Revelation 4

1Aty me'si' quivij jị'cavac-dye'ya' cạve' yụ yiris chụi'dye' vancai' mạyedye'ches. Vatyquej se'vete yụ yirity p̂eyaquity, mu' tashche' se'vetety jiquej yụ, mọ' jeñej yi'si' boñedye', chịmo'dye se'veban' quivij yụ. Yi mu' jin yụ: —Uche' jijtuva', chat qui ra' yụ jị'caveyeye jun' chuc ra' jiyi' yocsi'ĉan mạyedye' —yi mu' jin yụ. 2Me'ĉandye Jen'si' Ạ'edye' mu' tŝútyin yụ, mọ'che'dye nạijbite yụ ayos bä'yaquis mu' mọ' mạyedye'ches, mu'che' cạveteij bä'va'joij. 3Mu' bä'va'joijtyi' bä'yaquische' anic där jäm'si' pashquedye' mu', je'ñei' ya'ijtyis mij in, tịj mu' jaspe judyeya' cornalina, judyeya' je'ñes o'pito' jo'mes cọtoij bu'yi bä'yaquisya' mu', mu'si' pashquedyem' shandyes mu', jeñej bu'yi ya'ijtyi' mij, tịj mu' esmeralda. 4Chime'dye cạvacsi yụ yocsi' bä'yaquis in, ovemun tyei' in ayosya' bä'yaquis mu', pärä' qui'tac vạjpedye' jiyi' in, chichimesdye mu'che' bä'yi in pärä' qui'tac vạjpedye' jiyi' rụi'cu' in tashche' bu'yity in. Cäts jụi'bubutyĉantyi' quị'si' in judyeya' ĉässis mu'in oro. 5Chime'dye ayosya' bä'yaquis shupqui' venai'quedye' pururus mu', judyeya' täräjnacdye' fersi'. Mọ'ya' chime' yävätidye' furqueva'joi'si' in, tashche' bu'yi' bä'yaquisya' ayos mu', mọ' cại' jeñej yävätidye' bu'yi' shupquis Jen'si' Ạ'edye' mu'. 6Chime'dye mọ'ya' tashche' bu'yi' bä'yaquis ayosya' mu' yiris jedye' choñemsi', jeñej därsi' ojñi', me' pashqui'. C̣hẹi'ya' bu'yi' mọ' bä'yaquis mu', mọ'ya' vạjpedye' tsạ'si' jäm'tacdye' Jen'si' mu', dai'mun vej mọ'in tashchem' judyeya' jäqui'vem'. 7Mọ' tashche' tsạ'bu'yis je'ñes mọ' pupujri'. Mọ' pärä'yis tsạ'bu'yis je'ñes mọ' vaca, mọ' chibinyis tsạ'bu'yis je'ñes mọ' muntyi', jo'mes mọ' vejya', mọ' na vạjpedye'yis tsạ'bu'yis je'ñes mọ' nạijtyi' boñij. 8Mọ'in tsạ'bu'yis in cäts jäbän pavaj me'chui' in, judyeya' räj bu'yi' me'chui' vej mọ'in. Räjĉan tima'quete Jen' in, jam dam' jị'jutyiti' in, mạij judyeya' tsedyedye' me' tima'quete in. Yi' in: “Anic rụijtyity mu', där tsäqui' bu'yity judyeya' jäm'yity mu' muju'cha' ferdye'tumtyi' Jen' Ayo' tsun, mijam jụ'ñiij mu', mu' tạ'caty, mu' mu'yaty q̂uin', mu'dye ram' yejĉoijtyi'”, yi in. 9Me' mọ'in tsạ'bu'yis in tima'quete in judyeya' yoshoropaij jéte in mu' bä'yaquischety, mu' jam jun' mọtsity. Tima'cacdye'ĉan mọ'in ji'jäcbite in ferdye' mu' judyeya' irijyedye' mu' chime'. 10Jäm'dyeya' tima'queteya' in, mu'in pạ̈rä' qui'tac vạjpedye' jiyity muntyi' in tashche' bu'yity in, dyụtsyi in mu'si'ya' vej mu' bä'yaquischetyya', mu' räjĉan bu'yity, mu' tima'quete in judyeya' ĉụi'si' ĉästacdye' so'mete in. Tima'cacdye'tum yi jéte in: 11“Tsuntyi' Jen', mi nash Ayo' tsun, tupuj tsun mim' tima'queyac, judyeya' yoshoropaij jéyac tsun, judyeya' ji'jäcbiyac därsi' ferdye' mi, mọ'mun tima'quebiyac tsun, ĉaĉaij na mi jäm'tyety ọij jac, räjtumdye jedye' mọ', ĉụi'si'ya' dyijyedye' mi jäm'tye' mi judyeya' räj tsạ'chucsi chime' mi”, yi in.

will be added

X\