Revelation 8

1Mu' Oveca bu'yity jäctye'ya' mọ' yävätidye'yis cachtacdye', tyäpä' tyei' mạyedye'che', chocya' quim' hora tyum'tuqui'. 2Chat qui cạvacsi yụ mu'in yävätidye'yity anjer in, mu'in rụi'cujcuquentyi' in Jen'si'ya' vej mu'. Mu'in so'mac in yävätidye' boñedye'. 3Atsij yoctyi' anjer, mu'yam' dyäqui tashche' bu'yi mu'ya' ji'co'shayac-dye'ya'. Mu' me'chui' yiris ji'co'shayaquis jẹrejres oro. Mu' anic dai' jẹrejres so'mac, mọ' ra' cafon bu'yi' yụ'tye' cọdacdye'tum, mu'intum in anicjetety Jen' in, räj in. Mọ'che' ra' ji'co'shaye' in mọ' jẹrejres Jen'dyes ji'co'shayac-dye'che' oro. 4Mọ' jẹrejressi' jị'sam' anjersi'ĉan un shupqui', cọdacdye'tum anicjetetysi' Jen' in, mọ' bojvi' Jen'si'ya' vej jịjcai'. 5Chat qui mu' anjer tapje' mọ' ji'co'shayaquis judyeya' bijtyeye' adye', ji'co'shayacdye'ches adye' mọ'ches bijtye'. A qui me'si' shachje' jacche' jị'tŝoi' mọ' adye'. Me'ĉandye pururu fạ́coij vena'yaqui vatyquej, judyeya' fer bubaqui' ọij jac. 6Mu'in yävätidye'tyity anjer in boñedye'tutum in jä'mii'tyi mu'in in paj qui boñi in. 7Tashchety anjer pejtye' boñedye' mu'. Pejyedye'ĉan-dyem' jọ'chaij mu' tsafa' tsäqui'tyity judyeya' tŝij cafon bu'yi' chäshtum, me' bu'yi' tŝọi' jacche'. Pai' mọ' ji'co'shaye' jac arajdye chocya' qui' jac ji'co'shaye' mọ'. Me'dye chime' arajdye chocya' qui' jacches son co'shai' in,237 judyeya' me' mu' tsạ'tyi' biruruc co'shaij. 8Pärä'yity anjer pejtye' boñedye' mu', pejyedye'ĉandyem', jeñej yirity mụcu' därtyi' co'shaijtyi' mu' marĉan tŝọij, arajdye chocya' qui' marĉansi' ojñi' chäsh muñi'.238 9Chime'dye arajdye chocya' qui' marĉansi' tạbedye' säñi' in,239 arajdye chocya' qui' chime' marĉantyi' covamba pechi mọtsi in.240 10Chibinyity anjer pejtye' boñedye'. Pejyedye'ĉandyem' yirity därtyi' ọ́rota' vets tyeij jọ'chaij mạyedye'chety jijtuij mu'. Jeñej co'shai'si' mạijyis me' jọ'chaij mu', cojiroĉan mu' tŝọij, arajdye chocya' qui' jacches ojñi' in, mu'che' mu' tŝọij.241 11Mọ' tịj mu' ọ́rotas, “Bịcuquity” me' tịj mu'. Mọ'dyes qui arajdye chocya' qui' jacches ojñi' in anic bịcuc shupqui' in, jam jäm' tyec in.242 Anic dai' muntyi' in säñi in mọ' tyeijtyi' ojñi' in mọ' bịcuquis. 12Vạjpedye'yity anjer pejtye' boñedye' mu'. Pejyedye'ĉandye arajdye chocya' qui mu' tsun tyum' tyeij, mọ'dyes arajdye chocya' qui' mạyedye' jam mạijyi mu' tsun. Me'dye mọ' chime' ịvaj arajdye chocya' qui' tyum' tyei', chime'dye ọ́rota' in arajdye chocya' qui' tyum' tyeij in, mọ'dyes qui arajdye chocya' qui' tsedyedye' jam mạijyi' in.243 13Chat qui cạvi yụ, nạijte yụ yirity boñij, chidyi'ĉanya' mạyedye'che' tyeij nạij. Fer p̂eyaqui yi mu': —Fer ra' aijyejoij in jacchety muntyi' in, där ra' ñịbe' cạve' in va'tacdye'ĉan in, bonaquiya' boñedye' mu'in anjer in, taca' chibindyety jayej in.

will be added

X\