Revelation 3

1—Sáñeva' anjerdyes, mu' ĉọjcacsity mu'in ñuru'tyity yụ́tyi' in Sardisĉan bä'yity in, jéme ọij p̂eyacdye' mu'indyes in: “Yi mu' me'chuptety mọ' yävätidye' bu'yi' shupquis Jen'si' Ạ'edye' mu', judyeya' chiyäväti-dye'dye ọ́rota' in me'chucsity, yi mu' jínac: yụ nash chị́yeyac jun' chuc bä'yi mi'in, jeñej tsạ'tyi' yụ́dyes ĉúnac in, jam na me' mi'in, säñi bu'yi qui nam' yụ́dyes mi'in, me' bä'yi mi'in. 2Tsạ'ebaj-sham' mi'in yụ́dyesi' feryebadac mi'in chime' an'dyem' tsạ' taca' mi'in, ĉaĉaij na yụ cạveyac jam rụij bä'yi mi'in Jen'si'ya' vej mu'. 3Dyijtubadac ji'chäyitidye' mọ' se'vetiñes jiquej mi'in, dyijyebadac juchajche' chime' mi'in, chiquebadac ji'chäyitidye'. Tsạ'bu'jam', jam jụijya' me' mi'in, vatyquej ra' mọmo' atsij yụ jeñej yirity shushu'aty, mi'inche' ra' tŝọij yụ va'tacdye'tum yụ, jam ra' méqui' chị́va'joij mi'in. 4Pạrej na mi'inya' in jam jeñej bu'yi ọctum yụ'taqui quị'si' mu'in a'c̣hisya' dyijyedye' mu'in, me' bu'yi in, mu'in me' bä'yity in mu'in ra' pen'dyetun yụ in jai'batyĉantyi' quị'si' in, ĉaĉaij na mu'in rụijtyity in. 5Tyi chuc ji'peñe'tyi' a'c̣his dyijyedye' in, mu'in ra' so'mac jai'baty quị'si' in, mu'insi' ra' tịj mu'in jam jun' shac mu'in, mọ' sánacsi' Jen'si'che' quirca mu', mọ' ji'jäcacsi' mu'in mu'ya' ra' bä'yity in. Yụ ra' ji'jäcacsebi tịj mu'in mu'si'ya' vej mu' Jen'si'ya' yụ, judyeya' anjersi'ya' vej chime' mu'in. 6Tyi chuc chuntumtyi' in paj jäm' se've' in ọij p̂eyacdye' mọ' Jen'si' Ạ'edye' mu', jéyacsis mu'in ñuru'tyity yụ́ya' in.” 7—Sáñeva' anjerdyes, mu' ĉọjcacsity mu'in ñuru'tyity yụ́ya' in Filadelfiaĉantyi' in, jéme ọij p̂eyacdye' mu'indyes in: “Yi mu' Rụijtyity jị'cätsaquity p̂eyacdye' mu', mu' ra' ferdye'tum bu'yi ayo'bu'yi, yojdyem' mu' Davidvun ayo'bu'yi jiquej u. Mijam ra' tyi tupuj ñutsjepte dyijyedye' mu', vanchui' jụijya', mijam ra' jụ'ñity tupuj ĉär'teban' chime', ĉär'je' na jụijya' mijam ra' jụ'ñity vanacteban' in mọ'. 8Yi jínac: Yụ nash chị́yeyac jun' chuc bä'yi mi'in, chime'dye chị́yebiyac dyijyedye' dam' mọmo' ferdye' mọ'ya' mi'in. Me' tsan' me' mi'in, mi'in qui nam' cäc̣hä'chubutiĉa' p̂eyacdye' yụs mi'in, mijam méqui' va'quicdyiĉa' yụ mi'in. Yụ nash vanacjeyeyactyi' chụi'dye', jam jụ'ñity tupuj ĉär'ban' mọ'. 9Jesha', pạrej ferche' ñutsjinac in, me' tsan' judío na'i in, jam qui nam' anictyity judío shupqui in, Satanástyi' shupqui in. Yụ qui na ram' yi paj qui mu'in ĉucnac in paj qui mi'insi'ya' vej dyụtsyi in, mọ'ya' ra' chịj in jun' chuc yụ fer mạ'jeyac mi'in. 10Mi'in chäquibutiĉa' yụs p̂eyacdye' mi'in, mọ' nash jéyac paj qui tyum'chutidye'tum bä'yi mi'in, mọ'dyes yụ ra' ñutschuyac mi'in paj qui jam jị'ĉojtiñe' mọ' därsi' ñịbedyes, ọ́che' ra' mọ' tŝọi', mọ' ra' jị'ĉojtacsi' räj jacchety muntyi' in. 11Cavintum ra' atsijban yụ, mọ'dyes yejĉojam' cäc̣hä'chuvac mọ' p̂eyacdye' yụ aty me'chutiñes q̂uin' mi'in, paj qui jam jụ'ñity väñädye'ya' se' ja'yinac mi'in, me' jụijya' mi'in, itŝi' ra' bijodye' mi'in. 12Tyi chuc ji'peñe'tyi' a'c̣his dyijyedye' in, yụ ra' yụ'tacsi paj qui p̂otso'vi bu'yi in Jen'si'ĉan aca' mu', mijam ra' jun' shuban in. Mu'inche' ra' in yụ ra' tịj sánaqui Jen'si' yụ, judyeya' tịj bä'yedyes mu', mọ' mụi'sis Jerusalén, mạyedye'che' ram' jijtui'. Chime'dye yụ ra' sáñe' mu'inche' in mụi'sis tịj yụ. 13Tyi chuc chuntumtyi' in paj jäm' se've' in ọij p̂eyacdye' Jen'si' Ạ'edye' mu', jéyacsis mu'in ñuru'tyity yụ́tyi' in.” 14—Sáñeva' anjerdyes, mu' ĉọjcacsity mu'in ñuru'tyity yụ́tyi' in Laodiceaĉan bä'yity in, jéme ọij p̂eyacdye' mu'indyes in: “Yi mu' rụij jị'chiqueyacsity, mu' jị'cätse'tyi' p̂eyacdye', yódyetytum-dyem' jiquej u mu' Jen' räj jäm'tacsi jedye' in. Yi mu' jínac: 15- 16Yụ chị́yeyac jun' chuc bä'yi mi'in. Jesha' mi'in jeñej bu'yi jushu'shui'si' jam tsịvujyis mijam japacsi', mọ'dyes yụ ra' mọ'jeyac jeñejjeyac ojñi', ĉaĉaij na me' tsan' jam yiristum yacchutiĉa' yụ mi'in, jam qui nam' fer dyijtutiĉa' yụ mi'in. Dam'dye jäm' yiristum yacchutiĉa' yụ mi'in. 17Ĉụi' va'bunyi yi mi'in: Yụ nash jedye'tumtyi', räj jäm' yụ́dyes shupqui', jam yiris jedye' jayej yụ, yi mi'in. Mijam qui nam' chäyiti ĉụi' mi'in jun' chuc bä'yi mi'in, där ñịbe' cạvetiñe' mi'in, där ñịbe' mi'in, räj jedye' jayej mi'in, anic tofej bä'yi mi'in judyeya' anic chime' cädäj bä'yi mi'in, mijam chäyiti ĉụi' mi'in. 18Mọ'dyes yụ jéyac mi'in: ya'iyejam' cavin yụ́ya' anictyity oro pị́shety, me' ra' chat jedye'tum shupqui mi'in. Chime'dye ya'iyejam' jai'baty quị'si' paj qui mu'ĉan cäti mi'in paj qui jam tsị́cadye'tum cädäj bä'yi mi'in. Ya'iyejam' chime' pịñidye' tom'tacdyes vej mi'in, paj qui naijbunve Jen'dyes mi'in. 19Yụ nash fạra'jeĉúnacsi a'c̣hisya' dyijyedye' judyeya' va'tacdye'ya' jị'chiyacsi yụ yósi'dyem' mu'in mạ'jeyacsity u yụ.235 Mọ'dyes dyijyevac juchajche' mi'in judyeya' cäc̣hä'chutiĉam' yụ fer dyijtutiĉam'. 20Jesha', yụ nash fayeyac chụi'dye'ya' mi'in. Jụ'ñity chuc se'vibun fayacdye' jụijya' yụ, judyeya' vanacjiyin chụi'dye' jụijya' yụ, yụ ra' siste mu' judyeya' jebetyete yụ, judyeya' ra' mu' jibityin yụ. 21Tyi chuc ji'peñe'tyi' a'c̣his dyijyedye' in, yụ ra' yụ'tacsi paj qui pen'dyetun yụ in judyeya' ayo'bu'yi yụ́tum in, yojdyem' yụ u ji'peñe' yụ räj a'c̣his dyijyedye' judyeya' pen'dyetun yụ mu' Jen' yụ, ayo'bu'yi mu'tum yụ. 22Tyi chuc chuntumtyi' in paj jäm' se've' in ọij p̂eyacdye' mọ' Jen'si' Ạ'edye' mu' jéyacsis mu'in ñuru'tyity yụ́tyi' in.”

will be added

X\