Revelation 5

1Chat qui tacves un mu' bä'yaquischetysi', cạve' yụ yiris como'nacsi' sánacdye' pärä'che' sánacsi', mọ' cachtac yävätidye'ya'. 2Chat qui cạvete yụ yirity anjer ferdye'tumtyi', mu' fer p̂eyaqui, yi: —¿Jụ'ñity a ĉa yụ'tac paj qui mu' jäctye' cachtacdye' mọ' judyeya' dajtyetye' mọ' sánacdye'? —yi mu'. 3Mijam jụ'ñity yụ'tac paj qui mu' dajtyetye' mọ' sánacdye', mijam jụ'ñity mạyedye'chety mijam jacchety mijam jacĉantyi' chime', mijam yirity me' yụ'tac in paj qui mu' dajtyetye' in mọ' sánacdye' paj qui p̂eye' in. 4Mọ'dyes där tári yụ ĉaĉaij na jam jụ'ñity mu'ya' me' yụ'tac in paj qui mu'in dajtye' in paj qui p̂eye' in mọ' sánacdye' jätäjyi' chuc mọ'. 5Yirity tashche' bu'yity jin yụ: —Jam ra' tári mi, jesha' mu' Pupujri' bu'yity, mu' Judáĉantyi' ñuru'tyity, mu' nash ayo'bu'yity Davidtyi' vóshi' mu', mu' nash ji'peñe'tyi' Sọyo', mọ'dyes qui mu' tupuj jäctye' cachtacdye' mọ' judyeya' dajtyetye' mọ' sánacdye' —yi jin yụ. 6Chat qui tashche' mọ' bä'yaquis mu'che' cạvete yụ mu' Oveca bu'yity, mu'ya' rụi'cujcuij mu' chidyi'ĉanya' mọ'in vạjpedye'yis tsạ'bu'yis in judyeya' mu'in muntyi' in tashche' bu'yity in. Mu' Oveca bu'yity jorojĉan ijac jiquej mu', yävätidye' dáshu mu' judyeya' chiyävätidye'dye vej mu', mọ' cại' yävätidye' bu'yi' shupquis Jen'si' Ạ'edye' mu', mọ' Jen' jute' paj qui räj bu'yi' ọijche' jac. 7Mu' Oveca bu'yity ĉọcte mu' bä'yaquischety jäctyete mọ' sánacdye' tacvesve un mu'. 8Aty jäctyeteya' mọ' sánacdye', mọ'in vạjpedye' tsạ'bu'yis in judyeya' mu'in pärä' qui'tac vạjpedye' jiyity muntyi' tashche' bu'yity in, räj mu'in vaj cäts dyụtsyi in mu'si'ya' vej in Oveca bu'yitysi'ya'. Cäts jịjcaij me'chui' in vịcdyes mu'in judyeya' piji' oro jẹrejrestumsi' mu'in. Mọ' jẹrejres jeñej bu'yi' cọdacdye' mu'insi' anicjetetysi' Jen' in. 9Mu'in jimeyete in mu' Oveca bu'yity, mụi'sis jimacdye' jimeyete in, yi in: “Mi mọmo' yirity yụ'tactyi', mi mọmo' tupuj jäctye' cachtacdye' judyeya' dajtye' sánacdye' mi, ĉaĉaij na mi ijac muntyidyes jiquej, ĉụi'si'ya' chäsh mi ya'itacsebi mu'insi' juchaj in, judyeya' yụ'tacsi mi paj qui Jen'dyety räj in, yịjyi muntyi' jacchety in, yoc yoc p̂eyacdye' p̂eyaquity in. 10Mi yụ'tacsi paj qui ayo'bu'yi in, judyeya' yụ'tacsi chime' mi paj qui cudyitity bu'yi Jen'che' in, jacche' ra' ayo'bu'yi mu'in in”, yi in. 11Cuvij cạvi yụ, se'vacsebi yụ jimacdye' mu'in shachtyitysi' anjer in, jun'tum ra' mu'in in, anic jiyi dai' millones in. Cọij bu'yi in yóya'dyem' mọ' bä'yaquis o, judyeya' mọ'in tsạ'bu'yis in judyeya' mu'in muntyi' in tashche' bu'yity chime' in. 12Chat qui mu'in anjer dai'tyi' in fer p̂eyaqui in yi in: “Tupuj tsun tima'queja mu' ujactyi' Oveca bu'yity, tupuj ji'jäcbija därsi' ferdye' mu', ĉaĉaij na mu' räj me'chui' jedye', ĉaĉaij na mu' anic dyijyedye'tumtyi'. Där jäm'yity mu', anic fer bu'yity mu', judyeya' mạijquedye'tumtyi', mọ'dyes qui mu'dyem' tima'queja q̂uin'”, yi in. 13Me'ĉandye yụ se'vacsebi tima'cacdye' räj jäm'tacdye' Jen'si' mu', mạyedye'chety in judyeya' jacchety in judyeya' jacĉan bä'yity in, judyeya' marĉansi' chime' in, me' me' se'vacsi yụ. Yi in: “Tsun tima'queja mu' bä'yaquischety judyeya' mu' Oveca bu'yity chime', yoshoropaij jéyacseja', ĉaĉaij na ferdye'tumtyi' in, judyeya' mạijquedye'tumtyi' in, paj jam jụ'ñisĉan mạyedye' mọtsi' tima'cacdye' mu'in”, yi in. 14Mọ'in vạjpedye' tsạ'bu'yis in voryi' vatyquej in: “Paj me'”, yi in. Mu'in na pạ̈rä' qui'tac vạjpedye' jiyity muntyi' in tashche' bu'yity in dyụtsyi in, mu'ya' tima'quete in mu' Jen'.

will be added

X\