Revelation 6

1Chat qui yụ cạvete mu' Oveca bu'yity, jäctye' mọ' tashches cachtacdye'. Se've' yụ yiris fer p̂eyaqui mọ' tsạ'bu'yis, mọ' p̂eyacdye' jeñej yi' pururu. Yi': —Atsiva. 2Cạvi yụ, yiris vatyquej nạijtye' yụ cavayo jai'bas. Mu'che' foqui'tyity me'chui' yiris cọi'dye', judyeya' so'mac ĉästacdye' chime', mu' qui yụ'tac ji'penacsity. Chat qui sacti mu' ji'penacsequi. 3Chat qui mu' Oveca bu'yity jäctye' mu' pärä'yis cachtacdye' mọ'. Aty jäctye'ya' mọ', mọ' na pärä'yis tsạ'bu'yis p̂eyaqui', yi' mọ': —Atsiva. 4Me'ĉandye yocsi' ji'caviti' cavayo chäshes. Mu'che' foqui'tyity so'mac ferdye', mu' qui jäctyetacsi paj qui jam jäm'jiti in jacchety muntyi' in. Chat tiyacchui' chutidyeij in judyeya' ujatidyeij in. Mu' foqui'tyity chime'dye mu' so'mac därsi' coc̣hino chutidyes mu'. 5Chat qui mu' Oveca bu'yity jäctye' chibinyis cachtacdye' mọ'. Yụ se'vebi' p̂eyacdye' mọ' chibinyis tsạ'bu'yis, yi' mọ': —Atsiva. Yocsi' cạve' yụ cavayo tsin'cus. Mu' mu'che' foqui'tyity unĉan mu' me'chui' yiris javquis tuputuquis. 6Chat qui yụ se've' yiris p̂eyacdye', mọ'inya' shupqui' tsạ'bu'yisya' in, yi' mọ' p̂eyacdye': —Jayej ra' säcsedye', yiris mạyedye' carijtaqui tupuj ya'ij yirity quíro trivo, jam jụijya' chibin quíro cebada, me'qui' mọ' tupujtye', mọ' qui nam' aceite judyeya' vino paj jam bojvi' mọ'si' ya'idye' mọ'. 7Chat qui mu' Oveca bu'yity jäctye' vạjpedye'yis cachtacdye'. Yụ se'vebi' p̂eyacdye' mọ' vạjpedye'yis tsạ'bu'yis. Yi' jin yụ: —Atsiva. 8Cạvi yụ, yiris nạijtye' yụ cavayo jai'bai'yai'si'. Mu'che' foqui'tyity “Sän'dye'” tịj mu', judyeya' yoctyi' dyi'vetaque, tịj mu'si' “Säñitysi' ĉär'tacdyedyes mu'in,” me' bu'yi' mus tịj. Mu'in so'mac ferdye' in paj qui dai' ujacsi jacchety muntyi' in, pạrej chutidye'ĉan ujatidyeij in, pạrej na dáquistum säñi in, pạrej japacjodye'tum säñi in, judyeya' pạrej vajedyedyeij in. Anic dai' jacchety muntyi' me' ujac in, araj chocya' qui' jịjcaij säñi in.236 9Chat qui mu' Oveca bu'yity jäctye' mọ' ĉanam'yis cachtacdye'. Aty jäctye'ya' mu', cạvi yụ mụijya' uĉan ji'co'shayacdye'ĉan, vatyquej cạvacsebi yụ mọ'ĉan ạ'edye' mu'in voro'yedyedyes ijactyi' jiquej in voro'yitysi' jiquej in Jen'si' p̂eyacdye' mu'. 10Mu'in fer p̂eyaqui yi in: —Jen', mi ferdye'tumtyi', judyeya' rụijtyity mi, jị'cätsety p̂eyacdye' mi. ¿Jun'si' bu ra' jị'cäts yụ'tacsim juchadye'ya' jacchety muntyi' in paj qui so'macsi va'tacdye' mi mu'in ijantyi' tsun in? —yi jéte in. 11Chat qui mu' räj so'macsi jai'baty coftyity mu'in, judyeya' jéyacsi paj chum dam' tyum'chutidye'tum bisaqui in, jun' qui' chuc cạ̈tsi' ijacdyety ra' muntyi' in, voro'yedyedyes p̂eyacdye' Jen'si' mu', ĉaĉaij na taca' ra' ijac pạrej mu'in vojity mu'in Jen'dyes carijtaquity in. Taca' jayej mu'in ijactyi' ra' in yojdyem' mu'in jiquej u in, mọ' ra' yejĉoij bise' in, chat q̂uin'dyem' ra' va'tacdye' so'mac in mu'in ijacsity in. 12Mu' Oveca bu'yity jäctye' mọ' jäbänyis cachtacdye'. Jäctye' mọmo' me'ĉandye bubaqui' fer ọij jac, mu' na tsun tyum' tyeij, jeñej tsin'cuty quị'si', jo'meij tyeij mu' tsun, mọ' na ịvaj chäshei' mọ' tyei'. 13Mu'in na ọ́rota' in vetsetsej mu'in tyeij jọ'chaij in, jacche' tŝọij mu'in in, yojdyem' cätidyes väsh om' tyi'mutyi'ya', me' tyeij mu'in ọ́rota' in. 14Mọ' na mạyedye' tas mọ' itŝi' tyei', jeñejyi' paper comon'tacsi', me' tyei'. Mu'in na mụcu' in, räj mu'in yocya' yụ'tac in, me'dye chime' poc̣ho' in. 15Räjen' muntyi' jacchety in tyum' tyeij ĉojtyi' mu'in noi'yi in, judyeya' mu'in ayo'bu'yity in, judyeya' mu'in fer bu'yity in, judyeya' väc̣hä'tyitytyi' ayo' in, judyeya' mu'in jedye'tumtyi' in, judyeya' úñity in judyeya' jam úñity in, räj mu'in to'ĉan jịjcaij jijmu'siti in judyeya' mụcu'yatyya' mij, mu've jịjcaij jijmu'siti in. 16Mu'in na p̂eyetety mụcu' in judyeya' mij in, jéyacsi in: —Vai'naca rudyu'jitiĉam' tsun paj qui jam daquishun tsun mu' ayoschety bä'yaquis bä'yity, paj qui jam tsunche' tŝọi' mọ' fạ́codyem' Oveca bu'yitysi'. 17A nash ayij tupudye' mu', mu' ra' jị'caveyacsi muntyi' in fạ́codye' mu'. ¿Tyi buty ra' tupuj dyichjepte fạ́codye' mu'? ¡Jam jụ'ñity tupuj dyichjepte!

will be added

X\