Revelation 7

1Aty me'si' cạvacsi yụ vạjpedye' anjer in, yirity rụi'cujcuij tätscäi'che' jac jätisve bu'yi, yoctyi' na tätscäi'che' jac rocve mu', yoctyi' na tätscäi'che' jac jijtuijve tsun mu', yoctyi' na tätscäi'che' jac sitiche' mu' tsun. Mu'in ñutschute in mu' vạjpedye've jijtuijtyi' tyi'mu paj qui jam jac fujtye', mijam qui fujtye' mar mijam qui sonche' tŝọij chime' mu' tyi'mu. 2Chime'dye yoctyi' cạvete anjer yụ pam've mu' jijtuij. Mu' me'chupte cachtaquis Jen'si' mu', mu' tsạ'tyi' Jen'. Mu' anjer cạvetety yụ fayacsi mu'in vạjpedye'tyity anjer in, mu'in so'macsity ferdye' in paj qui mu'in ac̣hi'tye' jac in judyeya' mar. 3Fer fayacdye'ĉan p̂eyaqui jéyacsi: —Jambi' ra' ac̣hi'tiñe' mọ' jac judyeya' mar judyeya' son in, jun' qui' chuc tsun cachtacdye' so'macsi jáfiche' mu'in úñity in tsuntyi'che' Jen' —yi jéyacsi mu'. 4Chime'dye yụ se've' yiris p̂eyacdye' p̂eyacsi mu'in cachtacdye'tumtyi' in, mu'in yiri' cien vạjpedye' qui'tac vạjpedye' jiyi mirtyity in, me'si' mu'in in, yedyej Israeltyi' vóshi' in. 5Judátyi' ñuru'tyity in, yiri'tac pärä' jiyi mir in, me'si'dye mu'in cachtacdye'tum in, Rubéntyi' ñuru'tyity in, yiri'tac pärä' jiyi mir in, Gadtyi' ñuru'tyity in, yiri'tac pärä' jiyi mir in. 6Asertyi' in, yiri'tac pärä' jiyi mir in, Neftalítyi' in, yiri'tac pärä' jiyi mir in, Manaséstyi' in, yiri'tac pärä' jiyi mir in. 7Simeóntyi' in, yiri'tac pärä' jiyi mir in, Levítyi' in, yiri'tac pärä' jiyi mir in, Isacartyi' in, yiri'tac pärä' jiyi mir in. 8Zabulóntyi' in, yiri'tac pärä' jiyi mir in, Josétyi' in, yiri'tac pärä' jiyi mir in, Benjamíntyi' in, yiri'tac pärä' jiyi mir in, me'tumdye in räj cachtacdye'tutum in Israeltyi' vóshi' mu', yiri' cien vạjpedye' qui'tac vạjpedye' jiyi mir in, me'si' shupqui in yedyej cachtacdye'tumtyi' in. 9Chat qui cạvi yụ nạijtacsi yụ anic shachtyity muntyi' in, jun'tum ra' mu'in rụi'cu' in mijam tupuj tyi tsicsi mu'in in. Yịjyi muntyi' cạvacsi yụ, räj bu'yity jacche' bä'yity in, yịjyi p̂eyacdye' in, rụi'cujcuquen in tashche' bä'yaquisya' Jen'si'yam' judyeya' Oveca bu'yitysi'ya' in. Mu'in na jai'batyĉantyi' coftyity in, unĉaĉan mu'in je'ñes mana'is shan mu'. 10Räjtum tima'quete in fer p̂eyaqui yi in: “Tsuntyi' Jen' mu' ji'c̣honsin' tsun, mu' bä'yaquischety judyeya' mu' Oveca bu'yity.” 11Mu'in na anjer in cọij bu'yi mu'in in mu'ya' bä'yaquisya' in, judyeya' tashche' bu'yityya' in judyeya' mọ'inya' vạjpedye' tsạ'bu'yisya' in. Dyụtsyi mu'in mu'ya' in, täjjeque' jac in jáfiya' mu'in tima'quete Jen' in. 12Yi in: “Paj me' ọij tima'cacdye' Jen'dyes. Tima'queja mu' Jen', yoshoropaij jéja, tupuj ji'jäcbija därsi' ferdye' mu', judyeya' dyijyedye' mu' judyeya' mạijquedye'mun chime' mu', mijam ra' jụ'ñisĉan mạyedye' mọtsi' mu'. Paj me'”, yi in. 13Yirity tashche' bu'yity jin yụ: —¿Tyi uts u in jai'batyĉaĉantyi' quị'si' in cạvacsity mi? ¿Junatyi' buty jijtuij in? —jin yụ. 14Vorjete yụ: —Jam yụ chị́yacsi, mi nash chịj. Mu'dye ji'chäquiyin yụ: —Uts nash cạvacsity mi mu'in nash ji'cajñe'tyi' därsi' ñịbedyes in, mu'in nash aty puptactyi' coftyity mu'in Oveca bu'yitysi'ĉan chäsh mu', mu'si'ya' chäsh mu' jụi'buij yụ'taqui in. 15“Mọ'dyes q̂uin' mu'in in tashche' bu'yi in Jen'si'ya' bä'yaquis mu', räjĉan úñi Jen'dyes in Jen'si'ĉan aca' mu', mạij judyeya' tsedyedye'. Mu' bä'yaquischety räjĉan ra' pen'dyetucsi judyeya' ra' ñutsjeyacsi. 16Me'qui'dye ra' dáquische' in mijam ra' jajrische' in, me'qui'dye ra' jị'ĉojbite in tsunsi' are'yedyem', mijam ra' juñujñudye' jị'ĉojban' in, 17ĉaĉaij na mu' Oveca bu'yity, mu' c̣hẹi'ya' bu'yity bä'yaquischety, mu' qui ra' ĉọjcacsi judyeya' ra' cạcsi yóĉandyem' shupqui' tsạ'chucsis ojñi' o. Mu' qui ra' Jen' ji'tätsacsebi táris mu'in, me'qui'dye ra' tári bä'yi in.”

will be added

X\