Revelation 21

1Cạve' yụ mạyedye'ches jedye' mụi'sis judyeya' mụi'sis jac, mọ' na tashches mạyedye'ches judyeya' jac aty mọ' räj mọtsi' in, chịmotsi'dye mọ' mar. 2Yụ cạvepte Jen'si' bä'yedye' mu' mọ' nash mụi'sis Jerusalén, mạyedye'che' jijtui', Jen'yas ayij mọ'. Jeñej yiris p̂en vämis ra' jä'mii'tyi' vämedyedyes mọ', me' bu'yi'dye mọ' bä'yedye' yụ'tac. 3Se've' yụ fersi' mạyedye'ches p̂eyacdye' bä'yaquisches, yi': —̣Q̂uin' mu' Jen' aty jajbu'yacsi muntyi' in. Mu' ra' jajbu'yacsi, ĉụi'tyi' ra' muntyi' shupqui mu'. Jen'dye ra' pen'dyetucsi, mu'dye ra' Jen' mu'in. 4Jen' ra' ji'tätsacsebi táris mu'in, jadyic ra' sän'dye' mu'in, jadyic ra' táredye' mu'in judyeya' vátedye' chime' mu'in, aty ra' jam jị'ĉojtyeban' quivij are'redye' in, räj mọ' tashches jị'ĉojtye'si' jiquej in, räj ra' mọ'in jị'motsac in —yi' mọ' p̂eyacdye'. 5Ayosche' bä'yaquis bä'yity yi p̂eyaqui: —Yụ ra' tas yụ'ban' mụi'sis. Chime'dye yi mu' jin yụ: —Sáñeva' ọij jäm' se'ves p̂eyacdye' mi, mọ' anicsis, anic ra' cạ̈tsi' mọ'. 6Chime'dye yi jin yụ: —A to' o tas cạ̈tsi', yụ nash Tashchety judyeya' Jäquity. Tyi chuc jajrity in yụ ra' fibi'ya' ji'tyecsi tsạ'chucsisya' ojñi', mọ' jijmo'moĉan shupquis. 7Tyi chuc ji'peñe'tyi' a'c̣his dyijyedye' in, mu'indyes ra' räj jị'cätse' yụ ọij q̂uin' p̂eyes yụ, räj ra' so'macsi yụ. Yụ ra' Jen' mu'in, mu'in qui ra' ạva' yụ in, me' bu'yi ra' shupqui in. 8Yoctyi' na jam ra' me' in, mu'in ra' va'cac tŝijĉan in, tyijtyi chuc quiquijnaquity in, jam anicjetety Jen' in, judyeya' ac̣hi'yity in, judyeya' ijacsity in, judyeya' vo'voijtyi' in, judyeya' cọcojsi'naquity in, judyeya' jäm'tacdye' jen'tui'tyi' in, judyeya' räj mu'in väväjñity in, räj ra' mu'in me'tyity in va'cac ra' tŝijĉan in, yóĉandyem' co'shai'ĉan asufretumsi' o. Mọ' nash pärä'yis sän'dye' jadyiquis —yi jin yụ. 9Atsij yirity yävätidye'yity anjer, mu'in cại'tyi' piji' jiquej in, mọ' me'chui'si' in jadyiquis yävätidye'yis va'tacdye' in. Mu' anjer ĉúquin yụ chat qui jin yụ: —Atsiva, yụ ra' jị'caveyeye mọ' p̂en vämis ra' Oveca bu'yityche'. 10Jen'si' qui Ạ'edye' mu' tŝútyin yụ, mu' qui anjer därtyi'che' mụcu' can yụ, jumijĉan yu'tyin yụ. Ji'caviyin yụ mọ' jäm'si' bä'yedye' Jen'si' mu' Jerusalén, mọ' mạyedye'che' jijtui'si', Jen'ya' jijtui'si'. 11Anic pashqui' mọ' ji'caviti', Jen'si'tum pashquedye'. Anic där jäm'si' pashquedyem', jeñej ya'ijtyi' mij, tịj mu' jaspe, me' bu'yi' choñemquedyem'. 12Cọtoij bu'yi' mọ' bä'yedye' anic därsi' na'rum', moche' tyei' mọ'. Chụi'dye' nam' yiri'tac pärä' jiyi' mọ'. Cäts yirity jịjcaij anjer ĉọjcabi' chụi'dye' in, judyeya' chime' chụi'dye'che' tịj sánac mu'in, cäts yiri'tac pạ̈rä' jiyi mu'in ñuru'tyity in Israeltyi' vóshi' in. 13Pam've chibin bu'yi' chụi'dye' in, sitiche' tsun chichibindye mọ'che', jätisve chichibindye mọ've, rocve chichibindye mọ've chụi'dye' in, me' bu'yacñi' chụi'dye' mọ', mọ' bä'yedyes. 14Na'ru mọ' därtyi'che' mij ji'tac, yiri'tac pärä' jiyi mij tibu' in anic chäcdacñity in. Cäts yirity mij jịjcai' mu'che' sánac tịj mu'in yiri'tac pạ̈rä' jiyity jutactyi' mu' Oveca bu'yitytyi'. 15Mu' anjer p̂eyaquity yụ́tum mu' me'chui' yiris tuputuquis oro, je'ñes shuru' jo'mei', mọ'ya' ra' mu' tuputui' mọ' bä'yedye', fajve na'ru judyeya' chụi'dye' mọ', me' me' ra' tuputucsi. 16Me'sisij shupqui' tupuj mọ', därvedye' mọ' judyeya' moc̣hadyem' vaj cäts shupquim', pärä' mir pärä' qui' cien quirometro, me'qui'ya'mun moc̣hadyem' judyeya' därvedyem', chichime'qui'dye mochedyem' bä'yedyes. 17Na'rumun chime' tuputubi', jäbän qui'tac ĉanam' jiyi metro, me'qui'che' mochedyem'. Yódyesdyem' muntyis tuputuquis u tsun, jo'mesya' tuputui' mu' anjer mọ' bä'yedye'. 18Na'ru mọ' yedyej ya'ijtyi' mij, tịj mu' jaspe, me' bu'yi' jäm'tac, mọ' na bä'yedye' yedyej oro jäm'tac, chuñemtyi' anic pishyity oro in. 19Yóche'dyem' yútyi'che' o, mọ' jäm' yụ'tac jäjämuntyi'ya' mij in ya'ijtyi' in. Mu' tashchety shásha mọ' jaspe tịj mu', pärä'yity na shásha mọ' zafiro tịj mu', chibinyity na shásha mọ' ágata mus tịj, vạjpedye'yity na shásha mọ' esmeralda tịj mu'. 20Ĉanam'yity na shásha mọ' ónice mus tịj, jäbänyity na shásha mọ' cornalina tịj mu', yävätidye'yity na shásha mọ' crisólito tịj mu', mu' na q̂uenĉanyity shásha mọ' berilo tịj mu', arajtacyity sháshatuctyi' topacio tịj mu', yiri'tacyity na shásha mọ' crisoprasa tịj mu', yiri'tac yịris jiyity na shásha mọ' jacinto tịj mu', judyeya' mu' jadyiquity yiri'tac pạ̈rä' jiyity shásha mọ' amatista tịj mu', jo'memetyya' jäjämuntyi'ya' mij in jäm' yụ'tac yóche'dyem' tyei'che' na'ru o. 21Mọ'in na chụi'dye' bä'yedyes in yedyej jäjämuntyi' mij in tịj mu' perla, me' me' jäm'tac in, yirity perla cäts yiris chụi'dye' jäm'tac. Tashches caye bä'yedyes oro jäm'tac mọ', anic chuñemtyi' mu' oro in. 22Mijam méqui' dạque' yụ mọ'che' Jen'si' acam', ĉaĉaij na mu'che' mu' ferdye'tumtyi' Jen' Ayo' tsun judyeya' mu' Oveca bu'yity, mu'indyem' mu'che' aca' bu'yi in jimacdyes. 23Mọ'ches bä'yedye' jam jemoñe' mạijquedye' tsunsim' mijam ịvas, ĉụi'sim' mạijquedye' Jen'sim', mọ' mạij bu'yi' mọ'che', judyeya' mu' Oveca bu'yity mạij bu'yi mu'che' chime'. 24Mọ'si' qui ra' mạijquedyem' räj mạijchucsi' jacchety muntyi' in. Jacchety ayo' in ĉọ́que' ra' in mọ' bä'yedye' jiquique' ra' in jedye' chuc ĉụi'si' mu'in ya'i'si' mu'in. 25Mọ'si' bä'yedyes chụi'dye' mọ' vavancaca' ra' yụ'tac in, räjĉan ra' me' bu'yi' mọ', mọ'che' itŝi' tsedyedye'. 26Jacchety muntyi' in ĉọ́que' ra' in mọ' bä'yedye', jiquique' ra' in dai' ya'i'si' jedye' mu'in. 27Mọ' qui na ram' a'c̣his jedye' jam jun'yi' siti' mọ'che'. Tyi chuc a'c̣histum tsị́cadye' bä'yi in mu'in ra' jam jun' cạ̈nä'vaqui in mijam väväjñity chime' in. Mu'in ram' sánactyi' tịj quircache' in Oveca bu'yitysi'che' mu', mọ' ji'jäcacsis mu'in Jen'ya' ra' bä'yity in, mu'in ram' siti mu'ĉan in.

will be added

X\