyedye' fayacsi tsan' yụ mu'in in, mu'in qui nam' tyucje' chun in fáquintyi' yụ in, jam méqui' chäquin yụ in”, yi mu' Jen'

will be added

X\